Kombëtarja e Kosovës në futboll do t’i zhvillojë dy ndeshjet e radhës në Ligën e Kombeve ku do të ballafaqohet fillimisht me Lituaninë në udhëtim dhe pastaj me Qipron në stadiumin “Fadil Vokrri” në Prishtinë.

Por, në konferencën për media, trajneri Franco Foda më shumë foli për zhvillimet të tjera brenda kombëtares, se sa për dy ndeshjet e radhës. Në fakt, që në hyrje të konferencës, Foda sqaroi edhe njëherë vendimin për prjashitmijn e Edon Zhegrovës, Florent Muslijës dhe Aro Muricit duke thënë se ky vendim u morë në bashkëpunim me Federatën e Futbollit të Kosovës.

“Këtë vendim e kanë marrë bashkë trajneri dhe federata duke ditur se këta tre lojtarë i kanë thyer rregullat e kombëtares dhe rrjedhimisht kundër lojës ndaj Qipros i kemi larguar”, u shpreh shkurtimisht Foda.

Më tutje, përzgjedhësi i “Dardanëv” tha se në dy ndeshjet e radhës Kosova duhet ta synojë vetëm fitoren dhe asgjë më pak.

“Nëse dëshirojmë ta fitojmë këtë grup, ne duhet t’i fitojmë që të dy ndeshjet. Fillimisht do të kemi para vetes disa seanca stërvitore ku do të shihet se gjatë javës si do të veprojmë kundër Qipros, a do të luajmë me dy sulmues apo me disa të tjerë. Kjo mbetet të shihet gjatë ushtrimeve të ardhshme. Por, nuk ka rëndësi se sa sulmues i kemi në sulm, një, dy apo tre, me rëndësi është që ta kemi posedimin e topit dhe bashkarisht me një lojë të përbashkët ta fitojmë ndeshjen dhe bashkarisht të kemi sukses”, theksoi më tutje Foda.

Të tre lojtarët e përjashtuar më pas kërkuan falje për veprimet e tyre përmes një letre të përbashkët, veprim ky që ngjalli dyshime nëse letra e përbashkët e tyre ishte origjinale apo e falsifikuar. Popr, menacheri i kombëtares, Bajram Shala siguroi se ato janë origjinale dhe se janë lehtësisht të verfikueshe.

“Kushdo që dyshon se ato nënshkrime janë të falsifikuara, Kosova ka institucione që besoj funksionojnë shumë mirë, mund t’i deponojë ankesat në institucionet përkatëse dhe ka institucione që e vërtetojnë edhe autorësinë e nënshkrimit edhe procedurat dhe gjithçka tjetër. Mendoj që nëse flasim për nivelin e ekipit kombëtar, të diskutohen gjërat të tilla për futbollistë që janë prezent në skuadër tregon qartazi mënyrën se si funksionon i tërë ambienti rreth ekipit kombëtar dhe është pothuajse pa asnjë lloj profesionalizmi të diskutohet atutenticiteti i nënshkrimit të njerëzve që janë prezent në kamp dhe në çdo moment mund të flasin nëse nënshkrimet janë të tyre ose jo”, tha Shala.

Ndaj Lituani, Kosova luan më 12 tetor, ndërsa ndaj Qipros tri ditë më vonë.

Shefi i Grupit Parlamentar të Partisë Demokratike të Kosovës (PDK), Abelard Tahiri ka thënë se kryeministri Albin Kurti po rrezikon pjesëmarrjen e Kosovës në mekanizma rajonal si CEFTA dhe Procesi i Berlinit.

Ai pas mbledhjes së Kryesisë së Kuvendit, tha se Kurti për shkak të paaftësisë së tij dhe politikave të gabuara i ka sjell sanksione vendit.

