Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

27 shtator 1993

Letra e Adem Demaçit u botua si dokument në selinë e OKB-së

Një letër e Këshillit për Mbrojtjen e të Drejtave dhe të Lirive të Njeriut në Prishtinë, e nënshkruar nga Adem Demaçi, kryetar dhe Zenun Çelaj, sekretar, u botua si dokument në selinë e Organizatës së Kombeve të Bashkuara në Nju-Jork. Këtë letër, Thanas Shkurti, përfaqësues i Shqipërisë në OKB, ia dërgoi për shqyrtim Asamblesë së Përgjithshme të OKB-së. Në letër, siç njofton agjencia serbe “Tanjug”, vërtetohet se në Kosovë, “prej fundit të korrikut të këtij viti, janë arrestuar 43 shqiptarë, prej tyre 23 në Prishtinë, 10 në Prizren, 5 në Gjilan dhe 5 në komunat tjera. Në letër ipen edhe emrat e të arrestuarve. Shumica prej tyre iu kanë nënshtruar keqtrajtimit brutal dhe janë trajtuar si terroristë, edhe pse për këtë nuk ka fakte. Regjimi serb në Kosovë dëshiron të krijojë përshtypje në opinionin e vendit dhe atë të huaj se si shqiptarët janë ata të cilët dëshirojnë të zgjidhin çështjen e Kosovës me luftë”, citon agjencia serbe pjesë nga kjo letër.

Sipas këtij raporti nga Nju-Jorku, në dokumentin e publikuar në selinë e Kombeve të Bashkuara, thuhet se 14 shqiptarë u vranë ose vdiqën nga torturat e policisë serbe në nëntë muajt e parë të këtij viti. Ipen edhe emrat e të vrarëve.

Sipas agjencisë serbe, në listën e emrave të të vrarëve, janë futur, siç thuhet, “pa dyshim edhe terroristët, të cilët u vranë me rastin e sulmeve të tyre në polici”.

27 shtator 1994

Vili Klas u emërua sekretar i përgjithshëm i NATO-s

Pas konsultimeve në të gjitha nivelet ambasadorët e 16 vendeve anëtare të Aleancës së Atlantikut Verior, i shkruan dje ministrit belg për Punë të Jashtme z.Vili Klas dhe e njoftuan se është emëruar sekretar i përgjithshëm i NATO-s, njofton zëdhënësi i Aleancës nga selia në Bruksel.

Nga Nju-Jorku, ku e përfaqësonte Belgjikën në Asamblenë e Përgjithshme të OKB-së, Vili Klas iu përgjigj pozitivisht letrës së ambasadorëve dhe kështu u bë sekretari i tetë i përgjithshëm i Aleancës së Atlantikut Verior. Tridhjetë e shtatë vjet pas z.Pol-Henri Spak, z.Klas është belgu i dytë që emërohet në këtë post të rëndësishëm.

Me këtë rast Vili Klas u deklaroi gazetarëve “do të më ishte vështirë të pranoja këtë post, sikur të mos kishte rënë Muri i Berlinit”.

Të gjitha masmediumet belge dhe evropiane njoftojnë sot për emërimin e Vili Klasit, sekretar i përgjithshëm i NHATO-s, duke vënë në pah meritat e tij si politikan dhe diplomat i shquar, veçanërisht i theksojnë rezultatet e arritura gjatë udhëheqjes gjashtëmujore të presidencës së Unionit Evropian.

Pasardhësin në funksionin e të ndjerit Mnafred Verner, e pret punë e madhe, sidomos konflikti në Bosnjë-Hercegovinë, situata e tendosur në Ballkan, si dhe organizimi i mëtutjeshëm i Partneritetit për Paqe në Evropën Lindore, theksojnë komentatorët e shtypit dhe radiotelevizionit belg.

Vili Klas është në moshën pesëdhjetë e gjashtë vjeçare dhe ka kryer shkencat politike e diplomatike në Universitetin ULB. Që nga mosha rinore është anëtar i Partisë Socialiste Flamane dhe deri më sot ka kryer shumë funksione me rëndësi partiake dhe shtetërore në Belgjikë.

