Lajmet nga UBT

Kreativiteti dhe vizioni profesional: Ligjërata tematike, workshope, projekte dhe diskutime në Fakultetin e Arkitekturës në UBT

Published

on

Fakulteti i Arkitekturës dhe Planifikimit Hapësinor në UBT në kuadër të Global UBT Fest për tri ditë radhazi mbajti akademinë verore në kampusin inovativ të UBT-së në Lipjan. Ceremonia e hapjes u drejtua nga Dekani i Fakultetit, Prof. Dr. Binak Beqaj, i cili luajti një rol të rëndësishëm në drejtimin dhe organizimin e suksesshëm të aktivitetit.

Prof. Dr. Binak Beqaj, në cilësinë e dekanit shpalli zyrtarisht fillimin e akademisë verore, duke i ftuar të gjithë pjesëmarrësit të angazhohen plotësisht në programin e pasur të ligjëratave tematike, workshopeve, prezantimeve dhe diskutimeve që ishin në programin e akademisë verore. Poashtu Prof. Dr. Binak Beqaj,  theksoi rëndësinë dhe seriozitetin e angazhimit të institucionit për të ofruar një platformë të rëndësishme për diskutimin dhe zhvillimin e dijes, përvojës, ideve inovative në fushën e arkitekturës dhe planifikimit urban.

Më pas, u zhvillua prezantimi i moduleve dhe projekteve nga Prodekani i Fakultetit, Egzon Bajraktari, të cilat vazhduan gjatë tri ditëve vijuese.

Të gjithë të pranishmit patën mundësinë të njiheshin me punën dhe programin e pasur që ishte paraparë në kuadër të kësaj akademie verore që organizoi Fakulteti i Arkitekturës dhe Planifikimit Hapësinor. Aktivitetet u përkrahën nga një numër i konsiderueshëm i studentëve, pedagogëve, përfaqësues të institucioneve publike e private dhe profesionistëve të fushës, të cilët shkëmbyen ide dhe përvoja të rëndësishme në lidhje me qëndrueshmërinë në arkitekturë.

Akademia filloi nën drejtimin e ligjëruesit Bard Bajçinovci i cili prezantoi modulin e tij në “Dizajn Arkitektonik”. Ligjëruesi ndau me audiencën qëllimet dhe objektivat e modulit të tij, duke theksuar rëndësinë e përdorimit të teknologjive dhe koncepteve të reja në zhvillimin e dizajnit urban dhe arkitekturës së qëndrueshme. Prezantimi i tij u shoqërua me demonstrime praktike dhe studime që ilustruan përdorimin e metodave të avancuara në fushën e dizajnit arkitektonik.

Në vazhdim të programit të akademisë verore, një fokus i rendësishëm iu dedikua temës “Qëndrueshmëria rigjeneruese si një hap përtej Eficiencës”. Ky sesion u drejtua nga Blerta Vula dhe Guri Berisha, të cilët prezantuan modulin e tyre në “Eficiencën e Energjisë”.

Një ligjeratë ndërmodulare u mbajt edhe nga ligjëruese Leana Mahmuti mbi temën “Modelet Fizike në Arkitekturë”, ku u theksua rëndësia e përdorimit të modeleve fizike për të simuluar dhe vlerësuar performancën e projekteve arkitektonike në lidhje me aspekte të ndryshme fizike dhe teknike.

Ligjëratë tjetër iu dedikua edhe temës “Tactical Urbanism and AI”, që u udhëheq nga ligjëruese Medina Shalaku, Anita Imeri, si pjesë e modulit të parë në “Planifikimin dhe Dizajnin Urban”. Ligjërueset diskutuan rreth përdorimit të taktikave urbane dhe inteligjencës artificiale në procesin e planifikimit dhe dizajnit urban. Poashtu, u paraqitën strategjitë e tyre për të përdorur teknologjitë e fundit për të përmirësuar qytetërimin e hapësirave urbane, duke adresuar sfidat dhe mundësitë që ofrojnë teknologjitë dhe praktikat e taktikave urbane.

