Juventusi vazhdon të kalojë një periudhë të vështirë dhe humbja e fundit ndaj Real Madridit në Ligën e Kampionëve ka ndezur alarmin në kampin bardhezi. Pas këtij rezultati, skuadra e Igor Tudor numëron shtatë ndeshje radhazi pa fitore dhe ka vetëm dy pikë pas tre javëve të para në fazën e grupeve.

Ish-sulmuesi i njohur francez, Thierry Henry, ka analizuar situatën e Juventusit në studiot e CBS, duke u treguar shumë kritik ndaj mënyrës se si po luan skuadra aktuale.

“Pa një identitet apo filozofi, është e vështirë të konkurrosh. Shoh një ekip që nuk konkurron, pa identitet dhe pa filozofi të vet. Kur mendon për Juven, mendon për një ekip që lufton, me identitet të qartë. Por tani kjo mungon. E kuptoj që Tudor ka ardhur së fundmi dhe se ka një president të ri, por diçka duhet të ndryshojë,”, deklaroi Henry.

Francezi shtoi se mungesa e identitetit dhe frymës garuese është ajo që e bën më të dhimbshme situatën për tifozët bardhezi.

“Njerëzit sot nuk presin. Klubi duhet të ecë përpara dhe të marrë atë që do. Është e drejtë të mbështesësh ekipin, por nuk është mirë të shohësh Juventusin të luajë kështu. Është shumë e vështirë t’i shikosh ata në këtë gjendje.”, tha ai.

Juventusi nuk ka fituar që nga 13 shtatori, kur mundi Interin 4-3, dhe përballja e ardhshme në Ligën e Kampionëve pritet të jetë vendimtare për shpresat e kualifikimit./S.K/KP/

Liga e Kampionëve ka përfunduar raundin e tretë të fazës së grupeve me një rekord të ri historik, ku sipas të dhënave të UEFA-s, në 18 ndeshjet e këtij raundi janë shënuar plot 71 gola, shifër që nuk është regjistruar kurrë më parë në historinë e garës më prestigjioze evropiane për klube.

Edhe pse formati i ri përfshin një grup të vetëm me më shumë ndeshje se më parë, ky rezultat mbetet impresionues.

Raundi i parë i sezonit aktual 2025-26 kishte përfunduar me 67 gola, po aq sa raundi i pestë i sezonit të kaluar, ndërsa rekordi i mëparshëm mbahej nga raundi i tetë i edicionit 2023-24 me 64 gola.

Në formatin e vjetër me 32 ekipe dhe 16 ndeshje, raundi më i frytshëm ishte ai i parë i sezonit 2000-2001, me ndeshje spektakolare si Milan–Beşiktaş 4-1, Hamburg–Juventus 4-4 dhe Shakhtar–Lazio 0-3.

Në raundin rekord të kësaj jave, gjashtë ndeshje prodhuan pesë ose më shumë gola. Chelsea dhe Liverpool shënuan nga pesë gola secila, PSV dhe Barcelona nga gjashtë, ndërsa PSG e mbylli ndeshjen e saj me shtatë gola.

Tre ndeshje përfunduan pa gola.

Një javë e mbushur me spektakël, gola dhe emocione, konfirmoi se formati i ri i Ligës së Kampionëve po i ofron tifozëve më shumë argëtim se kurrë më parë./S.K/KP/

Dy ndeshje të planifikuara për sot në kompeticionet evropiane në Holandë janë shtyrë për shkak të kushteve të rënda atmosferike.

Autoritetet kanë lëshuar një paralajmërim për mot të keq duke filluar nga ora 14:00, me ardhjen e stuhisë “Benjamin”, e cila pritet të sjellë erëra të forta dhe reshje intensive.

Për këtë arsye, UEFA ka vendosur të modifikojë oraret e fillimit të dy takimeve për të garantuar sigurinë e lojtarëve dhe tifozëve.

Ndeshja Feyenoord – Panathinaikos, e vlefshme për fazën e grupeve të Ligës së Evropës dhe e planifikuar fillimisht për në orën 18:45 në Roterdam, do të zhvillohet tani në orën 16:30.

Ndërkohë, sfida e AZ Alkmaar – Slovan Bratislava, pjesë e Ligës së Konferencës, është zhvendosur nga ora 21:00 në 18:45.

