

Lajmet
Kosova ende pa vaksinat antiCOVID, fajësohet Ministria e Shëndetësisë
Published
5 years agoon
By
Betim GashiKanë mbetur edhe tri ditë deri në përfundim të muajit shkurt, muaj ky i cili ishte paralajmëruar si kohë e mundshme për arritjen e dozave të para të vaksinës anti-COVID në Kosovë. Por si duket edhe ky muaj do të kalojë e Kosova do të jetë vendi i vetëm në Ballkan që nuk ka siguruar asnjë dozë vaksine.
Ministri i Shëndetësisë, Armend Zemaj, në vazhdimësi kishte deklaruar se po angazhohen për sigurim të vaksinës anti-COVID, por ky institucion ende nuk ka ndonjë datë të saktë se kur mund të mbërrijnë vaksinat e AstraZenecas dhe Oxfordit në Kosovë. Por vonesat në negociata për vaksinën dhe mungesa e transparencës po shihen si dy faktorë që kanë ndikuar në mossigurimin e vaksinave kundër koronavirusit në Kosovë.
“Angazhimi ynë është maksimal për sigurimin e vaksinës COVID-19 në sasi të mjaftueshme për 75 përqind të popullatës sonë. Pres që sipas planit për vaksinim anti-COVID të hartuar nga Instituti të zbatohen nga të gjithë nivelet e përkujdesjeve shëndetësore duke filluar nga ajo primare. Puna jonë është transparente, e përqendruar dhe e pandalshme”, tha ai.
Besim Kodra nga Shoqata e Pacientëve të Kosovë ka deklaruar se mossigurimi i vaksinave për mbrojtje nga SARS-COV2, është një veprim i pafalshëm i institucioneve të Kosovës.
Sipas tij, edhe mungesa e transparencës nga Ministria e Shëndetësisë karshi këtij procesi është një problem tjetër.
“Sigurimi i një doze të vaksinës është jashtëzakonisht problem për gjithë botën, megjithatë është e pafalshme që të gjitha vendet e rajonit kanë filluar t’i kenë dozat e para dhe t’i imunizojnë kategoritë e rrezikuara, ndërsa Kosova ende asnjë dozë të vetme nuk e ka. Problemi më i madh se kjo mendoj se është mostransparenca e këtij procesi. Ne vazhdimisht kemi pasur premtime se do vijnë në këtë datë apo në një tjetër dhe do të vijë kjo dozë apo ajo dozë, por ende nuk e kemi parë qartë se kush është furnizuese me vaksina, cili model i vaksinës, cila do të jetë sasia dhe data e saktë kur ato vaksina do të vijnë në Kosovë. Vazhdimisht kemi pasur premtime të pabazuara, të pa faktuara dhe të kanë shkaktuar një konfuzitet tek popullata”, deklaroi Kodra.
Sipas tij, çdo ditë e humbur pa vaksina e rëndon tutje gjendjen shëndetësore të pacientëve, por edhe të bizneseve në vend.
“Fakti që vendet e rajonit kanë arritur të sigurojnë doza të vaksinës ne nuk mund ta arsyetohemi se sa mungesë të vaksinave të treg dhe ne nuk kemi arritur t’i marrim ato ne e kuptojmë që është e vështirë, por të paktën një dozë e caktuar e vaksinave është dashur të vijë. Çdo ditë e humbur pa vaksinë për ne është shumë, si me thënë gjendja e pacientëve është e rënduar, gjendja ekonomike e qytetarëve është e rënduar, bizneset janë në prag të kolapsit të gjitha këto për faktin se ne kemi një virus brenda dhe nuk kemi një vaksinë për të mbrojtur nga ai virus. Prandaj, barra më e madhe po iu bie qytetarëve dhe bizneseve të cilët po bëjnë kompromiset më të mëdha për të mbrojtur njerëzimin nga COVID-i, përndryshe ne do të duhej të kishim vaksinat të cilat ato do e bënin këtë mbrojtje”, theksoi ai.
Vonesa për vaksinat anti-COVID për qytetarët e Kosovës i ka konsideruar si papërgjegjshmëri, ish-deputeti i Lëvizjes Vetëvendosje, Fitim Haziri.
Haziri, i cili në legjislaturën e fundit ishte edhe anëtar i Komisionit për Shëndetësi, thotë se premtimet se në muajin shkurt do nis vaksinimi në Kosovë janë shfrytëzuar nga LDK-ja për të grumbulluar vota.