Një sesion u mbajt nga Dea Luma mbi temën “Neuroarchitecture”. Ky sesion u zhvillua si pjesë e modulit të dytë në “Dizajni Arkitektonik”.

Në kuadër të Akademisë Verore “Global UBT Fest 2024” në Fakultetin e Arkitekturës, një sesion u mbajt me temën “Policies and Measures for Sustainable Development and Energy Efficiency in Kosovo”. Ky segment u zhvillua si pjesë e modulit të katërt në “Eficienca e Energjisë”.

Sesionin e drejtuan përfaqësues të Ministrisë së Mjedisit dhe Planifikimit Hapësinor të Kosovës, Agim Mazreku dhe Servet Spahiu, që prezantuan politikat dhe masat që janë ndërmarrë në Kosovë për të promovuar zhvillimin e qëndrueshëm dhe eficiencën e energjisë në ndërtesat dhe infrastrukturën e qyteteve.

“Tactical Urbanism and AI”, ishte tema tjetër e rëndësishme e workshopit që u mbajt nga profesor, Shqiprim Ahmeti, Anita Ymeri, dhe Medina Shalaku, që u zhvillua si pjesë e modulit të parë në “Planifikimin dhe Dizajnin Urban”. Fokusi i punëtorisë ishte në përdorimin e taktikave urbane dhe inteligjencës artificiale për të përmirësuar planifikimin dhe dizajnin e qyteteve. Ahmeti, Ymeri dhe Shalaku demonstruan aplikacionet praktike të teknologjive të reja dhe strategjitë për të adresuar problemet e qytetërimit në mënyrë inovative dhe efikase.

Workshop u zhvillua edhe në temën “Plus Hapësira Publike”, që u udhëhoq u nga profesor Vullnet Shaqiri dhe Bard Bajcinovci, si pjesë e modulit të dytë në “Dizajni Arkitektonik”. Workshopi fokusoi përmirësimin dhe zhvillimin e hapësirave publike në mjediset urbane. Shaqiri dhe Bajcinovci diskutuan rreth koncepteve dhe strategjive për të krijuar hapësira që shpërblejnë dhe përdorin burimet natyrore dhe kulturore në mënyrë të qëndrueshme dhe inovative.

“Eficienca e Energjisë”, u trajtua nga Guri Berisha, fokusi ishte në strategjitë dhe teknologjitë e fundit për të përmirësuar eficiencën e energjisë në ndërtesa dhe infrastrukturë.

  

Prezantimet e projekteve të studentëve në Global UBT Fest 2024

Në kuadër të Akademisë Verore “Global UBT Fest 2024” në Fakultetin e Arkitekturës në UBT, studentët paraqitën projektet e tyre në tema të ndryshme të fushës. Në “Planifikim dhe Dizajn Urban”, studentët prezantuan projekte të cilat përfshinin planifikimin dhe dizajnin e qyteteve të qëndrueshme, duke përdorur teknologjitë e fundit dhe konceptet e taktikave urbane.

Në fushën e “Dizajnit Arkitektonik”, u prezantuan projekte që fokusin kishin në dizajnin arkitektonik të ndërtesave dhe hapësirave, duke përfshirë inovacione në materialet dhe stilin arkitektonik.

“Trashëgimia Arkitektonike”, ishte fusha në të cilën studentët shqyrtuan dhe prezantuan projekte që kërkuan ruajtjen dhe përdorimin e trashëgimisë arkitektonike të ndërtesave dhe objekteve historike. Dhe në kuadër të “Eficienca e Energjisë”, u prezantuan projekte që fokusin kishin në  përdorimin e teknologjive për të rritur eficencën e energjisë në ndërtesa dhe infrastrukturë, duke adresuar sfidat e qëndrueshmërisë së energjisë.

