Portieri legjendar i Meksikës, Guillermo Ochoa, ka njoftuar tërheqjen nga futbolli profesionist, duke i dhënë fund një karriere të jashtëzakonshme që zgjati 22 vjet.

41-vjeçari kishte bërë të ditur më herët largimin nga Kombëtarja e Meksikës, por kishte lënë të hapur mundësinë për të vazhduar të luante në nivel klubesh. Megjithatë, ai ka vendosur t’i japë fund përfundimisht karrierës së tij.

“Kam dhënë çdo gjë. Kam lënë gjithçka në fushë për klubet ku kam luajtur dhe për ekipin kombëtar. Sot i var dorezat e mia”, shkroi Ochoa në mesazhin e tij të lamtumirës.

Ochoa do të mbahet mend si një nga portierët më të mëdhenj në historinë e futbollit meksikan. Ai mori pjesë në gjashtë edicione të Kupës së Botës, një arritje që e ndajnë vetëm Cristiano Ronaldo dhe Lionel Messi. Në Botërorët e Brazilit 2014, Rusisë 2018 dhe Katarit 2022 ai ishte portieri titullar i Meksikës, duke dhuruar paraqitje që mbeten ndër më të mirat në historinë e turneut.

Karrierën e nisi te Club América, ndërsa më pas ndërtoi një rrugëtim të suksesshëm edhe në futbollin evropian, ku mbrojti ngjyrat e Ajaccio, Málaga, Granada, Standard Liège, Salernitana dhe disa klubeve të tjera.

Me pensionimin e Ochoas, futbolli humbet një prej portierëve më karizmatikë dhe më të spikatur të dy dekadave të fundit, i njohur për refleksin e jashtëzakonshëm dhe paraqitjet mbresëlënëse në skenën më të madhe të futbollit botëror.

D.L

Presidenti i Shteteve të Bashkuara të Amerikës, Donald Trump, dëshiron ta shohë presidentin e FIFA-s, Gianni Infantino, në postin e Sekretarit të Përgjithshëm të Kombeve të Bashkuara, raportoi The New York Post, duke cituar burime pranë presidentit amerikan.

Sipas raportimit, marrëdhëniet mes Trumpit dhe Infantinos janë forcuar gjatë bashkëpunimit për organizimin e Kupës së Botës 2026. Burimi i gazetës thotë se Trump e vlerëson lart kreun e FIFA-s, duke besuar se ai “respektohet nga të gjithë në botë” dhe se ka “një aftësi të veçantë për të bashkuar njerëzit”.

Mandati i sekretarit aktual të përgjithshëm të OKB-së, Antonio Guterres, përfundon në fund të dhjetorit dhe zgjedhja e pasuesit të tij pritet të zhvillohet gjatë këtij viti.

Për të marrë këtë detyrë, kandidati duhet të sigurojë fillimisht miratimin e Këshillit të Sigurimit të OKB-së, i përbërë nga 15 anëtarë, ku pesë anëtarët e përhershëm kanë të drejtën e vetos. Më pas, kandidatura duhet të konfirmohet nga Asambleja e Përgjithshme e OKB-së.

Megjithatë, ende nuk është e qartë nëse Infantino është i interesuar të kandidojë për këtë post apo nëse ka zhvilluar bisedime konkrete me Trump lidhur me këtë mundësi.

Sipas The New York Post, presidenti amerikan e sheh Infantinon si një kandidat me potencial të madh, veçanërisht në një garë ku kandidatët e tjerë konsiderohen “relativisht të dobët”, sipas një burimi të cituar nga gazeta amerikane.

D.L

Reprezentuesi i Kosovës U20 në hendboll, Suad Pajaziti, është përzgjedhur në ekipin më të mirë të Men’s 20 EHF Championship I, turne që përfundoi të dielën në Prishtinë.

Pajaziti ishte një nga lojtarët më të spikatur të Kombëtares së Kosovës gjatë gjithë kampionatit, duke fituar një vend në formacionin ideal në pozitën e qendrës. Edhe pse pozita e tij natyrale është ajo e alos së majtë, ai dha një kontribut të jashtëzakonshëm edhe si organizator i lojës, duke dëshmuar cilësitë dhe shumëanshmërinë e tij.

Pas përfundimit të kampionatit, Pajaziti u shpreh krenar për arritjen historike të ekipit, duke vlerësuar sakrificën dhe unitetin e skuadrës.

“Mund të jemi krenarë me atë që kemi arritur. Nuk kemi pasur kushtet më të mira në fillim të përgatitjeve për shkak të lëndimeve të bashkëlojtarëve. Në fund kemi shtyrë përpara si ekip dhe jam jashtëzakonisht krenar për këtë”, deklaroi Pajaziti.

Kombëtarja e Kosovës e mbylli garën në vendin e tretë, duke regjistruar suksesin më të madh deri më tani në kampionatet evropiane për grupmoshat e reja.

Pajaziti falënderoi Federatën e Hendbollit të Kosovës, bashkëlojtarët, tifozët dhe familjarët për mbështetjen gjatë gjithë turneut.

“Dua të falënderoj të gjithë të përfshirët në federatë për përkushtimin e tyre. Tre lojtarë nga ekipi ynë zunë vend në ekipin më të mirë të Evropianit dhe kjo flet shumë për aftësitë tona. Një falënderim i madh për tifozët dhe familjet tona që na kanë përkrahur në të gjitha ndeshjet. Shumë faleminderit edhe ekipit, Kosovës dhe të gjithë të përfshirëve”, përfundoi Pajaziti.

D.L

Përfaqësuesja e Kosovës U17 në konkurrencën e femrave e ka nisur me humbje paraqitjen në Kampionatin Ballkanik, pasi u mposht nga Mali i Zi me rezultat 3:0 në ndeshjen e parë të turneut.

Skuadra malazeze dominoi takimin dhe fitoi të tre setet me rezultat 25:17, 25:16 dhe 25:17, duke siguruar tri pikët e para në garë.

Vajzat e Kosovës treguan angazhim dhe luftuan gjatë gjithë ndeshjes, por nuk arritën të gjejnë ritmin e duhur përballë një kundërshtari që u shfaq më i organizuar, më i saktë në sulm dhe më efikas në momentet kyçe të secilit set.

Pavarësisht humbjes në ndeshjen hapëse, Kosova do të synojë të reagojë në përballjet e radhës të Kampionatit Ballkanik U17, me synimin për të përmirësuar lojën dhe për të siguruar rezultatet e para në turne.

D.L