“Kjo tregon se kjo qeveri përveç se ka qenë jolegjitime ka qenë edhe e papërgjegjshme karshi kësaj gjendjeje që jemi ballafaquar me pandeminë. Pra, këta me 10 shkurt kanë deklaruar se kemi siguruar 1.2 milionë vaksina, tash jemi në përfundim të muajit shkurt dhe ende nuk shihet asgjë. Ajo çfarë dihet gjatë historisë kjo vërehet që Lidhja Demokratike e Kosovës i ka shfrytëzuar fushatat dhe asnjëherë nuk i ka mbajtur premtimet të cilat i ka dhënë. Kjo tregon se ka qenë një fushatë prej tyre që të fitojë sa më shumë vota, por qytetarët janë ata që ia dhanë vlerësimin kësaj qeverie jo legjitime”, theksoi Haziri.
Zëdhënësi i Partisë Demokratike të Kosovës, Avni Bytyçi zotimet se së shpejti në arrijnë në Kosovë vaksinat anti-COVID i ka quajtur mashtrime. Sipas tij, fakti që të njëjtat nuk janë porositur me kohë e këtyre vaksinave i ka lënë qytetarët në dorë të fatit. Ai thotë se me këtë ritëm që është duke u punuar për sigurim të vaksinës, Kosova rrezikon që deri në vitin 2022 të mos ketë imunizimi në nivel të duhur.
“Për fat të keq qytetarët e këtij vendi janë braktisur dhe janë lënë në mëshirë të fatit si nga Qeveria Kurti dhe Hoti të cilët e kanë administruar dhe menaxhuar çështjen e pandemisë në vend. Jo vetëm se këto dy qeveri kanë dështuar në menaxhimin e pandemisë dhe menaxhimin e pasojave të saj, por përkundrazi nuk janë kujdesur që t’i porosisin me kohë vaksinat për t’i imunizuar qytetarët e vendit, sidomos kategoritë që kanë qenë të ndjeshme doktorët, infermierët dhe kategoritë që kanë qenë në fron me luftën e pandemisë. Për fat të keq ne jemi i vetmi shtet, jo vetëm në rajon por ndoshta edhe në Evropë, që nuk i kemi imunizuar asnjë kategori të shoqërisë kundër koronavirusit. Ne jemi tepër vonë dhe do vazhdojmë të vonohemi me këtë hap siç ka bërë Qeveria Hoti, gjasat janë që edhe viti 2022 të na zë pa vaksina dhe imunizim të duhur ose le të themi pa imunizim në nivel të duhur të qytetarëve”, theksoi ai.
Madje, Bytyçi deklaron se me këto vonesa për vaksinim të qytetarëve Kosova rrezikon të ballafaqohet edhe me izolim të jashtëm.
“Mund të ndodh që përtej izolimit të brendshëm ne do kemi edhe izolim të jashtëm për arsye se në momentin kur shumica e vendeve në rajon dhe Evropë e kanë një përqindje të qytetarëve të imunizuar nga vaksina, ne do jemi i vetmi vend që jo do të jemi të izoluar për mos liberalizim të vizave, por edhe për shkaqe shëndetësore dhe pandemike, do të jemi të izoluar si shtet. Ky rezultat ka ardhur si rezultat i një mos pune dhe moskoordinimi nga dy qeveritë (Kurti dhe Hoti). Kosova ka dështuar në shumë kontekste, jo vetëm në bashkëpunimin rajonal, por edhe në atë evropian ku siç duket ne jemi mbetur i vetmi shtet që do të presë si në formë të ndihmave nga BE-ja dhe vendet e tjera se në rast iu teprojnë do i sjellin në Kosovë. Në këtë rast jo që ka munguar vetëm bashkëpunimi rajonal, sidomos me Shqipërinë, ne kemi dështuar që t’i porosisim vetë”, deklaroi Bytyçi.
KosovaPress ka tentuar në vazhdimësi të marrë një qëndrim zyrtar nga Ministria e Shëndetësisë se kur pritet të mbërrijnë vaksinat e premtuara për këtë muaj, por zyrtarët e këtij dikasteri nuk janë përgjigjur.
Derisa në Kosovë ende nuk ka arritur asnjë dozë e vetme e vaksinës kundër koronavirusit, vendet e rajonit tashmë kanë nisur vaksinimin e kategorive më të rrezikuara. Shqipëria veçse ka marrë kontigjentët e vaksinës së Pfizer-it pothuajse çdo javë, kurse në prill në këtë shtet pritet të arrijë kontingjenti i parë i 360 mijë dozave të vaksinës AstraZenecas. Ndërsa, edhe Serbia ka siguruar katër lloj vaksina dhe po ashtu i ka dhuruar disa doza edhe Maqedonisë së Veriut, Malit të Zi dhe në Bosnje e Hercegovinës.
Kosova po vazhdon t’i pres 100 mijë e 800 vaksinat e AstraZenecas përmes programit të shpërndarjes së Organizatës Botërore të Shëndetësisë – COVAX, që ka për qëllim të shpërndajë vaksina në vende të varfra.
Aktualitet
UBT fton studiues dhe profesionistë për dorëzimin e abstrakteve në Konferencat e Shkencave Politike dhe Sigurisë
Published
9 hours agoon
September 28, 2025By
