Kryetari i Lidhja Demokratike e Kosovës, Lumir Abdixhiku, ka deklaruar pesë prona të paluajtshme në formularin e pasurisë pranë Agjencisë për Parandalimin e Korrupsionit.

Sipas të dhënave, dy prej tyre janë të trashëguara nga familja, ndërsa tri të tjera janë siguruar përmes kredive bankare dhe kursimeve familjare.

Në mesin e pasurive të trashëguara përfshihen dy banesa në pronësi të bashkëshortes: njëra me sipërfaqe 118.20 m² me vlerë 120 mijë euro dhe tjetra 94.15 m² me vlerë 100 mijë euro, të dyja të regjistruara në vitin 2025. Po ashtu, Abdixhiku ka deklaruar një shtëpi prej 200 m², me vlerë 150 mijë euro, të trashëguar nga prindërit që nga viti 1989.

Sa i përket pasurive të fituara me blerje, ai ka raportuar një shtëpi prej 214 m², të blerë në vitin 2014 përmes kredie dhe kursimeve, me vlerë 200 mijë euro. Gjithashtu, një banesë prej 174 m², e blerë në vitin 2023 përmes kredie bankare, është deklaruar me vlerë 265 mijë euro. Këto dy prona janë në pronësi të përbashkët.

Në total, vlera e pasurive të paluajtshme të deklaruara arrin rreth 835 mijë euro.

Në deklarim përfshihen edhe pasuri të luajtshme. Abdixhiku ka raportuar një veturë Mercedes-Benz, të blerë në vitin 2019 me kredi, me vlerë 25 mijë euro, e cila është në pronësi të bashkëshortes.

Po ashtu, është deklaruar edhe zotërimi i 25% të aksioneve në kompaninë AMPERA GROUP, të regjistruara më 15 prill 2024, me vlerë të deklaruar zero euro dhe në pronësi të bashkëshortes.

Sa i përket mjeteve financiare, kursimet familjare të raportuara arrijnë në rreth 9,594 euro.

Ndryshe, në deklarimin paraprak për vitin 2025, Abdixhiku kishte raportuar katër prona të paluajtshme.

Bazuar në të dhënat e fundit të pasurisë për vitin 2026, kryeministri i Kosovës, Albin Kurti, ka raportuar ndryshime në bilancin e tij financiar, ku spikat rritja e kostos së banimit dhe rënia e dukshme e kursimeve personale.

Kreu i qeverisë ka bërë të ditur se qiraja mujore për banesën ku qëndron është rritur nga 250 në 350 euro. Ndryshim drastik vërehet te paratë e gatshme; ndërsa vitin e kaluar ai kishte 1,800 euro kursime, këtë vit ka deklaruar se në llogarinë e tij rrjedhëse në një nga bankat e Kosovës posedon vetëm 16 euro e 41 centë.

Edhe në këtë raport, Kurti nuk ka deklaruar pasuri të paluajtshme në emër të tij. Pasuria kryesore e familjes mbetet banesa e bashkëshortes në Norvegji, me vlerë 530 mijë euro dhe sipërfaqe 67.00 m². Familja ka një kredi aktive në një bankë norvegjeze, ku nga shuma fillestare prej 270 mijë eurosh, mbeten për t’u shlyer edhe 160 mijë euro, me një afat deri në vitin 2052.

Sa i përket pagave, ekziston një diferencë e ndjeshme mes të hyrave të çiftit. Albin Kurti ka arkëtuar 21,315.76 euro neto në vit nga buxheti i shtetit dhe ka specifikuar se nuk përfiton asnjë lloj kompensimi tjetër. Në anën tjetër, bashkëshortja e tij, përmes angazhimit në institutin norvegjez “NUPI”, ka siguruar të hyra vjetore prej 51 mijë eurosh.

Në llogaritë rrjedhëse në Oslo, bashkëshortja e kryeministrit mban 21,500 euro, ku përfshihen edhe kursimet e vajzës së tyre. Në fund të deklarimit, kryeministri ka rikonfirmuar se nuk zotëron automjet, aksione në biznese apo asete në kriptovaluta.

Në Kuvendin e Kosovës ka nisur shqyrtimi në lexim të parë i Projektligjit për verifikimin dhe konfiskimin e pasurisë së pajustifikueshme. Gjatë prezantimit, ministrja e Drejtësisë, Donika Gërvalla, theksoi se ky ligj është jetik për drejtësinë, duke nënvizuar se pozitat publike nuk do të shërbejnë më si mburojë për pasurim të jashtëligjshëm. Ajo sqaroi se Byroja nuk do të marrë kompetencat e gjykatave, por do të shërbejë si mekanizëm për mbledhjen dhe analizimin e të dhënave mbi bazën e informacioneve kredibile.

Sipas ministres, versioni aktual ka integruar rekomandimet e Komisionit të Venedikut dhe vërejtjet e Gjykatës Kushtetuese, duke ruajtur konceptin e konfiskimit civil. Gërvalla hodhi poshtë pretendimet se ligji prek qytetarët e thjeshtë, duke specifikuar se cak i verifikimit janë zyrtarët publikë.

Nga ana tjetër, Partia Demokratike e Kosovës ka shprehur rezerva ndonëse parimisht nuk e kundërshton konceptin civil të konfiskimit. Deputeti Përparim Gruda kritikoi mungesën e konsultimeve publike dhe mënyrën e hartimit të tekstit, të cilin e cilësoi si “publicistik” dhe jo juridik. Gruda ngriti shqetësime edhe për mungesën e qartësisë në kompensimin e personave të cilëve u bllokohet pasuria pa pasur prova për shkelje.

PDK ka bërë të ditur se do të abstenojë në këtë fazë, me kushtin që vërejtjet e tyre të adresohen mes dy leximeve. Kjo është përpjekja e radhës e Qeverisë Kurti për të kaluar këtë nismë, pasi Gjykata Kushtetuese e kishte rrëzuar dy herë paraprakisht ligjin për shkak të shkeljeve procedurale dhe kushtetuese.

Ministri i Mbrojtjes i Kosovës, Ejup Maqedonci, ka pritur sot me një ceremoni të lartë ushtarake homologun e tij nga Shqipëria, Ermal Nufi.

Pas nderimeve shtetërore nga Garda e FSK-së, dy ministrat kanë nisur një takim dypalësh në ambientet e ministrisë, ku në fokus është koordinimi i mbrojtjes dhe sigurisë mes dy vendeve.

Vizita e ministrit Nufi në Prishtinë vjen pas një jave intensive aktivitetesh, ku ai zhvilloi takime edhe me ministrin kroat të mbrojtjes, Ivan Anusiq. Sipas Nufit, diskutimet e fundit me aleatët rajonalë kanë synuar thellimin e bashkëpunimit ushtarak dhe adresimin e temave që lidhen me stabilitetin dhe paqen në rajon.

Pas përfundimit të takimit në Prishtinë, Maqedonci dhe Nufi pritet të dalin në një konferencë të përbashkët për media për të shpalosur detajet e marrëveshjeve apo pikave të diskutuara.