Ditën e fundit të akademisë verore pas përfundimit të ligjëratave tematike, workshopeve, prezantimeve të studentëve në kuadër të “Global UBT Fest 2024”, kolegët dhe profesorët e Fakultetit të Arkitekturës dhe Planifikimit Hapësinor patën mundësinë të hyjnë në një fazë të diskutimit dhe konsultimit mbi projektet e prezantuara. Ky moment ofroi një platformë të rëndësishme për shkëmbimin e ideve, vlerësimin e projekteve dhe përmirësimin e tyre nëpërmjet analizave dhe rekomandimeve të ofruara nga kolegët dhe ekspertët në fushën e arkitekturës dhe dizajnit urban. Ky proces përmirësoi jo vetëm cilësinë e projekteve të prezantuara, por gjithashtu theu barrierat akademike për të krijuar një mjedis të hapur për diskutim dhe rritje të njohurive në fushën e arkitekturës dhe urbanizmit.

Në përmbyllje të Akademisë Verore “Global UBT Fest 2024”, Dekani i Fakultetit, Prof. Dr. Binak Beqaj, bëri një vlerësim të aktiviteteve të këtij organizimi. Ai theksoi se akademia u përmbyll me sukses të madh, duke pasur një program me ligjerata tematike, workshope, prezantime projektesh dhe shkëmbime njohurish të reja. Prof.Dr. Binak Beqaj vuri në dukje se gjatë kësaj periudhe u zhvilluan debate konstruktive, u diskutua dhe u arritën përfundime profesionale të rëndësishme për fushën e arkitekturës. Dekani theksoi se stafi akademik u angazhua seriozisht në organizimin dhe mbikqyrjen e aktiviteteve, duke ndihmuar në arritjen e suksesit të kësaj akademie verore. Më e rëndësishmja, sipas tij, ishte angazhimi dhe vullneti i të gjithë pjesëmarrësve, të cilët nuk e konsideruan akademinë si një detyrim, por si një mundësi për të zhvilluar njohuri dhe aftësi të reja në fushën profesionale.

Ky vlerësim thekson vlerën e një angazhimi të plotë dhe një qëndrimi të hapur ndaj dijes dhe zhvillimit personal dhe profesional të studentëve, në drejtim të një mjedisi akademik. Dekani vlerëson edhe kujdesin e vazhdueshëm të UBT-së si institucioni më i njohur i arsimit të lartë në rajon, ku liria për të shprehur mendimet dhe debatet konstruktive janë të inkurajuara dhe vlerësuar në mënyrë të barabartë./UBTNews/

Dionesa Ebibi

 

Aktualitet

UBT prezanton modelin e parë Digital Twin të Kampusit Smart City në aktivitetin përmbyllës të projektit Evropian IoT-ECO në Sofia

Published

on

Rektori i UBT-së, Prof. Dr. Edmond Hajrizi, së bashku me Prof. Dr. Besnik Qehaja, dekan i Fakultetit të Shkencave Kompjuterike dhe Inxhinierisë, dhe ekipin e UBT-së, po marrin pjesë në aktivitetin përmbyllës të projektit IoT-ECO, pjesë e programit Erasmus-LS, ERASMUS-EDU-2022-CBHE, i cili po mbahet në Technical University of Sofia, në Bullgari.

Ky projekt ndërkombëtar synon zhvillimin e modeleve inovative për Internet of Things (IoT) në fushën e ekonomisë së gjelbër, duke bashkuar ekspertë dhe akademikë nga universitete të ndryshme të rajonit dhe Evropës.

Në këtë aktivitet u prezantua modeli i parë real i Digital Twin Smart City Kampus në UBT, një inovacion unik i zhvilluar mbi infrastrukturën Smart City dhe teknologjitë e avancuara nga ekipi i UBT-së. Ky model digjital funksionon si një pasqyrim virtual i kampusit dhe qytetit, duke mundësuar ndërveprim në kohë reale.

Kjo teknologji rrit ndërveprimin dhe aftësinë për të reaguar shpejt ndaj situatave, si dhe kontribuon në përmirësimin e cilësisë së jetës, efikasitetit dhe sigurisë.

Rektori Hajrizi prezantoi gjithashtu UBT Hub, duke theksuar kontributin dhe avancimet e universitetit në integrimin e IoT në mjedisin akademik dhe industrial. Ai diskutoi rëndësinë e zhvillimit të infrastrukturës digjitale dhe bashkëpunimeve ndërkombëtare për fuqizimin e inovacionit dhe edukimit teknologjik në Kosovë, me theks të veçantë te modelet inovative që janë zhvilluar dhe implementuar në fushat e IoT, inteligjencës artificiale, smart cities, smart education, mjekësisë, etj.

