Teknologji

Kompanitë e mëdha pezulluan punën në Rusi

Kompanitë e mëdha i përgjigjen agresionit rus të Ukrainës.

Published

3 years ago

March 9, 2022

Betim Gashi

Shumë kompani të mëdha kanë pezulluar veprimtarinë e tyre në Rusi si përgjigje ndaj pushtimit rus të Ukrainës.

Eksodi preku çdo cep të ekonomisë, nga pasuritë e saj të mëdha energjetike përmes makinave, financave, shitjes me pakicë, argëtimit dhe ushqimit të shpejtë, duke e shtyrë Rusinë për investime të reja dhe duke hequr produktet dhe shërbimet që ishin bërë të njohura në dekada që nga rënia e Bashkimit Sovjetik.

Kompanitë automobilistike

Ford njoftoi se po pezullon veprimtarinë e saj në Rusi. Prodhuesi amerikan i automjeteve ka 50% të aksioneve në Ford Sollers, një sipërmarrje e përbashkët që punëson të paktën 4 mijë punëtorë dhe është e ndarë me kompaninë ruse Sollers.

Kompania ka fabrika në Shën Petersburg, Elabuga dhe Naberezhnye Chelny, por tha se ka “pezulluar ndjeshëm” operacionet e saj në Rusi vitet e fundit. Prodhuesi i automjeteve tha se është “thellësisht i shqetësuar për situatën në Ukrainë” dhe se ka “një kontigjent të fortë shtetasish ukrainas që punojnë në Ford në mbarë botën”.

Nga General Motors thanë se do t’i ndalin të gjitha eksportet drejt Rusisë deri në njoftimin e ardhshëm. GM nuk ka fabrika atje: ajo shet vetëm rreth 3 mijë automjete në vit përmes 16 përfaqësive, sipas një zëdhënësi.

Toyota (TM) njoftoi se do të pezullojë prodhimin e veturave në Rusi dhe importimin e tyre “deri në njoftimin e radhës, për shkak të ndërprerjes së zingjirëve të furnizimit”.

Volkswagen (VLKAF) ndaloi prodhimin e veturave në Rusi dhe suspendoi eksportin në marketet ruse. Vendimi vlen për vendet e prodhimit rus sikurse Kaluga dhe Nizhny Novgorod.

Nissan (NSANF) pezulloi eksportin e veturave në Rusi, duke shtuar se “do të ndalet prodhimi në Shën Petersburg”.

Aviacioni

Boeing (BA) pezulloi mbështetjen për linjat ajrore ruse. Një zëdhënës i kompanisë konfirmoi se prodhuesi i avionit ndaloi “pjesët, mirëmbajtjen dhe shërbimet e mbështetjes teknike për linjat ajrore ruse”, dhe gjithashtu “pezulloi operacionet kryesore në Moskë dhe mbylli përkohësisht zyrën tonë në Kiev”.

Të njëjtin hap e mori edhe Airbus (EADSF). Në një deklaratë, kompania tha se “pezulloi shërbimet mbështetëse për linjat ajrore ruse.

Kompanitë teknologjike

Apple (AAPL) ndaloi shitjen e produkteve të saj në Rusi. Gjiganti teknologjik përmes një prononcimi tha se është “thellësisht i shqetësuar” për pushtimin rus. Po ashtu, si kundërpërgjigje kompania limitoi qasjen në shërbimet dixhitale në Rusi, si për shembull me Apple Pay dhe kufizoi disponueshmërinë e mediave ruse jashtë vendit.

Facebook (FB) – kompania amë Meta bllokoi qasjen në mediat ruse sikurse Sputnik dhe RT, rrjeti televiziv i mbështetur nga Rusia, famëkeq për promovimin e agjendës së presidentit rus, Vladimir Putin, në të gjithë Bashkimin Evropian. Lëvizja erdhi pasi kompania pranoi disa kërkesa nga një numër qeverish dhe Bashkimi Evropian për të ndërmarrë masa në lidhje me mediat ruse të kontrolluara nga Rusia.

Edhe Twitter (TWTR) ka njoftuar në mënyrë të ngjashme planet për të “zvogëluar dukshmërinë dhe përforcimin” e përmbajtjes së medias shtetërore ruse.

