Ministria e Brendshme njoftoi se është ndaluar një banor i Strumicës, i cili, duke drejtuar një automjet nën ndikimin e alkoolit në gjak prej 1.75 promil, mori pjesë në një aksident trafiku në të cilën humbi jetën një 19-vjeçare me në një motoçikletë.

“Më 13.08.2026, në SPB Strumicë u raportua se rreth orës 23:30 në rrugën kryesore të pikës kufitare Strumicë – Novo Sellë, në zonën e fshatit Tërnovë, ka ndodhur një aksident trafiku midis një automjeti pasagjerësh “Seat Leon” me targa të Strumicës, të drejtuar nga S.B. (29) nga Strumica dhe një motoçiklete pa targa, të drejtuar nga A.D. (19) nga fshati Ilovicë.

Në aksident, 19-vjeçarja K.J., pasagjere në motoçikletë, vdiq në vendngjarje nga lëndimet e marra, ndërsa vdekja u konfirmua nga një mjek nga Shërbimi i Ndihmës së Shpejtë Mjekësore. Ndërsa, drejtuesi i motoçikletës, A.D., pësoi lëndime trupore, të cilat u konfirmuan në Qendrën Mjekësore të Strumicës”, njoftojnë nga policia.

Shoferit të automjetit “Seat” i është bërë testi i alkoolit dhe është konstatuar se ai ka qenë nën ndikimin e alkoolit, përkatësisht i janë matur 1.75 promil alkool në gjak dhe është privuar nga liria. Gjithashtu është konstatuar se shoferi i motoçikletës, A.D., drejtonte një motoçikletë të paregjistruar dhe pa leje drejtimi.

Trafiku në autostradën Strumicë-GSH Novo Sellë, pranë Turnovës, është ndërprerë në të dy drejtimet në periudhën nga ora 00:00 deri në orën 02:30. Me urdhër të prokurorit publik, trupi i të ndjerës është dërguar për autopsi./Telegrafi/A.K/

Një person ka humbur jetën dhe dy të tjerë kanë mbetur të lënduar si pasojë e një aksidenti trafiku në rrugën Shtime-Lipjan.

Mësohet se aksidenti ka ndodhur të enjten, rreth orës 10:00, në fshatin Grackë e Vogël, ku janë përfshirë dy vetura.

Siç raportojnë mediat, si pasojë e përplasjes, personi që ka humbur jetën është një 72-vjeçar, ndërsa një grua është lënduar rëndë, transmeton KosovaPress.

Në vendin e ngjarjes kanë dalë ekipet kompetente, ndërsa me autorizim të prokurorit janë ndërmarrë veprimet e nevojshme hetimore.

Trupi i viktimës është dërguar për obduksion në Institutin e Mjekësisë Ligjore. /A.K/

Prokuroria Speciale ka kërkuar nga Gjykata që t’ia caktojë masën e paraburgimit prej një muaji Fehim Salit, i dyshuar për veprën penale “Spiunazhi”.

Seanca dëgjimore ndaj Salit ka nisur në orën 09:00. Ai ishte arrestuar të enjten në mëngjes në pikën kufitare në Merdar, teksa dyshohet se po tentonte të kalonte në drejtim të Serbisë.

Sali dyshohet se për një periudhë të gjatë ka bashkëpunuar me Agjencinë serbe të Inteligjencës (BIA) dhe se ka mbajtur kontakte me zyrtarë të kësaj agjencie.

Pas arrestimit të tij, Policia e Kosovës dhe Prokuroria Speciale kanë bastisur shtëpinë e të dyshuarit në Dragash, ku, sipas autoriteteve, janë gjetur dhe sekuestruar prova materiale.

Sali punonte si arsimtar në shkollën serbe “9 Maji” në fshatin Rapçë të Dragashit. Më herët, ai kishte qenë i angazhuar për dy mandate në Këshillin Konsultativ për Komunitete pranë Presidencës së Kosovës, nga i cili ishte shkarkuar në vitin 2024.

Gjykata pritet të vendosë lidhur me kërkesën e Prokurorisë Speciale për caktimin e masës së paraburgimit./A.K/

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Mitrovica

14 gusht 1993

Dyshohet se forcat serbe plagosën e vranë shqiptarë në Mitrovicë

Sot, në Ditën e Tregut, duke filluar nga ora 12,30, rreth 600 policë e ushtarë serbë, bllokuan qytetin e Mitrovicës.