Mr.Ukshin Hoti u dënua me 5 vjet burg

Mr.Ukshin Hoti, kryetar i Partisë së Unitetit Kombëtar (UNIKOMB) dhe mësimdhënës në Universitetin e Prishtinës, u dënua sot me pesë vjet burg nga serbët e instaluar në gjykatën e qarkut në Prizren.

Mr.Ukshin Hoti është arrestuar më 16 maj të këtij viti. Ai është akuzuar për vepër penale “cenim i tërësisë territoriale të Republikës Federative të Jugosllavisë, sipas nenit 116”. Në seancën e djeshme nuk u argumentua aktakuza.

Koha e shkurtër, sa zgjati procesi, është edhe një dëshmi se ky ishte një proces i montuar politik, i planifikuar dhe që kishte për qëllim shqiptimin e këtij dënimi të rëndë për një kryetar partie legale shqiptare në Kosovë.

Siç dihet, mr.Ukshin Hoti është dënuar me 9 vjet burg në vitin 1982.

Vitin e kaluar është dënuar me 2 muaj burg për shkak të pjesëmarrjes në homazhin për viktimat e policisë serbe.

Ai është torturuar disa herë, duke përfshirë edhe torturat në vendet publike.

Prej të premtes së kaluar, UNIKOMB-i dhe shumë përfaqësues të tjerë të partive politike shqiptare, asociacioneve dhe institucioneve të Kosovës, kanë marrë pjesë në mbrëmjet protestuese kundër burgosjes dhe procesit të montuar politik ndaj mr.Ukshin Hotit.

27 shtator 1997

Ndërhyrje brutale e policisë kundër shumë qyetarëve shqiptarë në korzon e Mitrovicës

Mbrëmë në kohën kur studentët dhe qytetarët shetitnin nëpër korzon e qytetit të Mitrovicës, në shenjë provokimi parakaluan shumë vetura të policisë, pastaj agjentë civil të SPB-së, dhe autoblinda. Ata veturat e tyre i vozitnin nëpër trotuare ku shetisnin njerëzit dhe me to i ndiqnin. Me këtë rast policia arrestoi dhe keqtrajtoi fizikisht shumë profesorë, studentë, nxënës dhe qytetarë. Prej të arrestuarve më së keqi e pësoi profesori i gjimnazit “Frang Bardhi” Xhelal Tahiri, i cili u mbajt në lokalet e SPB-së mbi dy orë dhe rrahën me grushta dhe shqelma deri në alivanosje policët Arsiqi, Nenadi dhe Bubani. Pasi e liruan, Xhelali kërkoi ndihmën e mjekut i cili kishte konstatuar lëndimin e boshtin kurrizor dhe veshkët. Në polici u keqtrajtuan fizikisht edhe Ilaz Rexha, profesor i Shkollës së Mesme Ekonomike, Sylë Baliu arsimtar i shkollës fillore “Migjeni”, Nazmi Broboniqi, Hajriz (Rrustem) Bajraktari, qytetar, Gani Bajraktari, mjek, Avdi Shala, profesor i SHLT, Skender Hoti, profesor i FXM në Mitrovicë, Sami Sadiku, Xhevat Syla, Pleurat Dedinja, Lavdim Meholli, Sadete Hyseni dhe Agron Sokoli, studentë të SHLT në Mitrovicë, Ali Jaha, profesor i SHLT, Luan Murati, student në Prizren.

Njoftohet se policia ka legjitimuar në shtetitore edhe shumë qytetarë të tjerë, në mesin e të cilëve edhe: Muhamet Hajrizi, profesor i SHLT dhe nënkryetar i KMDLNJ-së në Mitrovicë, Brahim Bala, drejtor i shkollës së mesme ekonomike “Hasan Prishtina” dhe Ramadan Ademi profesor i kësaj shkolle dhe kryetar i nëndegës së “7 Shtatorit” të LDK-së.

Për të penguar shetinë e qytetarëve në orët e mbrëmjes, organet e dhunshme serbe të Mitrovicës kanë ndërprerë ndriçimin publik që nga 24 shtatori.

