Lajmet

​Konjufca për Asociacionin: BE-ja po përdorë qasje diskriminuese ndaj Kosovës

Published

on

Kryetari i Kuvendit të Kosovës, Glauk Konjufca, e ka akuzuar Bashkimin Evropian se po trajton Kosovën si jo-shtet.

Sipas tij, BE-ja ka një qasje diskriminuese dhe jo fer ndaj Kosovës në lidhje me kërkesën për procedim të draft-stautit të Asociacionit të komunave me shumicë serbe në Gjykatën Kushtetuese. Përkitazi me këtë, Konjufca nënvizon se draft-statuti i Asociacionit i hartuar nga BE-ja, është i papranueshëm, pasi i njëjti duhet të hartohet nga vet institucionet e Kosovës. Mirëpo, tri partitë opozitare, PDK, LDK dhe AAK, i quajtën si joserioze këto deklarata, pasi sipas tyre, qeveria fillimisht e kishte pranuar draft-stauttin e Asociacionit të propozuar nga BE-ja vitin e kaluar.

Kryeparlamentari, Glauk Konjufca, pas mbledhjes së Kryesisë së Kuvendit të hënën, tha se BE-ja s’mundet t’i marrë kompetenca Kosovës për hartimin e draft-statutit të Asociacionit dhe dërgimin e tij në Gjykatën Kushtetuese.

Ai tha se letra e ish kryeministres serbe, Ana Bërnabiq në Bruksel si dhe sulmi terrorist në Banjskë e kanë shpallur të vdekur Marrëveshjen Bazë të Brukselit dhe aneksin e Ohrit, të arritur në vitin 2023 ndërmjet Kosovës dhe Serbisë.

“Nëse mendon dikush se ky është një dokument përfundimtar i cili për Kosovën është merre ose lerë. Atëherë kjo me përkthyer i bie që Kosovës i është marrë një ingirencë shumë e rëndësishme shtetërore, të cilën e ka të garantuar edhe me procesin e negociatave dhe marrëveshjet ndërkombëtare që i kemi arritur deri tash. Nëse i referohemi ka bazë edhe në Kushtetutën e Kosovës dhe ligjet. Kjo është kompetenca që Kosova vet me propozu draftin. S’mundet në vend të Kosovës me propozu draftin e Asociacionit, Bashkimi Evropian. Kjo i bie që Bashkimi Evropian me ia grabit një kompetencë shtetërore Kosovës….Kosova e ka këtë të drejtë. Kosovës i garantohet e drejta që me paraqit një draft-statut të Asociacionit. BE-ja mundet me kritiku se jeni vonu shumë. Ne mund të themi a ka pasur afat deri kur mundet Kosova me paraqitë, s’ka pas. Më shumë është varur prej dinamikës kohore të procesit të dialogut. Ndoshta ne mundemi me pranu kritikën se jemi vonu, por vonesa nuk është me ia marrë kompetencën Kosovës”, tha ai.

Ai u shpreh i ashpër ndaj Bashkimit Evropian, duke thënë se qasja e tyre është diskriminuese ndaj Kosovës.

“Me ia imponuar Kosovës në këtë mënyrë, me thënë se ky është dokumenti, vetëm ky, 20 faqësh dhe s’ka tjetër, vetëm ky duhet të shkojë në Gjykatën Kushtetuese. Unë mendoj që jo që nuk është fer ndaj Kosovës por mendoj se është një qasje shumë diskriminuese e BE-së, i cili Kosovën e trajton si një jo-shtet. Prandaj Kosova duhet të mbrojë të drejtën e vet deri në fund. Cila është e drejta e vet? Me u ulë me BE-në dhe me qartësuar deri në fund se kush e ka këtë kompetencë. A e ka Kosova apo BE-ja. Unë mendoj se e ka Kosova…BE-ja e ka pasur qasjen merre ose lere, por kjo nuk është qasje në rregull. Prej kur kjo qasje kështu? Një dokument që ata e shkruajnë vet dhe me të gjitha ligjet ndërkombëtarë thuhet se Kosovës i takon kjo e drejtë”, shtoi ai.

Mirëpo, shefi i Grupit Parlamentar të PDK-së, Abelard Tahiri, tha se deklaratat e Konjufcës për Asociacionin janë jo serioze, pasi i njëjti para 1 viti ka deklaruar se draft-statuti i Asociacionit i propozuar nga BE-ja është modern dhe në përputhje me Kushtetutën.

