Seanca konstituive nisi me kërkesën e kryesuesit të Kuvendit, Avni Dehari për partitë politike për propozimet rreth formimit të komisionit për votim të fshehtë.

Partitë opozitare nuk pranuan të propozojnë kandidatë për formimin e komisonit, kurse Dehari përmbylli seancën konstituive për ditën e sotme.

Votimi i komsionit mori 55 vota për, ndërsa deputetët e tjerë refuzuan të marrin pjesë në votim.

Pasi deputetët e Lëvizjes Vetëvendosje u larguan nga salla plenare, deputetët partive të tjera shqiptare qëndruan në sallë për të diskutuar rreth ngërçit politik.

Deputetja më e re e legjislaturës së nëntë të Kuvendit të Kosovës, Sala Jashari tha se Lëvizja Vetëvendosje po sillet sikurse ka shumicën parlamentare.

“Edhe sot po vazhdoj të bëj thirrje për zgjidhje, sistemet parlamentare demokratike janë të ndërtuara mbi bazën e kompromisit. Edhe sot në tentativën e 43’të ende sillet sikur të kishte më shumë se 50% të ulësve në Parlamentin e Kosovës dhe pretendon se kompromisi i tyre është përpjekja e vazhduar për ta votuar vetëm një kandidate për kryeparlamentare dhe atë në mënyrë të fshehtë dhe arbitrare. Ky nuk është kompromis, kompromis është kur PDK i ka dhënë mundësinë Vetëvendosjes duke i thënë se ne do t’i votojmë një numër të konsiderueshëm të emrave në Lëvizjen Vetëvendosje për ta zhbllokuar këtë situatë“, tha fillimisht ajo.

Jashari tha se demokracia nuk funksionon me kokëfortësi duke bërë thirrje për kompromise politike.

“Me aktgjykimin e Gjykatës Kushtetuese është e qartë se partia fituese ka të drejtë të propozoj kandidatin për kryeparlamentar, por kjo nuk i jep të drejtë ekskluzive për ta zgjidhur atë. Duhet patjetër të kthehemi te kompromisi. Demokracia nuk funksionon me kokëfortësi, Kosova është më e madhe se ego e kujtdo. Kuvendi i Kosovës nuk është arenë e arrogancës, por tempull i demokracisë“, përfundoi Sala Jashari.

Deputeti i Lidhjes Demokratike të Kosovës, Besian Mustafa kritikoi qëndrimet e grupit më të madh parlamentar të dalur nga zgjedhjet e 9 shkurtit, duke thënë se Vetëvendosje ka mundësi për të zgjedhur krizën politike të krijuar.

Sipas Mustafës, Lëvizja Vetëvendosje ka mundësi të bashkëpunojë me partitë që kanë shprehur vullnet të votojnë emra të tjerë për kryeparlamentar.

“Në këtë parlament, disa parti politike janë shprehur se kanë vullnet të votojnë një emër tjetër dhe jo atë të Albulena Haxhiut, pra ka hapësirë për të krijuar 61 vota. Fatkeqësisht Vetëvendosje me të vetmen ide për të bllokuar Kuvendin e Kosovës, refuzon të marrë parasysh këto oferta për një emër tjetër. Kemi një inflacion një rritje të çmime të papërballueshme për kuletën familjare, është parë që familjet po përgatiten për fillimin e vitit të ri shkollor, por shteti është zhdukur, shteti është reduktuar në një emër të vetëm, Albulena Haxhiu. Për Vetëvendosjen ajo është më e rëndësishme se çdo qytetar i Republikës së Kosovës, për Vetëvendosjen ‘o zgjidhet Albulena Haxhiu kryetare e Kuvendit, o flaka i daltë këtij vendi’. Ka emra që janë të pranueshëm për disa parti politike, le të ulen le të flasin le të arrijnë një marrëveshje politike“, tha Besian Mustafa.

Në anën tjetër, deputeti i Aleancës për Ardhmërinë e Kosovës, Bekë Berisha ftoi deputetët e tjerë që të lejojnë Vetëvendosjen të marrë ‘fitoren e Pirros’.

Berisha tha se deputetët duhet të mendojnë racionalisht për t’i dhënë fund vuajtjes institucionale të shtetit.

“Kemi të bëjmë me dikë që nuk do të lëshojë pe. Tash e kam me disa deputetë këtu që mendojnë se duhet me u sjellë sikur edhe ne jemi të fortë edhe ne nuk lëshojmë pe. Edhe unë jam i fortë, kam parime dhe nuk lëshoj pe, por pasi jemi në Kuvendin e Kosovës është mirë të bëhemi më racional. Unë ia kisha dhënë këtë fitore, jo Fitore Pacollin, por këtë fitoren që po e lyp. Le te merr fitoren e Pirros, le të thotë që ka fitu, që t’ia shkurtojmë Kosovës vuajtjet. Ne rrezikohemi të humbim shtetin, të mendojmë jashtë kësaj që kemi parë deri sot“, tha Bekë Berisha.

Vazhdimi i seancës konstituive është caktuar për datën 9 korrik.

Procesi i konstituimit të Kuvendit të Kosovës ka dështuar sërish, për të 43-tën herë, duke shtyrë edhe më tej formimin e institucioneve të reja të vendit.

Edhe në këtë tentativë, deputetët nuk arritën të formojnë Komisionin zgjedhor për zgjedhjen e kryeparlamentarit.

Nga 99 deputetë të pranishëm vetëm 55 prej tyre votuan pro, abstenim dhe kundër nuk pati pasi që pjesa tjetër nuk morën fare pjesë në votim.

Kryesuesi i seancës, Avni Dehari njoftoi se seanca e radhës do të mbahet të mërkurën më 9 korrik në ora 11:00.

