Lajmet

Katër shtatzëna me COVID-19 po trajtohen në Klinikën Gjinekologjike

Published

5 years ago

February 23, 2021

Betim Gashi

Katër gra shtatzëna janë duke u trajtuar në repartin COVID në Klinikën Obstetrike Gjinekologjike të Qendrës Klinike Universitare të Kosovës.

Drejtori i klinikës, Jakup Ismajli ka deklaruar se gjendja e tyre shëndetësore është stabile, dy prej tyre së shpejti pritet të lindin pasi janë në javët e fundit të shtatzënisë. Ai njoftoi se që nga janari i vitit 2021 e deri tani në këtë repart të dedikuar për COVID janë trajtuar gjithsej 21 shtatzëna.

“Momentalisht në repartin e dedikuar për COVID për shtatzëna, janë të hospitalizuara katër pacientë. Dy janë në javën e 37 apo 38 të shtatzënisë, kurse dy janë shtatzëni të hershme, njëra në javën e 22-të dhe njëra në javën e 29-të. Këto dy shtatzëna që janë në javën e 37-të njëra pritet që brenda javës të kryejë lindjen, meqenëse lindjen e mëparshme e ka me prerje cezariane. Kurse tjera është në shtatzëninë e dytë dhe me lindje normale. Gjendja e pacientëve është stabile. Në vitin 2020 i kemi pasur gjithsej 103 pacientë (me COVID) që kanë kërkuar trajtim në klinikën tonë, 47 kanë përfunduar me lindje, kurse të tjerat kanë qenë shtatzëni të cilat pas trajtimit dhe mjekimit janë lëshuar për shtëpi. Kurse në vitin 2021 i kemi 21 shtatzëna (me COVID), një lindje me prerje cezariane”, theksoi Ismajli.

Meqenëse ditëve të fundit janë shtuar rastet e reja të të prekurve me COVID-19, Ismajli tha se institucionet kanë bërë një lirim të parakohshëm të masave anti-COVID dhe kjo tash po reflekton në rritje të shifrave.

“Rritja e numrit të përgjithshëm të të infektuarve me COVID, reflektohet edhe tek shtatzënat kështu që ne në dy-tri javët e fundit kemi pasur vetëm nga një paciente të hospitalizuar, por me rritjen e numrit ditëve të fundit po shihet se nuk janë respektuar masat aq sa duhet, fushata elektorale dhe mosrespektimi i masave, mosmbajtja e distancës, mendoj se është bërë e parakohshme një lirim i tillë dhe kjo po na reflektohet edhe në numrin e shtuar të të infektuarve me COVID, ne i kemi diku 20 shtretër dhe jemi të përgatitur për të pranuar paciente dhe për t’i përfunduar lindjet”, tha ai.

Meqenëse virusi SARS-COV-2 ka prekur një numër të madh të profesionistëve shëndetësorë në Kosovë, aktualisht në Klinikën Obstetrike Gjinekologjike nuk ka të infektuar, por vetëm 1 specialistike dhe 3 infermiere janë në vetëizolim për shkak të kontakteve me persona të infektuar me COVID-19.

“Për momentin kemi një specialiste në vetizolim dhe tri infermiere në vetizolim. Të infektuar nuk kemi, por vetëm në vetizolim, disa kanë familjarë e burrin të infektuar me COVID, kështu që janë në vetizolim derisa të dalin rezultatet”, theksoi Ismajli.

Drejtori i Klinikës Obstetrike Gjinekologjike, Jakup Ismajli në një intervistë për KosovaPress ka folur edhe për numrin e lindjeve të realizuara në këtë klinik gjatë vitit 2020. Ai tha se për shkak të pandemisë në këtë klinikë vitin që shkoi janë kryer rreth 700 lindje më pak.

“Në vitin 2020 kemi pasur rreth 8 mijë e 800 lindje, 3 mijë e 120 janë kryer me prerje cezariane, kurse pjesa tjerë janë kryer me lindje normale. Vërehet një rënie diku kemi pasur 600-700 lindje më pak mirëpo kemi pasur parasysh se për shkak të volumit të madh, një numër i madh i pacientëve disa që kanë pasur sigurime shëndetësore, lindje kanë kryer në spitale private, por edhe disa lindje janë ndalur në spitale”, theksoi ai.

Nga 13 marsi i vitit 2020 deri më 22 shkurt 2021, në Kosovë janë regjistruar mbi 66 mijë e 600 raste me COVID-19, prej tyre 1 mijë e 575 pacientë kanë vdekur. Numri i përgjithshëm i të shëruarve deri më sot është gjithsej 58 mijë e 359 raste, kurse numri i rasteve aktive është 6 mijë e 706.

Related Topics:kryesore Klinika Gjinekologjike

Up Next

Vijon rinumërimi i mbi 400 vendvotimeve

Don't Miss

6 mijë e 706 raste aktive me COVID-19

Lajmet

Osmani cakton datën për konstituimin e Kuvendit

Published

10 minutes ago

February 10, 2026

UBTNEWS

Presidentja e Kosovës, Vjosa Osmani-Sadriu, pas konsultimit me shumicën e partive parlamentare në Kuvend, ka thirrur seancën konstituive më 11.02.2026, në orën 12:00.

