Lajmet

Kalon propozimi për liberalizimin e vizave në janar të vitit 2024

Kjo datë ishte kërkesë e Spanjës.

Publikuar

Përfaqësues të vendeve anëtare të BE-së u pajtuan me propozimin që liberalizimi i vizave për Kosovën të hyjë në fuqi më 1 janar të vitit 2024.

Radio Evropa e Lirë merr vesh se pajtimi u arrit në një takim të këshilltarëve për viza të martën në Bruksel.

Kjo datë ishte kërkesë e Spanjës – njërit prej pesë vendeve të BE-së që nuk e njeh ende pavarësinë e Kosovës.

Paraprakisht, Republika Çeke – e cila aktualisht udhëheq presidencën gjashtëmujore të BE-së – kërkoi që liberalizimi i vizave për Kosovën të fuqizohet më 1 dhjetor të vitit 2023.

Por, ky propozim nuk kaloi në një takim të grupit punues të BE-së për vizat, që u mbajt javën e kaluar, pasi Spanja e më pas edhe Sllovakia dhe Suedia paraqitën vërejtje dhe kërkuan, siç thanë, sqarime shtesë. Arsyet e tyre nuk u bënë të qarta.

Sipas propozimit të miratuar të martën, “hyrja në fuqi e liberalizimit të vizave për qytetarët e Kosovës do të nisë në kohën kur të jetë funksional sistemi i udhëtimit ETIAS, por jo më vonë se më 1 janar të vitit 2024”.

Miratimi i këtij propozimi do të jetë në rend dite në takimin e ambasadorëve të vendeve anëtare të BE-së, që do të mbahet të mërkurën.

Liberalizimi i vizave do t’u mundësojë qytetarëve të Kosovës të udhëtojnë lirshëm në atë që njihet si zona Schengen, e që përbëhet prej 26 shtetesh evropiane.

Për të arritur deri këtu, Kosovës i duhet t’i kalojë edhe disa shkallë:

Diplomatë të BE-së thonë se kalimi i propozimit është një gjë pozitive, sepse ekziston një datë konkrete për hyrjen në fuqi të liberalizimit të vizave.

Sipas tyre, nëse ETIAS bëhet funksional sipas pritjeve, përkatësisht në nëntor të vitit të ardhshëm, liberalizimi i vizave mund të hyjë në fuqi edhe më herët, më 1 nëntor, 2023.

Lidhja me sistemin ETIAS

ETIAS është një sistem digjital që synon të bëjë evidentimin e vizitorëve që hyjnë prej jashtë BE-së në zonën Schengen.

Ky sistem është dashur të nisë së funksionuari në vitin 2022, por data është shtyrë disa herë dhe tani si afat përmendet nëntori i vitit 2023.

Në një takim të grupit punues për viza të Këshillit të BE-së, të mbajtur më 13 tetor, zyrtarët francezë propozuan që liberalizimi i vizave për Kosovën të lidhet pikërisht me funksionalizimin e ETIAS-it.

Republika Çeke doli më pas me propozimin që hyrja në fuqi e liberalizimit të vizave të lidhej me funksionalizimin e ETIAS-it, por njëherësh të caktohej edhe data e fuqizimit të vendimit: “jo më vonë se 1 dhjetori i vitit 2023”.

Me kërkesën e Spanjës, kjo datë u shty për 1 janar të vitit 2024.

Kosova është vendi i vetëm në Ballkanin Perëndimor, qytetarët e të cilit nuk mund të lëvizin lirshëm në zonën Schengen.

Kjo, me gjithë faktin se Komisioni Evropian, qysh në vitin 2018, ka konfirmuar disa herë se Kosova i ka përmbushur të gjitha kushtet për liberalizimin e vizave, por kanë qenë disa vende anëtare që vazhdimisht kanë shprehur rezerva./REL

Lajmet

​Vrasja e gruas në Ferizaj, Aliu: Dorasit t’i shqiptohet dënimi i merituar

Në llogarinë e tij në Facebook, ai tha se janë të tronditur nga ky lajm, teksa ka treguar se i plagosuri është vëllai i viktimës.

