Hoffenheimi është eliminuar nga Kupa e Gjermanisë pas humbjes ndaj Holstein Kielit, skuadër e kategorisë së dytë gjermane, me rezultat 4:3 pas ekzekutimit të penalltive.

Ndeshja përfundoi 1:1 në kohën e rregullt, me të dy golat që u shënuan gjatë pjesës së parë. Baraspesha vazhdoi edhe pas vazhdimeve, duke bërë që fituesi të përcaktohej përmes penalltive.

Sulmuesi i Kosovës, Fisnik Asllani, u tregua i saktë nga pika e bardhë, duke realizuar për 2:2. Ndërkohë, mesfushori Leon Avdullahu nuk arriti të shënonte penalltinë që do të barazonte rezultatin në 3:3, duke i dhënë përparësi skuadrës vendase.

Penalltinë vendimtare për Hoffenheimin e humbi Mats Rots, duke vulosur eliminimin e skuadrës së Bundesligës.

Avdullahu ishte titullar dhe luajti gjatë gjithë takimit, ndërsa Asllani u aktivizua në fillim të pjesës së dytë.

Në këtë përballje mungoi mbrojtësi i Kosovës, Albian Hajdari, për shkak të lëndimit, ndërsa mbrojtësi i Përfaqësueses U21 të Kosovës, Leon Parduzi, ishte në fushë deri në minutën e 103-të.

Kështu, Hoffenheimi i jep fund rrugëtimit në Kupën e Gjermanisë, ndërsa Holstein Kieli siguron kalimin në fazën tjetër të garës.

D.L

Përfaqësuesja e Kosovës në hendboll do të nisë javën e ardhshme rrugëtimin kualifikues për Kampionatin Evropian të vitit 2028, ku do të përballet me kundërshtarë të fortë në Grupin 4.

Kosova është pjesë e grupit së bashku me Hungarinë, Ishujt Faroe dhe Malin e Zi, ndërsa dy ndeshjet e para do t’i zhvillojë ndaj Ishujve Faroe dhe Hungarisë.

Selektori Jesper Ostlund ka publikuar të mërkurën listën e lojtarëve të ftuar, duke pranuar se Kosova hyn si autsajdere në këto përballje.

Ndeshja e parë zhvillohet më 4 nëntor, nga ora 20:00, në Torshavn ndaj Ishujve Faroe, ndërsa më 8 nëntor, nga ora 17:15, Kosova do të presë Hungarinë në palestrën “Bill Clinton” në Ferizaj.

“I fillojmë kualifikimet për Kampionat Evropian duke u përballur me dy kundërshtarë vërtetë të fortë si Ishujt Faroe dhe Hungaria. Jemi autsajderë të mëdhenj në të dy ndeshjet, por natyrisht shpresojmë të paraqitemi mirë, ndërsa do të bëjmë çdo gjë për të befasuar këto Kombëtare”, ka deklaruar Ostlund për Federatën e Hendbollit të Kosovës.

Kosova do të përballet edhe me mungesa të rëndësishme, pasi kapiteni Valon Dedaj dhe organizatori Leonard Gegaj nuk do të jenë pjesë e grumbullimit. Gegaj mungon për shkak të lëndimit.

Në anën tjetër, pas një periudhe të gjatë, në përfaqësuese rikthehet Endrit Abdullahi, i cili aktualisht luan në Suedi.

“Për fat të keq na mungojnë dy organizatorët e lojës, Leonard Gegaj dhe Valon Dedaj, që e bënë këtë grumbullim goxha sfidues. Në anën tjetër e mirëpresim fundorin Endrit Abdullahi, që po luan shumë mirë aktualisht në ekipin e tij në Suedi”, ka theksuar selektori suedez.

Përfaqësuesja e Kosovës do të udhëtojë të hënën drejt Torshavnit, ndërsa pas ndeshjes së parë do të rikthehet në Ferizaj për t’u përgatitur për përballjen me Hungarinë, që konsiderohet favorite e grupit.

Ostlund ka shprehur gjithashtu shpresën se tifozët kosovarë do të krijojnë atmosferë të zjarrtë në palestrën “Bill Clinton”, e cila në vitet e fundit ka qenë e mbushur në ndeshjet e rëndësishme të Kastriotit.