Në njoftimin e Presidencës është bërë e ditur se “duke pasur parasysh urgjencën e krijimit të institucioneve, miratimit të buxhetit dhe marrëveshjeve ndërkombëtare, në përputhje me Kushtetutën dhe legjislacionin në fuqi, Presidentja ka vendosur që seancën konstituive të Kuvendit ta ftojë për nesër, më 11.02.2026, në orën 12:00”.

Në zgjedhjet e mbajtura më 28.12.2025, Lëvizja Vetëvendosje (LVV) si partia e parë me më së shumti vota do të ketë 57 deputetë, Partia Demokratike e Kosovës (PDK) 22, Lidhja Demokratike e Kosovës (LDK) 15 dhe Aleanca për Ardhmërinë e Kosovës (AAK) 6.

Nga 120 deputetët që përbëjnë Kuvendin e Kosovës, 20 janë të garantuara me Kushtetutë për komunitetet joshumicë që jetojnë në vend.

Lajmet

Hagë: Dita e dytë e deklaratave përfundimtare (Lajm në zhvillim)

Published

60 minutes ago

February 10, 2026

UBTNEWS

Prokuroria: Veseli nuk i parandaloi krimet

Gjatë fjalëve përfundimtare në procesin gjyqësor ndaj Kadri Veselit, prokurori Matt Halling deklaroi se mosangazhimi i Veselit për të parandaluar dhe ndëshkuar krimet përbën një nga elementet të aktakuzës ndaj tij.

Sipas Halling, Veseli, në rolin e tij në Shtabin e Përgjithshëm nuk ka përmbushur detyrimet si epror përgjegjës, pavarësisht faktit se në periudha të caktuara nuk ka qenë i pranishëm në Kosovë.

“Mosangazhimi i Kadri Veselit për të parandaluar dhe për të ndëshkuar krimet në rolin që ka mbajtur është një kontribut që i takon aktakuzave të ngritura. Mungesa e tij në Kosovë nuk e ndryshon situatën, pasi Veseli mund të ushtronte kompetencat e tij në Kosovë, kudo që të ishte dhe kurdo që të dëshironte,” tha prokurori Matt Halling.

Opinionet e mbrojtjes së Thaçit nuk kanë peshë

Prokurori Matt Halling gjatë fjalës përfundimtare para trupit gjykues në Hagë ka folur për mbrojtjen e Thaçit, duke thënë se dëshmitarët nuk kishin informacione bazë dhe se opinionet e tyre nuk duhet marrë parasysh.

“Mbrojtja e Thaçit mbështete në përshtypjet e dëshmitarëve të vetë (Wesley Clark dhe James Rubin), por ata nuk kishin informacionet bazë për t’u marrë parasysh dhe rrjedhimisht këto opinione nuk duhen të kenë asnjë peshë. Mbrojtja e Thaçit pretendon se nuk kishte asnjë detyrim t’u referonte krimeve ndërkombëtarëve sepse ata tashme ishin në dijeni”, ka thënë prokurori i Zyrës Speciale.

Tutje, Matt Halling deklaron se Thaçi ishte i aftë të “maskonte” realitetin dhe kjo ka ndikuar në botëkuptimin e dëshmitarëve për ta kuptuar të vërtetën.

“Ajo që nuk kuptojnë James Rubin, Wesley Clark dhe ndërkombëtarë të tjerë është që Thaçi ishte i aftë të maskonte atë që po ndodhte në realitet dhe kjo ndikoi në botëkuptimin e tyre për të kuptuar vërtet se si funksiononte UÇK-ja. Veçanërisht Rubin dhe Clark treguan se nuk kishin asnjë interes për të kuptuar çfarë ndodhte në realitet dhe besonin se puna e tyre ishte në anën e duhur të historisë dhe nuk u përballën me atë çka po dëgjon tashmë ky trup gjykues”, sipas Halling

Ish-zëdhënësi i Stejt Departamentit, James Rubin, si dhe komandanti i NATO-s, Wesley Clark, me dëshmitë e tyre, i kanë dhënë vulën mbrojtjes së luftës së drejtë të UÇK-së dhe drejtuesve të saj. Ndaj, prokuroria po i sulmon dëshmitë e tyre me kaq ngulm.

Lajmet

Arrestohet i dyshuari në Podujevë për skema piramidale dhe bixhoz të paligjshëm

Published

2 hours ago

February 10, 2026

UBTNEWS

Një person është arrestuar në Podujevë, nën dyshimin se ka kryer veprën penale – organizimi i skemave piramidale dhe bixhoz të paligjshëm, sipas Raportit të fundit të Policisë së Kosovës.

