Me ndeshjen mes Meksikës dhe Afrikës së Jugut nis sot Botërori më i madh në historinë e futbollit. Takimi i Grupit A zhvillohet në stadiumin legjendar Azteca në Mexico City, duke filluar nga ora 21:00 sipas kohës në Kosovë.

Meksika, njëra prej tri vendeve organizatore së bashku me SHBA-në dhe Kanadanë, hyn në këtë sfidë si favorite. Megjithatë, përballë do të ketë një Afrikë të Jugut ambicioze, që synon të befasojë dhe të hedhë hapin e parë drejt fazës eliminatore.

Ndeshja e sotme rikthen kujtimet e Botërorit 2010, kur po këto dy përfaqësuese u përballën në takimin hapës dhe u ndanë në barazim 1:1 në Johannesburg.

Rreth 80 mijë tifozë priten në tribunat e Aztecas për të ndjekur spektaklin e hapjes së turneut, i cili këtë herë shënon disa rekorde historike. Për herë të parë në histori, Kupa e Botës zhvillohet me 48 përfaqësuese, ndërsa do të përfshijë gjithsej 104 ndeshje, 40 më shumë se edicioni i Katarit 2022. Po ashtu, është hera e parë që një Botëror organizohet nga tri shtete njëkohësisht.

Ceremonia hapëse nis 90 minuta para fillimit të ndeshjes. Në skenë do të performojnë këngëtarja kolumbiane Shakira, si dhe artistët J Balvin dhe Tyla, mes emrave të tjerë të njohur.

Pas festës së hapjes, vëmendja do të zhvendoset te fusha e lojës. Meksika paraqitet për herë të 17-të në një Kampionat Botëror dhe gëzon avantazhin e terrenit vendas. Përfaqësuesja meksikane renditet e 14-ta në klasifikimin e FIFA-s dhe është e pamposhtur në tetë ndeshjet e fundit, faktorë që e bëjnë favorite për tri pikët e para.

Në anën tjetër, Afrika e Jugut rikthehet në skenën botërore pas 16 vjetësh mungesë dhe merr pjesë për herë të katërt në histori. Përzgjedhësi belg Hugo Broos ka kërkuar nga lojtarët e tij të fokusohen te plani i lojës dhe të mos ndikohen nga atmosfera në tribuna.

“Për ne do të jetë një përvojë fantastike. Është shumë e rëndësishme t’i përmbahemi planit të lojës dhe të mos dëgjojmë se çfarë po ndodh në tribuna”, ka deklaruar Broos.

Përgatitjet e afrikanëve janë komplikuar nga problemet me vizat, të cilat kanë vonuar udhëtimin e një pjese të stafit teknik.

Në Grupin A bëjnë pjesë edhe Czech Republic dhe South Korea. Dy skuadrat e para të secilit prej 12 grupeve, së bashku me tetë ekipet më të mira të vendeve të treta, do të sigurojnë kalimin në fazën e 1/16 së finales.

Kjo do të jetë vetëm përballja e pestë mes Meksikës dhe Afrikës së Jugut. Deri më tani, Meksika ka regjistruar dy fitore, Afrika e Jugut një, ndërsa një ndeshje ka përfunduar pa fitues. Takimi i fundit mes tyre mbetet ai i Botërorit 2010.

Fisnik Asllani po jeton momentet më të mira të karrierës së tij dhe po shndërrohet në një nga emrat më të përfolur në futbollin gjerman. Sulmuesi 23-vjeçar i Hoffenheimit ka bërë një sezon të jashtëzakonshëm në Bundesligë, duke konfirmuar talentin e tij dhe duke tërhequr vëmendjen e klubeve më të mëdha të Evropës.

I lindur në Berlin, por përfaqësues i Kosovës në arenën ndërkombëtare, Asllani ka treguar një rritje të jashtëzakonshme gjatë sezonit 2025/26. Ai ka realizuar 10 gola dhe ka dhuruar 6 asistime në Bundesligë, duke qenë një nga lojtarët më të rëndësishëm të Hoffenheimit në luftën për një vend në Ligën e Kampionëve.

Paraqitjet e tij të shkëlqyera nuk kanë kaluar pa u vënë re. Borussia Dortmund vazhdon ta ketë në listën e objektivave për afatin kalimtar veror, ndërsa interesim për sulmuesin kosovar kanë shfaqur edhe Bayern Munich, RB Leipzig dhe Barcelona. Mediat gjermane raportojnë se drejtuesit e Dortmundit kanë zhvilluar kontakte me përfaqësuesit e lojtarit, ndërsa vetë Asllani shihet pozitivisht ndaj mundësisë për t’iu bashkuar një klubi me traditë të madhe si Dortmundi.

Edhe Barcelona po e ndjek me vëmendje zhvillimin e tij. Mediat spanjolle kanë raportuar se klubi katalunas e konsideron Asllanin si një sulmues modern, i aftë të kombinojë lojën, të krijojë hapësira dhe të kontribuojë jo vetëm me gola, por edhe me asistime. Profili i tij konsiderohet ideal për futbollin modern dhe për mënyrën se si luan Barcelona.

