Sport

Jovetic transferohet në Gjermani, Pjaca drejt rikthimit në Torino

Merkato e futbollit.

Published

5 years ago

July 28, 2021

Betim Gashi

Ekipet kanë nisur përforcimet për sezonin e ri futbollistik. Kjo merkato vere deri tani ka qenë mjaft interesante, por pandemia ka akoma gjurmët e saj tek financat e klubeve. Më poshtë po ju paraqesim disa lëvizje të fundit në merkato.

Jovetic te Hertha e Berlinit, gati kontrata 3-vjeçare
Sulmuesi malazez Stevan Jovetic ka mbyllur bashkëpunimin me Monacon dhe tani është gati për një aventurë në Bundesligë. Sipas mediave gjermane, futbollisti 32-vjeçar ka arritur marrëveshjen me Herthën e Berlinit për një kontratë 3-vjeçare dhe zyrtarizimi është vetëm çështje orësh. Sulmuesi malazez ka luajtur më herët në kampionatin italian, anglez, spanjoll e francez, ndërsa me kalimin në Bundesligë, kompleton 45-shen e ligave kryesore europiane.

Simeone nuk bind Cagliarin, gati transferimi në Rusi
Me vetëm 6 gola të shënuar në 33 ndeshje të sezonit të kaluar, Giovanni Simeone nuk ka përmbushur pritshmëritë e tij në Cagliari, ndaj pritet që të largohet gjatë merkatos së verës. Për sulmuesin 26-vjeçar së fundi kanë shfaqur interes rusët e Zenitit të Shën Petërsburgut, që janë ofruar ta marrin në huazim me të drejtë blerjeje për shifrën e 8 milionë eurove. Negociatat mes palëve kanë nisur dhe në ditët e ardhshme pritet edhe zyrtarizimi i Simeones në klubin rus.

Pjaca rikthehet në Torino, këtë herë jo për Juven
Pas tre sezonesh huazim në klube të ndryshme, Marko Pjaca është gati të rikthehet në Torino, por këtë herë jo për të veshur fanellën e Juventusit. Fantazisti kroat është në pronësi të bardhezinjve, por pëlqehet shumë nga trajneri Juriç, që po e kërkon me ngulm te Torino. Negociatat mes dy klubeve torineze kanë nisur dhe marrëveshja pritet të arrihet mbi formulën e huazimit me të drejtë blerjeje për një shifër totale prej 7 milionë eurosh.

Hauge kërkohet në Gjermani, Maldini i vendos çmimin
Ndonëse erdhi me bujë te Milani, norvegjezi Jens Petter Hauge nuk ia doli të bindë trajnerin Pioli dhe pritet të largohet gjatë kësaj vere. Për sulmuesin anësor kanë shfaqur interes klubet gjermane si Wolfsburg dhe Eintracht Frankfurt, ndërsa Maldini e ka bërë të qartë se Hauge nuk do të largohet nga Milano për një shifër më të ulët se 15 milionë euro./TCH

Sport

Eshref Beqiri delegat në gjysmëfinalen e Kupës Evropiane në hendboll

Published

15 hours ago

April 27, 2026

UBTNews

Anëtari i Federatës të Hendbollit të Kosovës, Eshref Beqiri, ka përfaqësuar sërish Kosovën në arenën ndërkombëtare, duke shërbyer si delegat i Federata Evropiane e Hendbollit në një ndeshje të rëndësishme evropiane të zhvilluar në fundjavë.

Beqiri ishte i angazhuar në mbarëvajtjen e takimit të parë gjysmëfinal të EHF European Cup për hendbollistë, ku u përballën skuadra sllovene RK Celje Pivovarna Laško dhe ekipi nga Maqedonia e Veriut, GRK Ohrid.

Ndeshja u zhvillua në Celje të Sllovenisë dhe përfundoi me fitoren e skuadrës vendase 27:26, duke lënë gjithçka të hapur për takimin e kthimit që do të luhet më 2 maj në Ohër.

Eshref Beqiri vazhdon të jetë i besuar nga Federata Evropiane e Hendbollit, duke u deleguar rregullisht në ndeshje të rëndësishme të garave evropiane gjatë këtij edicioni, çka vlerësohet si një konfirmim i punës së tij profesionale në këtë rol.

