Festivali i njohur veror “Wireless” është anuluar pasi artistit kryesor, Kanye West, i është refuzuar hyrja në Mbretërinë e Bashkuar.

Qeveria britanike nuk i dha leje reperit, i njohur tashmë si Ye, për të udhëtuar drejt Londrës, pas reagimeve të shumta lidhur me pjesëmarrjen e tij në festival. Gjatë viteve të fundit, ai ka shkaktuar polemika për deklarata antisemitike, raciste dhe pro-naziste.

Në një njoftim zyrtar, organizatorët e Wireless Festival konfirmuan anulimin e ngjarjes dhe bënë të ditur se të gjithë mbajtësit e biletave do të rimbursohen. Ata theksuan se para rezervimit të artistit ishin konsultuar me “palë të ndryshme të interesit” dhe se në atë kohë nuk ishin ngritur shqetësime.

Organizatorët shtuan se antisemitizmi në çdo formë është i papranueshëm dhe pranuan ndikimin real që këto çështje kanë tek individët dhe komunitetet. Sipas tyre, Ye ka deklaruar se e kupton që fjalët nuk mjaftojnë dhe shpreson të ketë mundësinë të nisë një dialog me komunitetin hebre në Mbretërinë e Bashkuar.

Parashitja e biletave për festivalin kishte nisur të martën dhe besohet se ishte shitur plotësisht, ndërsa shitja e përgjithshme ishte planifikuar për të mërkurën.

Më herët, Ministria e Brendshme britanike konfirmoi se artisti kishte aplikuar për të hyrë në vend përmes një autorizimi elektronik udhëtimi (ETA), por kërkesa iu refuzua me arsyetimin se prania e tij nuk ishte në interes të së mirës publike.

Vendimi vjen në vazhdën e kritikave të forta ndaj deklaratave të tij të mëparshme, përfshirë një postim të vitit 2022 ku ai kërcënonte me sulme ndaj komunitetit hebre shkruan BBC.

E famshmja Dua Lipa duket se do të martohet këtë verë, dhe për martesën e saj me aktorin e njohur Callum Turner ka shkruar The Sun, ku ka zbuluar disa detaje nga ky planifikim i dasmës, transmeton KultPlus.

Këngëtarja shqiptare me famë botërore, Dua Lipa, dhe aktori, Callum Turner, janë duke përgatitur në fshehtësi dasmën e tyre, pasi shpallën fejesën vitin e kaluar.

Sipas një burimi për rubrikën Bizarre të The Sun , përgatitjet janë në kulm, por gjithçka po mbahet larg vëmendjes së publikut.

“Planet janë në zhvillim të plotë për dasmën e Duas dhe Callumit, por gjithçka po mbahet shumë diskrete. Dasma do të zhvillohet këtë verë, ajo do të jetë e martuar para se të mbushë 31 vjeç në muajin gusht”, ka thënë burimi.Çifti thuhet se dëshiron një ceremoni të vogël dhe të ngrohtë, vetëm me njerëzit më të afërt.

Këngëtarja dhe aktorja me famë ndërkombëtare Rita Ora është në qendër të vëmendjes në numrin më të ri të revistës Crash Magazine, “CRASH 108 – The Privacy Issue”, ku vjen me një intervistë dhe paraqitje vizuale mbresëlënëse.

Në këtë edicion, Rita Ora prezantohet si një artiste që vazhdimisht rishpik veten, duke lëvizur mes muzikës, filmit dhe modës. Nga hitet që kanë kryesuar listat, deri te rolet në ekran, ajo dëshmon një dëshirë të fortë për të eksperimentuar dhe për të sfiduar kufijtë artistikë.

Këngëtarja shqiptare me famë botërore Bebe Rexha është vlerësuar së fundmi me “Female Icon Award 2026” nga EDM Awards, duke nënvizuar ndikimin e saj në muzikën dance dhe kontribuimin e vazhdueshëm në këtë zhanër global.

E emocionuar nga ky çmim, Rexha ndau në Instagram një video ku shfaqet duke marrë trofeun:

“Wow, faleminderit EDMAs. Kjo është e pabesueshme. ‘Female Icon Award 2026’. Dua t’u falënderoj fansave të mi për mbështetjen e tyre gjatë këtij udhëtimi të çmendur. Faleminderit edhe komunitetit të muzikës dance për pranimin. Muzika dance ka qenë gjithmonë pjesë e madhe e jetës sime. Ka qenë shpëtimi, terapia ime dhe është ende e tillë. Nuk ka gjë si të dëgjosh këngën tënde në një festival, klub apo në makinë. Sigurohuni që të dëgjoni këngën time të re ‘New Religion’ me grupin e mrekullueshëm Faithless. Është jashtë tani. Gëzuar!”

Në vitet e fundit, Bebe Rexha ka qenë aktive në Euro-dance, duke sjellë këngë që u bënë hite ndërkombëtare.