“Do të jetë entuziazmuese për të parë se çka mund të arrijmë së bashku. Po ashtu shpresoj për atmosferë magjike në ndeshjen tonë në shtëpi në Ferizaj. Kam qenë në atë arenë për të parë top-ndeshjet e ligës kosovare më parë dhe vërtetë shpresoj se do të jetë atmosferë e njëjtë për ndeshjen ndaj Hungarisë”, ka deklaruar Ostlund.

Dy përfaqësueset e para të grupit sigurojnë kualifikimin në Kampionatin Evropian 2028, ndërsa mundësi kualifikimi ekziston edhe përmes vendit të tretë.

Megjithatë, Kosova pritet të ketë një rrugëtim sfidues, duke marrë parasysh cilësinë e kundërshtarëve dhe mungesat në përbërjen e saj.

D.L

Klubi spanjoll Real Madrid ka reaguar përmes një deklarate zyrtare pas aksidentit tragjik hekurudhor në provincën e Toledos, në Spanjë, ku raportohet për viktima dhe persona të lënduar.

Përmes komunikatës, klubi madrilen ka shprehur tronditjen e thellë për ngjarjen, duke përcjellë ngushëllime për familjarët e viktimave dhe mesazhe solidariteti për të gjithë personat e prekur.

“Real Madrid CF dëshiron të shprehë tronditjen e tij më të thellë për aksidentin tragjik hekurudhor që ndodhi në provincën e Toledos”, thuhet në deklaratën e klubit.

Gjiganti spanjoll ka shprehur gjithashtu mbështetjen për personat e lënduar, duke u solidarizuar me familjet që po përballen me pasojat e kësaj tragjedie.

Në reagimin e tij, Real Madridi ka vlerësuar angazhimin e ekipeve të emergjencës dhe të personelit të përfshirë në operacionet e shpëtimit.

Klubi mbretëror ka ritheksuar se qëndron pranë familjeve të viktimave dhe të gjithë të prekurve në këto momente të vështira.

D.L

Futbollisti i Kosovës, Meriton Korenica, ishte pranë mundësisë për të luajtur në të njëjtën skuadër me Cristiano Ronaldon, pasi gjatë afatit kalimtar të verës kishte tërhequr interesimin e klubit saudit Al-Nassr.

Këtë e ka zbuluar menaxheri i tij, Armend Nexhipi, i cili në një intervistë për Digi Sport ka bërë të ditur se për mesfushorin kosovar kishte interesim nga disa klube evropiane, por edhe nga Azia dhe Shtetet e Bashkuara të Amerikës.

“Pati interesim nga klube të Bundesligës 2, Çorumi dhe Konyaspori nga Turqia, Al-Nassr, FC Tokyo, Craiova dhe së fundmi FCSB”, ka deklaruar Nexhipi.

Në mesin e skuadrave të interesuara ishin edhe Monza, që në atë periudhë garonte në Serie A, si dhe DC United nga kampionati amerikan.

Megjithatë, transferimi i Korenicës ishte penguar fillimisht nga kërkesat financiare të CFR Clujit, klub që kishte vendosur një çmim prej dy milionë eurosh për kartonin e futbollistit kosovar.

Sipas menaxherit, kjo shumë kishte ndikuar në ecurinë e negociatave, ndërsa vështirësitë financiare të klubit rumun krijuan mundësinë që në fund të arrihej marrëveshja me FCSB-në.

“Këtë verë mora shumë oferta, si nga Monza, ashtu edhe nga DC United. Herën e parë, Cluji kërkoi dy milionë euro. Kjo ishte ndoshta arsyeja pse transferimi nuk u realizua më herët”, ka theksuar Nexhipi.

Korenica përfundimisht iu bashkua FCSB-së, ku deri më tani ka regjistruar një gol në gjashtë paraqitje.

Menaxheri i tij ka shprehur besimin se mesfushori kosovar mund të luajë rol të rëndësishëm në përpjekjet e skuadrës rumune për të rikthyer titullin kampion dhe për të siguruar pjesëmarrjen në fazën e ligës së Ligës së Kampionëve sezonin e ardhshëm.

D.L