Në Gjirokastër është çelur libri i ngushëllimeve për ndarjen nga jeta të shkrimtarit Ismail Kadare. Në banesën muze të Ismail Kadaresë vizitat u shtuan që prej fillimit të javës. Të shumtë janë ata që kanë vendosur një koment në librin memorie të ngushëllimeve.

Nënshkruesit e komenteve janë nga vende të ndryshme të botës, lexues të tij por edhe bashkëqytetarë. Së shpejti bashkia pritet t’i dorëzojë këshillit bashkiak propozimin për ngritjen e një monumenti të shkrimtarit në qytetin e lindjes.

“Jam e përlotur dhe e trishtuar nga kjo humbje. Ai ishte një hero i letrave për Shqipërinë dhe botën. Unë kam lexuar disa nga librat e tij dhe isha sot pjesë e aktiviteteve në Gjirokastër. Trashëgimia e tij do të jetojë përgjithmonë”, shprehet një vizitore.

“Ne gjirokastritët përkulemi me mirënjohje para birit të këtij qyteti që ofroi kaq shumë. Iku Ismaili por ngeli Kadareja, në rrugët në sokakët, në shtëpinë muze. Kadare do ngelet, do ngelet vepra e tij, do ngelet ajo që ka shkruar për Gjirokastrën tonë. Unë besoj se do marr miratimin shumë shpejt të këshillit bashkiak, mbase për të sjellë një monument që duhet të zërë vend në Gjirokastër”, thotë kryetari i Bashkisë.

Ka nga ata që e njohën Kadarenë përmes librave dhe të tjerë që e zbuluan përmes kritikës letrare e publicistikës. Romanet “Kronikë në gur”, “Darka e gabuar” apo “Breznitë e Hankonatëve”, rrëfime identitare me në qendër Gjirokastrën dhe jetën e çuditshme brenda korracës së gurit u bënë pjesë e ndërgjegjes dhe krenarisë personale të çdo bashkëqytetari të tij.

“Sokaku i të Marrëve”, qafa e pazarit, kutia e Kako Pinos, shtëpia e doktor Vasilit apo plaka e Kokobobove veshin me karakter kryeveprën autobiografike të një fëmijërie plot fantazi të Kadaresë në Gjirokastër.

Qyteti e ka nderuar Ismail Kadarenë me disa tituj por do t’i detyrohet përherë, fëmijës ëndërrimtar që vëzhgonte avionët nga një dritare e lagjes Palorto, e më pas mendimtarit të rrallë për pasaportën që i dha Gjirokastrës e Shqipërisë për t’i bërë të njohura në të gjithë botën./TopChannel

Kryeministri francez, Gabriel Attal, një aleat i ngushtë i presidentit francez, Emmanuel Macron, tha se ai beson që një përpjekje ndërpartiake për të privuar Tubimin Kombëtar të ekstremit të djathtë të Marine Le Pen nga shumica në balotazhin parlamentar të së dielës së ardhshme mund të ketë sukses.

Attal po fliste pasi më shumë se 200 kandidatë në të gjithë spektrin politik ranë dakord të tërhiqen nga garat lokale për t’i hapur rrugën kujtdo që ishte në gjendje më të mirë për të mposhtur garuesin e RN në zonën e tyre të votimit.

“Ajo që tregojnë këto tërheqje është se ne mund të shmangim një shumicë absolute për të djathtën ekstreme”, tha Attal për radion France Inter për numrin prej 289 vendesh që RN do të kërkonte për të kontrolluar Asamblenë Kombëtare të Francës me 577 vende.

Ministria e Brendshme duhej të publikonte listën e kandidatëve për votimin e raundit të dytë më vonë, por media lokale vlerësoi se deri në 218 kandidatë ishin tërhequr, duke ulur numrin e zonave në të cilat vota kundër RN rrezikonte të ndahej./UBTNews/

Vepra letrare e shkrimtarit Ismail Kadare ka luajtur rol emancipues për Kosovën dhe kosovarët. Kështu tha kryetari i Akademisë së Shkencave dhe Arteve të Kosovës, Mehmet Kraja, në mbledhjen komemorative për shkrimtarin Ismail Kadare. Kraja u shpreh se Kadare ka bërë më shumë se institucionet.

“Zëri i Kaderesë në mbështetje të Kosovës ka qenë frymëzim për shumë gjenerata intelektualësh, për një masë të gjerë të njerëzve në Kosovë. Në këtë pikë Kadare ka bërë më shumë se të gjitha institucionet. Zëri i tij, pavarësisht nëse vinte ka diskursi publik, ka qenë zë frymëzues. Bashkësisë ndërkombëtare i ka folur me gjuhë të qartë. Shqetësimet e Kadaresë kanë pasur jehonë të madhe në opinionin kosovar. Veprat letrare të Kadaresë, kanë luajtur rol emancipues për Kosovën dhe kosovarët”, tha Kraja.

Në akademinë përkujtimore të organizuar nga AShAK, akademik Sabri Hamiti tha se me përkthimin e veprave të Ismail Kadaresë, ai ka fituar statusin e shkrimtarit të madh.

Dy mjete të dyshimta janë gjetur në një livadh të fshatit Babaj i Bokës të Gjakovës. Rastin në polici e ka lajmëruar një burrë i cili ishte duke punuar në livadh.

“Ankuesi mashkull kosovar ka njoftuar se derisa ishte duke punuar në një livadh ka vërejtur dy mjete të dyshimta. Njësiti policor ka bërë sigurimin e vendit të ngjarjes derisa njësiti për deminim i FSK-së kanë bërë deminimin e mjeteve të dyshimta në mënyrë të sigurt”, thuhet në raportin policor.