Njoftohet për një ndërhyrje brutale dhe të përgjakshme të forcave serbe mbi qytetarët shqiptarë. Janë bllokuar kuartet ku bëhet tregtia, si Tregu I dhe II, Tregu i Bagëtive, Stacioni i Autobusëve, Stacioni i Trenit, si dhe ka ndërhyrje nëpër lokalet private të shqiptarëve.

Informatat e para bëjnë me dije se forcat serbe, kanë shtënë me revole dhe pushkë automatike në qytetarë.

Njoftohet për shumë persona të plagosur. Dyshohet se ka edhe të vrarë.

Policia po rrah këdo që po zë rrugëve të Mitrovicës.

Dega e LDK-së në Mitrovicë, nuk mundi të japë asnjë supozim se me çfarë preteksti e ndërmorën këtë ekspeditë forcat ushtarake e policore serbe.

Situata në Mitrovicë është tepër e tensionuar.

Në këtë qytet, policia serbe edhe mbrëmë ndërhyri në mënyrë barbare kundër më se 60 pjesëmarrësve të një manifestimi kulturor.

14 gusht 1995

Refugjatët vendosen me dhunë në banesat e shqiptarëve

Në banesën e Mustafë Morinës nga Vitia, ish-punëtor i “Vineksit”, pasi ajo u thye nga persona të panjohur, u vendos me dhunë një familje refugjate nga Kraina, njofton Komisioni për Informim i Degës së LDK-së në Viti.

Në njoftim thuhet se Mustafë Morina, në këtë banesë jeton që nga viti 1979, ndërsa në momentin e vendosjes së familjes refugjate nuk ndodhej në banesën e tij.

Tash atij në banesë i kanë mbetur të gjitha orenditë, ndërsa “banuesit e rinj” në derë kanë vendosur kyçje të re.

Duke iu referuar një shkrimi të gazetës “Jedinstvo” të ditës së shtunë për vendosjen në komunën e Vitisë të 300 refugjatëve serbe, KI i Degës së LDK-së në këtë komunë njofton se si lokacione ku do të vendosen refugjatët më së shumti përmenden “Agromorava”, “Gornja Morava”, “Banja e Kllokotit”, por edhe objekti i Qendrës shkollore, nga e cila në vititn 1991 u dëbuan nxënësit shqiptarë.

 14 gusht 1997

Vazhdon largimi i shqiptarëve nga vendet e tyre të punës

Katër shqiptare, punëtore të Entit të sigurimit social të komunës së Prishtinës, u pushuan nga puna më 11 gushti, me justifikim se për punën e tyre më “nuk ka nevojë”.

Zejnepe Ismajli, Fexhrije Rexhepi, Jeta Neziri e Lida Visoka, që kanë stazh pune prej 12-18 vjet, u ankuan në vendimet për largim nga puna, por morën përgjigje negative.

Këto punëtore u larguan vetëm pse janë shqiptare. Thuhet se në vendet e tyre të punës u pranuan punëtorë serbë.

14 gusht 1998

Gjatë dy ditëve në komunën e Deçanit forcat serbe kanë vrarë 12 dhe kanë plagosur mbi 50 shqiptarë

Më 11 e 12 gusht të këtij viti, forcat e ushtrisë, policisë dhe paramilitarëve serbe në komunën e Deçanit kanë vrarë 12 dhe kanë plagosur mbi 50 shqiptarë, njofton Osman Cacaj, kryetar i KI të Degës së LDK-së në Deçan.

Bëhet e ditur se gjatë këtyre dy ditëve janë vrarë, Nexhat Humaj nga Baballoçi, Enver H. Halilaj nga Gllogjani, Orhan L. Halilaj nga Gllogjani, Naim M. Nimanaj nga Gllogjani, Xheladin Mushkolaj nga Gramaçeli, Gëzim Dërvishaj nga Irzniqi, Maxhun Malë Çekaj nga Irzniqi, Naser Idrizaj nga Kodralia, Artan I. Hasani nga Dubrava, Arben Lan Ahmetaj nga Gllogjani, Malë Avdyl Zenaj nga Irzniqi dhe një shqiptar edne i paidentifikuar në fshatin Shaptej.

I njëjti burim njofton se gjatë këtyre dy ditëve, forcat serbe kanë plagosur edhe mbi 50 shqiptarë.