Mesfushori i Argjentinës, Enzo Fernandez, ka reaguar me një mesazh emocionues në rrjetin social Instagram pas humbjes 1:0 ndaj Spanjës në finalen e Kupës së Botës 2026. Pavarësisht zhgënjimit për humbjen e titullit, ai theksoi se krenaria për të përfaqësuar Argjentinën mbetet më e madhe se çdo rezultat.

“La Albiceleste” u mposht pas kohës shtesë në finalen e së dielës, ndërsa Fernandez u përjashtua në fund të kohës së rregullt pasi mori kartonin e dytë të verdhë për një ndërhyrje ndaj Pau Cubarsit.

Në mesazhin e tij, mesfushori argjentinas shkroi se me kalimin e kohës kupton se ka gjëra shumë më të rëndësishme se rezultati i një ndeshjeje, duke shtuar se kjo skuadër prej vitesh ka treguar versionin më të mirë të vetes. Sipas tij, të garosh nuk do të thotë vetëm të fitosh, por të japësh gjithçka për fanellën dhe të mos dorëzohesh kurrë.

Fernandez u shpreh krenar që është pjesë e kësaj gjenerate të Argjentinës, duke theksuar se skuadra ka luftuar gjithmonë me krenari, përulësi dhe përkushtim për të mbrojtur ngjyrat e vendit.

Ai pati edhe një mesazh falënderimi për tifozët argjentinas, të cilët i mbështetën gjatë gjithë turneut.

“Faleminderit që jeni gjithmonë pranë nesh, që na mbështesni në çdo ndeshje, për dashurinë e pakushtëzuar dhe që na bëni të ndihemi si në shtëpi kudo në botë”, shkroi ai.

Në fund, Fernandez ritheksoi se përfaqësimi i Argjentinës është arritja më e madhe personale në karrierën e tij, duke premtuar se do të vazhdojë të japë maksimumin sa herë që të ketë mundësinë të veshë fanellën e kombëtares.

“Të vesh fanellën e vendit tim është nderi më i madh i karrierës sime dhe do të vazhdoj të jap gjithçka sa herë që të vijë momenti ta mbroj atë”, përfundoi Fernandez.

D.L

Mijëra tifozë sfiduan të ftohtin dhe reshjet e shiut të hënën për t’i rezervuar një pritje të ngrohtë përfaqësueses së Argjentinës në futboll, e cila u kthye në atdhe pas humbjes në finalen e Botërorit ndaj Spanjës. Në mesin e ekipit mungonte ylli Lionel Messi.

Ky nuk ishte rikthimi që kishin ëndërruar argjentinasit. Katër vjet më parë, miliona njerëz kishin pushtuar rrugët për të festuar triumfin historik në Botërorin e Katarit. Këtë herë atmosfera ishte ndryshe, por mbështetja për ekipin nuk mungoi.

Qindra e mijëra tifozë dolën në rrugë për të kënduar, kërcyer dhe ndezur fishekzjarrë, duke shprehur mirënjohjen për lojtarët pavarësisht humbjes në finale.

Lionel Messi nuk u pa duke zbritur nga avioni, ndërsa në Argjentinë nuk u kthyen menjëherë as disa futbollistë të tjerë të kombëtares.

Trajneri Lionel Scaloni dhe pjesa tjetër e ekipit u pritën ngrohtësisht. Ata zhvilluan një parakalim me autobus të hapur, duke përshëndetur mijëra tifozë të mbledhur përgjatë rrugëve.

Shumë prej tifozëve vlerësuan se momenti më i madh i këtij Botërori për Argjentinën mbeti fitorja 2:1 ndaj Anglisë në gjysmëfinale. Ndërkohë, Messi reagoi në rrjetin social Instagram, ku shkroi se “dhimbja është e madhe dhe do të duhet shumë kohë që kjo plagë të shërohet”.

