Pas më shumë se dy vitesh ndarjeje për shkak të shërbimit të detyrueshëm ushtarak në Korenë e Jugut, të shtatë anëtarët e grupit BTS janë ribashkuar këtë muaj, duke festuar së bashku 12-vjetorin e krijimit të grupit të tyre.

Festimet u mbajtën më 13 dhe 14 qershor në Goyang, pranë Seulit, ku morën pjesë mbi 60,000 fansa nga e gjithë bota.

Ato ditë, gjashtë nga anëtarët e grupit, Jin, j-hope, RM, Jimin, V dhe Jungkook, e kishin përfunduar shërbimin e tyre ushtarak, ndërsa anëtari i fundit, Suga, e përfundoi zyrtarisht detyrën më 21 qershor.

Suga mori një formë alternative të shërbimit për shkak të një dëmtimi të mëparshëm, duke punuar si punonjës civil.

Megjithatë, ai nuk kishte të drejtë të merrte pjesë në aktivitete profesionale deri në përfundimin zyrtar të shërbimit.

Gjatë eventit FESTA ku grupi bëri ribashkimin, anëtarët befasuan fansat me prezencë. Në skenë performuan j-hope, Jin dhe Jungkook me këngë si “Jamais Vu”, “Seven” dhe “Don’t Say You Love Me”,RM, Suga, Jimin dhe V qëndruan në audiencë, duke shijuar emocionet së bashku me ARMY-n, fansat e tyre.

Ky ribashkim shënon një moment kyç për BTS dhe fansat e tyre, të cilët kanë pritur me padurim rikthimin e grupit në përbërje të plotë.

Megjithëse nuk është dhënë ende një datë zyrtare për projektet e ardhshme, kompania menaxhuese e tyre, HYBE, ka konfirmuar se BTS do të rikthehet me aktivitete të grupit në fund të vitit 2025 ose në fillim të 2026. Një album i ri dhe një turne botëror janë në planet që pritet të zbulohen së shpejti.

Pas një periudhe ku çdo anëtar punoi në projekte solo dhe përmbushi detyrimet ushtarake, grupi është gati të shkruajë kapitullin e radhës të historisë së tij, një rikthim që pritet me shumë emocion nga miliona fansa në të gjithë botën.

Pedro Pascal ka folur për mënyrën se si e mban jetën e tij personale larg syrit të publikut, në një intervistë të fundit për Vanity Fair.

Aktori 50-vjeçar, i cili ka arritur majat e karrierës me rolet e tij në serialet “The Last of Us” dhe “The Mandalorian”, theksoi se ruajtja e privatësisë është thjesht dhe vetëm një mbrojtje nga ekspozimi mediatik.

“Gjithmonë ndihem në siklet kur më përshkruajnë si një person të rezervuar në media, sepse është krejt e kundërta e asaj që jam në të vërtetë,” tha ai.

“Jam shumë i hapur me njerëzit e mi, me rrethin tim personal. Thjesht e di që marrëdhëniet mes njerëzve janë mjaft të ndërlikuara edhe pa qenë nën dritën e kamerave apo përmes një lenteje që zmadhohet gjithmonë.”

I pyetur për mendimin e tij mbi prindërimin dhe nëse ka dëshirë të ketë fëmijë, Pascal u tregua i sinqertë:

“Nuk është diçka për të cilën e vras mendjen çdo ditë. Sigurisht, kam ëndërruar ta përjetoj atë që më kanë dhënë prindërit, t’i çoj fëmijët në kinema, siç më çonin mua. Ndoshta dua një ‘bashkudhëtar të vogël’, qenie njerëzore interesante që është fëmija im, e që më shoqëron të shohim filma që dua t’i shoh unë.”

Kur biseda kaloi te mënyra si interneti e ka shndërruar në një simbol seksi, Pascal u duk më shumë i habitur sesa i ngazëllyer:

“E mendoni me të vërtetë se dukem seksi? Faleminderit Zotit!,” tha ai.

Bota e kinemasë italiane është sot në zi. Alvaro Vitali, një nga figurat më të dashura dhe ikonike të komedisë italiane, është ndarë nga jeta në moshën 74-vjeçare, në Romë.

Aktori ishte shtruar në spital dy javë më parë për një bronkopneumoni të përsëritur, por kishte vendosur të rikthehej në shtëpi, ku ndërroi jetë pasdite.

I njohur për rolin e tij të paharrueshëm si Pierino, Vitali u bë një figurë kult e komedisë italiane, por edhe një personazh shumë i dashur për publikun e ri, falë imitimeve të suksesshme, si ajo e Jean Todt në “Striscia la Notizia”.

I lindur më 3 shkurt 1950, Vitali u zbulua nga Federico Fellini, i cili i dha rolin e parë në “Fellini Satyricon” (1969), ai u shfaq në filma të tjerë të regjisorit të famshëm si “I Clowns” dhe “Roma”.

Në vitet ’70-’80, Vitali u bë një nga aktorët më të kërkuar të zhanrit komik, duke luajtur krah emrave si Lino Banfi, Edwige Fenech dhe Renzo Montagnani.

Këngëtarja me rrënjë nga Kosova e me famë botërore, Rita Ora, ka dhënë mesazhin e saj për botën dhe njerëzit e rinj, në një deklaratë për “Dose of Society” që ka mision të sjellë zërin e njerëzve për inspirim dhe lidhje me të tjerët.

Në një video të publikuar në kanalin e “Dose of Society” në Instagram me 1.7 milionë ndjekës, Rita ka treguar edhe se çka do t’i thoshte vetes së vet më të re.

“Mos u brengos. Gjithmonë gjithçka do të jetë në rregull. Gjithçka lidhet me rrugëtimin. Ky është rrëfimi juaj. Dhe kurrë mos mendo e ndjej sikur rrëfimi juaj duhet të jetë si i dikujt tjetër”, ka thënë ajo.

Se pse e ka fituar këtë përshtypje, Rita ka thënë se gjërat “nuk po ecnin shpejt mjaftueshëm”. “Kam menduar se gjërat do të duhej të ishin më shpejt, por se ato kanë ndodhur ashtu siç ishte paraparë të ndodhnin”. Ajo ndihet e bekuar dhe me fat që e bën punën që gjithmonë ka ëndërruar.

Ajo ka treguar edhe se çka ka mësuar përgjatë rrugëtimit të saj.

“Që e dua atë që bëj dhe që jam me fat që e bëj atë që e bëj dhe që jam e bekuar. Më duhet ta kujtoj këtë, që po bëj një punë që gjithmonë kam dashur ta bëja. Disa njerëz kanë punë që nuk donin t’i bënin”, ka thënë ajo.

Këngëtarja është shprehur se duhet të respektohen të gjithë njerëzit “pasi ju nuk e dini se si mund të kthehen këta njerëz në jetën tuaj”.

“Se këdo që e takoni e meriton të njëjtin respekt sepse po ashtu nuk e dini si mund të kthehen këta njerëz në jetë, si mund t’ju ndihmojë në të ardhmen apo çfarë raportesh mund të bëni me ta…Ti mjafton. Ju mund të gjeni dyshime se nuk po bëni mjaftueshëm, se s’keni sukses, pasuri, por mos harroni se ju vetëm si person jeni mjaftueshëm. Je vetëm një. Mos e harro kurrë”, ka shtuar Rita Ora.