Kryeministri Albin Kurti është shprehur i habitur me përgjigjen e menjëhershme të Këshillit Grevist të BSPK-së se greva do të vazhdojë, pavarësisht se ai shpalosi një ofertë të re për ta, që nuk nënkuptonte më shumë para, por përfshirje më të madhe të tyre në disa procese të tjera.
Kurti iu ofroi atyre që të jenë pjesë përmbajtjesore e diskutimit publik për Ligjin mbi pagat, bashkërisht të bëjnë reformën e sistemit pensional si dhe të shtojnë edhe 10 milionë euro të tjera për barnat esenciale.
Shefi i ekzekutivit tha se Këshilli Grevist kërkoi nga ai që të lëvizë, por sipas tij tashmë kanë lëvizur të paktën 10 herë në drejtim të nevojave dhe kërkesave të punëtorëve të arsimit. Ai shtoi se nuk është e vërtetë se ka mungesë të komunikimit në mes palëve.
“Në takim më është thënë ‘kryeministër lëviz’, por unë kam lëvizur të paktën 10 herë në drejtim të nevojave dhe kërkesave të sindikatave dhe punëtorëve të arsimit, andaj pikërisht për këtë arsye edhe njëherë kërkoj që nxënësit të shkojnë në shkolla, e mësimdhënësit të shkojnë në shkolla, të parët të mësojnë e të dytët të japin mësim. Nuk bënë bojkot e grevë shtetit sepse shkolla është shteti. Nuk është e vërtetë që nuk ka pas komunikim, nuk është se nuk ka pasur dialog dhe më së miri kjo gjë u pa sot, problemi që kemi nuk është për shkak të mungesës së dialogut apo komunikimit. Në takim disa herë mu tha që ‘ne të dalim prej kësaj situate, edhe ju, edhe ne’, edhe qeveria edhe SBAShK, unë besoj që në situatë të vështirë nuk është as qeveria e as SBAShK-u, por arsimit. Dhe unë jam këtu që ta ndihmoj arsimin, nuk mund të zhvillohet dialog social me preokupim prioritar për përfaqësuesit e organizatave që zhvillojnë dialogun social”, u shpreh kryeministri i Kosovës.
Kryeministri Kurti gjatë kësaj konference para gazetarëve derisa listoi investimet që kanë bërë në sektorin e arsimit u shpreh se tashmë grevistë u kanë thënë tri oferta.
Sipas tij, oferta parasheh përfshirjen përmbajtjesore të Këshillit Grevist në diskutime publike, bashkërisht të bëjnë reforma në sistemin pensional si dhe të shtimi i barnave esenciale.
“Ne ua thamë edhe tri gjëra sot përfaqësuesve të Këshillit Grevist për të cilët ata na premtuan se do ta pyesin anëtarësinë. Neve na u tha në takim që për këtë ofertë të qeverisë do të pyetet anëtarësia, posa dolën nga takimi deklaruan për medie që greva vazhdon, kur e pyetën anëtarësinë? Neve na thanë në takim që do ta presin anëtarësinë dhe oferta shtesë ishte kjo: Do të jenë pjesë përmbajtjesore e diskutimit publik për Ligjin mbi pagat dhe atyre ua dhamë lajmin të parët se këtë javë do të fillojë diskutimi publik sepse diskutimet preliminare po përfundojnë duke i përfshirë të gjitha komentet. Dhe dy të tjerat ishin që bashkërisht me BSPK do ta bëjmë reformën e sistemit pensional në mënyrë që të bëhet diferencimi i kategorive të ndryshme duke e hequr atë pragun famëkeq për 15 vjet pune edhe për këtë u zotuan sot dhe të tjera u zotuam që tek barnat esenciale do të shtojmë edhe 10 milionë euro. Ata thanë se do të konsultohen me anëtarësinë, kur dolën nga takimi thanë vazhdon greva, unë nuk e di çfarë anëtarësie është ajo e cila reduktohet ndoshta në një telefonatë”, theksoi Kurti.
Kurti tha se Jasharaj në takimin që zgjati rreth dy orë i kërkoi që ta ndihmonte si vëlla, por u shpreh se ka kaluar koha kur një kryeministër ka ndidmuar dikë si vëlla.