27 shtator 1998

Sulm masiv serb në trekëndshin mes Shtimjes, Ferizajit dhe Suharekës

Prishtinë, 27 shtator (QIK)- Forcat serbe kanë ndërmarrë prej mbrëmë një sulm masiv kundër disa fshatrave që gjenden në trekëndshën Shtimje-Ferizaj-Suharekë. Po granatohen fshatrat Topillë, Devetak e Llanishtë të Shtimjes, Jezerc dhe Nerodime e Epërme në Ferizaj dhe Vraniq, Budakovë, Krushicë, Papaz, Savrovë, Buzhalë, Bukosh, Dubravë, Maqitevë, Stravoqinë dhe Reçan të Suharekës. Deri më tash ka njoftime për shumë shtëpi të granatuara e të djegura, por nuk ka njoftime për të vrarë e të plagosur.

Shtimje: Burimet e LDK-së në Shtimje njoftuan se në mbrëmje ka filluar granbatimi i fshatit Jezerc të Ferizajit. Mbrëmë kanë kaluar nëpër Shtimje 42 tanke e 57 kamionë me policë e ushtarë, ndërsa sot kanë shkuar edhe 11 kamionë të tjerë me ushtarë e policë. Këto forca serbe janë vendosur te Podi i Gështenjave dhe kanë filluar granatimin e fshatit Jerzerc të Ferizajit dhe fshatrat Topillë, Devetak e Llanishtë.

Ferizaj: Komisioni për Informim i Degës së LDK-së njofton se në orën 7.30 në drejtim të fshatit Pleshinë kanë shkuar forca të mëdha ushtarake serbe me tanke e kamionë, të cilat rreth orës 8.40 u stacionuan në udhëkryqin e fshatit Zaskok. Në drejtim të Pleshinës forca policore serbe shkuan edhe në orën 9.50.

Njoftohet se forcat serbe janë duke granatuar fshatin Jezerc, ndërsa granatimet janë aq të forta sa dëgjohen edhe deri në Ferizaj. Bëhet e ditur se në flakë është edhe fshati Nerodime e Epërme.

Forca ushtarako-policore serbe janë stacionuar edhe në fshatin Dremjak dhe ato janë të pajisura me teknikë të rëndë luftarake dhe me raketa të tipit “kaçusha”. Ndërsa në udhëkryqin e fshatrave Pleshinë e Dremjak forcat serbe ndalojnë dhe kontrollojnë të gjithë kalimtarët. Forca të mëdha ka edhe përgjatë rrugës Ferizaj-Shtime, si dhe në lagjen e Shabanajve në fshatin Gaçkë.

Njoftohet se në Dremjak policia ndaloi Bashkim Murtezin dhe i arrestoi dy bashkudhëtarët e tij Bafti dhe Nuhi Mujotën, nga Mollopolci, të cilët u dërguan në qendrën e sigurimit serb në Ferizaj, ndërsa Bashkimi u urdhërua që të kthehet në fshat dhe të thërrasë kryetarin e aktivit të LDK-së në fshat Rexhep Behlulin.

Ndërsa, në Gaçkë ushtarët serbë ndaluan Muharrem Bekteshin (52), Muhamet Sadikun (50) dhe Hamdi Nezirin (30) të gjithë nga Gaçka, të cilët më vonë u liruan. Sipas deklaratës së Hamdiut, një epror serb i ka thënë se rruga për “Bashdarhane”, dalja për në Brezovicë, është e mbyllur për civilë deri të martën. Eprori serb gjithashtu është kërcënuar se “nëse dikush shtie mbi ne, do t’iu çfarosim me gra e fëmijë”!

Njoftohet se sot në orën 9.45 policia serbe bastisi shtëpinë dhe dyqanin e Ali Shabanit, me ç’rast demoloi e plaçkiti gjithë çka gjeti, duke përfshirë edhe një veturë të tipit “mercedes”. Pas bastisjes, policia mori në arrest Ali, Hysen, Frashër e Xhemajl Shabanin, të cilët edhe i rrahu në prani të anëtarëve të familjes.

Suharekë: Forcat filluan rreth mesditës të granatojnë edhe në fshatin Vraniq të Suharekës. Sipas një dëshmitari, në këtë fshat ranë tri granata serbe.