“Ju e dëgjuat zotëri Konjufca që tha se Republikës së Kosovës nuk mundet me iu imponuar një draft-statut për Asociacionin nga BE-ja se po i merr kompetenca Kosovës dhe kështu me radhë. Por shikoni me 25 tetor të para 1 viti, zotëri Konjufca në një deklarim të tij thotë se draft-statuti i Asociacionit duket se është modern dhe duket se është në përputhje me Kushtetutën e Kosovës. Pra po shohim dy Glauka. Po shohim Glaukun e vitit 2023, ku thotë se duket që Asociacioni është në përputhje me Kushtetutën. Pra nuk e thotë këtë qëndrim që e ka tani dhe kemi Glaukun pas 1 viti që tash del me një gjuhë tjetër, që një dokument i tillë nuk mund t’i imponohet Kosovës në këtë formë. Ajo që do të duhej me ndodh është se atë që e tha tani zotëri Konjufca do të duhej me thënë fiks para 1 viti…Këta janë joserioz, këta janë vërtet joserioz. Këto nuk janë qëndrime të një burrështetasi dhe qëndrime shtetërore. Kjo është situatë e mjerueshme, por vetëm një fat e kemi që jemi në prag të zgjedhjeve. Jemi të bindur se vendi do të ketë një qeveri të re dhe që do të nxjerr vendin nga sanksionet”, theksoi Tahiri.

Kritika ndaj Konjufcës adresoi edhe shefi i Grupit Parlamentar të LDK-së, Arben Gashi, i cili tha se kur i kanë bërë thirrje Qeverisë së Kosovës të nis hartimin e një drafti për Asociacionin, kryeministri Albin Kurti thoshte se kjo është tradhti kombëtare.

“Kësaj qeverie i kemi thënë para dy vjetëve se Kosova e ka obligim ndërkombëtarë dhe duhet të marrë nismën vet. A e dini çka ka thënë kryeministri kjo është tradhti shtetërore. Qëndrimi i LDK-së ka qenë konstruktiv që prej ditës së parë edhe sa i përket statutit të Asociacionit. E kam thënë para jush dhe secilin televizion se Kosova duhet t’i zbatojë obligimet veta por duke garantuar se opinioni i Gjykatës Kushtetuese mbi parimin e statutit të zbatohen”, tha ai.

Ndërkaq, shefi i Grupit Parlamentar të AAK-së, Besnik Tahiri, akuzoi pushtetin aktual se po mashtron qytetarët në lidhje me dialogun dhe Asociacionin. Këtë të fundit, ai tha se tre krerët e shtetit, presidentja Vjosa Osmani, kryeparlamentari, Glauk Konjufca dhe kryeministri Albin Kurti janë zotuar gjatë këtij viti për themelim të Asociacionit.

“Kjo letër këtu është letra e 23 marsit të vitit 2024, ku të tre krerët e shtetit zotohen për themelimin e Asociacionit. Çka doni më shumë se tre nënshkrime të tre udhëheqësve të shtetit që thonë se ne zotohemi se do të themelojmë Asociacionin. Është letra e 15 majit që vjen nga Qeveria e Kosovës nga zvkm Donika Gërvalla e cila po ashtu zotohet për themelimin e Asociacionit të komunave me shumicë serbe. Për çka jemi tu fol. Jemi duke folur për një standard të dyfishtë. Për një standard të paparë të mashtrimit”, deklaroi Tahiri.

Rajoni

Rektori Hajrizi mori pjesë në Konferencën CIGRE Kosova mbi “Formësimin e fuqisë punëtore të së ardhmes: Perspektiva e universitetit mbi tregun e punës”

Published

on

Rektori i UBT-së, Prof. Dr. Edmond Hajrizi, mori pjesë në konferencën e organizuar nga CIGRE Kosova, me temën “Formësimi i fuqisë punëtore të së ardhmes: Perspektiva e universitetit mbi tregun e punës në sektorin e energjisë”. Në këtë ngjarje u bashkuan ekspertë të energjisë, akademikë dhe përfaqësues të industrisë, për të diskutuar ndikimin e transformimeve teknologjike në zhvillimin e kapaciteteve profesionale dhe krijimin e vendeve të reja të punës.

Në fjalën e tij, Rektori Hajrizi theksoi se universitetet duhet të kenë një rol udhëheqës në përgatitjen e fuqisë punëtore të digjitalizuar, duke ndërtuar ura bashkëpunimi midis arsimit, inovacionit dhe industrisë. Ai nënvizoi rëndësinë e edukimit ndërdisiplinar dhe zhvillimin e programeve studimore që përfshijnë fusha si energjia e zgjuar, inteligjenca artificiale, teknologjia 5G dhe menaxhimi i qëndrueshëm i burimeve.

