Deputeti i Partisë Demokratike të Kosovës (PDK), Rashit Qalaj, ka deklaruar se komuniteti serb në Kosovë jeton nën presion dhe terror të ushtruar nga Beogradi dhe mekanizmat e tij të sigurisë.

Qalaj ka thënë se nuk ka serb në Kosovë që nuk i bindet urdhrave të Beogradit, për shkak të presioneve dhe formave të frikësimit që ushtron shteti serb.

Sipas tij, as ministri në detyrë për Komunitete dhe Kthim në Kosovë, Nenad Rashiq, s’i shpëton presionit nga Beogradi.

“Ne dimë që Lista Serbe kontrollohet nga Beogradi. Gjema një serb që nuk i bindet Beogradit. Më vjen keq që nuk është ashtu (edhe Nenad Rashiqi i bindet Beogradit). Nuk ka serb në këtë vend që nuk i bindet Beogradit. Ka pas edhe njerëz para tij që kanë qenë pjesë e qeverise të Kosovës. Edhe ky (Rashiqi) ka qenë pjesë qeverive. Nuk e them rastësisht, nuk ka serb në Kosovë që nuk i bindet shtetit të Serbisë. E di çka po flas”, tha Qalaj.

Ai edhe më tej tha se shteti i Serbisë dhe presidenti i Serbisë i bëjnë mekanizimet e sigurisë terror tek komuniteti serb në Kosovë.

“Terrori është që të mos i bindet institucioneve të Kosovës dhe ata kanë mekanizma për tu bërë presion. Përveç ndaljes në kufi, intervistimit, burgosjes, kanë mekanizma të tjerë, i largojnë njerëzit nga puna… ua ndalin ato ndihmat. Pra bëjnë terror. Ky është mekanizmi që e përdor në vazhdimësi shteti i Serbisë. Ndërsa një pjesë tjetër që janë të kyçur në politikë, pra Lista Serbe janë pjesë e këtyre terrorizimeve që i bëjnë nëpër qytetet e Kosovës” ka theksuar Qalaj./S.K/EO/

Profesori, Bujar Dugolli, i cili ka qenë pjesë në zhvillimet e ndodhura në Rambuje, ka thënë se deklarimet e James Rubin po e tregojnë të vërtetën për rolin që kanë pasur secila prej figurave të asaj kohe.

“Po tregohet e vërteta për kompetencat dhe rolin që e kanë pasur këta në UÇK dhe Rambuje”, ka thënë Dugolli.

Ai shtoi se Hashim Thaçi në momentin që ishte bërë kryesues i delegacionit, kishte marrë autoritet, meqë ishte një konferencë e nivelit të lartë.

“Thaçi kur bëhet kryesues i delegacionit, ka marrë autoritet. Kjo është normale në secilin proces. Duke ditur se UÇK ishte faktor numër 1 në këtë proces për të arritur paqen, anëtarët e tjerë s’kanë dashur që dikusht tjetër të udhëheqë atë. S’e ka pasur autoritetin absolut mbi UÇK-në”, ka shtuar tutje Dugolli.

Marrëveshja e Rambujesë u mbajt afër Parisit në Francë, gjatë periudhës 6 shkurt-23 mars 1999 dhe kishte për qëllim të gjente një zgjidhje paqësore për krizën në Kosovë, që në atë kohë ishte përshkallëzuar në konflikt të armatosur mes forcave serbe dhe Ushtrisë Çlirimtare të Kosovës.

Ajo u organizua nga Grupi i Kontaktit (SHBA, Mbretëria e Bashkuar, Franca, Gjermania, Italia dhe Rusia)./S.K/EO/

Prokuroria Themelore në Prishtinë, Departamenti për Krime të Rënda, njoftoi opinionin publik se pas përfundimit të hetimeve ka ngritur aktakuzë kundër katër të pandehurve për veprën penale “Vrasje e rëndë”  lidhur me nenin 31 të Kodit Penal të Republikës së Kosovës (KPRK).

Sipas aktakuzës, të akuzuarit në bashkëkryerje privojnë nga jeta të ndjerin E.G., dhe Z.G.,ku me dashje dhe vetëdije kanë vënë në rrezik edhe jetën e personave të tjerë me datë 26.03.2024 rreth orës 21:10 minuta në rrugën ‘’Butrinti’’, në Prishtinë.

I pandehuri L.H. ndodhet në masën e paraburgimit, ndërsa ndaj të pandehurve N.B., A.B. dhe K.G. është ngritur aktakuzë në mungesën e tyre për shkak se ndodhen ende në arrati.

Prokuroria ka ndërmarrë të gjitha veprimet e nevojshme për sigurimin e prezencës së të pandehurve në procedurë, mirëpo të njëjtit ndodhen ende në arrati me qëllim shmangien e organeve të drejtësisë./S.K/EO/

Ambasadori i Bashkimit Evropian në Kosovë, Aivo Orav, gjatë ditës së sotme është takuar me gjyqtarin Zenel Leku, kryetar i Panelit për Ankesa dhe Parashtresa të Zgjedhjeve (PZAP).

Kështu është njoftuar përmes një postimi në Facebook, ku është shtuar se Orav ka ritheksuar mbështetjen e BE-së për punën e vazhdueshme dhe transparente të Panelit në ruajtjen e integritetit të zgjedhjeve, pavarësisht presioneve politike.

Po ashtu, në postim theksohet se Orav ka deklaruar se kjo është jetike për demokracinë e Kosovës dhe të ardhmen e saj evropiane.

‘‘Sot, Ambasadori i Bashkimit Evropian në Kosovë, Aivo Orav, u takua me gjyqtarin Zenel Leku, Kryetar i Panelit për Ankesa dhe Parashtresa të Zgjedhjeve (PZAP).

Ai ritheksoi mbështetjen e Bashkimit Evropian për punën e vazhdueshme dhe transparente të Panelit në ruajtjen e integritetit të zgjedhjeve, pavarësisht presioneve politike.

Ambasadori theksoi se kjo është jetike për demokracinë e Kosovës dhe të ardhmen e saj evropiane.

Ndryshe, gjyqtari Zenel Leku ditë më parë ka qenë cak i sulmeve nga ana e Lëvizjes Vetëvendosje.

Anëtari i LVV-së në Komisionin Qendror të Zgjedhjeve, Alban Krasniqi, në një mbledhje të KQZ-së, duke folur lidhur me çështjen e certifikimit të Listë Serbe për zgjedhjet lokale, ka sulmuar Lekun.

Krasniqi gjatë mbledhjes kishte deklaruar se gjyqtari Leku e ka emrin pothuajse si të kryetarit të Listës Serbe, Zlatan Elek.

“Unë kam dërguar e-mail zyrtar te ai personi që e ka emrin gati si Zlatan Eleku, qashtu dul edhe me mënyrën se si ka dirigju me këtë proces. Zenel Leku, a kush është ky kryesuesi”, tha ai.

Ndaj kësaj gjuhe të Krasniqit kishte reaguar edhe Gjykata Supreme.

Kjo gjykatë e kishte dënuar gjuhën e anëtarit të VV-së dhe se kishte konsideruar se deklarata të tilla janë të papranueshme dhe përbëjnë sulm të drejtpërdrejtë ndaj integritetit të një gjyqtari./S.K/EO/