Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Dr. Sali Berisha

12 gusht 1993

Sali Berisha kërkoi që Kosova të vihet nën protektorat të OKB-së

Në një deklaratë që lëshoi dje në Tiranë rreth incidenteve më të reja në kufirin midis Shqipërisë dhe Kosovës, që i shkaktoi ushtria serbe, presidenti i Shqipërisë, dr.Sali Berisha thotë:

Kohët e fundit autoritetet serbe kryen një akt provokativ kundër Republikës së Shqipërisë. Më 6 gusht 1993, ushtarakët serbë në kufirin e Shqipërisë me Kosovën, krejt të paprovokuar dhe pa asnjë paralajmërim, hapën zjarr dy herë brenda ditës mbi patrullat shqiptare të kufirit dhe mbi civilët shqiptarë, që ndodheshin në brendësi të territorit shqiptar, duke plagosur tre persona, dy ushtarë e një civil, dy prej tyre rëndë. Këto rrethana të incidentit u verifikuan e u konfirmuan nga Misioni vëzhgues i KE-së.

Kësaj ngjarjeje i parapriu paraqitja e një note Ministrisë së Punëve të Jashtme të Shqipërisë nga ana e Ministrisë së Punëve të Jashtme të Beogradit, ku paraqiteshin ankesa për tri incidente që gjoja ishin provokuar kohët e fundit nga pala shqiptare në kufirin e përbashkët. Asnjë nga rastet e paraqitura nuk kishte një bazë reale dhe kjo u konfirmua edhe nga Misioni vëzhgues i KE-së. Vlen të përmendet se vrajset në kufi të qytetarëve shqiptarë nga ana e forcave të armatosura serbe, janë një ngjarje e përsëritur. Rasti më mizor ishte pa dyshim ai fundit të prillit ’93, kur natën e vizitës së Papës në Shqipëri, tetë të rinj të paarmatosur nga Shqipëria u kapën në kufi dhe u ekzekutuan nga ushtarakët serbë. Gjithsej nga provokime të tilla qysh nga fillimi i vitit 1992, janë vrarë rreth 23 qytetarë shqiptarë dhe plagosur 4 të tjerë.

Gjithashtu, javën e fundit shënohet një rritje e konsiderueshme e terrorizmit shtetëror serb në Kosovë mbi popullsinë shqiptare, që është shprehur në një shumëfishim të numrit të zakonshëm të sulmeve policore ndaj banorëve. Nuk kanë munguar as provokimet e forcave ultranacionaliste të V.Sheshelit, që duke organizuar prita e sulme mbi policët serbë në Kosovë, janë munduar t’ua hedhin fajin shqiptarëve, tashmë të njohur për rezistencën e tyre civile e paqësore.

Këto provokacione të përsëritura e në rritje, si dhe valët e ultranacionalizmit që kanë shpërthyer edhe në vende të tjera, e që kërkojnë partneritet me regjimin serb, dëshmojnë për një strategji të Beogradit e të miqve të tij në rajon, që synojnë të rrisin tensionin e destabilizimin në Jug të Ballkanit e përhapjen e luftës.

Unë i bëj thirrje Këshillit të Sigurimit, NATO-s, si dhe organizatave të tjera ndërkombëtare, që sa më shpejt të marrin masa për parandalimin e shpërthimit të konfliktit në Jug të Ballkanit, që pa dyshim do të përfshinte të gjithë Gadishullin. Ne përsërisim me këtë rast pikëpamjen tonë, se zgjidhja e çështjes së statusit të Kosovës mund të arrihet duke kushtëzuar me të heqjen e embargos ndaj Serbisë dhe duke vënë Kosovën nën kontrollin e NATO-s ose të OKB-së, tha presidenti i Shqipërisë, dr.Sali Berisha.

12 gusht 1994

Në territorin shqiptar u kapën tre ushtarë të Jugosllavisë së vetëshpallur

Në një zonë kufitare brenda territorit të Republikës së Shqipërisë njësitë kufitare shqiptare kapën dhe çarmatosën tre ushtarë të Jugosllavisë së vetëshpallur.