Driton Iseni
UBT ka kënaqësinë të ftojë studiues, akademikë, profesionistë dhe studentë të interesuar të marrin pjesë në nënkonferencat Studime të Sigurisë dhe Shkenca Politike dhe Marrëdhënie Ndërkombëtare, pjesë e edicionit të 14-të Konferencës Ndërkombëtare të UBT-së për Biznes, Teknologji dhe Inovacion 2025.
Ky edicion i fokusuar në Qëndrueshmërinë dhe Reziliencën synon të sjellë së bashku ekspertë dhe studiues për të shkëmbyer ide, përvoja dhe rezultatet më të fundit kërkimore në fushat e sigurisë, shkencave politike dhe arsimit.
Konferenca për Studime të Sigurisë
Afatet e rëndësishme:
- Dorëzimi i abstrakteve: 10 tetor 2025
- Njoftimi për pranimin: 17 tetor 2025
- Dorëzimi i punimeve të plota: 14 nëntor 2025
- Regjistrimi i hershëm: 17 tetor 2025
- Regjistrimi i vonshëm: 20 tetor 2025
Kjo konferencë synon të krijojë një platformë ku studiues dhe praktikues mund të japin një pasqyrë të fushës, të prezantojnë rezultatet më të fundit kërkimore dhe të shkëmbejnë ide dhe përvoja në shkencat politike dhe siguri.
Temat dhe objektivat kryesore përfshijnë:
- Siguria njerëzore
- Paqja dhe demokracia
- Siguria kombëtare, rajonale dhe ndërkombëtare
- Konfliktet pas Luftës së Ftohtë
- Çështjet e sigurisë në Ballkanin Perëndimor
- Konfliktet ndërshtetërore dhe etnike: shkaqet dhe zgjidhjet
Dorëzimi i punimeve:
Punimet duhet të jenë origjinale, të papublikuara më parë dhe të mos jenë në shqyrtim diku tjetër. Maksimumi i faqeve është 6. Punimet që nuk i plotësojnë kriteret e formatit nuk do të shqyrtohen.
Konferenca për Shkenca Politike dhe Marrëdhënie Ndërkombëtare
Afatet e rëndësishme:
- Dorëzimi i abstrakteve: 10 tetor 2025
- Njoftimi për pranimin: 17 tetor 2025
- Dorëzimi i punimeve të plota: 14 nëntor 2025
- Regjistrimi i hershëm: 17 tetor 2025
- Regjistrimi i vonshëm: 20 tetor 2025
Kjo konferencë ndërkombëtare e shqyrtuar nga kolegët (peer-reviewed) ofron një mundësi për shkëmbimin e njohurive midis studiuesve inovativë, studentëve pasuniversitarë, kandidatëve doktoraturë dhe profesionistëve në arsim dhe zhvillim, si dhe në politikë dhe marrëdhënie ndërkombëtare. Edicioni i këtij viti fokusohet në ndërtimin e sistemeve arsimore të qëndrueshme për një të ardhme të qëndrueshme.
Temat kryesore përfshijnë:
- Politikat publike dhe arsimi
- Ekonomia politike dhe administrata publike
- Demokracia, migracioni dhe politikat e integrimit
- Digjitalizimi i proceseve zgjedhore dhe anti-korrupsioni në Ballkan
- Siguria globale dhe kërcënimet ndërkombëtare
- Terrorizmi, krimi i organizuar transnacional, lufta kibernetike
- Arsimi në zonat e konfliktit dhe roli i tij në parandalimin e ekstremizmit të dhunshëm
- Rikonstruksioni arsimor pas konflikteve dhe arsimi për refugjatët
Dorëzimi i punimeve:
Ashtu si për konferencën e sigurisë, punimet duhet të jenë origjinale, të papublikuara më parë dhe të mos jenë në shqyrtim diku tjetër. Maksimumi i faqeve është 6 dhe punimet që nuk i plotësojnë kriteret nuk do të konsiderohen.
Aktualitet
UBT shpall thirrjen për Konferencën Ndërkombëtare të Gjuhës dhe Kulturës 2025
Published
1 day agoon
September 27, 2025By
Driton Iseni
UBT ka bërë hapjen e thirrjes për pjesëmarrje në Konferencën Ndërkombëtare të Gjuhës dhe Kulturës 2025 (IC-LAC), e cila këtë vit organizohet në kuadër të Konferencës së 14-të Ndërkombëtare të UBT-së për Biznes, Teknologji dhe Inovacion.
Ky aktivitet shkencor do të bashkojë studiues, akademikë, studentë të cikleve të avancuara, doktorantë, ekspertë të fushës dhe profesionistë të arsimit nga vende të ndryshme të botës, me synim shkëmbimin e njohurive, përvojave dhe praktikave më të mira mbi gjuhën, kulturën dhe ndërthurjen e tyre në sistemet bashkëkohore arsimore.
Tema kryesore e këtij edicioni është: “Ndërtimi i sistemeve arsimore reziliente për një të ardhme të qëndrueshme.”