Partia Demokratike e Kosovës, Lidhja Demokratike e Kosovës, Lista Serbe dhe Aleanca për Ardhmërinë e Kosovës dhe NISMA sërish nuk propozuan emrat për anëtarë të këtij komisioni.

Lëvizja Vetëvendosje, si subjekti më i madh në Kuvend, ka propozuar Albulena Haxhiun për kryetare, duke insistuar që votimi të zhvillohet përmes një procesi të fshehtë.

Ky rekord i dështimeve reflekton mosmarrëveshjet e thella politike dhe mungesën e konsensusit mes partive kryesore.

Analistët dhe njohësit e çështjeve politike kanë paralajmëruar se vazhdimi i kësaj bllokade serioze mund të ndikojë negativisht në stabilitetin politik dhe zhvillimin demokratik të Kosovës.

Ndryshe, Gjykata Kushtetuese e nxori më 26 qershor një aktgjykim i cili i detyron deputetët që brenda 30 ditëve ta konstituojnë Kuvendin, por nuk dha hollësi se çfarë do të ishin pasojat në rast se afati nuk respektohet. /Telegrafi/

Presidenti i SHBA-së, Donald Trump, ka paralajmëruar se vendet që mbështesin politikat e aleancës BRICS që shkojnë kundër interesave të SHBA-së do të goditen me një tarifë shtesë prej 10%.

Trump e ka kritikuar prej kohësh BRICS-in, një organizatë anëtarët e së cilës përfshijnë Kinën, Rusinë dhe Indinë, e cila është krijuar për të rritur pozicionin ndërkombëtar të vendeve dhe për të sfiduar SHBA-në dhe Evropën Perëndimore, shkruan BBC.

“Çdo vend që përputhet me politikat anti-amerikane të BRICS-it, do t’i ngarkohet një tarifë SHTESË prej 10%. Nuk do të ketë përjashtime nga kjo politikë”, shkroi Trump në mediat sociale.

Një afat për vendet që të bien dakord për një marrëveshje tarifore me SHBA-në ishte caktuar për 9 korrik, por zyrtarët amerikanë tani thonë se ato do të fillojnë më 1 gusht.

Deri më tani, SHBA-të kanë arritur marrëveshje tregtare vetëm me Mbretërinë e Bashkuar dhe Vietnamin. Megjithatë, Britania dhe Amerika ende nuk kanë arritur një marrëveshje mbi taksat për çelikun britanik të importuar nga SHBA-të.

Që nga marrja e detyrës në janar, Trump ka njoftuar një sërë taksash importi për mallrat nga vendet e tjera – duke argumentuar se ato do të nxisin prodhimin amerikan dhe do të mbrojnë vendet e punës.

Në prill, në atë që ai e quajti “Dita e Çlirimit”, ai njoftoi një valë taksash të reja për mallrat nga vendet e botës, megjithëse shpejt pezulloi planet e tij më agresive për të lejuar tre muaj bisedime deri më 9 korrik.

I pyetur nëse taksat do të ndryshonin më 9 korrik apo 1 gusht, Trump tha të dielën: “Do të jenë tarifa, tarifat do të jenë tarifa.”

Ai shtoi se midis 10 dhe 15 letra do t’u dërgoheshin vendeve të hënën duke i këshilluar ato se cila do të jetë norma e re e tarifave nëse nuk do të ishte arritur një marrëveshje.

Sekretari i Tregtisë i SHBA-së, Howard Lutnick, sqaroi se taksat do të hyjnë në fuqi më 1 gusht.

Të dielën, Sekretari i Thesarit Scott Bessent i tha CNN: “Presidenti Trump do t’u dërgojë letra disa prej partnerëve tanë tregtarë duke u thënë se nëse nuk i lëvizni gjërat përpara, atëherë më 1 gusht do të ktheheni në nivelin tuaj tarifor të 2 prillit”.

Kërcënimi i Trump ndaj vendeve që punojnë me vendet e BRICS u shfaq pasi anëtarët kritikuan politikat tarifore të SHBA-së, si dhe propozuan reforma për Fondin Monetar Ndërkombëtar (FMN) dhe mënyrën se si vlerësohen valutat kryesore.

Vitin e kaluar, lista e anëtarëve të BRICS u zgjerua përtej Brazilit, Rusisë, Indisë, Kinës dhe Afrikës së Jugut për të përfshirë Egjiptin, Etiopinë, Indonezinë, Iranin, Arabinë Saudite dhe Emiratet e Bashkuara Arabe.

Vendet në bllok përbëjnë më shumë se gjysmën e popullsisë së botës./kosovapress/

Një person është arrestuar dje në Prishtinë nën dyshimin se pas një mosmarrëveshje ka sulmuar tre qytetarë.

Sipas policisë së Kosovës, për këtë rast me vendim të prokurorit, i dyshuari është dërguar në mbajtje.

“Prishtinë / 06.07.2025 – 00:50. Është arrestuar i dyshuari mashkull kosovar pasi që i njëjti pas një mosmarrëveshje dyshohet se ka sulmuar tre viktimat meshkuj kosovarë. Nuk raportohet për të lënduar, ndërsa me vendim të prokurorit i dyshuari është dërguar në mbajtje”, thuhet në raportin 24 orësh të policisë.

Një rast tjetër sipas raportit të fundit të policisë, në Podujevë është arrestuar një i dyshuari për shkak se tek i njëjti gjatë kontrollit është gjetur dhe sekuestruar një sasi prej 2.5 gramë substancë e dyshuar narkotike marihuanë dhe një cigare e mbushur me narkotik të gatshme për shitje.

Ndërsa, me vendim të prokurorit i dyshuari është dërguar në mbajtje.