Lajmet

Kërkohet hartimi i ligjit të ri për Shëndetin Mendor

Ani pse është e paraparë me ligj, Burim Meta tha se nuk ka institucion përkatës dhe të veçantë për trajtimin e sëmundjeve të varësisë.

Published

on

Komisioni për Shëndetësi i ka rekomanduar Ministrisë së Shëndetësisë që të hartojë një ligj të ri për Shëndetin Mendor.

Gjatë shqyrtimit të raportit me rekomandime për mbikëqyrjen e zbatimit të këtij ligji, u tha se ende nuk është hartuar plani strategjik i shëndetit mendor.

Ani pse është e paraparë me ligj, në emër të komisionit Burim Meta tha se nuk ka institucion përkatës dhe të veçantë për trajtimin e sëmundjeve të varësisë.

Kuvendi i Kosovës me 62 vota për, asnjë kundër dhe asnjë abstenim e ka miratuar këtë raport.

Meta në seancë plenare tha se informatat për zbatimin e këtij ligji janë marrë nga spitalet dhe qendrat e shëndetit mendor. Deputeti Burim Meta tha se qëllimi i mbikëqyrjes së zbatimit të Ligjit për Shëndetin Mendor është të vlerësohet si dhe të konstatohet niveli i zbatueshmërisë së tij në praktikë.

Më tej, theksoi se nuk ekziston as klinikë e veçantë për hospitalizimin dhe trajtimin e mirëfilltë të fëmijëve me sëmundje psikiatrike.

“Paramendoni kolegë deputetë, që ky ligj është funksional nga viti 2015 është thënë që për mbi 11 ligje të nxirren aktet nënligjore dhe deri më tani është nxjerrë vetëm një. Ende nuk është hartuar plani strategjik i shëndetit mendor. Departamenti i Shëndetit Mendor në kuadër të Ministrisë së Shëndetësisë nuk ka qenë funksional. Këshilli profesional i shëndetit mendor nuk është formuar. Haset në shumë probleme të zbatimit i neneve për trajtimin e pavullnetshëm të personave me probleme dhe çrregullime mendore. Nuk ka institucion përkatës dhe të veçantë për trajtimin e sëmundjeve të varësisë, siç parashihet me ligj”, ka njoftuar ai.

Më tej, ai tha se nuk është aprovuar asnjë udhërrëfyes klinik dhe nuk ka asnjë standard të miratuar rreth kufizimit fizik të personave me çrregullime mendore, teksa i kënaqshëm nuk është as furnizimi me barna.

“Ligji nuk ka nene të veçanta për trajtimin e fëmijëve me probleme të shëndetit mendor. Ligji nuk parasheh rregullimin e statusit të Institutit të Psikiatrisë Forenzike. Hapësirat nuk janë të ndara sipas gjinisë dhe moshës. Nuk bëhet monitorimi i personave pas lirimit nga Institutit të Psikiatrisë Forenzike. Me Ligjin për Shëndetin Mendor nuk është paraparë as funksionimi i qendrave të shëndetit mendor me bazë në komunitet, edhe pse ato funksionojnë që 18 vjet”, ka thënë Meta.

Ai ka shtuar se pandemia COVID-19 ka përkeqësuar gjendjen e shëndetit mendor të popullatës dhe ka rritur numrin e personave me çrregullime të shëndetit, ndërkohë që nuk ka pasur hapa konkretë për ofrimin e shërbimeve në këtë fushë. Bazuar në këto të gjetura, Komisioni për Shëndetësi ka propozuar 12 rekomandime.

“Ministria e Shëndetësisë të hartojë një Ligj të ri për Shëndetin Mendor, ligj të integruar të avancuar dhe me kompetenca të qarta për institucionet zbatuese. Të hartohen të gjitha aktet nënligjore me kohë, siç parashihen me ligj”, ka rekomanduar ai.

Për hartimin e ligjit të ri për Shëndetin Mendor janë pajtuar edhe partitë opozitare.

Kuvendi i Kosovës, në seancën e sotme plenare ka emëruar për kryesuese të Komisionit të Auditimit të KOSTT-it, Liza Markun, ndërkaq për anëtarë Arben Dodaj dhe Sead Mujovi./Sh.Pajaziti

Bota

Humbin jetën të paktën 8 persona pasi Treni përplaset me autobusin në Meksikë

Published

on

Të paktën 8 persona kanë vdekur kur një tren u përplas me një autobus pasagjerësh me dy kate në Meksikë duke lënë të plagosur të paktën edhe 45 të tjerë, tha Mbrojtja Civile e Shtetit të Meksikës.

Aksidenti ndodhi në një autostradë në komunën Atlacomulco, sipas autoriteteve shtetërore, shkruan CNN.

Trafiku është i mbyllur në të dyja drejtimet për të lejuar shërbimet e emergjencës të reagojnë.

