Ministria e Industrisë, Ndërmarrësisë, Tregtisë dhe Inovacionit (MINT) ka publikuar listën e re të çmimeve maksimale të lejuara për shitjen e derivateve të naftës në Kosovë, të vlefshme për datën 29 prill 2026.

Sipas njoftimit zyrtar, çmimet që hyjnë në fuqi nga ora 10:00 janë 1.68 euro për litër për naftën (dizel), 1.47 euro për litër për benzinën dhe 0.85 euro për litër për gasin.

Ky vendim obligon të gjithë operatorët ekonomikë që të mos i tejkalojnë këto tavanë, ndërkohë që qytetarët inkurajohen të raportojnë çdo parregullsi në adresën zyrtarë të inspektoratit ose përmes linjës telefonike pa pagesë.

Ky shtrenjtim i lehtë dhe luhatja e vazhdueshme e çmimeve vijnë si pasojë e një situate të tensionuar në arenën ndërkombëtare. Shkaktari kryesor mbetet kriza e rëndë gjeopolitike në Lindjen e Mesme, ku bllokimi pothuajse i plotë i Ngushticës së Hormuzit ka krijuar një goditje të paprecedentë në furnizimet me energji.

Meqenëse kjo rrugë ujore është jetike për transportin global të naftës, pasiguria ka bërë që çmimet në bursa të rriten me shpejtësi. Kosova, duke qenë një vend importues, mbetet e ekspozuar ndaj këtyre lëvizjeve, ndërsa ndërhyrja e Ministrisë përmes çmimeve tavan synon të parandalojë rritjen artificiale të çmimeve nga tregtarët lokalë dhe të amortizojë koston për konsumatorët në këtë periudhë të vështirë globale.

Fakulteti i Inxhinierisë së Energjisë në UBT po vazhdon të ofrojë përvoja praktike për studentët përmes aktiviteteve të drejtpërdrejta me industrinë, duke i përgatitur ata për sfidat reale të tregut të punës. Në këtë kuadër, është realizuar një vizitë studimore në KEDS, me pjesëmarrjen e studentëve dhe profesorëve të fakultetit.

Kjo vizitë kishte për qëllim ndërlidhjen e njohurive teorike me praktikën, duke u mundësuar studentëve të njihen nga afër me funksionimin e sistemit të shpërndarjes së energjisë elektrike dhe rolin e teknologjisë në menaxhimin e tij.

Studentët u pritën nga zyrtari kryesor i operimeve në KEDS, prof. Dr. Avni Alidemaj, i cili prezantoi rëndësinë e Qendrës Dispeçerike si një nga komponentët kryesorë të operimit të rrjetit energjetik. Më pas, aktiviteti vijoi me prezantimin e inxhinieres Arta Grajçevci, e cila shpjegoi në mënyrë të detajuar funksionimin e sistemeve monitoruese SCADA dhe rolin e tyre në menaxhimin efikas të rrjetit të shpërndarjes.

Gjatë vizitës, studentët patën mundësinë të njihen me procese reale operative, përfshirë monitorimin në kohë reale, koordinimin e ekipeve në terren dhe përdorimin e platformave digjitale për sigurimin e furnizimit të qëndrueshëm me energji elektrike. Përmes rasteve konkrete nga praktika, ata fituan një kuptim më të thellë mbi sfidat dhe përgjegjësitë e sektorit energjetik.

Aktivitete të tilla janë pjesë thelbësore e programit të studimit në UBT, i cili është i orientuar drejt praktikës dhe bashkëpunimit të ngushtë me industrinë. Përmes këtyre përvojave, studentët jo vetëm që përvetësojnë njohuri teknike, por zhvillojnë edhe aftësi profesionale që i bëjnë më konkurrues në tregun e punës.

Kryemjeshtri Driton Kuka është nderuar me çmimin prestigjioz “Pllaka e Artë” nga Akademia Sportive e Malit të Zi, në kuadër të Konferencës së 24-t Ndërkombëtare të mbajtur në Budva, duke marrë kështu një tjetër vlerësim të rëndësishëm për kontributin e tij në sportin e xhudos dhe sukseset në arenën ndërkombëtare.

Ky çmim i është dhënë për rezultatet e jashtëzakonshme që ka arritur ndër vite si trajner, si dhe për rolin e tij në promovimin e sportit të xhudos në nivel global. Nën udhëheqjen e tij, Kosova ka shënuar suksese historike, duke fituar pesë medalje olimpike (tre të arta, një të argjendtë dhe një të bronztë), 10 medalje botërore dhe mbi 30 medalje evropiane, duke u renditur ndër vendet më të suksesshme në këtë sport.

Vlerësimi nga Akademia Sportive e Malit të Zi përbën një dëshmi të rëndësishme të ndikimit dhe përkushtimit të Kukës në zhvillimin e sportit, si dhe të punës së tij të palodhshme për ngritjen e xhudos kosovare në majat botërore.

