Juventusi ka njoftuar zyrtarisht shitjen e mesfushorit Douglas Luiz te skuadra e Ligës Premier, Nottingham Forest, në një marrëveshje të përhershme, për një shumë totale prej 31.5 milionë eurosh.

Bianconerët kanë dhënë një shpjegim të plotë të detajeve financiare të përfshira në transferimin e brazilianit te klubi anglez.

Douglas Luiz do të kalojë në një marrëveshje huazimi për një sezon me një kosto prej 3 milionë eurosh, me një detyrim blerje të vendosur në 25 milionë euro, i cili paguhet në katër këste, plus bonuse deri në 3.5 milionë euro, të cilat nëse arrihen, do ta çojnë koston e plotë të marrëveshjes deri në 31.5 milionë euro.

Zonja e Vjetër ka vendosur të ulë humbjet e saj nga braziliani, i cili u bashkua me klubin italian për një tarifë prej 50 milionë eurosh nga Aston Villa verën e kaluar. Douglas pati vështirësi të linte përshtypje gjatë kohës së tij në Serie A dhe luajti vetëm tri herë si titullar në ligë sezonin e kaluar.

Te Nottingham Forest janë të lumtur me transferimin e tij dhe presin të shkëlqej sikurse gjatë kohës së tij te Aston Villa.

Klubi katalunas, Barcelona ka njoftuar zyrtarisht se blinduar me kontratë të re mbrojtësin Jules Kounde.

Kounde nënshkroi zgjatjen e kontratës së tij deri në vitin 2030 këtë të enjte.

Mbrojtësi i Barçës, i veshur elegant, tregoi ambicien, teksa pranoi se Liga e Kampionëve nuk është një obsesion, por është objektivi dhe, siç thonë në Francë, qielli është limiti.

“Jam shumë i lumtur që rinovova kontratën. Ishte mjaft e thjeshtë. Jam shumë i lumtur”, ka thënë fillimisht Kounde.

“Qëllimet? Qielli është limiti, siç themi në Francë. Jemi me fat që jemi në një klub që garon për çdo titull. Do të synojmë më shumë për të fituar, madje edhe më shumë se sezonin e kaluar”, përfundoi mbrojtësi francez.

Arsenali ka rënë dakord për një marrëveshje me vlerë deri në 67.5 milionë funte për Eberechi Eze dhe duket se është gati ta shfrytëzojë në mënyrë sensacionale transferimin e sulmuesit anglez nga Tottenham.

Kuptohet që skuadra e Mikel Artetas iu afrua Crystal Palace për Eze pasi Kai Havertz pësoi një dëmtim në gju gjatë fitores së Arsenalit kundër Manchester United të dielën, shkruan TheGuardian, transmeton KosovaPress.

Arsenali po vazhdon të vlerësojë dëmtimin, ka frikë se sulmuesi gjerman mund të mungojë për një periudhë të zgjatur, edhe nëse indikacionet e para tregojnë se nuk është serioz. Por, pasiguria e shtyu Arsenalin të përshpejtonte interesin e tyre për Eze, me burime që tregojnë se kanë mbetur në kontakt të vazhdueshëm me përfaqësuesit e 27-vjeçarit gjatë gjithë verës.

Tottenham dukej në pozicionin e favorshëm për ta transferuar atë pasi rriti interesin e tyre gjatë fundjavës dhe besohet se ka rënë dakord për një marrëveshje me vlerë afër klauzolës së tij të lirimit prej 68 milionë funtesh, e cila skadoi javën e kaluar.

Me Artetën e etur për të shtuar përforcimet e tij sulmuese ndërsa përpiqen të bëhen kampionë për herë të parë që nga 2004, kuptohet se drejtori sportiv, Andrea Berta, dhe nënkryetari, Tim Lewis, kontaktuan Palace të mërkurën për të larguar rivalët e tyre të Londrës veriore.

Klubi italian, Interi thuhet se ka punuar në heshtje kohëve të fundit dhe është shumë afër t’i konfirmojë dy transferime ‘Mister X’ ditëve të ardhshme.

Nerazzurrët kanë kompletuar në fillim të afatit kalimtar transferime si Petar Sucic, Luis Henrique dhe Ange-Yoan Bonny këtë verë, por tifozët e tyre janë ende të pakënaqur me skuadrën.

Problemi është se për shkak të peripecive midis negociatave të lodhshme, drejtuesit e Interi dështuan ta transferojnë Ademola Lookman nga Atalanta.

E çuditshme por e vërtetë, Interi nuk ka “gatuar një pjatë të re” për gjashtë javë dhe kjo ka filluar t’i stresoj tifozët që duan nënshkrime të reja, madje edhe më shumë pas shumë shitjeve të suksesshme të klubit.

Sipas Gazzetta dello Sport, nuk do të duhet të presin gjatë, pasi drejtuesit e Nerazzurrëve kanë punuar në heshtje për t’i marrë ata në fazat e fundit: një mesfushor “i kompletuar” dhe një mbrojtës i ri do të mbërrijnë shumë shpejt.

Gazzetta dello Sport nuk jep emra por shton se janë dy lojtarë “Mister X” nga ligat e huaja e janë duke u mbajtur të fshehur emrat për të shmangur interesimin nga klubet tjera dhe bujën mediatike. Këto dy transferime thuhet se do t’i kushtojnë Interit plotë 80 milionë euro dhe me këto dy prurje mund të mbyllet afati kalimtar për klubin nga Giuseppe Meazza.