Netflix (NFLX) pezulloi shërbimin e transmetimit në Rusi, por detajet tjera nuk u bënë të ditura.

“Duke marrë parasysh rrethanat në të cilat jemi, kemi vendosur të pezullojmë shërbimin në Rusi”, i tha një zëdhënës i Netflixit CNN-it.

Kompania refuzoi t’i transmetojë kanalet televizive ruse – diçka që plaftormës do i ishte kërkuar ta bënte duke filluar nga kjo javë sipas ligjit rus.

Spotify (SPOT) njoftoi se i mbylli zyret e saj në Rusi për një kohë të pacaktuar dhe kufizoi përmbajtjet në mediat ruse.

Shërbimi i transmetimit fshiu të gjithë përmbajtjen nga RT dhe Sputnik në Evropë dhe regjionet tjera, konfirmoi një zëdhënës i kompanisë.

“Jemi thellësisht të shokuar dhe të pikëlluar nga sulmi i paprovokuar në Ukrainë. Prioriteti ynë i parë gjatë javës së fundit ka qenë siguria e punëtorëve tanë dhe të sigurojmë se Spotify vazhdon të shërbejë si një burim i rëndësishëm i informatave globale dhe rajonale në një periudhë kur qasja në informacione është më e rëndësishme se kurrë”, thuhet në njoftim.

Roku (ROKU), i cili shet pajisje që i lejon përdoruesit të transmetojnë përmbajtje përmes internetit, ka ndaluar RT në mbarë botën.

YouTube, nën pronësi të Google (GOOGL), tha se i bllokoi mediat shtetërore ruse brenda Ukrainës, përfshirë edhe RT. Kjo platformë tha se do të kufizojë ndjeshëm rekomandimet për këto kanale. Google dhe YouTube thanë se nuk do t’i lejojnë mediat shtetërore ruse të shfaqin reklama ose të fitojnë para nga përmbajtja e tyre.

Themeluesi i Airbnb, Brian Chesky tha në një postim se kompania e tij do të suspendojë të gjithë veprimtarinë në Rusi dhe Bjellorusi.

Intel (INTC) ka ndaluar të gjitha dërgesat në Rusi dhe Bjellorusi, njoftoi kompania.

Microsoft (MSFT) tha se po pezullon të gjitha shitjet e reja të produkteve dhe shërbimeve të saj në Rusi. Presidenti dhe nënkryetari, Brad Smith tha gjithashtu se kompania po ndalon “shumë aspekte” të biznesit të saj në Rusi në përputhje me sanksionet e qeverisë. Microsoft tha gjithashtu se do të vazhdojë të ndihmojë në sigurinë kibernetike të Ukrainës.

Drejtori i Përgjithshëm i IBM, Arvind Krishna, tha se kompania ka pezulluar të gjithë biznesin në Rusi.

“Në Ukrainë, kemi qenë në kontakt të vazhdueshëm me ekipet tona lokale dhe vazhdojmë të ofrojmë ndihmë që përfshin zhvendosjen dhe mbështetjen financiare. Siguria e përdoruesve të IBM-së dhe familjeve të tyre në të gjitha fushat e prekura nga kjo krizë mbetet prioriteti ynë kryesor”, deklaroi ai.

Divizioni cloud i Amazon (AMZN), Amazon Web Services, që nga 8 marsi ndaloi regjistrimet e reja në Amazon në Rusi dhe Ukrainë. Kompania ka tashmë një “politikë të gjatë për të mos bërë biznes me qeverinë ruse” dhe nuk ka qendra të dhënash, infrastrukturë apo zyra në Rusi, tha kompania në një postim në blog.

Konsulenca

Accenture ndëpreu biznesin e saj në Rusi dhe u solidarizua me popullin e Ukrainës. Kompania mori këtë vendim më 3 mars, ku falënderoi rreth 2 mijë e 300 kolegët e saj në Rusi për përkushtimin dhe shërbimin e tyre ndaj kompanisë gjatë viteve.

Në një lëvizje të ngjashme, Deloitte njoftoi më 7 mars për pezullimin e veprimtarisë në Rusi dhe Bjellorusi.

EY, i njohur ndryshe si Ernst & Young, tha gjithashtu se do të heqë Rusinë nga rrjeti i saj zyrtar global, por do ta lejojë atë të “vazhdojë të punojë me klientët si një grup i pavarur kompanish auditimi dhe konsulence”.