Shkaku i përplasjes nuk dihet ende./S.K/KP/CNN/

Continue Reading

Lajmet

Rama takohet me komandantin e Forcave Detare të SHBA-së

Published

on

Kryeministri Edi Rama ka zhvilluar një takim me komandantin e Forcave Detare të Shteteve të Bashkuara të Amerikës në Europë dhe Afrikë, Admirali Stuart B. Munsch.

Në këtë takim është diskutuar për hapat konkretë të Shqipërisë për ringjalljen e industrisë ushtarake, avancimin e projekteve të Korridorit VIII dhe zhvillimin e Portit të Ri të Durrësit, shkruan rtsh.al.

“Në takimin me Komandantin e Forcave Detare të Shteteve të Bashkuara në Europë dhe Afrikë, Admiralin Stuart B. Munsch, në kuadër të hapave që Shqipëria po ndërmerr për rilindjen e industrisë ushtarake, si edhe për ecurinë e projekteve të Korridorit VIII dhe Portit të Ri të Durrësit”, shkruan Edi Rama në rrjetin e tij social, në Facebook.

I pranishëm në këtë takim ishte edhe ministri i Mbrojtjes Pirro Vengu, i cili thekson se është diskutuar për modernizimin e ushtrisë shqiptare.

Një tjetër pikë e rëndësishme e diskutimit ishte përparimi i projektit të Korridorit VIII, një arterie e rëndësishme infrastrukturore që lidh Detin Adriatik me Detin e Zi, duke kaluar përmes Shqipërisë, Maqedonisë së Veriut dhe Bullgarisë.

Korridori VIII konsiderohet një projekt strategjik për zhvillimin ekonomik dhe sigurinë rajonale, duke lehtësuar tregtinë, transportin dhe bashkëpunimin ushtarak mes vendeve të NATO-s dhe partnerëve të tjerë.

Projekti synon të rrisë ndërveprimin ekonomik dhe ushtarak mes vendeve të rajonit, duke e bërë Shqipërinë një nyje të rëndësishme logjistike në Ballkan./S.K/KP/

Continue Reading

Bota

Spanja tërheq ambasadorin nga Tel Aviv

Published

on

Spanja thirri ambasadorin e saj në Tel Aviv, pasi qeveria izraelite akuzoi Madridin për antisemitizëm dhe ndaloi dy ministra spanjollë të hynin në Izrael.

Të hënën, kryeministri Pedro Sanchez njoftoi nëntë masa që synojnë ndalimin e asaj që ai e quajti gjenocid në Gaza.

Ato përfshijnë një embargo të përhershme armësh, një ndalim të importeve nga territoret e pushtuara dhe ndalimin e individëve të përfshirë në luftën e Gazës të hyjnë në Spanjë, shkruan Anadolu.

Ministri i Jashtëm izraelit, Gideon Sa’ar iu përgjigj, duke e quajtur qeverinë e Sanchez antisemite dhe duke njoftuar se zëvendëskryeministres Yolanda Diaz dhe ministres së Rinisë Sira Rego do t’u ndalohej hyrja në Izrael.

“Është një pikë krenarie që një shtet gjenocidal po më ndalon mua”, u përgjigj Diaz.

Sa’ar tha gjithashtu se Izraeli do të informojë aleatët e tij për sjelljen armiqësore të qeverisë spanjolle dhe natyrën antisemite dhe të dhunshme të deklaratave të bëra nga ministrat e saj.

Më vonë të hënën, Spanja dënoi një sulm terrorist në Jerusalem që vrau gjashtë persona, përfshirë një shtetas spanjoll.

Debati vazhdoi të përshkallëzohej, me Spanjën që thirri ambasadorin e saj dhe Sa’ar që shkroi më vonë: “Sanchez është ngatërruar me njerëzit e gabuar. Ditët e Inkuizicionit, persekutimit dhe dëbimit kanë mbaruar. Izraeli është një vend i fortë dhe sovran.”/S.K/KP/

Continue Reading

Aktualitet

Katër të lënduar nga aksidenti afër Sllatinës po trajtohen në Qendrën Emergjente

Published

on

Një aksident i rëndë ka ndodhur dje pasdite në Fushë Kosovë, përkatësisht afër Sllatinës, ku janë përfshirë një kamion dhe disa vetura.

Nga ky aksident janë krijuar kolona të mëdha në tërë Fushë Kosovën dhe në rrugën Prishtinë-Pejë.

Drejtori i Klinikës Emergjente, Naser Syla tha se nga ky aksident janë pranuar 4 persona në Qendrën Emergjente teksa gjendja e tyre është stabile.

“Katër persona janë duke u trajtuar në Qendrën Emergjente. Gjendja stabile është për të gjithë”, tha Syla.

Njësitet përkatëse të Policisë së Kosovës kanë dalë menjëherë në vendngjarje dhe po ndërmarrin veprimet e nevojshme hetimore për zbardhjen e plotë të shkaqeve të aksidentit./S.K/KP/

Continue Reading

Të kërkuara