Deputetja e PDK-së, Ariana Musliu-Shoshi e ka pyetur kryeministrin e Kosovës, Albin Kurtin, se deri ku kanë arritur procedurat në emërimin e ambasadorëve të rinj dhe a do të jenë të emëruar politik apo të karrierës, njofton Klan Kosova.

“Pyetja ime lidhet me emërimin e ambasadorëve të rinj, e dini që janë bërë më shumë se dy muaj nga shkarkimi i ambasadorëve që kanë qenë të emëruar me çelës politik. Si rrjedhojë ne kemi qendrat kryesore evropiane që janë pa ambasadorë dhe kjo shkakton krizë diplomatike për vendin tonë. Deri ku kanë arritur me procedura në emërimin e ambasadorëve të rinj dhe a do të jenë të emëruar politik apo të karrierës”, tha ajo.

Kurti iu përgjigj Musliu-Shoshit duke i thënë se MPJ dhe Qeveria janë në periudhën e reformimit të brendshëm dhe se tërheqja e ambasadorëve do të pasohet edhe me hapa të tjerë.

“Ministria e Punëve të Jashtme dhe diasporës sikurse edhe krejt Qeveria është në periudhën e reformimit të brendshëm, tërheqja e ambasadorëve do të pasohet edhe me hapa të tjerë. Jemi në fazën e identifikimit dhe vlerësimit të përmbushjes së kritereve nga ana e diplomatëve të karrierës të cilët mund të jenë kandidat potencial për udhëheqjen e misioneve diplomatike. Deri tani ky proces i identifikimit ka rezultuar me 43 diplomatë karriere me grada të larta, të cilët mund të jenë kandidatë potencial si udhëheqës të misioneve diplomatike të shtetit tonë. 7 prej tyre janë me gradën ambasadorë, tre prej tyre aktualisht në Ministrinë e Punëve të Jashtme dhe Diasporës, 4 si të ngarkuar të përkohshëm me punë në misione diplomatike të cilët poashtu llogariten kandidatë potencial”.

“Me gradën ministër këshilltar janë 17 dhe këshilltarë 19. Procedura e emërimit të ambasadorëve e përcakton disa faza deri në fillimin e ushtrimit të funksionit si udhëheqës të misionit diplomatik. Pas verifikimit dhe plotësimit të kritereve, MPJ i dërgon qeverisë rekomandim për emërim dhe kërkesën për pëlqim, pasi që ta marrim pëlqimin nga qeveria, është Ministrja e punëve të jashtme dhe diasporës ajo që ia dërgon emrin e kandidatit për ambasadorë komisionit për punë të jashtme të kuvendit të Kosovës, ju do të mbani si komision seancë dëgjimore dhe pas kësaj seance ja përcillni rezultatet e dëgjimeve edhe mua por edhe presidentes dhe ministres dhe më pas presidentja vendos nëse kandidatja ose kandidatja pranohet. Emërimi bëhet me dekret të presidentes”, tha Kurti.