Programi i ngjarjes përfshin prezantime mbi modelet virtuale të IoT, integrimin me cloud, aplikimet praktike në industri, si dhe sfidat e sigurisë kibernetike në rrjetet moderne inteligjente. Përveç pjesës akademike, aktiviteti ofron edhe vizita kulturore dhe ture në Sofia, duke krijuar hapësirë për shkëmbim përvojash dhe rrjetëzim ndërkombëtar.

Continue Reading

Aktualitet

Në UBT diplomon ushtaraku i FSK-së, Major Vilson Musaj

Published

on

Ushtaraku i FSK-së, Major Vilson Musaj, student në nivelin Master në Fakultetin e Politikave Publike dhe Menaxhimit në UBT, mbrojti me sukses tezën e tij me temë: “Rëndësia e regjimenteve të këmbësorisë në Forcën e Sigurisë së Kosovës – Një perspektivë strukturore: studim krahasimor (FSK, Ushtria Amerikane dhe NATO)”.

Ky punim, i cili u realizua me përkushtim të madh, i siguroi Major Musajt diplomën dhe gradën shkencore “Master në Politika Publike dhe Menaxhim”.

Komisioni vlerësues, i përbërë nga Prof. Dr. Hajdi Xhixha (kryetare), Prof. Dr. Arian Kadriu (anëtar) dhe Prof. Dr. Bahri Gashi (mentor), e vlerësuan këtë hulumtim si të parë në format dhe strukturën e tij në këtë fushë, duke e konsideruar si një punim serioz shkencor dhe mjaft kompleks.

Prezantimi i të gjeturave, argumentimi dhe krahasimi i hipotezave u vlerësuan me performancë të lartë akademike dhe notë maksimale, duke reflektuar një strukturë të qartë operacionale ushtarake dhe qasje profesionale në trajtimin e temës.

Major Vilson Musaj, i cili u gradua në këtë gradë më 1 korrik 2025, është emëruar Oficer për Bashkëpunim me ODC dhe Iowa (Office for Defense Cooperation – Zyra për Bashkëpunim të Mbrojtjes në Ambasadën Amerikane) në Departamentin për Bashkëpunim Ndërkombëtar dhe Integrime Euro-Atlantike në Ministrinë e Mbrojtjes. Ai vazhdon të shërbejë aktualisht në këtë departament të rëndësishëm, duke kontribuar në zhvillimin dhe integrimin e Forcës së Sigurisë së Kosovës.


Continue Reading

Aktualitet

Policia, FSK-ja dhe Shërbyesit Civilë përfitojnë bursë 20 për qind në programet Master Shkenca Politike dhe Studime të Sigurisë në UBT

Published

on

UBT po ofron bursë 20 për qind në nivelin Master në programet Shkenca Politike dhe Studime të Sigurisë, për të gjithë kandidatët nga Akademia e Policisë, Forca e Sigurisë së Kosovës (FSK) dhe Shërbyesit Civilë.

Programi Master në Shkenca Politike ofron një mjedis akademik të avancuar, të orientuar drejt kërkimit shkencor dhe zhvillimit të mendimit kritik. Studentët pajisen me njohuri dhe aftësi për të adresuar sfidat politike në nivel lokal dhe ndërkombëtar, për të kontribuar në zhvillimin demokratik dhe për të ndikuar në politikëbërjen moderne. Ky program përgatit ekspertë, mendimtarë dhe liderë të rinj që promovojnë qeverisje efektive dhe procese demokratike.

Ndërkaq, programi Master në Studime të Sigurisë është i konceptuar për të përgatitur profesionistë të aftë të përballen me sfidat e sigurisë në kontekste kombëtare dhe ndërkombëtare. Ai trajton tema bashkëkohore si siguria kibernetike, kërcënimet hibride, terrorizmi, migrimi, gjeopolitika dhe siguria energjetike. Studentët zhvillojnë aftësi analitike dhe praktike për të krijuar strategji efikase në fushën e sigurisë dhe për të kontribuar në stabilitetin dhe qëndrueshmërinë e shoqërisë.