Televizioni Shqiptar transmetoi pamje të ushtarëve serbë dhe njoftoi se në sektorin ku ata u kapën, ka pasur edhe më parë tentativa nga ushtarët serbë për të kaluar brenda kufirit shqiptar.

12 gusht 1995

SHBA-të paralajmërojnë Serbinë që të mos sistemojë refugjatë serbë në Kosovë

SHBA-të po i paralajmërojnë zyrtarët serbë që të mos sistemojnë refugjatët serbë që janë duke u larguar nga Kraina, në rajonin e Kosovës, që banohet kryesisht me populllsi shqiptare.

Kosovë konsiderohet si një shkëndijë e mundshme për konfliktin ballkanik, thuhej në një korrespondencë të transmetuar në emisionet e “Zërit të Amerikës”.

Në emisionin shqip u transmetuan deklaratat e zëdhënësit të Stejt departamentit të shtetit amerikan lidhur me paralajëmimet serbe për vendosjen e disa refugjatëve serbë në Kosovë.

Në korrespondencë thuhej:

“Departamenti amerikan i shtetit është i shqetësuar nga njoftimet lidhur me planet e Serbisë për vendosjen e disa refugjatëve serbë nga Kroacia në Kosovë dhe u kanë kërkuar diplomatëve amerikanë që të sqarojnë qëllimet e qeverisë së Beogradit.

Rreth 150 mijë refugjatë serbë kanë ardhur në Serbi nga Kroacia, kur forcat e ushtrisë kroate pushtuan rajonin e Krainës që mbahej nga serbët e Kroacisë.

Sipas autioritetve të Beogradit, Kosova duhet të trajtohet si çdo rajon tjetër i Serbisë dhe do të marrë një pjesë të refugjatëve të sapoardhur.

90 përqind e popullsisë së Kosovës përbëhet nga shqiptarët. Presioni i egër serb ndaj popullsisë shqiptare të Kosovë ka ardhur duke u rritur që kur humbi autonominë pesë vjet më parë.

Zëdhenësi i departamantit të shtetit, Dejvid Xhonson thotë se çdo përpjekje e autoriteteve të Beogradit për të ndryshuar përbërjen e popullsisë së Kosovës, duke sjellë aty refugjatë serbë, vetëm do ta keqësonte gjendjen, që edhe kështu është karakterizuar me përleshje të ashpra.

Dejvid Xhonson tha: “Shumë kohë para se të fillonte kriza e tanishme e refugjatëve, Beogradi filloi një përpjekje tepër të pasuksesshme për të kolonizuar Kosovën me serbë etnikë, në mënyrë që të ndryshonte përbërjen demografike të rajonit.

Gjendja në Kosovë është e tendosur. Prej shumë kohësh ajo shihet si një fuqi baroti, shpërthimi i së cilës mund të çonte në zgjerimin e konfliktit ballkanik. Ne jemi të mendimit se çdo orvatje për të sistemuar një numër të madh të refugjatëve serbë nga Kroacia në Kosovë do të ishte një politikë jashtëzakonisht e padobishme”.

12 gusht 1997

Në Mitrovicë një civil serb plagosi me armë zjarri një të ri shqiptar

Mbrëmë rreth orës 18:00, në afërsi të dispanzerit të fëmijëve në Mitrovicë, një civil serb plagosi me armë zjarri Blerat Gani Mikullovci (18) nga Mitrovica.

KI i Degës së LDK-së në Mitrovicë njofton se civili serb, së pari kërcënoi disa të rinj shqiptarë që po luanin basketboll që të mos vazhdojnë lojën, dhe pastaj shkoi në banesën e tij prej nga me armë zjarri plagosi Bleratin.

Pas dhënies së ndihmës në spitalin e Mitrovicës, Blerati u lëshua në shtëpi. Jeta e tij nuk është në rrezik.