Policia gjatë një kontrolli në lokalin e të dyshuarit ka gjetur dhe sekuestruar; sekuestruar një printer për shtypjen e tiketave, një skaner, tri shtëpiza, njëzet e shtatë (27) pako me letra për lojëra, dy monitorë, një tastiere si dhe dyzet e katër (44) kuponë të printuara të lojërave të fatit

Ndërkaq, i dyshuari me vendim të prokurorit është dërguar në mbajtje

“Në lokalin e të njëjtit është bërë kontrolli ku gjatë kontrollit janë gjetur dhe sekuestruar një printer për shtypjen e tiketave, një skaner, tri shtëpiza, njëzet e shtatë (27) pako me letra për lojëra, dy monitorë, një tastiere si dhe dyzet e katër (44) kuponë të printuara të lojërave të fatit. Me vendim të prokurorit pas intervistimit i dyshuari është dërguar në mbajtje”, thuhet në raportin e Policisë.

Lajmet

REL: BE-ja thotë se me arrestimin e shtetasve të Kosovës, Serbia po shkel marrëveshjen e vitit 2015

Published

2 hours ago

February 10, 2026

UBTNEWS

Bashkimi Evropian tha se arrestimi i fundit nga Serbia i një veterani të Ushtrisë Çlirimtare të Kosovës është “një shkelje tjetër” e obligimeve të Serbisë të Marrëveshjes për dialogun dhe drejtësinë të vitit 2015.

“Sipas kësaj marrëveshjeje, Serbia është zotuar që të mos iniciojë hetime penale apo ndjeje penale për krimet që pretendohet se janë kryer në Kosovë, përveç nëse një gjë e tillë kërkohet nga autoritetet e Kosovës. Juridiksioni mbi pretendimet për krime të luftës dhe vepra të tjera serioze bie mbi institucionet e Kosovës. I bëjmë thirrje Serbisë që të respektojë zotimet e saj”, tha një zëdhënës i Komisionit Evropian për Radion Evropa e Lirë.

Më 5 shkurt, autoritetet e Serbisë arrestuan Mitehat Llozhanin me të hyrë në terrorin serb nga kufiri me Kroacinë. Ai, sipas autoriteteve, në Beograd dyshohet për krime kundër popullatës civile.

Ministria e Punëve të Jashtme dhe Diasporës ka kërkuar angazhim të bashkësisë ndërkombëtare lidhur me këtë rast.

Sipas Serbisë, i arrestuari dyshohet se ka kryer trajnime si pjesëtar i UÇK-së i Zonës Operative të Dukagjinit më 1998 dhe 1999 “pas së cilave ka marrë pjesë në sulme terroriste kundër anëtarëve të MPB-së serbe dhe ushtrisë jugosllave”. Në njoftim thuhet po ashtu se “si anëtar i grupit të komanduar nga Ramush Haradinaj, ai ka marrë pjesë në rrëmbim dhe masakrim të policëve”.

Por, nga Organizata e Veteranëve të Luftës së Ushtrisë Çlirimtare të Kosovës i kanë thënë Radios Evropa e Lirë se i arrestuari ka marrë pjesë në disa stërvitje në Shqipëri, por nuk ka informacione të ketë qenë në vijat e frontit në Kosovë.

Nënkryetari i kësaj organizate të veteranëve, Gazmend Syla, ka thënë për Radion Evropa e Lirë se Llozhanit iu gjet kartela e veteranit në xhep gjatë kontrollit nga autoritetet serbe.

Serbia ka arrestuar vazhdimisht shtetas të Kosovës nën pretendime për krime lufte në Kosovë më 1998-’99, dhe vetëm në vitin 2025 u regjistruan disa arrestime të tilla.

Serbia gjatë viteve ’90 e karakterizoi UÇK-në si organizatë terroriste, ndërsa për Kosovën, UÇK-ja është organizata që mbrojti popullsinë lokale nga represioni i forcave të armatosura jugosllave.

Rastet e të arrestuarve në Serbi, sipas burimeve në MPJD

Arbnor Spahiu – i arrestuar në qershor nën dyshimet për “vrasje të rëndë” në Banjskë; u lirua më 21 nëntor.

Lulzim Halili – i arrestuar në korrik, i akuzuar për “krime lufte”; mbetet në paraburgim.

Sasha Gjorgjeviq – i arrestaur në korrik, nën dyshimet për “bashkëpunim me Shërbimin Informativ të Shtetit të Shqipërisë (SHISH), përmes Agjencisë Kosovare të Inteligjencës (AKI)”; mbetet në paraburgim.

Behar Preniqi – i arrestuar në gusht, si “pjesëtar i dyshuar i UÇK-së”; mbetet në paraburgim.

Hazir Haziri – i arrestuar në shtator nën dyshimet për “krime lufte”; u lirua në janar 2026.

Avni Qenaj – i arrestuar në nëntor për “krime lufte”; gjykata në Beograd i dha një muaj paraburgim.

Millan Vukashinoviq dyshohet se është rrëmbyer nga xhandarmëria serbe në Leposaviq – pjesa veriore e Kosovës – më 1 nëntor.

Më 14 gusht, autoritetet serbe njoftuan se i ndaluan edhe dy persona me inicialet X.E. dhe B.E. (Xhemajl dhe Bashkim Emini) në pikën kufitare mes Serbisë dhe Hungarisë, Horgosh, nën dyshimet se si pjesëtarë të UÇK-së, “kanë kryer krime lufte kundër popullsisë civile”. Pesë ditë më pas, ata u liruan. /REL/