Për kërkesën prej 100 eurosh të sindikatave, kryeministri u shpreh se kjo është logjikë e shantazhit dhe të bërjes Pazar dhe nuk është aspak e drejtë.
“Ata me mua janë sjell thua se buxheti është i imi e janë paratë e mia, këto janë para të qytetarëve, më thoshin ‘na ndihmo si vëlla’. Si vëlla të ndihmoj privatisht, por unë jam kryeministër dhe ka kaluar koha kur kryeministri të bëhet vëlla, kur kryeministri të ndihmon si vëlla. 80% në Kosovë janë në sektorin privat ata e mbushin buxhetin, 20% janë në sektorin publik dhe nuk janë të gjithë mësimdhënës, mua më duhet të kem parasysh një qasje universale ndërkohë që unë ballafaqohesha me një dëshirë partikulare. Nuk bën të bankrotojë shteti, institucioni i këtillë është moskokëçarje për shëndetin financiar, shoqëror e ekonomik të mbarë shtetit. Kanë kërkuar 100 euro, ka qenë zero, ne kemi thënë 50, po o krejt o hiç, nuk është e drejtë kjo lloj logjike e shantazhit dhe e bërjes pazar. Nuk bën pazare kryeministri… Nuk do të duhej shteti të shantazhohej nga dikush që është më i zhurmshmi edhe jo për kushtet e punës e as për rezultate të performancës por për para e ne familjet e mësimdhënësve i kemi ndihmuar në shumë forma”, theksoi Kurti.
Kurti e ka konsideruar të palogjikshme që qeveria t’ju plotësojë plotësisht kërkesën e grevistëve, derisa shtoi se sindikatat duhet të festojnë e jo të bëjnë greva bazuar në ndihmën që i ka ofruar vazhdimisht.
“Proceduralisht i bie që sindikata e ka përdorur grevën si instrumentin e saj të parë, në të kaluarën ka raste kur SBASHK ka kërkuar rritje edhe prej 50% , por e ka ndërprerë grevën e dhe kur janë dakorduar për më pak se 10% rritje, në rastin e tanishëm kërkesa ka qenë për pagesë prej 100 euro, dhe ne e kemi bërë pakon e përballjes me inflacion që mund ta tejkalojë Projektligjin për paga në sektorin publik edhe jemi dakorduar për 50 euro sepse nënkupton se e ka takuar në mes kërkesën e sindikatave mbase edhe më shumë se aq. Të kërkosh përmbushje të plotë të kërkesës është edhe e palogjikshme edhe e rrezikshme, një sindikatë që i kërkon 100 euro, e i ka marr 50 euro dhe gjithë këto shtesa rrotull, 5% sivjet të bruto produktit dhe 4% të vitit të kaluar organizon festë, e jo grevë, nuk vazhdon grevë, por në ditët e javët në vijim do ta marrim vesh se çka është në pyetje. Nuk është në pyetja arsimi, nuk janë në pyetje arsimtarët, tha do të konsultohem me anëtarësinë dhe doli para juve”, tha ai.
Po ashtu, kryeministri i Kosovës njoftoi se gjatë kësaj jave del në diskutim publik Projektligji për pagat, i cili sipas tij i trajton me kujdes të veçantë mësimdhënësit dhe punëtorët e tjerë të arsimit.
Ai shtoi se me këtë projektligj i cili doli në konsultimet paraprake 8 ditë para grevës mësimdhënësit do të gëzojnë koeficientin më të lartë ndonjëherë.
Mëngjesin e sotëm, Kurti priti në takim Këshillin Grevist të BSPK-së të kryesuar nga Rrahman Jasharaj. Pas këtij takimi, ky i fundit u shpreh se nuk kanë arritur ndonjë pajtim rreth ndërprerjes së grevës në arsim dhe administratë publike.
Që nga 25 gushti administrata publike është në greva dhe nuk po ofrojnë shërbime për qytetarët, ndërsa nga 1 shtatori nuk ka nis as mësimi në shkollat e Kosovës i pasoj e po kësaj greve.
Lajmet nga UBT2 months ago
Lajmet nga UBT2 months ago
Lajmet nga UBT2 months ago
Lajmet nga UBT2 months ago