Në finalen e Botërorit, Spanja dominoi ndaj Argjentinës dhe e mposhti me lojë bindëse. Pas ndeshjes, përfaqësuesja argjentinase u përball edhe me kritika për incidentet në fushë, pasi disa lojtarë u përfshinë në përplasje me futbollistët spanjollë.

D.L

Sulmuesi i Hoffenheimit, Fisnik Asllani, është shumë pranë një transferimi te RB Leipzigu, sipas raportimit të gazetës prestigjioze gjermane Bild.

Sipas mediumit gjerman, 23-vjeçari pritet ta finalizojë kalimin te klubi nga Saksonia para përfundimit të këtij muaji. RB Leipzigu është i gatshëm të aktivizojë klauzolën e lirimit prej 30 milionë eurosh, e cila është e përfshirë në kontratën e Asllanit dhe mbetet e vlefshme deri në vitin 2029.

Për sulmuesin kishte shfaqur interes edhe Barcelona, e cila e konsideronte atë si një alternativë në rast se nuk do të arrinte marrëveshje për objektivin kryesor, Julian Alvarez të Atletico Madridit.

Ndërkohë, edhe Borussia Dortmundi e kishte në listën e dëshirave, por klubi verdhezi duhet fillimisht të krijojë hapësirë në skuadër dhe në buxhetin e pagave përpara se të ndërmarrë hapa konkretë për transferimin e tij.

Me zhvillimet e fundit, RB Leipzigu shihet si favorit absolut për të siguruar shërbimet e Asllanit, i cili konsiderohet një nga talentet më premtues të rinj në Bundesligë.

D.L

Pas përfundimit të Kupës së Botës 2026, është publikuar renditja e përditësuar e favoritëve për fitimin e Topit të Artë, ku vlerësohen paraqitjet individuale, ndikimi te skuadrat dhe arritjet gjatë gjithë sezonit.

Në vendin e parë është ngjitur ylli i Barcelonës dhe kampioni i botës me Spanjën, Lamine Yamal, i cili konsiderohet favoriti kryesor për të fituar çmimin më prestigjioz individual në futboll.

Një nga surprizat më të mëdha të renditjes është pozicioni i Kylian Mbappe, i cili mbetet jashtë tre vendeve të para, pavarësisht se e mbylli sezonin si golashënuesi më i mirë në La Liga, Ligën e Kampionëve dhe Kupën e Botës. Mungesa e trofeve me Real Madridin ndikoi në renditjen e tij.

Në vendin e dytë renditet Michael Olise, pas një sezoni mbresëlënës me Bayern Munich dhe paraqitjeve të mira me Francën, ndërsa podiumin e kompleton Harry Kane, i cili humbi terren pas eliminimit të Anglisë në fazën përfundimtare të Botërorit.

Top 15 favoritët për Topin e Artë 2026:

1. Lamine Yamal (Barcelona)
2. Michael Olise (Bayern Munich)
3. Harry Kane (Bayern Munich)
4. Kylian Mbappe (Real Madrid)
5. Vitinha (Paris Saint-Germain)
6. Pedri (Barcelona)
7. Declan Rice (Arsenal)
8. Erling Haaland (Manchester City)
9. Ousmane Dembele (Paris Saint-Germain)
10. Lionel Messi (Inter Miami)
11. Khvicha Kvaratskhelia (Paris Saint-Germain)
12. Luis Diaz (Bayern Munich)
13. Rodri (Manchester City)
14. Joao Neves (Paris Saint-Germain)
15. Cole Palmer (Chelsea)

Triumfi i Spanjës në Kupën e Botës ka ndikuar ndjeshëm në garën për Topin e Artë, me Lamine Yamalin që shihet si kandidati kryesor për ta fituar trofeun, falë ndikimit të tij në suksesin historik të kombëtares spanjolle dhe paraqitjeve të shkëlqyera gjatë gjithë sezonit.

D.L