Rektori Hajrizi po ashtu theksoi rëndësinë e studimeve të doktoratës dhe akreditimit të programeve në këtë nivel, si domosdoshmëri për zhvillimin e kërkimit shkencor të avancuar dhe përgatitjen e ekspertëve të nivelit të lartë që i nevojiten tregut të punës. Ai potencoi se akreditimi i doktoraturave në fushat e energjisë, teknologjisë dhe inovacionit është një hap i rëndësishëm për të forcuar lidhjen mes universiteteve dhe industrisë, si dhe për të krijuar një bazë të qëndrueshme të zhvillimit akademik dhe profesional.

Gjithashtu, Rektori prezantoi arritjet e UBT Smart City, e cila ka integruar teknologjinë 5G dhe sistemet e mençura të energjisë, duke e bërë UBT-në një ndër institucionet e para në rajon që po e zbatojnë në praktikë konceptin e qytetit të mençur (Smart City). Këto zhvillime lidhin drejtpërdrejt kërkimin shkencor me nevojat e ekonomisë moderne dhe krijojnë terren të përshtatshëm për përfshirjen e studentëve dhe stafit akademik në projekte të avancuara.

Rektori theksoi se sektori i energjisë është ndër më dinamikët në procesin e digjitalizimit dhe zhvillimit të qyteteve të mençura, duke hapur mundësi të reja për bashkëpunim ndërmjet universiteteve dhe industrisë, si dhe për krijimin e vendeve të punës të orientuara drejt inovacionit, qëndrueshmërisë dhe kërkimit shkencor të avancuar.

Konferenca CIGRE Kosova shërbeu si një platformë e rëndësishme për shkëmbimin e ideve, nxitjen e kërkimit shkencor dhe forcimin e partneriteteve ndërmjet akademisë dhe sektorit energjetik, në funksion të përgatitjes së brezave të rinj për tregun dinamik të punës së së ardhmes.

Continue Reading

Aktualitet

Studim i përbashkët UBT – Universiteti i Mynhenit publikohet në revistë ndërkombëtare shkencore

Published

on

Një bashkëpunim i rëndësishëm ndërmjet UBT-së dhe Universitetit Teknik të Mynhenit (Technical University of Munich) ka rezultuar me publikimin e një punimi shkencor në një revistë prestigjioze ndërkombëtare të indeksuar në Scopus dhe Web of Science, me faktor impakti 2.2.

Punimi me titull “Microbiological Analysis of Traditional Sausage in Prishtina, Republic of Kosovo, During Production and Storage”, është publikuar në revistën Microbiological Research (MDPI) dhe përfaqëson një nga studimet e para të këtij lloji në Kosovë, duke analizuar aspektet mikrobiologjike dhe të sigurisë ushqimore të suxhukut tradicionalë kosovarë gjatë prodhimit dhe ruajtjes.

Studimi është realizuar nga një ekip ndërdisiplinar studiuesish, përfshirë:

Prof. Dr. Flutura C. Ajazi – UBT, autore e parë dhe correspondent e punimit

Prof. ass. Veton Haziri-UBT, autorë correspondent

Bashkëautorët: Rreze M. Gecaj, Sarah Shaqiri, Idriz Vehapi, Namik Durmishi, Xhavit Bytyçi dhe Violeta Lajqi-Makolli, në bashkëpunim me Prof. Dr. Matthias A. Ehrmann nga Universiteti Teknik i Mynhenit, Gjermani.

Qëllimi i studimit ka qenë vlerësimi i ndryshimeve mikrobiologjike gjatë fazave të fermentimit dhe ruajtjes së suxhukut tradicional të prodhuar në Prishtinë, me fokus në bakteret e acidit laktik (LAB) dhe familjen Micrococcaceae, të cilat kanë rol kyç në sigurinë dhe cilësinë e produktit.

Rezultatet treguan se gjatë procesit të ruajtjes ndodh një ulje e ndjeshme e baktereve patogjene si Enterobacteriaceae, ndërsa bakteret e dobishme (LAB) dhe Micrococcaceae mbeten stabile, duke dëshmuar se produktet tradicionale të prodhuara sipas metodave lokale ruajnë cilësi dhe siguri të lartë mikrobiologjike.