Pas sulmit që nisi sot në mëngjes kundër fshatrave Budakovë, Krushicë, Papaz, Savrovë, Buzhalë, Bukosh, Dubravë, Maqitevë, Stravoqinë dhe Reçan të kësaj komune, shumë banorë u detyruan të largohen nga shtëpitë e tyre. Nën qiellin e hapur në një luginë janë 10 deri në 15 mijë banorë. Ata janë janë të rrezikuar nga sulmet e mundshme të forcave serbe.

Fshatrat Reqan, Savrovë e Bukosh po digjen nga këmbësoria serbe.

Deri tash nuk ka njoftime për pasojat e këtij sulmi, pos që dihet për disa të plagosur.

Gllogoc: U identifikuan edhe 24 viktima të terrorit serb

Burimet e Nënkëshillit për Mbrojtjen e të Drejtave dhe Lirive të Njeriut në Gllogoc bënë sot të ditur se në disa fshatra të kësaj komune u gjetën edhe 24 shqiptarë të vrarë (4 prej tyre edhe të masakruar) nga forcat serbe gjatë ofensivës së fundit.

Deri më tani janë identifikuar: Bajram Beqir Krasniqi e Behram Hazir Morina nga fshati Gllobar; Behxhet Islam Karagja, Rrustem Fetah Karagja (u gjet i masakruar në bunar) e Skënder Fetah Karagja nga Çikatova e Vjetër; Shyqri Hajdin Krasniqi, Muhamet Krasniqi, Bashkim Avdullah Krasniqi, Myftar Shaban Kurrumeli, Xhevat Sheqir Berisha, Hafize Jetullah Llugani (e sëmurë mentale), Hamit Lladrofci, Fehmi Lladrovci dhe Xhevahire Krasniqi – Lladrovci (bashkëshorte e Fehmiut), të gjithë nga fshati Gllanasellë; Brahim Ajet Avdulli (i masakruar në fytyrë), Hajdar Ismaili, Selim Myftari e Hamit Zymberi, nga Likoshani; Bahtie Gashi nga Vërbovci e Sefer Tafaleci (i therrur me thikë) nga Vërbovci; Mehmet Azem Saliuku e dr. Lec Bislim Uka (i masakruar) nga Gradica dhe Hajzer Hajdari nga Abria e Epërme dhe një dhëndërr i tij, nga Komorani.

Njoftohet se të gjithë këta të vrarë janë gjetur në fshatrat lindore të Gllogocit, deri në malin e Çiçavicës. Në pjesët tjera të komunës, si në fshatrat Dobroshec, Poklek i Vjetër, Polluzhë, Abri, Baincë, Tërdefc, Vuçak, Negroc e të tjerë, po vazhdojnë pa ndërprerë sulmet e forcave serbe. Deri tash në këto fshatra nuk ka arritur të depërtojë askush. Druhet se numri i viktimave të ofensivës serbe në këto fshatra është shumë i madh.

Shumë të vrarë, të paidentifikuar, në malet e Çiçavicës

Në malet e Çiçavicës kanë mbetur shumë shqiptarë të vrarë, por numri i saktë dhe identiteti i tyre nuk dihet, për shkak se ata janë nga komuna të tjera.

Komisioni për Informim i Degës së LDK-së në Vushtrri, duke iu referuar njoftimeve të veprimtarëve të saj në fshatin Zhilivodë, bën të ditur se shumica e të vrarëve janë të rinjë.

Deri tani është bërë vetëm identifikimi i dy viktimave: Haxhi Ahmet Krasniqit nga Zhilivoda dhe nëna e Sabri Saraçit nga Bivolaku, të dy të masakruar.

Po ky burim bën të ditur se në xhaminë e Zhilivodës policia serbe ka dërguar 12 pleq, të cilët janë në gjendje të rëndë shëndetësore. Askush nuk mund të kujdeset për ta, pasi fshati është boshatisur plotësisht, për shkak të sulmeve të forcave serbe.

Një delegacion i Kryesisë së Degës së LDK-së në Vushtrri vizitoi sot disa nga fshatrat e kësaj komune të përfshira në ofensivën e ditëve të fundit të forcave ushtarake e policore serbe, për të konstatuar pasojat e saj.

Sipas të dhënave të deritashme, në Okrashticë janë djegur 85 shtëpi, në Balincë 18, kurse në Oshlan 67. Në këto fshatra pothuaj nuk ka shtëpi që nuk është shkatërruar apo dëmtuar nga granatimet.