Publikuar

nga

Kryetari i Ferizajt, Agim Aliu, ka reaguar pas rastit të rëndë në këtë komunë, ku mbeti e vrarë një grua. Në llogarinë e tij në Facebook, ai tha se janë të tronditur nga ky lajm, teksa ka treguar se i plagosuri është vëllai i viktimës.

“Të tronditur thellë, morëm lajmin se pak minuta më parë, një bashkëqytetare e jonë është qëlluar për vdekje nga ish bashkëshorti i saj derisa dorasi ka plagosur edhe vëllain e viktimës. Viktima dhe dorasi po merrnin shërbime pranë Qendrës për Punë Sociale në Ferizaj, derisa dorasi ka shtënë mbi viktimën dhe vëllain e saj si dhe ka kërcënuar me armë edhe punonjësen e këtij institucioni”, ka shkruar ai në Facebook.

Aliu gjithashtu bëri thirrje për institucionet e drejtësisë që t’i japin dënimin e merituar dorasit.

Vazhdo të lexosh

Lajmet

​“Zëri juaj është i çmuar”, Macron vlerëson rolin e Ramës në dialogun Kosovë-Serbi

Ai tha se normalizimi i marrëdhënieve mes dy vendeve është i nevojshëm për sigurinë e rajonit të Ballkanit Perëndimor.

Publikuar

nga

Presidenti i Francës, Emmanuel Macron ka përgëzuar Shqipërinë për ecurinë drejt integrimit në BE gjatë konferencës për shtyp që mbajti me kryeministrin Edi Rama, i cili po qëndron për vizitë zyrtare në Paris.

Në adresimin e tij për media, Macron përsëriti angazhimin e Francës në favor të angazhimit evropian të Shqipërisë dhe më gjerë të lëvizjes për Ballkanin Perëndimor.

“Ju e dini se mund të keni besim tek vendosmëria ime për t’i intensifikuar edhe më shumë. Dua të përsëris angazhimin e Francës në favor të anëtarësimit të vendit në BE dhe të lëvizjes që ne kemi për Ballkanin Perëndimor.Siç e nënvizova para 6 muajve në Tiranë këtu bëhet fjalë vetëm për bashkimin e Europës për ta bërë më të fortë, më sovrane në kontekstin e agresionit rus kundër Ukrainës, por gjithashtu përballë kërcënimeve dhe sfidave të përbashkëta. Është gjithashtu një premtim paqeje për të gjithë rajonin”, tha Macron.

Ndërkaq duke folur për rolin e Shqipërisë në dialogun Kosovë-Serbi, presidenti francez e vlerësoi lartë rolin e Tiranës zyrtare, duke thënë se zëri i saj është i çmuar. Ai tha se normalizimi i marrëdhënieve mes dy vendeve është i nevojshëm për sigurinë e rajonit të Ballkanit Perëndimor.

“Në të gjitha çështjet rajonale është i nevojshëm normalizimi i marrëdhënieve ndërmjet Kosovës dhe Serbisë ku zëri juaj është i çmuar. Shkëmbimet tona të sotme do të lejojnë të vazhdojmë në këtë rrugë dhe të bëjmë bilancin e kantiereve që kemi hapur së bashku për të forcuar partneritetin tonë të cmuar në të gjitha fushat dhe të gjitha këto kantiere kanë avancuar dhe gëzohem për nënshkrimin pas pak të një marrëveshje ndër-qeveritare që do t’i jap një impuls të ri bashkëpunimit tonë”, tha ai.

Vazhdo të lexosh

Lajmet

​Gjermania i kërkon Iranit të mos ndërmarrë veprime ushtarake kundër Izraelit

Kancelari Scholz tha se qeveria gjermane ka biseduar me aleatët e saj perëndimorë, si dhe partnerët e saj në rajon, për të parandaluar një konflikt më të gjerë në Lindjen e Mesme.

Publikuar

nga

Kancelari gjerman Olaf Scholz shprehu të premten shqetësimin për përshkallëzimin e mundshëm në Lindjen e Mesme dhe i kërkoi Iranit të mos ndërmarrë veprime ushtarake kundër Izraelit.