12 gusht 1998

Vazhdon ofensiva serbe në komunën e Deçanit

– Supozohet se ka të vrarë, por deri tash dihen emrat e tre të vrarëve, ndërsa një i vrarë i paidentifikuar është në Shaptej. – Numër i madh i të plagosurve, dihet emrat e 45 prej tyre. – Forcat e UÇK-së u kanë shkaktuar humbje të mëdha forcave serbe. – Mbi 100 mijë banorë në qiell të hapur dhe të rrezikuar nga masakrat serbe

Ëdhe sot, ditën e katërt me radhë, forcat serbe po sulmojnë pandërprerë fshatrat e komunës së Deçanit. Në sulmin kundër fshatrave të kësaj komune, forcat serbe kanë angazhuar mbi 250 automjete ushtarake nga të gjitha llojet, njofton KI i Degës së LDK-së në Deçan.

Në këtë ofensivë të egër të forcave serbe janë përfshirë fshatrat Gllogjan, Gramaçel, Baballoç, Shaptej, Dubravë, Llukë e Epërme, Irzniq, Prejlep, Carrebreg i Ulët, Beleg, Kodrali, e fshatra të tjera. Kundër këtyre fshatrave, përveç këmbësorisë serbe, janë angazhuar edhe njësitet tankiste dhe njësitet tjera serbe, e në veçanti artileria e rëndë.

Bëhet e ditur se gjatë këtyre luftimeve, që konsiderohen nga më të ashprat që nga fillimi i luftës, janë vrarë disa shqiptarë: Nexhat Humaj, Xheladin Mushkolaj, një i paidentifikuar në fshatin Shaptej, Naim M. Nimanaj nga Gllogjani dhe disa të tjerë, emrat e të cilëve ende nuk dihen.

I njëjti burim njofton se gjatë këtyre luftimeve janë plagosur mbi mbi 40 shqiptarë: Bashkim Aliaj, Arian Malaj, Yll Morina, Elan Çeragjiu, Januz Rexhaj, Bashkim Sejfiaj, Genc Rexhaj, Sabit Kastrati, Ali Sylaj, Muhamet Haskaj, Fatos Salihaj, Jashar Zogaj, Haxhi Mustafaj, Ismet Haskaj, Gëzim Dërvishaj, Drilon Haskaj, Vaze Lokaj, Hajdar Demhasaj, Sami Lokaj, Jashar Zogaj, Idriz Rexhaj, Isuf Haskaj, Leonard Aliaj, Bekim Vishaj, Xhevat Zenuni, Shahe Bajramaj, Zade Bajramaj, Isuf Aliaj, Ismet Aliaj, Jeton Halilaj, Burhan Halilaj, Hajdar Demhasaj, Jeton Lushaj, Afërdita Hajdaraj, Arben Hajdaraj, Driton Mustafaj, Gani Ukaj, Luan Qerimaj, Astrit Ahmetaj, Zenun Mataj, Lulzim Mataj, Ismet Neziraj, Gani Beqaj, Nezir Lushaj, Demë Ramaj e të tjerë.

Në anën tjetër, njësitet e Ushtrisë Çlirimtare të Kosovës dhe forcat e vetëmbrojtjes shqiptare i kanë shkaktuar armikut humbje të mëdha, si në njerëz ashtu edhe në teknikë ushtarake.

Njoftohet se në pozitë shumë të vështirë edhe në këto momente të rënda është popullata civile shqiptare e larguar nga fshatrat e tyre ku po zhvillohen luftimet. Bëhet e ditur se rreth 25 mijë civilë shqiptarë janë vendosur në fshatrat Isniq, Prapaqan, Broliq, Lumbardh, Dubovik dhe fshatra të tjera, ndërsa shumica e tyre po qëndrojnë nën qiellin e hapur, pa ushqime, ilaçe e gjësende të tjera më elementare.

Veç këtyre banorëve, në këtë hapësirë tash për tash po jetojnë edhe rreth 80 mijë banorë shqiptarë të komunës së Pejës, Deçanit dhe Gjakovës, tek të cilët ekziston frika e ndonjë masakri të forcave serbe.

