Dy persona kanë vdekur kur një aeroplan mallrash rrëshqiti nga një pistë në Aeroportin Ndërkombëtar të Hong Kongut dhe u ul në det herët këtë të hënë.

Fluturimi EK9788 i Emirates po mbërrinte nga Dubai rreth orës 03:50 sipas orës lokale (19:50 GMT) kur doli nga pista dhe u përplas me një automjet patrullimi të aeroportit, shkruan BBC.

Dy personat brenda automjetit vdiqën, ndërsa katër anëtarët e ekuipazhit në bord të aeroplanit i mbijetuan rrëzimit.

Kjo shënon një nga incidentet më vdekjeprurëse të aviacionit në Hong Kong prej vitesh – aeroporti ndërkombëtar i qytetit ka pasur një rekord të mirë sigurie./S.K/KP/

Një shpërthim i fuqishëm në një ndërtesë apartamentesh me tetë kate në kryeqytetin e Rumanisë, Bukuresht, shkaktoi rrëzimin e kateve, duke vrarë tre persona dhe plagosur të paktën 13 të tjerë të premten, raportuan mediat lokale, sipas The Guardian.

Më shumë se një duzinë automjete emergjence, përfshirë 11 makina zjarrfikëse dhe katër njësitë mobile të kujdesit intensiv, u dërguan në vendngjarje në Calea Rahovei, në Sektorin 5 të Bukureshtit.

Shpërthimi të premten preku katin e pestë dhe të gjashtë të ndërtesës me tetë kate, sipas Inspektoratit të Situatave Emergjente të kryeqytetit. Ministria e Shëndetësisë më vonë njoftoi se një nga të vdekurit u gjet i bllokuar nën një pllakat betoni në katin e gjashtë të ndërtesës.

“Pas shpërthimit, një tjetër ndërtesë apartamentesh pranë u prek gjithashtu, ku u vunë re elementë ndërtimi të shkëputur nga fasada e ndërtesës”, thanë autoritetet e emergjencës në një deklaratë. Të paktën 13 persona janë transportuar në spitale për lëndime, përfshirë politrauma dhe djegie./KP

Presidenti rus Vladimir Putin  ka mbledhur Këshillin e Sigurisë të vendit të tij pas telefonatës me Presidentin e SHBA-së Donald Trump, raportuan të hënën agjencitë ruse të lajmeve, duke cituar këshilltarin e politikës së jashtme të Kremlinit, Yuri Ushakov.

Sipas Ushakov, Putin u dha anëtarëve të Këshillit të Sigurisë një informacion të gjerë mbi bisedën e tij me Trump.

Trump dhe Putin ranë dakord mbrëmjen e djeshme që të mbajnë një samit mbi luftën në Ukrainë.

Kreu i Shtëpisë së Bardhë pas një bisede telefonike prej dy orësh me shefin e Kremlinit, tha se “telefonata ishte shumë produktive dhe u shënuan përparime të mëdha”.

Presidenti amerikan shtoi më tej se bisedime të këshilltarëve të nivelit të lartë do të mbahen që javën e ardhshme, me pjesëmarrjen e Sekretarit të Shtetit, Marco Rubio.

“Unë dhe Putini do të takohemi më vonë në një lokacion të përcaktuar në Budapest të Hungarisë, për të vlerësuar nëse mund t’i japim fund kësaj lufte të palavdishme”, vijoi Trump.

Ai theksoi se kishte marë përgëzimet e Presidentit rus për marrëveshjen e madhe të paqes në Lindjen e Mesme. “Më tha se ishte diçka të cilën ai e ka ëndërruar për shekuj”, ishin fjalët e Trump./EO

Qeveria e re e Kryeministrit të riemëruar të Francës, Sebastien Lecornu, i mbijetoi dy votave të mosbesimit radhazi të enjten, ku të dyja nuk arritën shumicën prej 289 votash të nevojshme për të rrëzuar një qeveri.

Mocioni i parë dështoi me 271 deputetë që votuan pro dhe 18 kundër mocionit të mosbesimit, duke bërë që Asambleja Kombëtare të refuzonte mocionin e partisë së ekstremit të majtë France Unbowed (LFI). I dyti, i propozuar nga Tubimi Kombëtar (RN) i ekstremit të djathtë, pati rezultate edhe më të këqija, me vetëm 144 vota kundër qeverisë, shkruan Anadolu.

Olivier Faure, sekretari i parë i Partisë Socialiste, e cila ka sinjalizuar se mund të paraqesë një mocion të veçantë mosbesimi, tha se nuk do ta censurojë qeverinë “për sa kohë që Parlamenti respektohet”.

Qëndrimi i partisë së qendrës së majtë erdhi pasi Lecornu njoftoi se do të pezullonte zbatimin e reformave të diskutueshme të pensioneve deri në zgjedhjet e ardhshme presidenciale, duke iu përgjigjur një kërkese kyçe nga e majta opozitare./KP