Një nga figurat më të mëdha të futbollit francez dhe atij evropian, Thierry Henry, është nderuar me një prej çmimeve më prestigjioze të UEFA-s.

Ish-sulmuesi francez është shpallur fitues i UEFA President’s Award 2026, çmim që u jepet personaliteteve për arritje të jashtëzakonshme dhe kontribut të veçantë në futboll, brenda dhe jashtë fushës.

Henry konsiderohet një prej sulmuesve më të kompletuar të gjeneratës së tij. Me Arsenal-in, ai u shndërrua në golashënuesin më të mirë në historinë e klubit dhe ishte një prej figurave kryesore të skuadrës së famshme “Invincibles”, e cila përfundoi sezonin e Premier League pa pësuar asnjë humbje.

Gjatë karrierës së tij, Henry fitoi edhe trofeun më të rëndësishëm në futbollin evropian, Champions League, me Barcelonën. Me përfaqësuesen e Francës, ai triumfoi në Kupën e Botës 1998 dhe në Euro 2000.

Në total, Henry shënoi 411 gola për klubin dhe kombëtaren, duke u dalluar për shpejtësinë, teknikën, kreativitetin dhe aftësinë e jashtëzakonshme për të finalizuar aksionet.

Presidenti i UEFA-s, Aleksander Čeferin, e vlerësoi Henryn jo vetëm për sukseset e tij sportive, por edhe për qëndrimin e tij të vazhdueshëm kundër racizmit dhe diskriminimit, si dhe për angazhimin në çështjet e shëndetit mendor dhe kauzat humanitare.

Pas përfundimit të karrierës si futbollist, Henry ka mbetur aktiv në botën e futbollit. Aktualisht angazhohet si analist sportiv, ku kontribuon me analiza të detajuara dhe komente për ndeshjet dhe zhvillimet kryesore në futboll.

UEFA President’s Award ndahet që nga viti 1998 dhe u jepet personaliteteve që kanë dhënë një kontribut të jashtëzakonshëm në futboll dhe që kanë treguar cilësi të veçanta, si në sport, ashtu edhe jashtë tij.

D.L

Drita ka mbetur jashtë fazës së ligës së UEFA Conference League, pasi është eliminuar nga Inter Club d’Escaldes pas ekzekutimit të penalltive.

Pas barazimit 2:2 në ndeshjen e parë të zhvilluar në “Fadil Vokrri”, skuadrat nuk arritën të shënonin në 120 minutat e ndeshjes së kthimit në Andorrë. Kështu, fati i kualifikimit u vendos nga pika e bardhë.

Në serinë e penalltive, Inter Club d’Escaldes triumfoi 4:2 dhe siguroi kalimin tutje.

Për Dritën, nga pika e bardhë nuk arritën të shënonin Kristal Abazaj dhe Igball Jashari. Portieri Faton Maloku e mbajti gjallë shpresën e skuadrës gjilanase duke pritur një penallti, por kjo nuk mjaftoi për ta ndryshuar fatin e takimit.

Kështu, pas 2:2 në ndeshjen e parë dhe 0:0 pas 120 minutave në Andorrë, Drita i dha fund aventurës evropiane në Conference League pas serisë së penalltive.

D.L

Pesë xhudistë të Kosovës do të garojnë të premten në Lojërat Mesdhetare “Taranto 2026”, duke sjellë pritshmëri të mëdha për medalje dhe tituj kampionësh.

Do të ishte befasi nëse Kosova nuk do ta pasuronte bilancin e saj me disa medalje, ndërsa synimi për të fituar edhe ndonjë titull të kampionit, përkatësisht një vend në shkallën më të lartë të podiumit, është më se i arsyeshëm.

Kosova deri më tani ka fituar vetëm një medalje në “Taranto 2026”. Ajo është e arta e boksieres Donjeta Sadiku, e cila e siguroi të enjten. Sportistët e tjerë kosovarë, deri tani, nuk kanë arritur t’i afrohen podiumit.

Në fakt, pritshmëritë kryesore për medalje kanë qenë të orientuara te xhudoja. Të premten në tatami do të paraqiten Erza Muminoviq në kategorinë deri 48 kilogramë, Fatjona Kasapi në kategorinë deri 52 kilogramë, Flaka Loxha në kategorinë deri 57 kilogramë, Akil Gjakova në kategorinë deri 73 kilogramë dhe Dardan Cena në kategorinë deri 81 kilogramë.

Një ditë më vonë, të shtunën, garojnë Laura Fazliu në kategorinë deri 63 kilogramë dhe Shpati Zekaj në kategorinë deri 100 kilogramë.

Duke parë nivelin e xhudistëve kosovarë, Lojërat Mesdhetare nuk konsiderohen një sfidë e paarritshme për ta, edhe përkundër mungesës së Distria Krasniqit, bindshëm njëra prej sportisteve më të suksesshme të Kosovës.

Dominimi i xhudos kosovare në këtë garë është dëshmuar edhe në edicionet e kaluara. Në “Tarragona 2018”, medalje të arta fituan Distria Krasniqi, Nora Gjakova dhe Akil Gjakova, ndërsa Loriana Kuka u shpërblye me medalje të argjendtë.

Në “Oran 2022”, Distria Krasniqi, Laura Fazliu dhe Loriana Kuka fituan medalje të arta, ndërsa Flaka Loxha dhe Akil Gjakova u kthyen me medalje të bronzta. Medalje të bronztë për Kosovën në atë edicion fitoi edhe boksieri Shpëtim Bajoku.

Xhudoja është sporti që i ka sjellë Kosovës rezultatet më të mëdha në arenën ndërkombëtare. Xhudistët kosovarë kanë fituar medalje në pothuajse çdo ngjarje të rëndësishme ku kanë marrë pjesë, ndërsa deri tani kanë siguruar pesë medalje olimpike, tri prej të cilave të arta.

Bëhet fjalë për medaljet më të vlefshme që mund të fitojë një sportist në karrierën e tij. Pikërisht për këtë arsye, pritshmëritë janë të mëdha që xhudistët kosovarë ta nisin fuqishëm betejën për medalje në “Taranto 2026” dhe ta shtojnë ndjeshëm bilancin e Kosovës në këto Lojëra Mesdhetare.

D.L

Donjeta Sadiku ka triumfuar në finalen e kategorisë deri në 60 kilogramë në Lojërat Mesdhetare “Taranto 2026”.

Boksierja kosovare ka mposhtur përfaqësuesen e Serbisë, Kristina Kuluhova, ndërsa kundërshtarja u tërhoq që në minutat e para të duelit.

Kështu, Sadiku e mbyll me medaljen e artë aventurën e saj në Taranto, duke i sjellë Kosovës një tjetër sukses të madh në arenën ndërkombëtare.

Një triumf i veçantë për boksieren kosovare, e cila edhe një herë dëshmoi nivelin e saj dhe u ngjit në podiumin më të lartë.

DONJETA SADIKU – KAMPIONE E MESDHEUT!

Foto: RTK

D.L