Roli i Gjermanisë në 25 vitet e fundit në Kosovë ka qenë shumëdimensional. Prandaj, edhe prezenca e mediave gjermane në Kosovë, që nga viti 1998 e deri më sot, ka qenë e rëndësishme.

Gjatë Luftës së Kosovës, roli i Gjermanisë shënoi një moment kyç në marrëdhëniet Kosovë-Gjermani. Vendimi për të marrë pjesë në Operacionin e Forcave Aleate të NATO-s në vitin 1999 dhe më pas për të kontribuar në KFOR përfaqësoi një ndryshim historik për Gjermaninë, duke qenë dislokimi i parë ushtarak i vendit që nga Lufta e Dytë Botërore.

Ky vendim shkaktoi një debat të madh brenda Partisë së Gjelbër, e cila kishte një bazë pacifiste, dhe brenda qeverisë federale të kancelarit Gerhard Schröder dhe ministrit të Jashtëm Joschka Fischer. Pavarësisht këtyre debateve të brendshme, pjesëmarrja e Gjermanisë në operacion u bë një moment i rëndësishëm në politikën e jashtme dhe të sigurisë të saj, duke hapur rrugën për një angazhim afatgjatë për sigurinë e Kosovës.

Por, si e portretizoi media gjermane këtë angazhim? Për të kuptuar më mirë qasjen e mediave gjermane në Kosovë, si dhe kontributin e tyre përmes arkivave të Reporting House nga periudha e luftës 1998-1999, u mbajt një diskutim në zyret e këtij institucioni.

Pjesëmarrëse ishte gazetarja nga Kosova, Vjosa Çerkini, që punon në Deutsche Welle, e cila ndau përvojën e saj profesionale dhe pikëpamjet mbi ndikimin e mediave gjatë asaj periudhe dhe pas saj.

Ajo u shpreh: “Rrugëtimi im nuk ka qenë aspak i lehtë, si një 18-vjeçare udhëtova për në Gjermani për t’u bërë gazetare e pavarur. Ishte një rrugë e gjatë ku më është dashur të mësoj gjuhën, të krijoja kontakte të reja dhe të siguroja financa vetanake”. Vjosa, e emocionuar nga kujtimet e luftës, ndau me të pranishmit detaje të shumta që gjeneratat e reja nuk i kishin dëgjuar më parë.

Temat e trajtuara në këtë ngjarje, si dhe ndikimi i mediave gjermane gjatë periudhës së luftës dhe pas saj, u ndoqën me shumë interes, duke e ditur se shumë media, përfshirë ato gjermane, kanë luajtur një rol të rëndësishëm në zbardhjen e fakteve të asaj periudhe të dhimbshme për popullin shqiptar.

Artikull nga gazetarja Albina Zeneli. /UBT News/

Në shënimin e Ditës Ndërkombëtare të të Drejtave të Njeriut, Gjykata Kushtetuese e Kosovës ka organizuar “Ditën e Gjykatës së Hapur”.

Gjatë qëndrimit para gjykatës, është vërejtur numër i vogël i vizitorëve, derisa nuk ka pasur prononcime për media nga përfaqësues të Gjykatës Kushtetuese.

Në këtë ditë, të gjithë qytetarët, e veçanërisht studentët e drejtësisë, përfaqësuesit e komunitetit juridik dhe vizitorët e tjerë, do të kenë mundësi që të vizitojnë objektin e Gjykatës Kushtetuese dhe të njihen më për së afërmi me Gjykatoren, me Bibliotekën dhe me ambientet në të cilat punojnë gjyqtarët dhe zyrtarët e Gjykatës, si dhe të informohen drejtpërsëdrejti përkitazi me historikun, me punën e deritanishme dhe me kompetencat kushtetuese të këtij institucioni.

“Organizimi i vizitës së qytetarëve të interesuar do të bëhet në përputhje me kapacitetet akomoduese që ofron ndërtesa e Gjykatës Kushtetuese dhe për grupe prej jo më shumë se pesëmbëdhjetë (15) personash në të njëjtën kohë. Vizitat do të organizohen çdo orë, ndërmjet orës 10:00 dhe 14:00, ndërsa kohëzgjatja maksimale e vizitës do të jetë dyzet e pesë (45) minuta”, është thënë në njoftim.

Në njoftimin e gjykatës poashtu ishte thënë se para vizitës në gjykatë, të gjithë vizitorët e moshës mbi 16 vjeç duhet të kenë me vete dhe të dorëzojnë në recepcion një dokument zyrtar identiteti (kartë studentore, letërnjoftim apo pasaportë).

Në fund thuhet se gjatë vizitës, vizitorët do të kenë mundësi të bëjnë foto vetëm në Gjykatore dhe në oborrin e Gjykatës.

Ministri i Mbrojtjes i Letonisë, Andris Sprūds, është duke qëndruar për vizitë zyrtare në Kosovën.

