Aktualitet

Kërkohet ndryshimi i Projektligjit për rrjetet e komunikimeve elektronike

Operatorët kabllorë kërkuan shkurtimin e afateve kohore për kthimin e përgjigjeve për ankesa.

Publikuar

3 vjet më parë

më

Në dëgjimin publik për Projektligjin për masat për uljen e kostos së shtrirjes së rrjeteve të komunikimeve elektronike të shpejtësisë së lartë, operatorët kabllorë kërkuan shkurtimin e afateve kohore për kthimin e përgjigjeve për ankesa dhe tarifa standarde për infrastrukturë.

Deputeti Driton Hyseni, kryesues i Grupit punues në kuadër të Komisionit për Ekonomi, tha se projektligji duhet të jetë sa më funksional, i dobishëm për të gjithë operatorët.

“Ne synojmë që përmes projektligjit të arrijmë që operatorët të cilët merren me fushën e komunikimeve elektronike të shpejtësisë së lartë, të kenë mundësi infrastrukturën fizike ekzistuese, e cila ekziston në vendin tonë të kenë mundësi që në mënyrë të përbashkët ta shfrytëzojnë. Sepse mendojmë që kështu është kosto më e ulët për secilin prej operatorëve, por njëkohësisht edhe infrastrukturën e re fizike në këtë fushë, e cila do të ndërtohet në Kosovë. Po ashtu, inkurajohen të gjithë operatorët që me kosto sa më të ulët të bëjnë shtrirjen e saj, por edhe të kenë marrëveshje të mira të shfrytëzimit të përbashkët të kësaj infrastrukturë”, tha Hyseni.

Enver Basha nga Ministria e Ekonomisë, theksoi se më shumë se gjysma e komenteve janë futur në draft ligj, derisa shtoi se afatet kohore për përgjigjen e ankesave janë në përputhje me direktivat e BE-së.

“Kemi pranuar një numër të konsiderueshëm të komenteve dhe i kemi trajtuar ato. Mund të themi se më shumë se gjysma e tyre janë marrë në konsideratë, përveç disa komenteve që kanë qenë për shkurtim të afateve. Duke marrë parasysh se direktiva i cakton afatet, ne nuk kemi mund t’i kalojmë ato për shkak se nuk do të ishin në përputhje me direktivën e Komisionit Evropian. Qëllimi i projektligjit realizohet përmes katër objektivave kryesore. E para është shfrytëzimi më I mirë I infrastrukturës ekzistues dhe rritja e transparencës, duke përfshirë të gjitha shërbimet publike që janë në shfrytëzim”, tha Basha.

Vedat Morina, përfaqësues i një operatori kabllor në Kosovë, tha se trajtimi i ankesave brenda katër muajve është i papranueshëm dhe pengesë për operatorët.

“Sa e pashë unë këtë draft, është mirë që të shkurtohet koha e përgjigjes. Koha e përgjigjes, kur ARKEP ka mos marrëveshje, me nenin 8 pika 6 thuhet: se “për mosmarrëveshje, mund të kthehet përgjigje deri në katër muaj. Kjo për neve nëse vonohet përgjigja katër muaj, është sikur mos me pasur përgjigje fare. Pse po e themi këtë? Për arsye se ka raste, disa ndërtues të objekteve banesore brenda dy tri ditëve presin për ta vendosur infrastrukturën në objekt. Në qoftë se ajo nuk ndodhë nga ne në këtë kohë, punët fizike kanë përfunduar dhe nuk kemi qasje në atë objekt”, tha Morina.

Ndërsa, Dardan Makolli, përfaqësues i një kompanie tjetër kabllore në Kosovë, ka kërkuar që tarifat të jenë standarde dhe të njëjtat të përcaktohen nga ana e ARKEP-it. Ai po ashtu ka kërkuar që me këtë ligj të parashihet që komunat të bartin përgjegjësinë e ndërtimit të infrastrukturës kabllore.

