Shefi ekzekutiv i OpenAI, Sam Altman, ka refuzuar një ofertë prej 97.4 miliardë dollarësh për të shitur kompaninë që krijoi ChatGPT. Oferta e papritur u paraqit nga një konsorcium investitorësh i udhëhequr nga Elon Musk.

Në përgjigje të ofertës, Altman reagoi me një postim në platformën sociale të Musk, “X”, duke thënë: “Jo faleminderit, por ne mund të blejmë Twitterin për 9.74 miliardë dollarë nëse dëshironi”.

Musk dhe Altman bashkë-themeluan OpenAI në vitin 2015 si një kompani jofitimprurëse, por marrëdhënia mes të dyve është përkeqësuar që kur Musk u largua nga firma në vitin 2018.

Një nga arsyet për tensionet është transformimi i OpenAI në një kompani fitimprurëse, i cili ka qenë i nevojshëm për të siguruar fondet për zhvillimin e modeleve më të avancuara të inteligjencës artificiale, sipas Altman.

Në një deklaratë, Musk shprehu mbështetje për OpenAI dhe tha se është koha që kompania të kthehet në një forcë me burim të hapur, duke u fokusuar në siguri, siç ishte dikur.

Oferta prej 97.4 miliardë dollarësh është shumë më e ulët se 157 miliardë dollarë, vlerësimi i kompanisë në raundin e fundit të financimit në tetor të vitit të kaluar, ndërsa bisedimet për një raund tjetër financimi e vlerësojnë atë tani në 300 miliardë dollarë.

Avokati i Musk shprehu mbështetje për ofertën e bërë nga ai, duke e cilësuar si një mundësi të shkëlqyer për të mbrojtur dhe zhvilluar teknologjinë e OpenAI.

Përveç ofertës për OpenAI, Musk është gjithashtu duke bashkëpunuar me Oracle dhe një firmë investimi japoneze, për të ndihmuar në ndërtimin e një infrastrukture të avancuar të inteligjencës artificiale në SHBA, vlerësuar në 500 miliardë dollarë.

Apple pritet të prezantojë një iPhone të ri SE që në fillim të javës së ardhshme dhe mund të shënojë një ndryshim të madh duke shtuar Face ID dhe duke hequr butonin klasik.

Nuk do të ketë një buton klasik

Ndryshimi më i madh është se Apple po ndryshon dizajnin e iPhone SE, pasi e ka lënë atë gjerësisht të pandryshuar që nga fillimi i serisë në vitin 2016.

iPhone SE 2022 është iPhone i fundit që ende përdor buton home, teksa thashethemet thonë se Apple do heqë butonin e do shtojë Face ID.

Rezultati do të jetë një telefon që duket si iPhone 14 nga përpara.

Do të ketë një buton Veprimi

Videoja e publikuar sugjeron që SE 4 do të përfshijë një buton veprimi të personalizueshëm, por jo kontrollin e kamerës të prezantuar në iPhone 16. /UBT News/

Norvegjia do të jetë vendi i parë në botë që do të realizojë në mënyrë efektive dhe të plotë kalimin nga veturat me motor me djegie të brendshme në vetura me motor elektrik në tregun e automjeteve të reja, shkruan CNBC.

Pavarësisht se ka rezerva të mëdha nafte dhe gazi, vendi nordik prej kohësh është lider botëror në transportin e gjelbër.

Më konkretisht, shitjet e automjeteve elektrike u rritën nga 1 për qind në vitin 2010 në 88.9 për qind vitin e kaluar. Ky trend nuk tregon asnjë shenjë ngadalësimi. Sipas të dhënave zyrtare, automjetet elektrike kanë përbërë 96 për qind të shitjeve të reja që nga fillimi i këtij viti.

Kjo e bën Norvegjinë plotësisht të elektrifikuar sa i përket shitjeve të veturave të reja. Autoritetet norvegjeze besojnë se do të bëjnë kthesë historike. Konkretisht, presin që pothuajse të gjitha veturat e reja të shitura të jenë elektrike deri në fund të këtij viti.

Kompania ‘Alphabet’, e cila është kompania mëmë e Google, njoftoi ndalimin e përdorimit të inteligjencës artificiale për zhvillimin e armëve dhe mjeteve mbikëqyrëse. Ky vendim është nënshkruar nga nënpresidenti i kompanisë, James Manikas, dhe drejtori i laboratorit të inteligjencës artificiale të Google, Demis Hassabis.

Google mbrojti këtë vendim duke theksuar se kompanitë dhe qeveritë demokratike duhet të bashkëpunojnë për të zhvilluar inteligjencën artificiale në mënyrë që të mbështesin sigurinë kombëtare dhe zhvillimin global. Kompania beson se bashkëpunimi i organizatave që ndajnë këto vlera do të ndihmojë në krijimin e një inteligjence artificiale që mbron njerëzit dhe promovon sigurinë.

Përdorimi i inteligjencës artificiale në luftë është pranuar, por frika që lind është përdorimi i saj në sisteme të armëve dhe mbikëqyrje, për të cilin Google ka vendosur të tërhiqet nga zhvillimi i tij.