Firma e konsulencës dhe kontabilitetit KPMG International tha se “firmat e saj nga Rusia dhe Bjellorusia do të largohen nga rrjeti i KPMG”.

PricewaterhouseCoopers (PwC) po planifikon gjithashtu të shkëputet nga biznesi i saj rus.

“Si rezultat i pushtimit të Ukrainës nga qeveria ruse, ne kemi vendosur që sipas rrethanave, PwC nuk duhet të ketë një firmë anëtare në Rusi dhe rrjedhimisht PwC Rusia do të largohet nga rrjeti”, tha në një deklaratë konsulenca “Big Four”.

Përveç këtyre edhe shumë kompani të tjera pezulluan punën në Rusi./UBTNews/

Teknologji

Meta do t’i ndalojë reklamat politike në BE nga tetori

Published

12 hours ago

August 5, 2025

UBT News

Meta Platforms do t’i japë fund reklamave politike, zgjedhore dhe sociale në platformën e saj në BE që nga fillimi i tetorit, raportoi Reuters.

Siç ka bërë të ditur kompania amerikane e rrjeteve sociale, ky ndalim do të bëhet si pasojë e pasigurisë ligjore për shkak të rregullave të reja të BE-së mbi reklamat politike.

Legjislacioni i Bashkimit Evropian, i quajtur rregullorja për Transparencën dhe Synimin e Reklamimit Politik dhe i cili do të zbatohet nga 10 tetori, u nxit nga shqetësimet në lidhje me dezinformimin dhe ndërhyrjen e huaj në zgjedhje në të gjithë bllokun me 27 vende.

Ligji kërkon që kompanitë e mëdha të teknologjisë të etiketojnë reklamat politike në platforma, kush pagoi për to dhe sa, si dhe cilat zgjedhje po synohen, përndryshe rrezikojnë gjoba deri në 6% të të ardhurave të tyre vjetore. Meta tha se rregullat e BE-së në fund të fundit do t’i dëmtonin evropianët.

Facebooku dhe Instagrami që janë në kuadër të Metas po hetohen aktualisht nga Komisioni Evropian për shkak të dyshimeve për dështimin e tyre për të luftuar dezinformimin dhe reklamat mashtruese në prag të zgjedhjeve të Parlamentit Evropian të vitit 2024.

Teknologji

S25 arrin 3 milionë shitje në Korenë e Jugut, dy muaj më shpejt se paraardhësi

Published

12 hours ago

August 5, 2025

UBT News

Samsung ka njoftuar se seria Galaxy S25 ka kaluar shifrën prej 3 milionë njësive të shitura në Korenë e Jugut brenda vetëm gjashtë muajve nga lansimi në shkurt.

Kjo e bën S25 serinë më të shitur deri tani, duke arritur këtë rekord dy muaj më herët se paraardhësi, Galaxy S24.

Një ndër faktorët kryesorë të suksesit është plani “AI Subscription Club”, që përfshin edhe një garanci blerjeje deri në 50% të çmimit pas një viti.

Samsung theksoi se ky plan ka tërhequr shumë përdorues të rinj. Kompania bëri të ditur se edhe modelet e palosshme Z Fold7 dhe Z Flip7 po performojnë më mirë se paraardhësit e tyre. Megjithatë, për këto të fundit nuk janë dhënë shifra të sakta shitjesh.

Teknologji

Italia nis hetimet për futjen e inteligjencës artificiale në WhatsApp

Published

17 hours ago

August 5, 2025

UBT News

Një zëdhënës i Autoritetit italian të Antitrustit në Milano tha bashkë me policinë financiare italiane janë kontrolluar zyrat e biznesit të filialit italian Meta. Hetimi po bëhet në bashkëpunim me autoritetet përkatëse të Bashkimit Europian.

Akuza nga Milano është: Ofruesi i Whatsapp-it, Meta, ka instaluar chatbot-in me IA pa marrë miratimin e përdoruesve. Përmes lidhjes së aplikacionit të inteligjencës artificiale “Meta AI” me Whatsapp-in koncerni i SHBA-së i orienton klientët në drejtim të ofertave të veta, kritikon Autoriteti italian i Antitrustit.

