Kryeministri Albin Kurti është figura më e përfolur në keqinformata gjatë muajit tetor. Në mediat sociale ka filluar parafushata zgjedhore keqinformuese, ku fokusi kryesor është publikimi në tik-tok. Kështu thotë raporti monitorues i Hibrid.info për keqinformimit gjatë muajit tetor. Në këtë raport janë analizuar 44 përmbajtje keqinformuese, ku lajmet e rreme janë forma më e shpeshtë e keqinformimit.

Hulumtuesi në Hibrid.info, Festim Rizanaj tha se keqinformimi në masë të madhe po vijon edhe gjatë këtij muaji.

“Lajmi i rremë ka qenë kategoria e keqinformimit që ka dominuar gjatë muajit tetor. Pasuar nga përmbajtje të ndryshme mashtruese. Kur them lajmi i rremë, të gjitha këto janë gjetur në tik-tok, fokusi kryesor ka qenë në tik-tok të publikimit të këtyre lajmeve të rreme. Mashtrimi vazhdon me 16 për qind, dezinformata radhitet si e treta. Vetëm dezinformatë ka pasur diku 11 për qind, por prej krejt kategorive që i përmenda kanë dominuar në mediat sociale që janë publikuar”, tha ai.

Ai shtoi se 18 për qind e publikuesve janë media, ndërkaq 73 për qind janë media sociale.

“Figurat lidhen me para fushatën zgjedhore, ku partitë politike duke i përfshirë të gjitha këto të mëdhajat janë pjesë, dominojnë si institucionet më të përfolura. Kryeministri Albin Kurti është figura më e përfolur gjatë muajit tetor, e që herë pas here edhe gjatë muajve të tjerë Kurti është nga protagonistët e përfolur në keqinformata. Kemi një para fushatë keqinformuese zgjedhore që po zhvillohet në mediat sociale, konkretisht në tik-tok. Nëse e bëjmë një kalkulim, gjatë gushtit 23 për qind kanë qenë keqinformatat e publikuara në tik-tok, shtatori është ngritur në 35 për qind edhe në muajin tetor 38 për qind. Shihet një rritje e keqinformatave në tik-tok që edhe gjatë nëntorit këto keqinformata po publikohen kryesisht në platformën në tik-tok”, shtoi Rizanaj.

Nga dita kur është vendosur dita e zgjedhjeve, kontrolluesi i fakteve, Fatbardh Dema tha se janë identifikuar 14 sondazhe të rreme.

“Që nga data 16 gusht kur presidentja Vjosa Osmani, kishte caktuar datën 9 shkurt të vitit 2025 për zgjedhjet e rregullta në Kosovë, e deri tash Hibridi ka verifikuar gjithsejtë 14 sondazhe të rreme. Kur themi sondazhe të rreme, aty ka pasur që kanë qenë komplet të fabrikume, ka pasur sondazhe të vjetra që janë rikthyer si aktuale por edhe sondazhe të vjetra që janë rikthyer si aktuale duke ju manipuluar të dhënat. Për shembull, e kanë marrë x partinë e kanë vendosur në vendin e dytë, të tretë, varësisht se publikuesi cilën parti ose kandidat e mbështet. Ndërsa, prej 1 janar deri më 16 gusht kanë qenë shtatë sondazhe të rreme. Prej gushtit e deri sot kur po flasim ka një rritje enorme të sondazheve të rreme që publikohen në tik-tok”, theksoi ai.

Në raportin monitorues të Hibrid.info thuhet se temat kryesore të cilat janë përdorur për krijimin e përmbajtjeve keqinformuese janë sondazhet zgjedhore, situata në veri, zgjedhjet në Kosovë, dialogu Kosovë-Serbi, rritja e pagave dhe konkurset për punësim.

Federata e Sindikatave të Shëndetësisë së Kosovës ka paralajmëruar protestë më 5 dhjetor, ku një ndër kërkesat e tyre është rritja e pagave.

