Vetëm brenda 24 orëve të fundit, Policia e Kosovës ka regjistruar tri raste të ndryshme të dhunës në familje në rajonin e Pejës dhe të Gjakovës, të cilat kanë çuar në arrestimin e dy personave dhe shpalljen në kërkim të një të mituri.

Rasti i parë është regjistruar në Pejë, në orët e hershme të mëngjesit të së mërkurës. Sipas Policisë, një person është arrestuar pasi i njëjti, në gjendje të dehur, kishte ushtruar dhunë psikike ndaj bashkëshortes së tij. Me urdhër të prokurorit kujdestar, i dyshuari është dërguar menjëherë në mbajtje.

Ndërkaq, dy raste të tjera të dhunës janë raportuar në komunën e Gjakovës. Në njërin prej tyre, një djalë i mitur ka sulmuar fizikisht nënën e tij. Sipas raportit policor, viktima nuk ka pësuar lëndime që kërkonin tretman mjekësor, ndërsa i dyshuari i mitur ka ikur nga vendi i ngjarjes dhe ndodhet në arrati. Rasti është duke u hetuar me intensitet nga njësitet përkatëse.

Po në Gjakovë, gjatë pasdites së të mërkurës është raportuar edhe një tjetër rast i dhunës brenda familjes. I dyshuari është shoqëruar në stacionin policor ku është intervistuar nga hetuesit dhe me vendim të prokurorit, edhe ai është dërguar në mbajtje. /E.A/

Dy mjete të pashpërthyera janë gjetur të mërkurën në bodrumin e një shtëpie në rrugën “Ahmet Krasniqi” në Prishtinë.

Sipas raportit të Policisë së Kosovës, një qytetare ka hasur në mjetet e dyshuara – dy granata dore – teksa po pastronte hapësirat e bodrumit dhe ka njoftuar menjëherë autoritetet.

Pas pranimit të informatës, njësitë përkatëse policore kanë dalë në vendngjarje për të siguruar perimetrin dhe për të garantuar sigurinë e banorëve të zonës. Në vendin e ngjarjes ka ndërhyrë edhe njësiti i specializuar për deminim (EOD), i cili ka bërë tërheqjen e kontrolluar dhe të sigurt të granatave.

Operacioni ka përfunduar me sukses dhe pa asnjë incident. Autoritetet apelojnë te qytetarët që në raste të ngjashme të mos i prekin mjetet e dyshuara dhe të njoftojnë menjëherë linjat emergjente të Policisë. /E.A/

Policia e Kosovës ka bërë të ditur se ka realizuar Planin Operativ “Ditët e Veprimit të Përbashkët – JAD Global Chain 2026”, i zhvilluar nga 8 deri më 12 qershor, në koordinim me EUROPOL-in, INTERPOL-in, FRONTEX-in dhe institucione të tjera vendore.

Gjatë operacionit janë kryer kontrolle në lokale të muzikës live, qendra masazhi, rrugë, sheshe dhe qendra tregtare, me fokus identifikimin e viktimave të mundshme të trafikimit me qenie njerëzore.

Dogana e Kosovës ka ndaluar një sasi prej 128 palësh këpucë të markave të mbrojtura, të dyshuara se cenojnë të drejtat e pronësisë intelektuale.

Rasti është zbuluar gjatë mbrëmjes, rreth orës 22:00, në Pikën e Kalimit Kufitar Hani i Elezit, ku zyrtarët doganorë kanë ndaluar për kontroll një automjet me targa vendore, bazuar në analizën e riskut dhe kompetencat ligjore.

Gjatë kontrollit fizik të automjetit, në bagazh janë gjetur këpucët për të cilat drejtuesi nuk ka poseduar dokumentacion që dëshmon origjinën, importin e rregullt apo të drejtën për përdorimin dhe qarkullimin e tyre.

Dogana e Kosovës ka iniciuar procedurë për kundërvajtje doganore, ndërsa malli është ndaluar për procedura të mëtejshme, në përputhje me legjislacionin në fuqi.

Sipas Doganës, kontrollet do të vazhdojnë me qëllim parandalimin e kontrabandës, tregtisë së paligjshme dhe qarkullimit të mallrave që cenojnë të drejtat e pronësisë intelektuale./A.K/