“I kemi disa komente në lidhje me përmbajtjen e tij, së pari duke u bazuar në praktikat ndërkombëtare, e sidomos në vendet e rajonit dhe më gjerë kemi parë në vazhdimësi që ndërtimi i rrjetit të komunikimeve publike në vendet e tjera ka filluar të bëhet edhe nga organet e qeverisjes lokale, nga komunat. Për këto raste, arrihen marrëveshje për shfrytëzim të atij rrjeti. Prandaj, duke i parë këto praktika, e kishim parë të arsyeshme që një rast i tillë të parashihet edhe me projektligj… Sa i përket tarifave, ne si operatorë, na kërkohet varësisht nga lokacioni. Për rrugë nacionale apo lokale kërkohet të aplikojmë në Ministri të Infrastrukturës, ose në njërën nga 38 komunat e Kosovës. Prandaj, secila komuna ka rregullore komunale dhe ka një diskrepancë të madhe. Kemi hasur në praktika gjatë aplikimit për leje, ku në një komunë kemi paguar një shumë të caktuar, në komunën tjetër ndoshta ka qenë 10 fish më shtrenjtë”, tha ai.

Projektligji për masat për uljen e kostos së shtrirjes së rrjeteve të komunikimeve elektronike të shpejtësisë së lartë, ditë më parë është miratuar në lexim të parë nga Kuvendi i Kosovës.

Etiketa
Vazhdo të lexosh

Bota

Ekonomia gjermane sheh tkurrjen vjetore të pestë radhazi të PBB-së

Publikuar

3 ditë më parë

më

30 Prill, 2024

nga

Ekonomia gjermane është tkurrur me 0.2% në tremujorin e parë të vitit 2024 në bazë vjetore, deklaroi të martën departamenti i statistikave të vendit Destatis. Që nga fillimi i vitit të kaluar, ekonomia gjermane është tkurrur çdo vit për pesë tremujorë radhazi.

Vitin e kaluar, ekonomia gjermane u tkurr me 0.2% në tremujorin e parë, të dytë dhe të katërt, dhe 0.4% në tremujorin e tretë, në bazë vjetore. Në bazë tremujore, produkti i brendshëm bruto (PBB) i vendit u rrit lehtësisht me 0.2% në periudhën janar-mars.

PBB-ja u tkurr me 0.5% në tremujorin e fundit të vitit 2023. Për shkak të dy rënieve të njëpasnjëshme të PBB-së, ekonomia gjermane kishte hyrë edhe në një recesion teknik vitin e kaluar.

Vazhdo të lexosh

Aktualitet

Qeveria mban mbledhje elektronike

Merr dy vendime.

Publikuar

1 javë më parë

më

23 Prill, 2024

nga

Qeveria e Kosovës ka zhvilluar sot një mbledhje elektronike, në të cilën ka marrë dy vendime.

Sipas njoftimit të Zyrës së Kryeministrit, Qeveria ka miratuar Projektligjin për Ratifikimin e Amendamentit të Marrëveshjes për Themelimin e Bankës Evropiane për Rindërtim dhe Zhvillim (“Marrëveshja”) – Neni 1.

Qeveria po ashtu ka themeluar Komisionin e Pranimit për pozitën e Sekretarit të Përgjithshëm të Ministrisë së Punëve të Jashtme dhe Diasporës, sipas konkursit të shpallur me datën 14.03.2024.

Vazhdo të lexosh

Aktualitet

Rama nis vizitën zyrtare në Paris, takim ‘kokë më kokë’ me presidentin Macron

Vizita bëhet me ftesë të presidentit Macron.