Sipas njoftimit të federatës, pas diskutimit të sfidave kryesore me të cilat po përballet sektori i shëndetësisë në Kosovë, kryesia ka marr vendim për protestë.

“Me këtë protestë, FSSHK shpreh pakënaqësinë e thellë për ndërprerjen e dialogut social me Ministrinë e Shëndetësisë, mospajtimin me propozimin e qeverisë për një rritje të vogël të koeficientit prej 0.5, mosnënshkrimin e Kontratës Kolektive Sektoriale, si dhe injorimi i protestës nga ana e Ministrisë së Shëndetësisë ndaj kërkesave të FSSHK-së”, thuhet tutje.

FSSHK ka theksuar se këto veprime pengojnë përmirësimin e kushteve të punës dhe zhvillimin e një sistemi shëndetësor më të qëndrueshëm dhe të drejtë për të gjithë profesionistët shëndetësor.

Ushtruesi i detyrës së Kryeprokurorit të Shtetit, Besim Kelmendi, ka marrë pjesë në Konferencën e Këshillit Gjyqësor të Kosovës “Ditët e Gjyqësorit”.

Gjatë fjalës së tij, Kelmendi ka përmendur sfidat e sistemit prokurorial, në veçanti ato që kanë të bëjnë me ndarjen e buxhetit nga pushteti ekzekutiv dhe legjislativ për të pasur një sistemin prokurorial funksional dhe efikas, me ç’rast ka theksuar se si pasojë e mos aprovimit të kërkesave buxhetore për të shtuar numrin e prokurorëve dhe stafit mbështetës do të vije deri të pamundësia e mbajtjes së seancave gjyqësore brenda afateve ligjore, për shkak të numrit disproporcional të prokurorëve dhe gjyqtarëve.

Kelmendi nënvizoi qëndrimet lidhur me avancimin e sistemit të drejtësisë përmes bashkëpunimit institucional, duke theksuar rëndësinë e koordinimit në mes të sistemit gjyqësor dhe sistemit prokurorial, për të garantuar një drejtësi efikase dhe të besueshme në Republikën e Kosovës.

Ai ka falënderuar sistemin gjyqësor dhe partnerët ndërkombëtarë për mbështetjen e tyre gjatë reformës në drejtësi dhe ruajtjen e pavarësisë së sistemit të drejtësisë.

Sipas komunikatës, Konferenca e Këshillit Gjyqësor të Kosovës “Ditët e Gjyqësorit”, është organizuar me mbështetjen e Organizatës për Siguri dhe Bashkëpunim në Evropë (OSBE), Misioni në Kosovë, ku në ditën e dytë të kësaj gjykate kanë marrë pjesë gjyqtarë të lëmisë penale të gjykatave në Republikën e Kosovës.

Numri i sinjalizuesve në Kosovë ka shënuar rritje, porse mungon mbështetja dhe mbrojtja e tyre nga institucionet.

Kështu u tha në konferencën e organizuar nga Iniciativa për Drejtësi dhe Transparencë për mbrojtjen e sinjalizuesve.

Menaxheri i projektit “Sinjalizuesi”, nga organizata joqeveritare Iniciativa për Drejtësi dhe Transparencë, Bujar Ejupi tha se nga monitorimet e bëra del se ka zero përkrahje për sinjalizuesit nga institucionet, për çka shton se këto të fundit mbrojnë zyrtarët që kanë qenë të raportuar nga sinjalizuesit.

Ejupi i bëri thirrje Ministrisë së Drejtësisë që bëhen ndryshime në Ligjin për Mbrojtjen e Sinjalizuesve.

Ndërkaq, gazetarja Ardiana Thaçi tha se sinjalizuesit në vend që të mbrohen ata dënohen apo ndëshkohen nga institucionet duke u larguar nga puna.

Në konferencë u potencua se këtë vit ka pasur dhjetëra raportime nga sinjalizuesit.

Sinjalizuesi është një person që shpërfaq apo raporton informacion për aktivitete joligjore, joetike apo mashtruese brenda një organizate apo institucioni.