Lajmet

Kolona nëpër kufij: Nga Kosova deri në Austri, rreth 20 orë udhëtim

Published

5 years ago

May 24, 2021

Betim Gashi

Meqë dita e hënë është ditë pushimi në shumë shtete evropiane, shumë mërgimtarë për tri ditë pushim morën rrugën për në vendlindjet e tyre. Mirëpo, pas kthimit nga atdheu drejt shteteve perëndimore, ata janë duke u përballur me kolona të gjata nëpër kufij të shteteve të ndryshme.

Bashkatdhetari ynë, Gazmend Bardhoku, i cili jeton në Amstetten të Austrisë, mbrëmë është nisur në orën 18:00 nga Gjakova dhe ende nuk ka mbërritur në vendin ku jeton dhe vepron.

„Jemi nisur me autobus, dhe ende jemi rrugës për në Amstetten. Sapo kemi hyrë në Austri. Kishte shumë kolona gjatë rrugës. Në kufirin Serbi – Hungari kemi pritur mbi tri orë, ndërsa ata me vetura pritjet e tyre janë deri në pesë orë“, theksoi ai për albinfo.at.

Gazmendi tregoi se në kolona të gjata kanë hasur edhe në hyrje të Austrisë. „Në hyrje të Austrisë, kolona ishte deri në 4 kilometra“, shtoi ai duke thënë se i duhen edhe dy orë rrugëtim deri në vendin ku jeton.

A ka karantinë për udhëtarët nga Kosova?

Që nga lehtësimi i masave të shtetit austriak, versione të ndryshme janë thënë sa i përket karantinimit për shtetet e Ballkanit, duke përfshirë edhe bashkatdhetarët tanë nga Kosova. Nga vendi i ngjarjes na njoftoi Gazmend Bardhoku.

“Ata që dëshmojnë certifikatë që janë shëruar nga virusi dhe ata që janë të vaksinuar para 22 ditëve, (vaksina e parë) nuk u kërkohet karantina. Ndërkohë, për udhëtarët tjerë vlen karantinimi prej dhjetë ditësh, me mundësi ndërprerje në ditën e pestë, pas testimit dhe rezultati të jetë negativ. Përjashtim kishte të disa udhëtarë të cilët dëshmonin se kanë pasur rast vdekje. Nuk merret parasysh as testi PCR negativ dhe as fotografimi i banerëve të personave të vdekur nëpër shtylla elektrike”, bëri më dije Gazmend Bardhoku.

Sipas faqes zyrtare, austria.info, rregulli pas 19 majit thotë: Me rastin e hyrjes në Austri (kjo vlen posaçërisht për shtetet e Ballkanit) qytetarët duhet të dëshmojnë certifikatën e vaksinimit (vlen vetëm nga dita e 22-të pas vaksinimit me vaksinën e parë) ose

– dëshmi nga mjeku që në 6-mujorin e fundit është kaluar virusi SARS-COV-2 (dëshmia duhet të jetë në gjuhën gjermane ose angleze).

Të gjithë qytetarët, të cilët nuk bëjnë pjesë në dy kategoritë e mësipërme, duhet t’i nënshtrohen vetëkarantinimit prej 10 ditësh, me mundësi ndërprerje në ditën e 5-të nëse pas testimit, rezultati është negativ.

Lajmet

Operacion i përbashkët SHBA–Nigeri vret zëvendëskomandantin e ISIS në Afrikë

Published

46 minutes ago

July 3, 2026

UBT News

Forcat amerikane dhe nigeriane kanë kryer një operacion ushtarak në verilindje të Nigerisë në muajin maj, ku është vrarë Abu-Bilal al-Minuki, i identifikuar si zëvendëskomandant i ISIS në nivel global.

Operacioni u zhvillua pas një sulmi amerikan të autorizuar nga presidenti Donald Trump, i cili deklaroi se militantët kishin synuar komunitetet e krishtera në Nigeri.

Duke folur në një konferencë të shefave të mbrojtjes afrikane në Angola, komandanti i AFRICOM-it, gjenerali Dagvin Anderson, tha se bashkëpunimi SHBA–Nigeri po shërben si model për operacionet e ardhshme të sigurisë në Afrikë.

Sipas tij, SHBA ka tërhequr shumicën e forcave pas përfundimit të operacionit, por po vazhdon bashkëpunimin në fushën e shkëmbimit të inteligjencës me Nigerinë.

