Federata e Futbollit e Kosovës, në bashkëpunim me sponsorin zyrtar të Superligës, Albi Mall, ka ndarë çmimin tradicional “Ylli i Javës”, që i dedikohet futbollistit më të dalluar të javës në Superligën e futbollit kosovar.

Për javën e 21-të të këtij edicioni, çmimi shkoi për Ruben Silva Richards të FC Ferizaj, i cili ndihmoi skuadrën e tij të fitojë 3 pikë të rëndësishme me dy gola të shënuar kundër FC Ballkan, në një ndeshje që përfundoi 2:1. Vlerësimi u bë nga Komisioni i Veteranëve të Futbollit.

Pas marrjes së këtij çmimi, Richards u shpreh:

“Mendoj që ka qenë një ndeshje e mirë, ku ekipi funksionoi shumë mirë mes vete. Unë shënova dy gola, por pa përpjekjen e madhe të bashkëlojtarëve nuk do të ishte e mundur, prandaj jam shumë mirënjohës.
Liga është shumë e mirë, me lojtarë taktikë dhe me nivel të lartë. Qyteti dhe shteti i Kosovës janë shumë mikpritës. Jam shumë i lumtur këtu.
Dua ta ndaj këtë shpërblim me kapitenin e ndeshjes, Mexhit Neziri, i cili gjithashtu ka bërë një punë të shkëlqyer në këtë ndeshje.”

Ky çmim vlerëson jo vetëm performancën individuale të futbollistëve, por edhe përpjekjen e ekipit dhe ndikimin e tyre në zhvillimin e Superligës së Kosovës. Ruben Silva Richards ka treguar një herë tjetër aftësitë e tij, duke u bërë protagonist në një ndeshje vendimtare për FC Ferizaj.

Sekretari i Përgjithshëm i Komiteti Ndërkombëtar i Lojërave Mesdhetare (ICMG), Iakovos Filippousis, ka vlerësuar lart përgatitjet e Kosovës për organizimin e Lojërat Mesdhetare “Prishtina 2030”, duke e cilësuar këtë edicion si një mundësi të jashtëzakonshme për zhvillimin sportiv dhe infrastrukturor të vendit.

Gjatë vizitës së tij në Kosovë dhe takimeve me drejtues të institucioneve sportive, ai theksoi se puna e Komiteti Olimpik i Kosovës dhe e federatave sportive po zhvillohet në drejtimin e duhur, ndërsa përgatitjet po marrin formë konkrete.

Filippousis nënvizoi se edicioni i 21-të i Lojërave Mesdhetare përfaqëson një mundësi të madhe jo vetëm për organizimin e garave në 28 sporte në nivel të lartë, por edhe për ndërtimin e infrastrukturës moderne dhe të qëndrueshme sportive. Sipas tij, këto investime do të ndikojnë drejtpërdrejt në përmirësimin e kushteve për atletët, rritjen e standardeve të performancës dhe zhvillimin afatgjatë të sportit në vend.

Ai shtoi se organizimi i “Prishtina 2030” do të lërë një trashëgimi të rëndësishme për Kosovën, duke forcuar kapacitetet institucionale dhe duke e pozicionuar kryeqytetin në hartën e ngjarjeve të mëdha sportive ndërkombëtare.

Sipas tij, angazhimi aktual tregon se Kosova është në rrugën e duhur për të realizuar një organizim dinjitoz dhe me ndikim afatgjatë për sportin dhe vendin në tërësi.

Pas incidentit të dyshuar racist në ndeshjen e parë të playoff-it të Liga e Kampionëve, futbollisti argjentinas Gianluca Prestianni i Benfica është pezulluar përkohësisht për ndeshjen e kthimit kundër Real Madrid. Vendimi është marrë nga Komisioni i Disiplinës dhe Etikës i UEFA përpara ndeshjes që zhvillohet këtë të mërkurë.

UEFA bëri të ditur se pezullimi vlen pavarësisht vendimeve të mundshme që organet disiplinore mund të marrin pas përfundimit të hetimit në vijim. Si arsye për masën e përkohshme, institucioni evropian përmendi një shkelje të dyshuar të nenit 14 të Rregullores Disiplinore të UEFA-s, që lidhet me sjellje diskriminuese.

Incidenti ndodhi të martën e javës së kaluar. Pas golit të fitores 1:0 dhe festimit të tij, sipas deklarimeve të lojtarit dhe bashkëlojtarit të tij francez Kylian Mbappé, braziliani Vinícius Júnior është ofenduar në mënyrë raciste. Pretendohet se Prestianni e ka quajtur atë “majmun”.

Argjentinasi i ka mohuar akuzat. Gjatë incidentit, ai ishte parë duke e mbuluar gojën me fanellë.

Federata e Basketbollit e Kosovës (FBK) ka njoftuar se kanë dalë në shitje biletat për ndeshjen e dytë parakualifikuese të Kosovës për FIBA EuroBasket 2029, ku përfaqësuesja e Kosovës do të përballet me Sllovakinë.

Ndeshja Kosovë – Sllovaki do të zhvillohet më 27 shkurt 2026, me fillim nga ora 19:00, në Palestra sportive Sezai Surroi, në Prizren.

Sipas njoftimit, biletat do të jenë në dispozicion nga sot deri më 27 shkurt 2026 dhe mund të blihen në fanshopin e KB Bashkimit në Prizren, që ndodhet përballë Palestra sportive Sezai Surroi.

Kjo sfidë është e vlefshme për raundin e dytë parakualifikues drejt EuroBasket 2029, ndërsa FBK u ka bërë thirrje tifozëve që të mbështesin ekipin kombëtar në këtë përballje të rëndësishme.

Ekipi i Kombëtares së Kosovës në basket do të përfaqësohet nga këta lojtarë:

Valon Bunjaku

Divine Myles

Musab Mala

Jon Ismajli

Mikaile Tmusic

Erjon Kastrati

Arian Qallaku

Muhamedali Janjeva

Samir Zekiqi

Bardh Istrefi

Gëzim Morina

Dardan Kapiti

Lis Shoshi

Të ftuar nga shtabi teknik, por që nuk do të jenë të disponueshëm për këtë ndeshje:

Dardan Berisha

Drilon Hajrizi

Meriton Ismaili

Pas vlerësimit të stafit mjekësor, është konstatuar se këta lojtarë kanë nevojë për kohë shtesë rikuperimi dhe nuk janë në gjendje optimale për paraqitje.

Kosova synon një paraqitje të fortë para publikut vendas, ndërsa përkrahja nga tribuna pritet të jetë një shtysë e madhe në këtë sfidë të rëndësishme.

D.L