Të dy programet ofrojnë orare fleksibile, qasje praktike, staf akademik me eksperiencë ndërkombëtare dhe mundësi për mobilitete studimore në universitete partnere në Evropë dhe më gjerë.

UBT thekson se qëllimi i këtyre programeve është të fuqizojnë kapacitetet akademike dhe profesionale të studentëve, duke i pajisur ata me njohuri multidisiplinare që tejkalojnë standardet e industrisë dhe i përgatisin për karrierë ndërkombëtare, punësim në institucione vendore dhe globale, si dhe për vazhdim studimesh në nivel doktorature.

APLIKO TANI ONLINE për të përfituar bursën 20 për qind dhe për të qenë pjesë e gjeneratës së re të ekspertëve të politikës dhe sigurisë në Kosovë.

Continue Reading

Aktualitet

UBT hap thirrjen për dorëzimin e abstrakteve për Konferencën Ndërkombëtare mbi Shëndetin Mendor dhe Mirëqenien (PSY 2025)

Published

on

UBT ka shpallur hapjen zyrtare të thirrjes për dorëzimin e abstrakteve për Konferencën Ndërkombëtare mbi Shëndetin Mendor dhe Mirëqenien (PSY 2025), e cila do të zhvillohet në kuadër të aktiviteteve të edicionit të 14-të të Konferencës Ndërkombëtare të UBT-së.

Kjo konferencë synon të bashkojë profesionistë, studiues, praktikues dhe studentë të psikologjisë, vendorë dhe ndërkombëtarë, për të ndarë përvoja, njohuri dhe ekspertizë mbi faktorët që ndikojnë në përmirësimin e shëndetit mendor, duke kontribuar si në komunitetin akademik ashtu edhe në praktikën profesionale.

Konferenca Ndërkombëtare mbi Shëndetin Mendor dhe Mirëqenien do të mbahet më 23, 24 dhe 25 tetor 2025, ndërsa tema kryesore e këtij viti është: “Shëndeti Mendor dhe Mirëqenia”. Ajo ka për qëllim të bashkojë studiues, edukatorë dhe profesionistë nga fusha të ndryshme, për të eksploruar dhe shkëmbyer ide mbi lidhjen mes shëndetit mendor dhe proceseve të rezistencës që mbështesin qëndrueshmërinë, inovacionin dhe mirëqenien mendore.

UBT mirëpret abstrakte që lidhen (por jo vetëm) me fushat e mëposhtme:

  • Aftësitë e rezistencës në komunitetet e margjinalizuara
  • Avancimet në kërkimin mbi sjelljen
  • Shëndeti mendor dixhital dhe epoka dixhitale
  • Baza biologjike e sjelljes njerëzore
  • Shëndeti mendor dhe pabarazia
  • Strategjitë e përballimit të stresit
  • Ndërgjegjësimi për shëndetin mendor

Konferenca do të mbahet në format hibrid, duke u lejuar pjesëmarrësve të marrin pjesë fizikisht në Kampusin e UBT-së ose online, duke ofruar fleksibilitet për kontribuesit vendorë dhe ndërkombëtarë. Pjesëmarrës në këtë ngjarje do të jenë hulumtues shkencorë nga SHBA-ja, Republika Çeke, Turqia, Shqipëria dhe Maqedonia e Veriut.

Datat e rëndësishme:

  • Dorëzimi i abstrakteve: 10 tetor 2025
  • Njoftimi për pranimin e abstrakteve: 17 tetor 2025
  • Dorëzimi i punimeve: 14 nëntor 2025
  • Procesi i rishikimit: 17 tetor 2025
  • Regjistrimi i hershëm: 17 tetor 2025
  • Regjistrimi i vonë: 20 tetor 2025
  • Datat e konferencës: 23–25 tetor 2025

Koordinatorët e konferencës:

Dr. Fatbardh Qehaja Osmani & Dr. Elona Krasniqi

Continue Reading

Të kërkuara