Publikuar

3 javë më parë

më

11 Prill, 2024

nga

Kryeministri Edi Rama nisi sot një vizitë zyrtare dyditore në Paris me ftesë të presidentit francez, Emmanuel Macron, ku do të zhvillojë një sërë takimesh të përqendruara kryesisht në promovimin e potencialeve dhe klimës pozitive që Shqipëria ofron për zhvillimin e investimeve të huaja, si dhe në perspektivën e bashkëpunimit mes dy vendeve në fushën e teknologjisë dhe inovacionit.

Konkretisht, ditën e premte në orën 8:30, kryeministri Rama do të zhvillojë një mëngjes pune me Unionin e Sipërmarrësve të Francës MEDEF, nën drejtimin e z. Jean-Paul Agon, president i grupit L’Oréal dhe i komitetit Francë-Shqipëri në MEDEF, me pjesëmarrjen e 35 përfaqësuesve të kompanive prestigjoze franceze, si dhe të ftuar të tjerë nga bota e biznesit. Gjatë takimit do të prezantohen disa nga fushat prioritare për investime në Shqipëri, me interes të ndërsjellë për të dy vendet dhe më pas kryeministri Rama do të zhvillojë takime individuale me drejtues të sipërmarrjeve pjesëmarrëse, shkruan Top chanel, transmeton KosovaPress.

Të premten, në orën 12:30, do të zhvillohet ceremonia zyrtare e mirëseardhjes, e më pas në orën 13.00, Kryeministri Rama do të mbërrijë në Pallatin Elysee, ku do të mikpritet nga Presidenti francez Emmanuel Macron me të cilin do të mbajnë edhe një deklaratë për shtyp.

Më pas, në praninë e Kryeministrit Edi Rama dhe Presidentit francez Macron do të nënshkruhen disa marrëveshje ndërqeveritare dhe memorandume mirëkuptimi mes vendeve.

Në orën 14:45, Kryeministri Edi Rama dhe Presidenti Francez Macron do të zhvillojnë një takim kokë më kokë mes tyre.

Axhenda do të vijojë në orën 16.00 me vizitën dhe takimet në STATION F, inkubatori më i madh në botë i startup-eve dhe inovacionit, si dhe me mbledhjen inauguruese të Këshillit të Inovacionit Francë-Shqipëri –CIFA, ku do të marrë pjesë edhe Sekretarja franceze e Shtetit për Industrinë Numerike, përfaqësues të ministrive franceze të Jashtme dhe të Ekonomisë, si edhe operatorë të ndryshëm franceze e shqiptarë në fushën e inovacionit.

Së bashku me Kryeministrin Rama pjesë e delegacionit qeveritar do të jenë Ministrja e Arsimit dhe Sportit Ogerta Manastirliu, Ministrja e Turizmit dhe Mjedisit Mirela Kumbaro, Ministri i Ekonomisë, Kulturës dhe Inovacionit Blendi Gonxhe, Ministri i Shtetit për Pushtetin Vendor Arbjan Mazniku, si dhe Ministrja e Shtetit për Administratën Publike dhe Antikorrupsionin Adea Pirdeni.

Vazhdo të lexosh

Aktualitet

​Vdes ish-gazetari Arben Rugova

AGK-ja i shpreh ngushëllime familjes, miqve dhe komunitetit. 

Publikuar

1 muaj më parë

më

19 Mars, 2024

nga

Asociacioni i Gazetarëve të Kosovës me pikëllim ka marrë lajmin për vdekjen e gazetarit, Arben Rugova. Në njoftim thuhet se ai ka punuar në sektorin e arsimit dhe të politikës në disa media si Koha Ditore, Gazeta Express, Telegrafi, Gazeta Lajmi e të tjera.

Rugova punonte së fundi si Zyrtar për Qasje në Dokumente Publike në Ministrinë e Jashtme dhe të Diasporës. Për vdekjen e gazetarit Rugova, kanë njoftuar familjarët e të ndjerit në rrjetet sociale.

AGK-ja i shpreh ngushëllime familjes, miqve dhe komunitetit.

Vazhdo të lexosh

Të kërkuara