Kjo mund të pengojë konkurrencën, përdoruesit janë të detyruar të instalojnë dy aplikacione të IA në aparat, në rast se nuk duan ta përdorin “Meta AI”.

Sipërmarrja, së cilës i përkasin Facebook dhe Instagrami, në të kundërt thekson dobinë e ndërlidhjes së aplikacioneve. “Aksesi falas në funksionet tona të IA-së u jep miliona italianëve mundësinë të përdorin IA në një vend, që e njohin, tek i cili kanë besim dhe e kuptojnë.”

Nëse akuzat nga Italia kundër Meta-s konfirmohen, kjo do të ishte goditje ekonomike për Facebook. Në rast shkeljeje të rregullave europiane të konkurrencës kërcënojnë gjoba me deri në dhjetë për qind të xhiros vjetore mbarëbotërore.

Ditët e fundit ndërmjet BE-së dhe Meta-s ka pasur edhe një përplasje për një temë tjetër. Koncerni amë Facebook njoftoi, se nga tetori nuk do të lejojë më në platformat e veta njoftime dhe reklama politike në Bashkimin Europian. Arsyeja është se rregullorja e BE-së “nuk mund të zbatohet në praktikë”.

Një zëdhënës i sipërmarrjes u ankua, se udhëzimet e BE-së krijojnë “pasiguri ligjore”. Zuckerberg është kritik ndaj rregullave të BE-së. Në fillim të vitit ai e akuzoi Brukselin për “censurë”.

Teknologji

Toyota prezanton automjetin e parë elektrik

Published

18 hours ago

August 5, 2025

UBT News

Duket se është shkruar një kapitull i ri në marrëdhënien komplekse të Toyotës me automjetet elektrike. Gjiganti japonez, ndonëse ngadalë, po e pranon të ardhmen elektrike, gjë që tregohet me prezantimin e modelit krejt të ri C-HR+, krahas modelit ekzistues bZ4X.

Sipas një raporti nga Nikkei Asia, Toyota planifikon të rrisë ndjeshëm prodhimin e automjeteve elektrike në Evropë deri më 2028. Fabrika e kompanisë në Çeki pritet të shndërrohet në një qendër kryesore prodhimi, me një objektiv ambicioz prej 100 mijë automjetesh elektrike në vit.

Ky hap është pjesë e një strategjie të Toyotës që përfshin ofrimin e 14 modeleve të automjeteve elektrike në Evropë deri më 2026, duke përfshirë versionet elektrike të ardhshme të modeleve C-HR+ dhe Urban Cruiser, si dhe një version të përditësuar të modelit bZ crossover, shkruan Carscoops.

Vendimi për të lokalizuar prodhimin është në përputhje me objektivat afatgjata të qëndrueshmërisë dhe ndalimin e ardhshëm të shitjes së automjeteve të reja me motorë me djegie të brendshme në Bashkimin Evropian nga 2035. Pavarësisht një rënie të lehtë të shitjeve së fundmi, automjetet elektrike ende përbëjnë një pjesë të konsiderueshme prej 15.4 për qind të shitjeve të reja të makinave në kontinentin e vjetër.

Për krahasim, në Japoni, kjo për qindje është vetëm 2, gjë që e bën tregun evropian shumë më të rëndësishëm për strategjinë elektrike të kompanisë.

Toyota, si shumë prodhues tradicionalë, po ndjen presion nga konkurrentët kinezë si BYD, Jaecoo dhe Xpeng, të cilët kanë 5.1 për qind të pjesës së tregut në Evropë. Edhe pse Toyota ka qenë e kujdesshme, plani i ri tregon një ndryshim brenda industrisë.

Shumë do ta quajnë këtë si hap për t’iu përgjigjur kërkesës në rritje për opsione elektrike në Evropë, por edhe për t’iu përshtatur kuadrit të rreptë rregullator.

Nuk duhet pritur një ndryshim i plotë i strategjisë. Kompania mbetet e kujdesshme për shkak të sfidave praktike si pesha e baterive dhe kufizimet në autonomi. Në vend të një kthese të plotë, Toyota ka gjasë të vazhdojë të integrojë zgjidhje të avancuara hibride dhe teknologji për zgjatjen e autonomisë, për të ruajtur praktikën dhe tërheqjen – veçanërisht për automjetet më të mëdha.