Gjetjet e këtij studimi ofrojnë dokumentacion të vlefshëm të praktikave lokale që mund të ndikojnë në cilësinë e produktit dhe afatin e ruajtjes. Në kontekstin e këtij studimi, autoret bejne thirrje tek autoritetet e sigurisë ushqimore të Kosovës qe të zbatojnë programe ndërgjegjësimi për prodhuesit e produkteve tradicionale të mishit, për të promovuar praktikat më të mira dhe për të siguruar prodhimin e produkteve të sigurta dhe me cilësi të lartë. Kjo është e nevojshme për të rritur cilësinë e suxhukut dhe produkteve të tjera të mishit të prodhuara me metoda tradicionale, përmes përmirësimit të parametrave të tyre higjienikë, etiketimit dhe paketimit, të cilat mund të ndikojnë në rritjen e eksportit dhe të vlerës së produktit.

Punimi është pranuar më 26 gusht 2025 dhe publikuar më 3 shtator 2025, nën redaktimin akademik të Prof. Dr. Beniamino T. Cenci-Goga.

Continue Reading

Rajoni

UBT organizon ligjëratë ndërkombëtare dhe hap Panairin e Materialeve në Arkitekturë dhe Konstruksione

Published

on

UBT njofton se të premten, më 24 tetor 2025, duke filluar nga ora 09:00, në Kampusin Inovativ të UBT-së në Lipjan (Objekti I), do të mbahet një ligjëratë tematike ndërkombëtare me titull: “Environmental Sustainability of Concrete Structures”, që do të udhëhiqet nga Prof. Bruno Dal Lago nga Universiteti i Insubrias dhe Politekniku i Milanos, Itali.

Ligjërata do të trajtojë praktikat bashkëkohore të qëndrueshmërisë mjedisore në ndërtimet prej betoni, duke sjellë njohuri shkencore dhe përvoja profesionale nga universitetet më prestigjioze evropiane.

Pas ligjëratës, nga ora 10:00, do të zhvillohet Ceremonia e Hapjes së “Panairit të Materialeve”, që do të mbahet në hollin e Objektit I, dhe do të vazhdojë deri në ora 14:00.

Ky panair do të prezantojë materiale dhe teknologji inovative në fushën e arkitekturës, inxhinierisë dhe ndërtimtarisë, si dhe do të shërbejë si platformë për ndërveprim ndërmjet studentëve, profesorëve dhe kompanive bashkëpunëtore.

Gjithashtu, në të njëjtën ditë, nga ora 12:40, do të mbahet prezantimi i kompanisë ndërkombëtare “PENETRON”, e cila do të paraqesë materiale inovative që lidhen me ndërtimet prej betoni, arkitekturën dhe qëndrueshmërinë strukturore.

Ky prezantim do të zhvillohet po ashtu në Objektin I të Kampusit të UBT-së në Lipjan.

Ligjërata është obligative për studentët e programeve “Materialet në Arkitekturë” dhe “Konstruksionet e Betonit” (niveli Bachelor), ndërsa janë të ftuar të marrin pjesë edhe studentët e lëndës “Bazat e Konstruksioneve të Betonit” në Arkitekturë dhe të gjithë studentët e interesuar nga vitet tjera të studimeve.

Kjo ngjarje përfaqëson një mundësi unike për studentët dhe profesionistët e rinj që të njihen nga afër me risitë bashkëkohore të qëndrueshmërisë në ndërtim, materialet inteligjente dhe zhvillimet më të fundit teknologjike në këtë fushë.

Continue Reading

Lajmet

Përfundon rinumërimi i 16 kutive të votimit nga 12 vendvotime

Published

on

By

Në Qendrën e Numërimit dhe Rezultateve është përmbyllur procesi i rinumërimit të kutive të votimit, për rinumërimin e të cilave mori vendim Komisioni Qendror Zgjedhor (KQZ) në mbledhjen e ditës së mërkurë, raporton KosovaPress.

Nga pasditja e ditës së mërkurë dhe deri në orën 15:30 të ditës së enjte, janë rinumëruar 16 kuti të votimit.

Rezultatet nga rinumërimi pasqyrohen platformën https://resultslocal2025.kqz-ks.org/, në rubrikën “Rezultatet QNR – Rinumëruara”.

Gara e balotazhit në Kosovë për kryetar të komunave ku në raundin e parë nuk kishte fitues mbahen më 9 nëntor./KP

Continue Reading

Të kërkuara