Ekspertët dhe aktivistët shpresonin se bisedimet e OKB-së për klimën do të përfundonin javën e kaluar me një përmendje të spikatur të biodiversitetit në tekstin përfundimtar. Ata u larguan të zhgënjyer.

Disa thonë se delegatët në samitin COP27 humbën një mundësi kyçe për të pranuar lidhjen midis krizës së klimës dhe natyrës, të cilat shumë besojnë se janë trajtuar veçmas për një kohë të gjatë.

Dështimi për të adresuar të dyja mund të nënkuptojë jo vetëm shkatërrimin e mëtejshëm të sistemeve të mbështetjes së jetës së Tokës, por edhe humbjen e objektivit kryesor klimatik të kufizimit të ngrohjes nën 1.5 gradë Celsius, paralajmërojnë ata.

Në bisedimet COP15 të OKB-së për biodiversitetin muajin e ardhshëm, dhjetëra vende do të takohen për të hartuar një kornizë të re për të mbrojtur kafshët dhe bimët nga shkatërrimi njerëzor.

Takimi vjen pasi shkencëtarët paralajmërojnë se ndryshimi i klimës dhe dëmtimi i biodiversitetit mund të shkaktojnë ngjarjen e gjashtë të zhdukjes masive në botë.

Një shkatërrim i tillë i natyrës rrezikon gjithashtu përkeqësimin e ndryshimeve klimatike.

Oqeanet kanë thithur pjesën më të madhe të nxehtësisë së tepërt të krijuar nga emetimet e gazrave serrë të njerëzimit dhe, së bashku me pyjet, janë zhytës të rëndësishëm karboni.

“(Natyra) është deri në një të tretën e zgjidhjes së klimës. Dhe është një teknologji e provuar”, i tha AFP-së, Brian O’Donnell, drejtor i “Campaign for Nature”.

“Ne duhet t’i zgjidhim të dyja [natyrën dhe klimën] nëse duam të kemi një planet të jetueshëm për brezat e ardhshëm”./UBTNews/