Vendimi është marrë në koordinim me autoritetet vendase dhe sinoptikanët, të cilët kanë paralajmëruar për rreziqe në udhëtim dhe grumbullime njerëzish gjatë periudhës së stuhisë./S.K/KP/

Me sloganin “Making Kosovo Heroes”, një nga akademitë më të njohura të futbollit në botë, S.L. Benfica, hap shkollën e saj të futbollit në Prishtinë.

Me shumë emocion ju njoftojmë për një arritje dhe një lajm të mrekullueshëm për botën e sportit në Kosovë!

Në mars të vitit 2026 do të inaugurohet Shkolla e Futbollit S.L. Benfica, një nga akademitë më prestigjioze të futbollit në botë, duke shënuar kështu një moment të rëndësishëm për futbollin në vendin tonë. Kjo do të jetë shkolla e parë nga disa që do të hapen në rajon, përfshirë Shqipërinë dhe Maqedoninë e Veriut si pjesë të këtij projekti.

Shkolla e Futbollit Benfica do të zhvillohet në partneritet me UBT-në, respektivisht në Prishtinë, një nga kryeqytetet më dinamike dhe më të gjalla në rajon.

Kjo akademi jo vetëm që do të sjellë njohuri dhe ekselencë në fushën e futbollit, por do të krijojë gjithashtu mundësi të reja për të rinjtë e Kosovës, duke u ofruar atyre një platformë për të zhvilluar talentin dhe për të ndjekur ëndrrat e tyre sportive.

Marrëveshja u formalizua në frymën e entuziazmit dhe miqësisë ndërmjet dy institucioneve, përmes një ceremonie të organizuar në Klubin Benfica në Lisbonë. Ajo u nënshkrua nga Drejtori i Zgjerimit Ndërkombëtar të Benfica-s, z. Bernardo Faria de Carvalho, dhe Rektori i UBT-së, Prof. Dr. Edmond Hajrizi.

Kjo akademi do t’u ofrojë të rinjve mundësinë për të mësuar nga trajnerë të njohur dhe të përkushtuar, me qëllim arritjen e standardeve që kërkon niveli i futbollit evropian për grupmoshat 4-16 vjeçare.

Për të siguruar mbikëqyrjen e projektit, klubi do të dërgojë një ekip koordinatorësh dhe trajnerësh që do të qëndrojnë në Prishtinë, për të monitoruar nga afër dhe për të zbatuar programin në përputhje me standardet më të larta.

Ky është një lajm i madh për të gjithë ne — për të gjithë ata që e duan sportin, dhe veçanërisht për fëmijët e talentuar. Ky projekt do të kontribuojë në zhvillimin e futbollit vendor dhe do të forcojë imazhin dhe pozitën e Kosovës në arenën ndërkombëtare.

Shkolla e Futbollit Benfica në Kosovë synon të bëhet një qendër ekselence për zhvillimin e atletëve të rinj, duke ofruar kushte sportive të cilësisë së lartë që do t’u mundësojnë atyre të përparojnë sipas strategjisë dhe metodologjisë së zhvillimit të Benfica-s.

Me një fokus të veçantë në zhvillimin e futbollit në vendet e Ballkanit Perëndimor dhe në prag të Kupës së Botës 2030, S.L. Benfica po forcon strategjinë e saj për të rritur praninë në Kosovë dhe për të mbajtur lidhje me një brez të ri talentesh.

Ky zgjerim gjithashtu synon forcimin e marrëdhënieve të klubit me tifozët rajonalë dhe thellimin e ndikimit të futbollit në vend në prag të këtij eventi madhor.

Benfica Campus në Kosovë, përveç angazhimit të saj të drejtpërdrejtë në Prishtinë për zbulimin e talenteve të rinj, do të ofrojë një gamë programesh të dizajnuara për të integruar dhe zhvilluar të gjitha aftësitë dhe njohuritë që kërkon futbolli modern, duke i kombinuar ato me:

• Kampet e trajnimit të ekipeve – Prishtinë
• Kampet në Benfica – Lisbonë
• Kampet e trajnimit elitar – Prishtinë & Lisbonë
• Turne ndërkombëtare të futbollit për të rinjtë – Evropë dhe SHBA
• Edukim dhe certifikim të trajnerëve

Ftojmë të gjithë dashamirët e futbollit që të bashkohen me ne në këtë rrugëtim të bukur, sepse futbolli në Kosovë po hyn në një dimension të ri! Ky është vetëm fillimi, dhe jemi të bindur se shumë talente do të lindin nga Shkolla e Futbollit Benfica në Prishtinë, e cila padyshim do të jetë një histori suksesi që do ta bëjë Kosovën krenare.