Një tjetër dëshmi e vlerësimit që po merr Asllani në Gjermani erdhi edhe nga Bundesliga, e cila publikoi videon speciale “The Best of Fisnik Asllani”, ku u përfshinë momentet më të mira të sezonit të tij. Golat, asistimet dhe paraqitjet bindëse e kanë bërë atë një nga futbollistët më të spikatur të kampionatit gjerman gjatë këtij edicioni.

Asllani po shkëlqen edhe me fanellën e Kosovës. Në ndeshjen miqësore ndaj Andorrës ai realizoi një gol spektakolar nga goditja e lirë, duke treguar edhe një herë cilësitë e tij teknike dhe aftësinë për të vendosur ndeshje të rëndësishme. Ai po bëhet gjithnjë e më shumë një nga liderët e rinj të Kombëtares së Kosovës dhe një figurë kyçe për të ardhmen e saj.

Ajo që e bën edhe më të veçantë suksesin e Asllanit është mosha e tij. Vetëm 23 vjeç, ai ka ende shumë hapësirë për t’u zhvilluar dhe për të ngritur nivelin e lojës së tij. Shpejtësia, lëvizjet inteligjente, instinkti për gol, fiziku i fortë dhe aftësia për të luajtur në role të ndryshme sulmuese e bëjnë atë një nga talentet më premtuese që ka nxjerrë futbolli kosovar në vitet e fundit.

Me interesimin që po rritet çdo ditë dhe me paraqitjet që vazhdojnë të impresionojnë në Gjermani, vera e vitit 2026 mund të jetë momenti kur Fisnik Asllani do të bëjë hapin më të madh të karrierës së tij. Pavarësisht se cili do të jetë destinacioni i ardhshëm, një gjë është e sigurt: sulmuesi kosovar po ndërton emrin e tij në elitën e futbollit evropian dhe po krenohet jo vetëm Kosovën, por të gjithë shqiptarët kudo që janë.

Sulmuesi brazilian, Vinicius Junior, nuk po mendon largimin nga Real Madridi gjatë afatit kalimtar të verës dhe pritet të vazhdojë të jetë pjesë e skuadrës madrilene edhe për sezonin e ardhshëm.

Sipas raportimeve të mediumit spanjoll Diario AS, 25-vjeçari ka vendosur të mbetet në “Santiago Bernabeu”, pavarësisht spekulimeve të vazhdueshme për të ardhmen e tij dhe interesimit të klubit për përforcime të reja në repartin ofensiv.

Kontrata aktuale e Viniciusit me Real Madridin skadon në verën e vitit 2027, ndërsa negociatat për vazhdimin e bashkëpunimit janë duke vazhduar prej muajsh. Megjithatë, deri tani palët nuk kanë arritur një marrëveshje përfundimtare, kryesisht për shkak të kërkesave financiare të lojtarit brazilian.

Pas rizgjedhjes së Florentino Perezit në krye të klubit, drejtuesit madrilenë pritet të intensifikojnë bisedimet për rinovimin e kontratës menjëherë pas përfundimit të Kupës së Botës 2026. Presidenti i Real Madridit e sheh Viniciusin si një prej figurave kyçe të projektit afatgjatë të klubit dhe dëshiron ta mbajë atë në ekip për shumë vite.

Nga ana tjetër, vetë futbollisti ka shprehur në disa raste dëshirën për të vazhduar karrierën me fanellën e “Los Blancos”, duke e bërë të qartë se prioriteti i tij mbetet qëndrimi në Madrid.

Megjithatë, mbetet të shihet nëse klubi do të pranojë kushtet financiare të kërkuara nga braziliani për kontratën e re. Një paraqitje e suksesshme me Kombëtaren e Brazilit në Kupën e Botës 2026 mund ta forcojë edhe më shumë pozicionin e tij në negociatat me drejtuesit madrilenë.

Pavarësisht zërave për një largim të mundshëm, gjithçka tregon se Vinicius Junior do të vazhdojë të jetë një nga emrat kryesorë të Real Madridit edhe në sezonet e ardhshme.

D.L

Kosova do të jetë nikoqire e një tjetër ngjarjeje të rëndësishme sportive ndërkombëtare, pasi më 13 dhe 14 qershor 2026 në Istog do të mbahet turneu “Kosovo 7’s 2026”, në kuadër të Rugby Europe Sevens Conference 2.

Ndeshjet do të zhvillohen në Stadiumin “Demush Mavraj”, ku kombëtare të ndryshme do të garojnë gjatë dy ditëve për rezultate sa më të mira në këtë kompeticion evropian të ragbit.

Organizatorët premtojnë ndeshje dinamike, ritëm të lartë loje dhe një atmosferë të veçantë sportive, duke e shndërruar Istogun në qendrën e ragbit evropian gjatë fundjavës së ardhshme.

Përmes këtij eventi, Kosova vazhdon të dëshmojë aftësinë e saj për organizimin e garave ndërkombëtare, ndërsa tifozët do të kenë mundësinë të mbështesin nga afër përfaqësuesen e vendit në arenën ndërkombëtare.

Federata e Ragbit e Kosovës ka ftuar sportdashësit, tifozët dhe komunitetin e ragbit që të jenë pjesë e kësaj feste sportive dhe të përkrahin Kosovën në ndeshjet që do të zhvillohen në shtëpi.

Hyrja për të gjitha ndeshjet do të jetë falas për publikun.

D.L