Me këtë rast ministri Sprūds është pritur me ceremoni shtetërorë të shoqëruar me togun ceremonial të FSK-së, nga Ministri i Mbrojtjes Ejup Maqedonci.

Takimi ndërmjet ministrave është zhvilluar në objektin e MB-së.

USAID kërkon nga Qeveria e Kosovës rritjen e nivelit të transparencës buxhetore. Sipas rezultateve nga “Anketa e Buxhetit të Hapur 2023 për Kosovën”, Kosova renditet e treta ndër shtetet e Ballkanit Perëndimor në këtë aspekt. Ndërsa, në aspektin e pjesëmarrjes së publikut, Kosova ka marrë rezultat të ulët, me mesatare prej vetëm 9 nga 100 pikë.

Në prezantimin e rezultateve të OBS-së, drejtori i zyrës së Rritjes Ekonomike në USAID Kosovë, Alexander Albertine, ka theksuar nevojën e përmirësimit të vendit në këtë drejtim. Ndërsa ka thënë se institucionet e Kosovës duhet të punojnë bashkë për t’u siguruar si transparenca të jetë pjesë integrale e punës së qeverisë.

“Ka shumë pak gjëra që kanë po aq rendësi që janë aq strategjike se sa kontrata sociale me qytetarët, mënyra si krijohen buxhetet, dhe është një gurthemel i mundësimit të qeverisjes së mirë sigurimit të transparencës. Duhet të shohim si një gjendje bazë ku marrim parasysh së çfarë ndodhë në Kosovë jo si kritikë por si hap i parë në kuptimin e vështrimit të mënyrave si mund të punojmë bashkë për t’u siguruar si transparenca të jetë pjesë integrale e punës së qeverisë. Kjo anketë e sotme, na hapin një fazë të re, d.m.th. tranzicioni i Kosovës si shtet i pavarur, për të arritur kaq shumë për të ruajtur vlerat kyçe kushtetuese në kuptimin e angazhimit të publikimit“, tha ai.

Ndërkaq, Rrona Zhuri nga ky institut ka thënë se Kosova ka më shumë hapësirë për përmirësim në përfshirjen e qytetarëve dhe organizatave të shoqërisë civile në gjitha fazat e hartimit të buxhetit dhe ekzekutimit, duke shtuar se duhet të ofrohen mundësi për më shumë komente.

“Në pjesën e transparencës rezultatet e anketës tregojnë se Kosova ka arritur një rezultat prej 50 pikëve gjithsej nga 100 pikë sa janë në total. Krahasuar me vendet e Ballkanit Perëndimor, në transparencë buxhetore Kosova renditet e treta pas Shqipërisë dhe Serbisë, të cilat kanë rezultat prej 57 dhe 51 pikëve. Tek pjesa e pjesëmarrjes së publikut, Kosova ka marrë rezultat të ulët, me mesatare prej vetëm 9 nga 100 pikë. Kosova ka shumë hapësirë për përmirësim në përfshirjen e qytetarëve dhe organizatave të shoqërisë civile në gjitha fazat e hartimit të buxhetit dhe gjatë ekzekutimit, duhet të ofrohen mundësi për komente edhe në raportet financiare gjatë vitit që publikohen nga Ministria e Financave si dhe në mbikëqyrje nga Kuvendi dhe nga ZKA“, tha ajo.

Në anën tjetër, drejtori i Departamentit të Buxhetit në Ministrinë e Financave, Punës dhe Transfereve, Salvador Elmazi ka thënë se do të mundohen të jenë sa më afër realizimit të këtyre objektivave.

Ndërsa ka përmendur edhe komunat të cilat nuk e kanë aprovuar buxhetin me kohë, siç tha ai, gjitha këto aprovimet e vonshme shkaktojnë telashe shtesë.

“Si Ministri e Financave kemi nevojë për pak më shumë kohë të analizojmë dokumentin dhe të përgatisim një lloj plan veprimi për çështjet që janë ngritur këtu. Është kompleks në kuptimin e përfshirjes së institucioneve, pastaj kemi nivelin lokal i cili ka disa specifika të veta ku procesi i buxhetit nuk fillon momentin e hartimit të buxhetit, por fillon qysh në fillim të vitit kur lëshohet udhëzuesi për tri vitet e ardhshme. Kemi edhe një situatë specifike për shkak se tre komuna nuk e kanë aprovuar me kohë buxhetin. Gjitha këto aprovimet e vonshme neve na shkaktojnë telashe shtesë sepse e kemi edhe mbylljen e vitit, çështjet e pagave disa vendime të qeverisë, është një angazhim më i ngarkuar. Mundohemi të jemi sa më afër realizimit ta këtyre objektivave“, tha ai.

Kjo analizë është fokusuar në tri institucionet kryesore, në Kuvendin e Kosovës, Ministrinë e Financave dhe Zyrën Kombëtare të Auditimit.