Sport

Sonte ndeshje finale në volejboll

Published

15 hours ago

April 27, 2026

UBTNews

Në Pallatin e Sporteve “Bill Clinton” në Ferizaj, sonte zhvillohen ndeshje shumë të rëndësishme finale në kuadër të Raiffeisen Superliga e Kosovës në volejboll.

Në konkurrencën e femrave, nga ora 20:30 luhet finalja e dytë e serisë për titullin e kampionit, ku përballen KVF Ferizaj dhe KV Fer Volley. Ky duel pritet të jetë vendimtar në garën për titull, pas ndeshjes së parë mes këtyre dy skuadrave rivale.

Ndërkohë, në konkurrencën e meshkujve, sonte nis seria e finaleve, ku në aktin e parë përballen dy skuadra nga i njëjti qytet, KV Ferizaj dhe KV Luboteni. Ndeshja fillon nga ora 18:00 dhe pritet të sjellë një rivalitet të fortë lokal.

Të dyja përballjet pritet të ofrojnë spektakël dhe interesim të madh nga tifozët, duke qenë se bëhet fjalë për ndeshje vendimtare në garën për titujt kampionë.

Sport

Kristian Prenga përballet me Anthony Joshua në Riad, para sfidës së madhe me Fury

Published

17 hours ago

April 27, 2026

UBTNews

Boksieri shqiptar Kristian Prenga do të përballet me një nga emrat më të mëdhenj të boksit profesionist, Anthony Joshua, në një duel që pritet të zhvillohet më 25 korrik në Riad të Arabisë Saudite.

Vetë Joshua ka konfirmuar rikthimin në ring për këtë përballje, e cila do të shërbejë si një test i rëndësishëm përpara sfidës së madhe që e pret më vonë gjatë vitit. Për Prengën, kjo është një mundësi e artë për t’u përballur me një kampion të njohur botëror dhe për të bërë hap të madh në karrierë.

Ndërkohë, vëmendja e botës së boksit është e përqendruar edhe te superndeshja e shumëpritur mes Joshua dhe Tyson Fury. Pas vitesh spekulimesh, dy rivalët kanë arritur marrëveshje për t’u përballur, duke e bërë këtë një nga duelet më të mëdha të kohëve të fundit.

Para kësaj përballjeje, Joshua synon të rikthehet në formë optimale pikërisht përmes meçit ndaj Prengës. Në anën tjetër, Fury tashmë është rikthyer në ring, duke fituar me pikë ndaj Arslanbek Makhmudov pas një pauze të gjatë prej 16 muajsh.

Nëse gjithçka shkon sipas planit dhe Joshua kalon me sukses sfidën e korrikut, përballja e madhe me Fury pritet të zhvillohet në nëntor, me shumë gjasa në Wembley Stadium, ndërsa interesimi global për këtë duel pritet të jetë jashtëzakonisht i madh.

Sport

Asllani shënon, Hajdari asiston në fitoren e Hoffenheimit ndaj Hamburgut

Published

17 hours ago

April 27, 2026

UBTNews

TSG Hoffenheim ka shënuar fitore të rëndësishme në udhëtim ndaj Hamburger SV me rezultat 2:1, në një ndeshje ku futbollistët shqiptarë patën rol vendimtar.

Golin e parë për Hoffenheimin e realizoi Tim Lemperle në minutat shtesë të pjesës së parë, pas një asistimi të saktë nga Albian Hajdari, i cili u dallua me paraqitje shumë të mirë gjatë gjithë takimit.

Në pjesën e dytë, në minutën e 64-të, ishte Fisnik Asllani ai që vulosi fitoren, duke shënuar golin e dytë për mysafirët dhe duke qenë një nga figurat kryesore të ndeshjes.

Paraqitja e dy futbollistëve shqiptarë ishte vendimtare për këtë sukses, me Hajdarin që kontribuoi me asist dhe Asllanin që gjeti rrugën e rrjetës, duke konfirmuar formën e mirë dhe rëndësinë e tyre në skuadër.

Hamburger SV arriti të shënojë një gol, por nuk ishte i mjaftueshëm për të shmangur humbjen ndaj një Hoffenheimi më efikas.