Deri tash dihet edhe për djegien e objekteve të shkollave në Pantinë dhe në Bivolak, kurse shkolla e Oshlanit është dëmtuar shumë nga granatat.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

26 shtator 1994

Mbrëmje protestuese kundër procesit të montuar kundër Ukshin Hotit

Mbrëmë në Shoqatën e Shkrimtarëve të Kosovës u mbajt mbrëmja e tretë protestuese kundër burgosjes së mr. Ukshin Hotit, mësimdhënës në UP dhe kryetar i Partisë së Unitetit Kombëtar (UNIKOMB).

Në mbrëmjen e tretë folën akademik Rexhep Qosja, dr. Agim Vinca, Idriz Kakrruki, Zeqir Gërvalla, Hydajet Hyseni, Gani Xhafolli, Milaim Kadriu, Qerim Pllana, Bajram Kosumi, Milaim Berisha, Halil Koliqi, dr. Haki Kosumi e Rexhep Avdullahu.

Akademik Rexhep Qosja tha mes tjerash se të dënuarit e djeshëm e të sotëm shqiptarë, regjimi serb nuk i dënoi pse janë anëtarë të kësaj a asaj partie, pse kanë këtë apo atë ideologji, por Serbia i ka burgosur dhe vazhdon t’i burgosë e t’i dënojë ata pse janë shqiptarë, pse janë atdhetarë.

Ndërsa në Prizren nesër fillon procesi i montuar politik kundër Ukshin Hotit. Ai akuzohet “për vepër penale të cenimit të tërësisë territoriale të Jugosllavisë”.

Mr. Ukshin Hoti u arrestua më 17 maj të këtij viti dhe prej atëherë ai gjendet në paraburgim.

Ukshin Hoti ka qenë në shënjestër të policisë prej vitit 1981, kur në një proces po ashtu të montuar politik u dënua me disa vite burg.

Ndërsa vitin e kaluar ai është torturuar egërsisht në Gllogovc për çka janë njoftuar dhe kanë protestuar institucione ndërkombëtare humanitare.

26 shtator 1995

Senati Amerikan miratoi 6 milionë dollarë ndihmë për Kosovën

Senati i Shteteve të Bashkuara të Amerikës miratoi të enjten e kaluar një projektligj për ndihmë vendeve të huaja që kap 12.3 miliardë dollarë.

Së paku 6 milionë dollarë ndihmë humanitare i dedikohet Kosovës, thuhet në një njoftim të Ruder Finit nga Uashingtoni.

Udhëheqësi i shumicës në Senat, Robert Doull, paraqiti një amendament në kuadër të pjesës për Ndihmë Ndërkombëtare për Vendet e Prekura nga Katastrofa që vë mënjanë 40 milionë dollarë për ndihmë urgjente në ish-Jugosllavi, prej të cilëve “jo më pak se 6 milionë dollarë do të jenë në dispozicion vetëm për ndihmë humanitare Kosovës”.

Projektligji tashti duhet të shkojë në procedurë të harmonizimit me një version të miratuar nga Dhoma e Përfaqësueseve të Kongresit Amerikan.

26 shtator 1997

Mbi 100 persona të keqtrajtuar në Mitrovicë

Policia serbe ndërhyri mbrëmë brutalisht në shëtitoren e Mitrovicës, ku ishin tubuar rreth 2000 studentë e qytetarë, në shenjë përkrahjeje për manifestimet e studentëve të Prishtinës.

Dhjetëra grupe policësh me nga 10 deri 15 policësh ndërhynë në disa vende, duke ndaluar, legjitimuar, keqtrajtuar dhe arrestuar së paku 100 qytetarë.

Komisioni për Informim i Degës së LDK-së në Mitrovicë njofton se janë marrë në polici mbi 100 vetë. Ata janë mbajtur në stacion prej orës 19 deri rreth orës 22:00 dhe janë keqtrajtuar brutalisht.