“Në këtë periudhë asgjë nuk duhet të merret shumë seriozisht se çka deklaron kryeministri Kurti, është në një fushatë zgjedhore, është në përfundim të mandatit të tij si kryeministër. Në katër vite tash duhet me pas parasysh edhe sikletin dhe presionin tij që ka këtë periudhë, sepse nuk po arrin të përfundojë as edhe një projekt të vetëm, po e le gjendjen më keq siç ka qenë…Sa i përket CEFTA-s mendoj që jemi pikërisht janë bërë 10 vite kur Kosova është bërë pjesë e iniciativës së Ballkanit Perëndimor që drejtohet nga Gjermania dhe Franca, dhe pas një këtyre viteve kemi arrit në një pikë ku Kosovës po i rrezikohet pjesëmarrja tutje pikërisht për shkak të paaftësisë së saj për të implementuar zotimet dhe detyrimet që dalin nga kjo marrëveshje. Ne nuk mund t’i ndihmojmë asgjë Kurtit në situatën ku e ka sjellë vendin, por, shpresojmë që komuniteti ndërkombëtar, BE-ja, ShBA-të ta ndalin në shtimin e sanksioneve ndaj vendit tonë, dhe besoj shumë se vendit do t’i jepim një qeveri të re që e nxerr nga kjo situatë…Shpresoj se këto sanksione të mos shtohen deri në momentin me 9 shkurt vendit i jepim një qeveri të re”, tha ai.

Ndërsa, Tahiri derisa ka folur për vendimin sa i përket mallrave serbe, duke thënë se Qeveria duhet t’i përmbush obligimet e saj.

“Qeveria duhet t’i përmbush obligimet e saj, nëse flitet për sigurinë e mallrave ato janë kushte që duhet t’i ofrojë Qeveria e Republikës së Kosovës apo cilado qeveri, duhet të përmbushen obligimet tona dhe të mos vije puna deri tek një pozicion ku dukemi të paaftë të implementojmë detyrimet tona që realisht pastaj ato na rrezikojnë që të na nxjerrin prej këtyre mekanizmave që do të jetë e dëmshme. Pse nuk po ndodh me shtetet tjera, por me Kosovën?”, ka shtuar Tahiri.

Krahas kësaj, ai bëri të ditur se seanca e radhës e Kuvendit do të mbahet të enjten, derisa potencoi se mazhoranca për shkak të brishtësisë së numrave do të ketë të vështirë miratimin e Projektligjeve.

“Tash e dy seanca sesioni vjeshtor nuk po arrin të fillojë në Kuvendin e Kosovës për shkak të mungesës së numrave nga mazhoranca, qëndrimet e PDK-së sa i përket këtyre pikave janë të njëjta, ne do t’i votojmë marrëveshjet ndërkombëtare konform qëndrimit tonë qysh e kemi deklaruar më herët, mirëpo normalisht në çështjen e projektligjeve të cilat kërkohet shumica e thjeshtë prej 61 deputeteve qe duhet të jenë prezent në seancë dhe që shumica e këtyre deputeteve normalisht se nuk do të marrin pjesë sepse kjo është një përgjegjësi e mazhorancës. Por, fatkeqësisht duket se do të jetë vështirë që do të kalohen dhe këto projektligje sepse tashmë duket se ka një shthurje kogja të madhe brenda Grupit Parlamentar të Lëvizjes Vetëvendosje sa i përket numrave dhe shumicës së tyre në Kuvendin e Kosovës”, thotë Tahiri.

Profesori i UBT-së, Hazir Çadraku, dhe Fadil Bajraktari kanë publikuar një punim të rëndësishëm shkencor në revistën Geoheritage, një platformë gjithëpërfshirëse që detajon aspektet globale të gjeotrashëgimisë. Punimi, me titull “Monumentet Gjeologjike të Republikës së Kosovës: Veprime për Identifikimin, Studimin, Kodifikimin, Gjeokonservimin dhe Promovimin”, përqendrohet në pasurinë gjeologjike të Kosovës dhe thekson rëndësinë e monumenteve gjeologjike që ndodhen në këtë territor.

Në studim, autorët eksplorojnë larmishmërinë gjeologjike të Kosovës, e cila ka krijuar kushte ideale për formimin e një numri të konsiderueshëm monumentesh natyrore. Këto monumente janë të shpërndara në të gjithë territorin e vendit dhe përbëjnë një pasuri të jashtëzakonshme për studimet gjeologjike dhe ekologjike.