Popullata civile shqiptare, apelon te bashkësia ndërkombëtare që të ndërhyjë urgjentisht te okupatori serb, në mënyrë që të ndalet një masakër e mundshme kundër popullatës së pambrojtur shqiptare.

Deçan: 7 shqiptarë të vrarë e 49 të plagosur

Forcat serbe ua kanë vënë zjarrin shumë fshatrave. Banorët e kësaj komune bëjnë apel për masa urgjente prevetive për të evituar masakrat e forcavse serbe ndaj tyre

Fshatrat: Glloxhan, Baballoq, Gramaqel, Shaptej, Dubravë, Prekollukë, Irzniq, Prejlep, Carrabreg, Drenoc, Kodrali e Pozhar janë përfshirë nga zjarri. Forca të mëdha të ushtrisë e policisë serbe, të shoqëruara me tankse autoblinda e mjete të tjera të motorizuara kanë hyrë në këto fshatra dhe ua kanë vënë zjarrin. Më se 25 banorë të këtyre dhe të fshatrave të tjera që ishin strehuar në fshatrat e përfshira në zjarr janë strehuar në fshatrat: Isniq, Prapaqan, Broliq, Lumbardh e Dubovik, njofton Komisioni për Informim i Degës së LDKsë në Deçan.

I njëjti burim bën të ditur se deri tani dihet se janë vrarë 7 shqiptarë. Përveç katër të vrarëve që ishin identifikuar më heret, janë identifikuar edhe trupat pa jetë të Maxhun (Mujë) Çekajt nga Irzniqi, Gëzim Dervishajt e Orhan Halilajt nga Glloxhani. Ndërkaq, numri i të plagosurve ka arritur në 49 vetë.

Kryetari i këtij komisioni, Osman Cacaj, i deklaroi QIK-ut se banorët e komunës së Deçanit u bëjnë apel të gjithë faktorëve ndërkombëtarë që të ndërmarrin masa urgjente preventive për të penguar masakrat që u kanosen atyre nga forcat ushtarake e policore dhe nga paramilitarët serbë.

Një mjet i pashpërthyer është gjetur gjatë punimeve me ekskavator nga një punëtor në Rahovec.

Në vendin e ngjarjes kanë dalë menjëherë njësitet e deminimit të KFOR-it dhe Forcës së Sigurisë së Kosovës (FSK), të cilat kanë bërë tërheqjen e mjetit në mënyrë të sigurt.

Nga ky rast nuk është raportuar për ndonjë incident. /E.A/

Interesimi i të rinjve për të ndërtuar karrierë në industrinë moderne të muzikës po rritet çdo ditë, deri sa gjithnjë e më shumë prej tyre po kërkojnë mundësi akademike që talentin dhe pasionin për muzikën ta shndërrojnë në profesion. Në këtë drejtim, programi Muzikë Moderne, Produksion Digjital dhe Menaxhment në UBT po tërheq interesim të madh, duke ofruar një qasje ku muzika është në linjë me teknologjinë, krijimtarinë dhe menaxhimin.

Programi është i pari i këtij lloji në Kosovë dhe është i ideuar në përshtatje me zhvillimet e industrisë moderne të muzikës, e cila sot përfshin jo vetëm performancën artistike, por edhe produksionin digjital, teknologjinë e zërit, platformat online, menaxhimin e artistëve, organizimin e ngjarjeve, festivalet, televizionin, radion, filmin dhe teatrin.

Një nga veçoritë kryesore të programit është mundësia që studentët të orientohen në fusha specifike të industrisë përmes pesë specializimeve kryesore: Audio Produksion, Performancë Instrumentale, Performancë Vokale, Kompozim dhe Menaxhim në Muzikë.