Në mesin e më se 100 personave të keqtrajtuar janë edhe Ismail Loshi, Osman Rama, profesor dhe kryetar i LDK-së dega në Zubin Potok, Muharrem Avdiu, anëtar i kryesisë së UNIKOMB-it dega në Mitrovicë, Gëzim Mustafa student i FXM në Mitrovicë e Bashkim Beka, profesor i Shkollës së Lartë Teknike në Mitrovicë.

Janë legjitimuar: Muhamet Hajrizi, prof. i SHLT Mitrovicë, Jakup Ceraja, poet, Osman Rama, profesor, Sabi Idrizi anëtar i kryesisë së LDK-së dega në Mitrovicë, Brikenë Ceraja, nxënëse dhe Arbër Berisha, student në Prishtinë, Zymer Zeqiri, drejtor i shkollës fillore në Qabër të Zubinpotokut, Ismet Berani, inxhinier, Adem Beqiri, kryetar i nëndegës së LDK-së “Qendra”, Gazmend Rama, Ilir Morina, student të FXM në Mitrovicë, Ali Ahmeti, arsimtar, Dr. Ali Topalli dhe Sabri Sadiku, profesorë të FXM në Mitrovicë.

Numri i të keqtrajtuarve fizikisht, i të arrestuarve dhe i të legjitimuarve arrin numrin mbi 200.

Sipas deklaratave të të arrestuarve numri i të cilëve është mbi 100, në polici derisa qëndronin në korridor ishin të detyruar të rrinin me fytyrë nga muri me duar të lidhura mbrapa. Ata thirreshin një nga një nëpër zyre dhe i detyronin të shkruajnë nga një deklaratë.

Burimet nga Mitrovica flasin për një gjendje shumë të rëndë e të tensionuar pas ndërhyrjes brutale të forcave serbe.

26 shtator 1998

Njoftime edhe për 68 të vrarë në fshatrat rreth Qyqavicës

Burimet e informimit në Vushtri, Mitrovicë, Gllogoc e Skënderaj njoftojnë për së paku 68 të vrarë gjatë sulmeve të fundit, kryesisht më 24 shtator, në Galicë (10), Oshlan (4), Zhilivodë (13), Beqiq (20), Lubovec (3), Prekaz (5), Klinë e Epërme (1), Dashefc (4) dhe Shtuticë (8).

Sot, në fshatrat rrëzë Qyqavicës, u varrosën edhe 23 shqiptarë të vrarë e të masakruar nga forcat serbe

Sot, në fshatrat që shtrihen rrëzë Qyqavicës u varrosën edhe 23 kufoma të shqiptarëve të vrarë dhe të masakruar nga forcat e ushtrisë dhe të policisë serbe, njofton KI i Degës së LDK-së në Vushtrri.

Njoftohet se nga forcat serbe janë vrarë e masakruar këta shqiptarë: Shasivar Isa Ademi (51) nga Galica, Fatmir Shasivar Ademi (17) nga Galica, Burim Ramadan Ademi (17) nga Galica, Gani Fazli Ademi (16) nga Galica, Bajram Bejtullah Sahiti (33) nga Galica, Agim Selim Ademi (28) nga Galica, Hetem Rizah Halili (45) nga Galica, Bujar Hetem Halili (16) nga Galica, Bekim Miftar Halili (22) nga Galica, Nazmi Veli Halili (25) nga Galica, Nexhat Kadri Halili (17) nga Galica, Sejdi Kabashi (22) nga Polaci, Haradin Islam Lahu (43) nga Galica, Enver Kastrati (40) nga Polluzha, Hasime Shabani (50) nga Galica, Mexhid Hamit Bislimi (33) nga Prekazi i Epërm, Xhavit Haradin Bislimi (40) nga Prekazi i Epërm, Driton Shaban Brahimi (22) nga Prekazi i Epërm, Kadri Miftar Mehmeti (22) nga Prekazi i Epërm, Adem Lushtaku (?) nga Prekazi i Epërm, Enver Halit Ferati (42) nga Lubaveci, Muhamet Rrahman Idrizi (53) nga Beqiqi dhe Feriz Rrustem Shala (43) nga Ujmiri.

I njëjti burim bën të ditur se sot pas shumë përpjekjeve, Kryesia e Degës së Lidhjes Demokratike të Kosovës në Vushtrri ka arritur të depërtojë në disa fshatra të Qyqavicës dhe nga vendi i ngjarjes dëshmon se kufomat janë masakruar nga forcat serbe, por ka edhe raste kur ato janë ekzekutuar.

