Presidenti i SHBA-së Donald Trump ka vendosur një kufi për pranimet e refugjatëve në 7500 për vitin fiskal 2026, më i rrepti ndonjëherë, sipas një dokumenti të Shtëpisë së Bardhë.

Vendimi është pjesë e përpjekjes për të ndryshuar politikat e refugjatëve në SHBA dhe në të gjithë botën.

Në vendimin vjetor për refugjatët më 30 shtator, Trump tha se tani do të pranonte kryesisht afrikano-jugorë nga pakica etnike e bardhë afrikane e vendit, pasi sipas tij, ata po përballen me persekutim racor në Afrikën e Jugut me shumicë të zezë, një pretendim i mohuar nga qeveria e vendit.

Trump pezulloi pranimet e refugjatëve kur mori detyrën në janar, duke thënë se kjo mund të vazhdonte vetëm nëse përcaktohej se ishte në interesin më të mirë të Shteteve të Bashkuara.

Disa javë më vonë, ai nisi një përpjekje për të sjellë afrikano-amerikanë, duke zemëruar aktivistët e të drejtave të refugjatëve.

Në një vendim të njoftuar sot, Trump tha se administrata e tij do të merrte në konsideratë sjelljen e “viktimave të tjera të diskriminimit të paligjshëm ose të padrejtë në vendet e tyre”.

Shtëpia e Bardhë tha gjithashtu se do të zhvendoste mbikëqyrjen e programeve të ndihmës për refugjatët nga Departamenti i Shtetit te Departamenti i Shëndetësisë dhe Shërbimeve Njerëzore./S.K/KP/

Manchester United është i gatshëm të bëjë një ofertë rekord prej 200 milionë eurosh për të transferuar Vinícius Júnior nga Real Madridi në verën e vitit 2026.

Sulmuesi brazilian po kalon një periudhë të tensionuar në Madrid, ku marrëdhëniet e tij me trajnerin Xabi Alonso nuk janë të mira dhe rinovimi i kontratës së tij është pezulluar.

Kontrata aktuale e Vinícius skadon në vitin 2027, ndaj kjo mund të jetë një nga mundësitë e fundit që Real Madridi të përfitojë financiarisht nga ai.

Sipas raportimeve, edhe pse klubi spanjoll nuk e ka vënë në shitje lojtarin, një ofertë e tillë e lartë mund t’i detyrojë drejtuesit të marrin në konsideratë negociatat.

Nga ana tjetër, Manchester United e sheh brazilianin si lojtarin ideal për të forcuar repartin ofensiv dhe për t’i dhënë skuadrës energji të re. Për ta bërë marrëveshjen të mundur, klubi anglez duhet të sigurojë pjesëmarrjen në Ligën e Kampionëve dhe t’i garantojë Viníciusit një rol kryesor në ekip.

Nëse transferimi realizohet, ai do të ishte një nga më të mëdhenjtë në historinë e futbollit dhe do të sillte ndryshime të mëdha si për United ashtu edhe për Real Madridin./S.K/KP/

Kuvendi i Shqipërisë rrëzoi kërkesat e Partisë Demokratike për ngritjen e dy komisioneve hetimore, ku me 81 vota kundër,  Kuvendi rrëzoi dy projektvendime:

1. “Për ngritjen e Komisionit Hetimor të Kuvendit për verifikimin e ligjshmërisë së veprimeve të zyrtarëve shqiptarë në raport me ish-agjentin special të FBI-së, Charles McGonigal”.

2. “Për ngritjen e Komisionit Hetimor të Kuvendit për kontrollin e ligjshmërisë së veprimtarisë të organeve të pushtetit qendror dhe pushtetit vendor, si dhe për të verifikuar përdorimin e burimeve të administratës shtetërore për qëllime elektorale në zgjedhjet e 11 majit 2025”.

Deputetët miratuan projektrezolutat për vlerësimin e veprimtarisë së disa institucioneve si Këshillit të Lartë të Prokurorisë; Avokatit të Popullit; Komisionerit për Mbikëqyrjen e Shërbimit Civil për vitin 2024; Institutit të Statistikave; Bankës së Shqipërisë; Autoritetit të Mediave Audiovizive; Radiotelevizionit Shqiptar.

Deputetët miratuan me 81 vota projektligjin “Për ratifikimin e marrëveshjes së huasë, ndërmjes Republikës së Shqipërisë dhe Bankës Ndërkombëtare për Rindërtim dhe Zhvillim, për financimin e programit “Aftësia ripërtëritëse dhe zhvillimi i gjelbër – hua e dytë për politikat e zhvillimit”.

Po ashtu me 80 vota u miratua edhe projektligji “Për aderimin e Republikës së Shqipërisë në protokollin shtesë, të Konventës për kontratën e Transportit Rrugor Ndërkombëtar të Mallrave (CMR), në lidhje me faturën elektronike të ngarkesës, bërë në Gjenevë, në datën 20.2.2008”.

Kuvendi miratoi po ashtu edhe disa shtesa në anëtarësinë e komisioneve të përhershme të Kuvendit.

Në përfundim, Kuvendi miratoi me 81 vota pro edhe projektrezolutat për vlerësimin e veprimtarisë së disa institucioneve si: Prokurorisë së Përgjithshme; Strukturës së Posaçme Kundër Korrupsionit dhe Krimit të Organizuar; Inspektorit të Lartë të Drejtësisë; Këshillit të Lartë Gjyqësor. /S.K/KP/

Policia në Ferizaj ka njoftuar se dje më 30.10.2025 rreth orës 22:00 ka pranuar një informacion për një rast të vjedhjes së rëndë në rrugën “Mustafë Xhigolli”.

Sipas njoftimit pas daljes në vendngjarje nga ekzaminimet e para është dyshuar se personi/na të panjohur kanë depërtuar në shtëpinë e viktimës përmes thyerjes së xhamit të dritares së pasme, duke vjedhur stoli ari në vlerë rreth 10.000 euro, si dhe pajisjen DVR të kamerave të sigurisë.

“Gjatë zhvillimit të hetimeve, njësia hetimore ka identifikuar një automjet të dyshuar të tipit Audi A4, ngjyrë hiri, që drejtohej nga A. Xh.( 25 vjeç) .Gjatë kontrollit në automjet janë gjetur mjete të dyshimta, përfshirë një shpues elektrik dhe një palë këpucë, të cilat përputhen me gjurmët e lëna dhe pamjet nga kamerat e sigurisë nga kryesi i veprës”, thuhet në njoftim.

I dyshuari ka tentuar të largohet, por pas një ndjekjeje është arrestuar nga hetuesit policorë.

Me urdhër të prokurorit të rastit, i dyshuari është ndaluar për 48 orë, ndërsa automjeti është sekuestruar për procedura të mëtejshme hetimore./S.K/PK/