Datat kryesore:
- Dorëzimi i abstrakteve: 10 tetor 2025
- Njoftimi i pranimit & rishikimi shkencor: 17 tetor 2025
- Regjistrimi i hershëm: deri më 17 tetor 2025
- Regjistrimi i vonuar: deri më 20 tetor 2025
- Dorëzimi i punimit të plotë: 14 nëntor 2025
Qëllimet dhe objektivat
Konferenca IC-LAC synon të hapë një hapësirë të gjërë diskutimi mbi rolin e gjuhës dhe kulturës në shoqëritë moderne, duke nxitur qasje multidisiplinare për edukimin dhe komunikimin ndërkulturor.
Fushat e diskutimit përfshijnë:
- Gjuha dhe kultura në arsim
- Përdorimi i teknologjisë në mësimdhënie dhe të nxënë
- Komunikimi ndërkulturor dhe shumëgjuhësia
- Praktikat e qëndrueshme në edukimin gjuhësor
- Inteligjenca artificiale dhe ndikimi i saj në të nxënit e gjuhëve
- Përkthimi, interpretimi dhe komunikimi global
- Rezilienca arsimore dhe dizajnimi i kurrikulave
Dorëzimi i punimeve
Punimet e paraqitura duhet të jenë origjinale, të papublikuara më parë dhe të mos jenë në proces shqyrtimi në konferenca të tjera. Gjatësia maksimale e një punimi është 6 faqe. Punimet që nuk respektojnë kriteret e formatimit nuk do të merren në konsideratë.
Organizatorët ftojnë të gjithë të interesuarit që të kontribuojnë me hulumtimet e tyre shkencore dhe praktikat profesionale, duke u bërë pjesë e një platforme ndërkombëtare shkëmbimi idesh që synon të forcojë lidhjen mes gjuhës, kulturës dhe arsimit për një të ardhme më të qëndrueshme.
Lajmet
Gjykata spanjolle liron Dani Alves-in
Published
2 days agoon
September 26, 2025By
UBT News
Gjykata e Lartë e Katalonjës ka rrëzuar të premten dënimin për përdhunim ndaj ish-futbollistit brazilian Dani Alves, duke arsyetuar se çështja kishte mospërputhje dhe kontradikta në dëshmitë e paraqitura.
Alves, 41 vjeç, ishte dënuar vitin e kaluar me katër vjet e gjysmë burg për përdhunimin e një gruaje në një klub nate në Barcelonë në vitin 2022. Megjithatë, gjykata e apelit vendosi se dëshmia e akuzueses nuk kishte besueshmëri të mjaftueshme, duke theksuar se mungonin prova të qarta për të mbështetur akuzën.
“Dani Alves është shumë i lumtur. Ai është i pafajshëm, kjo është demonstruar. Drejtësia ka folur,” deklaroi avokatja e tij, Ines Guardiola.
Ndërkohë, avokatja e akuzueses, Ester Garcia, paralajmëroi se do ta çojë çështjen në Gjykatën Supreme të Spanjës, proces që mund të zgjasë deri në një vit./S.K/KP/Morung Express/
Lajmet
Caktohet data, Pogba rikthehet në fushë
Published
2 days agoon
September 26, 2025By
UBT News
Paul Pogba është shumë pranë rikthimit në futboll pas një periudhe të gjatë mungese tha trajneri i Monacos, Adi Hütter. Ai zyrtarisht ka konfirmuar se mesfushori francez po përparon ndjeshëm.
“Fizikisht dhe mendërisht po shkon mirë. Është stërvitur për tre muaj dhe është afër kthimit në skuadër,” deklaroi Hütter.
Sipas mediave franceze, Pogba pritet të jetë i disponueshëm më 5 tetor, në ndeshjen e Ligue 1 kundër Nice në Stade Louis II.
Ndërkohë, rikthimi në sfidën e së shtunës kundër Lorient shihet më pak i mundshëm.
Ish-mesfushori i Juventusit nuk ka luajtur një ndeshje zyrtare që prej 3 shtatorit 2023, kur u aktivizua ndaj Empolit.
Pak javë më vonë, ai u pezullua për doping dhe u dënua fillimisht me katër vite jashtë fushave. Megjithatë, në tetor 2024, Gjykata e Arbitrazhit Sportiv uli ndalimin në 18 muaj, që skadoi më 11 mars 2025.
Pas ndarjes me Juventusin, Pogba refuzoi një transferim në MLS dhe verën e kaluar nënshkroi një kontratë dyvjeçare me Monacon, e vlefshme deri më 30 qershor 2027.
Klubi monegask e ka regjistruar 31-vjeçarin edhe për Ligën e Kampionëve, ku pritet të rikthehet në tetor.
Ky rikthim do të shënojë një moment të rëndësishëm për kampionin e botës 2018, i cili synon të rifitojë formën dhe të lërë pas periudhën më të vështirë të karrierës së tij./S.K/KP/CNN/