Punimi ofron një analizë të detajuar mbi procesin e identifikimit dhe studimit të këtyre monumenteve, si dhe rëndësinë e kodifikimit dhe gjeokonservimit të tyre. Një fokus i veçantë është vënë gjithashtu në mënyrat e promovimit të këtyre monumenteve, për të rritur ndërgjegjësimin e publikut dhe për të inkurajuar mbrojtjen e këtij trashëgimie natyrore.

Ky studim është një kontribuim i rëndësishëm për komunitetin shkencor dhe për publikun e gjerë, duke ofruar njohuri të reja dhe duke nxitur diskutime mbi mbrojtjen dhe promovimin e monumenteve gjeologjike në Kosovë. Publikimi ndihmon në rritjen e vlerësimit për pasuritë natyrore të vendit dhe përpjekjet për ruajtjen e tyre për brezat e ardhshëm./UBTNews/

Shefi i Grupit Parlamentar të Lidhjes Demokratike të Kosovës (LDK), Arben Gashi ka deklaruar se problemet kësaj e legjislature janë duke vazhduar, duke shtuar se do të jetë e vështirë që të miratohen ligjet.

Pas përfundimit të mbledhjes së Kryesisë së Kuvendit, ai tha se vendi vazhdon të jetë në një situatë të paaftësisë për qeverisje dhe po ashtu të ketë probleme në aspektin e përfaqësimit ndërkombëtar.

“Po shkojmë drejt fundit të legjislaturës dhe si duket problemet e kësaj legjislature dhe kësaj shumice parlamentare vazhdojnë. Do të jetë e vështirë që të miratohen ligje gjatë kësaj legjislature, por gjithsesi ne si parti opozitare jemi në funksion të interesit të qytetarëve dhe mbrojtjes së interesit së qytetarëve. LDK e ka konfirmuar dhe vazhdon të konfirmojë pjesëmarrjen në votimin e marrëveshjeve ndërkombëtare të cilat janë në interes të vendit, por si duket shumica parlamentare është humbur dhe problemet vazhdojnë. Sa i përket temave tjera të rëndësishme për vendin, vazhdojmë të jemi në një situatë të paaftësisë qeverisje dhe po ashtu vazhdojmë të kemi probleme në aspektin e përfaqësimit ndërkombëtar. Një qeverisje e tillë nuk i duhet vendit, por tashmë po shkojmë drejt zgjedhjeve dhe qytetarëve të Kosovës ju mbetet të vendosin se çfarë lloj qeverisje do të kenë dhe çfarë lloji duan…Sa i përket çështjes së mediave, është qasje e gabuar, dhe e dëmshme për demokracinë dhe fjalën e lirë në Kosovë ”, tha Gashi.

Ndërsa, sa i përket çështjes e cila ka të bëjë me lejen e lëvizjes së mallrave dhe shërbimeve që është në kuadër të marrëveshjes së CEFTA-s, tha se është një çështje delikate dhe problematike. Në këtë drejtim, ka thënë se duhet të mbrohet maksimalisht interesi i Kosovës e po ashtu të ruhet anëtarësimi i saj në organizata ndërkombëtare.

“Sa i përket çështjes tjetër e cila ka të bëjë me lejen e lëvizjes së mallrave dhe shërbimeve që është në kuadër të marrëveshjes CEFTA-s, është një çështje delikate dhe problematike. Kosova ka të drejtën dhe obligimet e veta, por gjithsesi duhet të trajtohet si anëtar i barabartë dhe këto rrethana duket se Qeveria e Kosovë në vazhdën e problemeve në aspektin e komunikimit ndërkombëtar është edhe kjo një ndër problemet që ka. Prandaj, mendojmë se duhet të mbrohet maksimalisht interesi i Kosovës dhe po ashtu të ruhet anëtarësimi i Kosovës në organizata ndërkombëtare, sepse është shumë me rendësi që Kosova të jetë pjesë e organizatave”, tha ai.