Në të njëjtën kohë, Driton Kuka është pjesë e stafit akademik në Fakultetin e Shkencave të Sportit dhe Lëvizjes në UBT, ku sjell për studentët përvojën e tij unike nga niveli më i lartë i sportit profesionist. Përfshirja e ekspertëve të tillë në procesin mësimor dëshmon përkushtimin e UBT-së për të ofruar edukim cilësor, të ndërlidhur ngushtë me praktikën dhe suksesin real në arenën ndërkombëtare.

Qytetarët e Kosovës pritet t’u drejtohen sërish kutive të votimit, për herë të pestë brenda 16 muajve të fundit, nëse përfshihen edhe dy rundet e zgjedhjeve lokale.

Të martën, në ditën e fundit të afatit kushtetues, partitë e përfaqësuara në Kuvend nuk arritën të zgjedhin presidentin. Si pasojë, bazuar në aktgjykimin e fundit të Gjykatës Kushtetuese, vendi do të shkojë në zgjedhje të parakohshme, të cilat duhet të mbahen brenda 45 ditëve.

Gjatë së martës u bënë katër tentativa për zgjedhjen e presidentit. Përpjekja e parë nisi në orën 10:00 si vazhdim i seancës së një dite më parë, ndërsa seancat vijuan në orët 14:30, 19:30 dhe në fund në 23:00. Megjithatë, në asnjërën prej tyre nuk u sigurua kuorumi i nevojshëm për të proceduar me votim.

Deputetët e koalicionit qeverisës, të udhëhequr nga Lëvizja Vetëvendosje, ishin të pranishëm në sallë, ndryshe nga ata të opozitës. Këta të fundit kishin paralajmëruar paraprakisht se nuk do të merrnin pjesë në votim pa një marrëveshje politike.

Kandidate për presidente ishin Feride Rushiti dhe Hatixhe Hoxha, të propozuara nga Lëvizja Vetëvendosje pas tërheqjes, të hënën në mbrëmje, të Glauk Konjufcës dhe Fatmire Mulhaxha-Kollçakut. Ndryshe nga seanca e së hënës, kur pati votim për zgjedhjen e pasardhësit të Vjosa Osmanit, gjatë katër tentativave të së martës nuk u zhvillua fare proces votimi.

Në seancën e fundit, kryetarja e Kuvendit, Albulena Haxhiu, u bëri thirrje deputetëve të opozitës të rikthehen në sallë dhe të marrin pjesë në votim.

“Po presim nëse deputetët e opozitës do të vijnë dhe do të heqin dorë nga barrikadimet. Kjo është arsyeja pse vazhdimisht kam bërë thirrje që ata të jenë këtu. Këto janë minutat e fundit të kësaj legjislature dhe kjo rrugë e nisur mbarë nuk meritonte të ndërpritej”, tha Haxhiu.

Gjatë kohës së pritjes nga deputetët e shumicës, fjalën e mori ministri në detyrë i Financave, Hekuran Murati. Ai u bëri thirrje qytetarëve që në zgjedhjet e ardhshme të mos votojnë partitë opozitare, duke i akuzuar ato për bojkotim të Kuvendit dhe sabotim të shtetit.

“Kur këta përfaqësues të opozitës të kërkojnë vota, qytetarët duhet të pyesin veten pse t’i votojnë. Ata janë zgjedhur nga populli, por në këtë rast nuk po e përfaqësojnë atë”, deklaroi Murati.

Ai gjithashtu paralajmëroi për humbjet financiare që mund të sjellin zgjedhjet e reja.

“Përveç rreth 10 milionë eurove që kushton organizimi i zgjedhjeve, vendi rrezikon të humbasë edhe dhjetëra milionë të tjera. Kosova pritet të përfitojë 882 milionë euro nga Plani i Rritjes i BE-së, por kjo kërkon miratimin e reformave. Pa Kuvend funksional, kjo nuk është e mundur”, shtoi ai.

Pas tij, para deputetëve foli edhe kryeministri Albin Kurti, i cili u shpreh se në zgjedhjet e ardhshme partia e tij do të rrisë mbështetjen.

“Ata e dinë që zgjedhjet nuk janë zgjidhje. Nuk duan përgjegjësi e as pushtet, por synojnë që këtë të mos e kemi as ne. Megjithatë, vendimin e merr populli i Kosovës, i cili vazhdimisht na ka mbështetur për realizimin e zotimeve dhe përmirësimin e gjendjes socio-ekonomike dhe të sigurisë. Pas një qeverisjeje pesëvjeçare, mbështetja për ne është rritur dhe kështu do të vazhdojë”, tha Kurti.

Pas përfundimit të seancës, Kurti mbajti një konferencë për media së bashku me kandidaten për presidente, Feride Rushiti.

“E ndërmora këtë hap vetëm që vendi të dalë nga ngërçi politik. Udhëtimi im do të vazhdojë me organizatën joqeveritare që përfaqësoj”, deklaroi Rushiti.