“Ne po i marrim shumë seriozisht rreziqet që po shfaqen atje në lidhje me veprimet e mundshme nga Irani”, tha Scholz në një konferencë shtypi në Berlin, mes raporteve të mediave që pretendonin se Irani mund të hakmerret kundër Izraelit brenda 24 deri në 48 orëve të ardhshme.

Kancelari Scholz tha se qeveria gjermane ka biseduar me aleatët e saj perëndimorë, si dhe partnerët e saj në rajon, për të parandaluar një konflikt më të gjerë në Lindjen e Mesme.

“Si unë, edhe ministri i jashtëm dhe e gjithë qeveria, kemi bërë gjithçka që është e mundur, si shumë nga partnerët tanë, për të dërguar mesazhet e duhura dhe për ta bërë të qartë se nuk duhet të ketë ndonjë aktivitet të tillë ushtarak atje”, u tha ai gazetarëve.

Izraeli është në gatishmëri të lartë mes frikës për një sulm të mundshëm iranian si hakmarrje për një sulm të supozuar izraelit në Konsullatën iraniane në Damask më 1 prill.

Të paktën shtatë anëtarë të Korpusit të Gardës Revolucionare Islamike të Iranit u vranë në sulm, duke përfshirë dy gjeneralë të lartë.

Ministri i Jashtëm izraelit, Israel Katz, kërcënoi të mërkurën se ushtria e vendit të tij do të godasë Iranin drejtpërdrejt nëse Teherani fillon një sulm nga territori i tij kundër Izraelit.

Përshkallëzimi vjen ndërsa Izraeli vazhdon të kryejë një ofensivë ushtarake vdekjeprurëse në Rripin e Gazës pas një sulmi ndërkufitar në fillim të tetorit nga Hamasi, i cili vrau rreth 1200 njerëz.

Më shumë se 33.600 palestinezë janë vrarë që atëherë në Gaza dhe mbi 76.000 janë plagosur në mes të shkatërrimit në masë dhe zhvendosjes./AA

Vazhdo të lexosh

Lajmet

IKSHPK: Rriten rastet me kollën e mirë

Më 29 mars, ky institut kishte raportuar për tetë raste të regjistruara me kollën e mirë.

Publikuar

nga

Instituti Kombëtar i Shëndetësisë Publike të Kosovës (IKSHPK) tha se ka regjistruar raste të reja me sëmundjen ngjitëse të kollës së mirë, apo siç njihet ndryshe edhe si pertussis.

“Gjatë vitit 2024, IKSHPK ka regjistruar 14 raste të konfirmuara me laborator të pertussisit, kryesisht te moshat e reja, që paraqet një rritje të lehtë krahasuar me vitet paraprake”, u tha në njoftim.

Më 29 mars, ky institut kishte raportuar për tetë raste të regjistruara me kollën e mirë.

“Kjo sëmundje ngjitëse mund të shfaqet në çdo moshë, por më shpesh i prek fëmijët dhe adoleshentët. Më të rrezikuar janë fëmijët nën moshën 1-vjeçare”, tha IKSHPK-ja.

Kjo sëmundje, që shkaktohet nga bakteri bordetella pertussis, përhapet lehtësisht nga personi në person përmes spërklave nga kollitja ose teshtitja e personit të infektuar.

Sipas IKSHP-së, simptomat zakonisht shfaqen shtatë deri në dhjetë ditë pas infektimit, por mund të shfaqen edhe deri në 21 ditë më vonë. Simptomat janë të ngjashme me ftohjen e zakonshme, përfshirë teshtitjen, rrjedhjen e hundës, temperaturë të ulët dhe një kollë të lehtë.

Sipas IKSHPK-së, mënyra më e mirë e parandalimit të kësaj sëmundjeje është vaksinimi, duke u bërë thirrje prindërve të vaksinojnë fëmijët dhe foshnjat për këtë sëmundje ngjitëse./REL

 

Vazhdo të lexosh

Të kërkuara