Gjiganti i transmetimit të filmave dhe serialeve, Netflix, planifikon të shkurtojë rreth 6 për qind të vendeve të punës, në një kohë kur po përballet me ngadalësimin e rritjes së biznesit, raporton revista “Variety”.

Lajmi u bë i ditur nga bashkëdrejtuesit ekzekutivë të kompanisë, Greg Peters dhe Ted Sarandos.

Në fund të vitit të kaluar, Netflix kishte rreth 16 mijë punonjës, çka do të thotë se shkurtimet mund të prekin afërsisht 1.000 vende pune. Sipas raportimeve, masat do të përfshijnë disa sektorë, mes tyre burimet njerëzore, shërbimet ligjore dhe teknologjinë.

Disa javë më parë, Sarandos kishte pranuar se kompania po rritej më ngadalë sesa do të dëshironte.

Megjithatë, Netflix vazhdon të jetë një nga platformat kryesore globale të transmetimit. Sipas të dhënave të kompanisë, në fund të vitit 2025 shërbimi kishte më shumë se 325 milionë familje abonente.

Ndërkohë, gara në industrinë e transmetimit po intensifikohet. Pasi oferta e Netflix për të blerë aktivitetet e prodhimit të filmave dhe serialeve të Warner Bros u tejkalua nga Skydance, kjo e fundit synon të bashkojë platformën Paramount+ me HBO Max, duke krijuar një konkurrent më të fuqishëm në treg.

Pavarësisht shkurtimeve të planifikuara, drejtuesit e Netflix kanë theksuar se kompania do të vazhdojë të investojë në fushat me potencial të lartë rritjeje. Rezultatet e ardhshme financiare tremujore pritet të japin më shumë detaje për ecurinë e biznesit./A.K/

Filmi dokumentar “I Believe the Portrait Saved Me” (Mua besoj se portreti më shpëtoi), me regji të artistit kosovar Alban Muja, është nderuar me përmendje të veçantë nga çmimi iHuman Award në edicionin e dhjetë jubilar të festivalit DOKUBAKU 2026, në kategorinë DOKUSHORT për dokumentarin më të mirë të shkurtër ndërkombëtar.

Juria vlerësoi mënyrën se si rrëfimi i filmit kalon nga hutimi fillestar drejt një përjetimi të thellë emocional, duke zbuluar gradualisht kuptimet e një klase të pazakontë. Filmi trajton fuqinë e artit dhe mënyrën se si portretizimi e krijimi artistik shndërrohen në instinkt mbijetese përballë barbarisë së luftës.

Sipas vlerësimit të jurisë, fotografia e filmit shmang romantizimin e luftës dhe, përmes kompozimit të kujdesshëm të kuadrove dhe trajtimit të ngjyrave, përcjell peshën e saj dramatike. Juria veçoi edhe aftësinë e regjisorit për të përmbledhur një përmbajtje kaq të thellë dhe një ndikim të fuqishëm vizual në vetëm dhjetë minuta, duke e vlerësuar filmin me përmendje të veçantë.

Ky vlerësim përbën një tjetër prezantim të krijimtarisë së Alban Mujës në skenën ndërkombëtare të filmit dokumentar./A.K/

Kryeministri i Shqipërisë, Edi Rama, ka deklaruar se nuk do të japë dorëheqje për shkak të protestave të dhunshme të udhëhequra nga studentët, të cilat kanë hyrë në ditën e tretë radhazi.

Policia ka përdorur autobotë me ujë për të shpërndarë protestuesit, të cilët kanë thyer xhama dhe kanë dëmtuar pronën në kryeqytet. Për shkak të situatës, Kuvendi e ka anuluar seancën e planifikuar për sot.

Studentët, të cilët po protestojnë kundër rritjes së kostos së arsimit dhe korrupsionit, kanë kërkuar dorëheqjen e Ramës.

“Sa u përket thirrjeve për dorëheqjen time, qeveritë ndërrohen përmes zgjedhjeve demokratike. Ne patëm zgjedhje vitin e kaluar, jo revolucion”, ka thënë Rama në përgjigjet me shkrim për Reuters.

Ai ka shtuar se përgjegjësia e tij është të dëgjojë qytetarët, t’u përgjigjet shqetësimeve legjitime dhe ta mbajë Shqipërinë në rrugën e përparimit.

“Alternativa do të ishte t’i tradhtojë shqiptarët që më dhanë një mandat të fuqishëm për t’i përfunduar negociatat për anëtarësimin në Bashkimin Evropian”, ka deklaruar Rama.

Kryeministri është shprehur i gatshëm të diskutojë për rritjen e kostos së arsimit, por ka theksuar se sulmet ndaj institucioneve, shkatërrimi i pronës publike dhe rrezikimi i sigurisë publike nuk kanë të bëjnë me kërkesat legjitime të studentëve.

Protestat përbëjnë sfidën më të madhe deri më tani për Ramën, i cili vitin e kaluar fitoi mandatin e katërt në krye të qeverisë.

Trazirat vijnë pas disa muajsh protestash kryesisht paqësore, të nxitura nga planet për ndërtimin e një resorti luksoz në bregdetin jugor të Shqipërisë. Projekti mbështetet nga Jared Kushner, dhëndri i presidentit amerikan, Donald Trump, dhe është përballur me sfida ligjore.

Rama ka deklaruar se luftimi i korrupsionit mbetet një nga prioritetet e qeverisë së tij.

“Korrupsioni duhet të luftohet dhe, siç ka rikonfirmuar së fundmi edhe vetë BE-ja, Shqipëria po e lufton atë më shumë se kurrë më parë”, ka thënë ai.

Sipas Ramës, mund të ketë forca brenda dhe jashtë vendit që nuk dëshirojnë që Shqipëria të ketë sukses në procesin e integrimit evropian, por ka theksuar se nuk do të lejojë që dhuna ta pengojë të ardhmen evropiane të vendit.

Shqipëria, së bashku me Malin e Zi, aktualisht kryesojnë procesin e anëtarësimit në mesin e vendeve të Ballkanit dhe synon të anëtarësohet në Bashkimin Evropian që në vitin 2028./A.K/

NATO ka vlerësuar se situata e sigurisë në Kosovë mbetet përgjithësisht e qëndrueshme dhe ka vazhduar të përmirësohet, por ka theksuar se çdo ndryshim në praninë dhe strukturën e KFOR-it do të varet nga zhvillimet në terren.

Në njoftimin e publikuar me rastin e ceremonisë së ndërrimit të komandës së misionit të KFOR-it, Aleanca Veriatlantike ka bërë të ditur se procesi i optimizimit të pranisë dhe strukturës së misionit po vazhdon, me qëllim që KFOR-i të mbetet i përshtatshëm për përmbushjen e detyrave të tij.

Procesi parasheh përshtatje graduale dhe të kujdesshme të strukturës dhe numrit të trupave të KFOR-it gjatë vitit të ardhshëm.

Megjithatë, NATO ka theksuar se ky proces nuk është përfundimtar dhe mund të anulohet ose të kthehet në gjendjen e mëparshme, nëse zhvillimet e sigurisë në terren e kërkojnë një gjë të tillë.

“Procesi do të varet nga zhvillimet në terren dhe mund të anulohet ose të kthehet në gjendjen e mëparshme nëse zhvillimet e sigurisë e kërkojnë këtë”, thuhet në njoftimin e NATO-s./A.K/