Anderson shtoi se operacioni në rajonin e Liqenit Çad ka ndikuar ndjeshëm në degradimin e strukturave drejtuese të Shtetit Islamik, duke goditur komandantë lokalë dhe rrjetet e komunikimit të organizatës militante./A.K/

Lajmet

Betohen 12 kadetë të rinj të Forcës së Sigurisë së Kosovës, gradohen nëntogerë

Published

2 hours ago

July 3, 2026

UBT News

Në Kazermën “Adem Jashari” në Prishtinë është mbajtur ceremonia solemne e diplomimit dhe betimit të 12 kadetëve të Forcës së Sigurisë së Kosovës (FSK), të cilët kanë përfunduar me sukses studimet katërvjeçare në programin ushtarak në Qendrën për Studime Universitare pranë Akademisë së Mbrojtjes së FSK-së, si dhe përgatitjen akademike në Universitetin Amerikan në Kosovë.

Në ceremoni morën pjesë ushtruesja e detyrës së Presidentes së Republikës së Kosovës, Albulena Haxhiu, Kryeministri në detyrë Albin Kurti, Ministri i Mbrojtjes Ejup Maqedonci, Komandanti i FSK-së gjenerallejtënant Bashkim Jashari, si dhe përfaqësues të institucioneve vendore dhe partnerëve ndërkombëtarë.

Ceremonia nisi me raportimin zyrtar para udhëheqësve shtetërorë dhe komandës së FSK-së, ndërsa kulmoi me betimin solemn të gjeneratës 2026. Pas betimit, kadetët u graduan me gradën nëntoger, duke u bërë udhëheqësit më të rinj të FSK-së.

Ky diplomim u vlerësua si një moment i rëndësishëm për zhvillimin profesional të FSK-së dhe forcimin e kapaciteteve të saj në përputhje me standardet moderne ushtarake./A.K/

Lajmet

Mjet i pashpërthyer gjendet në Bjeshkët e Junikut, intervenon FSK dhe KFOR

Published

3 hours ago

July 3, 2026

UBT News

Një mjet i dyshuar i pashpërthyer është gjetur të enjten në Bjeshkët e Junikut, kanë bërë të ditur autoritetet.

Sipas raportit policor, rasti është raportuar më 2 korrik 2026, rreth orës 14:00, pasi në një zonë pyjore është hasur një mjet i dyshuar shpërthyes.

Menjëherë pas pranimit të informatës, njësitë e Policisë së Kosovës kanë dalë në vendin e ngjarjes dhe kanë siguruar perimetrin për të shmangur rrezikun për qytetarët.

Më pas, në vendin e ngjarjes kanë intervenuar njësiti për deminim i Forcës së Sigurisë së Kosovës (FSK) dhe forcat e KFOR-it, të cilët kanë bërë largimin e mjetit pa incidente./A.K/

Lajmet

Dogana e Kosovës ndalon 23,500 euro të padeklaruara në Merdarë

Published

3 hours ago

July 3, 2026

UBT News

Dogana e Kosovës ka zbuluar 23,500 euro të padeklaruara gjatë kontrollit të një automjeti në dalje të Pikës së Kalimit Kufitar në Merdarë.

Sipas njoftimit zyrtar, automjeti ishte përzgjedhur për kontroll bazuar në analizën e riskut dhe më pas ishte dërguar në vijën e dytë për kontroll të detajuar nga zyrtarët doganorë dhe Policia Kufitare.

Gjatë kontrollit janë gjetur 10 mijë euro në çantën personale të udhëtarit, ndërsa 13,500 euro të tjera ishin të fshehura në zarfe brenda një ndarjeje të automjetit, duke e çuar shumën totale në 23,500 euro të padeklaruara.

Autoritetet kanë bërë të ditur se personi kishte dokumente që dëshmojnë prejardhjen e ligjshme të mjeteve monetare, përfshirë kontratë noteriale për shitblerje prone dhe dëshmi të tërheqjes bankare.

Rasti i është referuar Hetimeve Doganore për procedura të mëtejshme, ndërsa në bazë të ligjit është mbajtur 25 për qind e shumës së padeklaruar, kurse pjesa tjetër i është kthyer poseduesit.

Dogana e Kosovës ka rikujtuar se çdo person që hyn ose del nga vendi me 10 mijë euro e më shumë është i obliguar t’i deklarojë ato, në të kundërtën përbën kundërvajtje dhe mund të sjellë masa ligjore./A.K/