UBT fton studiues dhe profesionistë për dorëzimin e abstrakteve në Konferencat e Shkencave Politike dhe Sigurisë

UBT shpall thirrjen për Konferencën Ndërkombëtare të Gjuhës dhe Kulturës 2025

Gjykata spanjolle liron Dani Alves-in

Caktohet data, Pogba rikthehet në fushë

Aksident me fatalitet në Blagaj të Pejës

Legjenda e Barcelonës njofton pensionimin nga futbolli

Osmani takohet me presidentin e Senegalit

Arrestohet një i dyshuar për sulm seksual ndaj një të miture në Podujevë

Nis Superliga e Kosovës në futsall këtë fundjavë
Të kërkuara
-
Aktualitet1 month ago
Profesori i UBT-së, Bahri Gashi, pjesë e rrjetit prestigjioz ndërkombëtar të recensimit shkencor në Taylor & Francis
-
Lajmet nga UBT3 months ago
UBT shpall konkurs për pranimin e studentëve të rinj për vitin akademik 2025/26
-
Aktualitet2 months ago
BSc në Shëndet Publik dhe Shkenca Mjekësore në UBT – Investim për të ardhmen e shëndetit të popullatës
-
Kërkime3 months ago
Profesori i UBT-së, Musa Sabedini, publikon punim shkencor në revistën ndërkombëtare JGPSCD në SHBA