Të përkujtojmë se vetëm në fshatin Galicë, sot janë varrosur 14 kufoma. Të 23 shqiptarët e varrosur sot, 13 kufoma tjera që janë vrarë nga 17 shtatori i këtij viti dhe pesë të tjera ende të paidentifikuara arrijnë shifrën në 41 shqiptarë të vrarë.

Kryesia e Degës së LDK-së në Vushtrri thekson se në fshatrat shqiptare që shtrihen rrëzë bjeshkës së Qyqavicës ka edhe shqiptarë të tjerë të vrarë e të plagosur, ndërsa fshatrat Dubofc, Beqiq dhe një pjesë e Galicës janë djegur deri në themel.

Shëndeti kërkon kujdes të vazhdueshëm, diagnostikim të saktë dhe trajtim të koordinuar. United Hospital ofron shërbime shëndetësore 24 orë në ditë, 7 ditë në javë, duke integruar diagnostikën, emergjencën, trajtimin specialistik, kirurgjinë dhe kujdesin intensiv në një strukturë të vetme.

Me fokus në sigurinë e pacientit, precizitetin diagnostik dhe kujdesin multidisiplinar, spitali ofron shërbime nga disa fusha të mjekësisë, duke u mundësuar pacientëve qasje në kujdes profesional për nevoja të ndryshme shëndetësore.

Në fushën e diagnostikës, Radiologjia dhe CT-ja janë pjesë e infrastrukturës teknologjike të spitalit, ndërsa sipas institucionit, pajisjet mundësojnë ekzaminime me deri në 40% më pak ekspozim ndaj rrezatimit, në krahasim me teknologjitë përkatëse tradicionale, në varësi të ekzaminimit dhe protokollit të përdorur.

Shërbimet specialistike përfshijnë Kardiologjinë, Hematologjinë, Nefrologjinë, Gastroenterologjinë dhe Pulmologjinë, duke ofruar qasje të dedikuar për diagnostikimin dhe menaxhimin e një game të gjerë të problemeve shëndetësore.

Në kuadër të shërbimeve kirurgjikale, United Hospital mbulon disa profile, përfshirë Kirurgjinë e Përgjithshme, Kardio-kirurgjinë, Ortopedinë, Kirurgjinë Vaskulare, Pediatrike, Gjinekologjinë, Urologjinë, ORL-në, Kirurgjinë Maksilofaciale dhe Torakale.

Një fokus i veçantë i kushtohet edhe kujdesit për fëmijët. Neonatologjia dhe Pediatria ofrojnë shërbime të dedikuara për pacientët më të vegjël, ndërsa Laboratori, Emergjenca, Radiologjia dhe Kujdesi Intensiv janë të disponueshme gjatë gjithë kohës.

Me një qasje që synon të lidhë diagnostikimin, trajtimin dhe kujdesin e vazhdueshëm, United Hospital e pozicionon veten si një qendër ku pacientët mund të marrin shërbime të integruara shëndetësore në çdo kohë./rajonipress/

📍 M2 Prishtinë–Ferizaj, Km 7, Prishtinë, Kosovë

📞 038 60 70 70 / 046 60 70 70

Kuvendi i Republikës së Kosovës do të mbajë të hënën, më 28 shtator, seancë plenare, e cila do të nisë në orën 11:00.

Sipas rendit të ditës, deputetët do të shqyrtojnë disa çështje, përfshirë miratimin e një deklarate lidhur me aktgjykimin e Dhomave të Specializuara të Kosovës të 16 shtatorit 2026.

Në rendin e ditës janë përfshirë këto pika:

Miratimi i procesverbaleve nga seancat e mëparshme.

Betimi i deputetëve.

Miratimi i Deklaratës lidhur me Aktgjykimin e Dhomave të Specializuara të Kosovës, të datës 16 shtator 2026.

Zgjedhja e nënkryetarit të Kuvendit të Republikës së Kosovës nga Grupi Parlamentar i Partisë Demokratike të Kosovës (PDK).

Formimi i komisioneve parlamentare./A.K/