Këto specializime u mundësojnë studentëve të ndërtojnë profilin e tyre profesional në përputhje me talentin, interesat dhe objektivat e tyre të karrierës. Në këtë mënyrë, një student mund të fokusohet në krijimin dhe produksionin muzikor, një tjetër në performancën vokale ose instrumentale, ndërsa të tjerë mund të zhvillohen në kompozim apo në menaxhimin e artistëve dhe projekteve muzikore.

Programi fokusohet në zhvillimin e aftësive praktike dhe krijuese, duke i përgatitur studentët jo vetëm për të kuptuar muzikën, por edhe për ta krijuar, prodhuar, interpretuar dhe menaxhuar atë në mënyrë profesionale. Përmes kombinimit të njohurive teorike, praktikës aplikative, projekteve reale, punëtorive dhe bashkëpunimit me industrinë, studentët krijojnë përvojën e duhur për të hyrë lehtësisht në tregun global të muzikës sot.

Në veçanti, Audio Produksioni i orienton studentët drejt botës së produksionit muzikor dhe teknologjisë së zërit, ndërsa Performanca Instrumentale dhe Performanca Vokale synojnë zhvillimin e interpretuesve të aftë për skena dhe formate të ndryshme profesionale.

Në fushën e Kompozimit, studentët zhvillojnë krijimtarinë muzikore dhe aftësinë për të krijuar vepra që mund të gjejnë aplikim në produksionin muzikor, film, teatër, animacion dhe projekte të tjera artistike. Ndërkaq, Menaxhimi në Muzikë fokusohet në dimensionin profesional dhe organizativ të industrisë, duke përfshirë menaxhimin e artistëve, projekteve dhe ngjarjeve muzikore.

Një element i rëndësishëm i programit është lidhja e drejtpërdrejtë ndërmjet studimeve dhe praktikës profesionale. Studentët kanë mundësi të zhvillojnë përvojë në studio, festivale dhe institucione muzikore, si dhe të bashkëpunojnë me partnerë ndërkombëtarë dhe aktorë të industrisë.

Përmes kësaj qasjeje, UBT synon të përgatisë profesionistë që mund të angazhohen në një gamë të gjerë rolesh, nga producentë dhe inxhinierë të tingullit, kompozitorë, këngëtarë dhe instrumentistë, deri te menaxherë artistësh, agjentë të marrëdhënieve me publikun dhe profesionistë të organizimit të projekteve dhe ngjarjeve muzikore.

Programi i përgjigjet gjithashtu transformimit të industrisë muzikore, ku zhvillimi i teknologjisë dhe platformave digjitale ka ndryshuar mënyrën se si muzika krijohet, prodhohet, shpërndahet dhe menaxhohet. Për këtë arsye, studentët pajisen me njohuri dhe shkathtësi që u mundësojnë të jenë pjesë aktive e këtij transformimi.

Policia e Kosovës ka regjistruar pesë raste të dhunës në familje në disa rajone të vendit, ku përfshihen sulme fizike, psiqike dhe tentativa për sulm. Rastet janë raportuar në Prishtinë, Fushë Kosovë, Istog, Deçan dhe Mitrovicë të Jugut.

Në Fushë Kosovë një grua ka raportuar se është sulmuar fizikisht nga një burrë. Pas intervistimit, me vendim të prokurorit, rasti vazhdon në procedurë të rregullt.

Në Prishtinë një burrë ka raportuar se është sulmuar fizikisht nga një grua. Rasti ndodhet nën hetime nga njësitë përkatëse.

Ndërsa në Istog një burrë dyshohet se ka ushtruar dhunë psiqike ndaj dy personave, një gruaje dhe një burri. Rasti vazhdon të hetohet.

Edhe në Deçan një grua ka njoftuar se bashkëshorti i saj ka tentuar ta sulmojë fizikisht. I dyshuari nuk është takuar në shtëpi nga policia dhe rasti mbetet nën hetime.

Një grua në Mitrovicë e Jugut ka raportuar se është sulmuar fizikisht nga bashkëshorti i saj. Rasti është duke u hetuar nga njësitë relevante policore. /E.A/