Ndërsa disa blejnë më të mirat e produkteve më të fundit, gjithnjë e më shumë njerëz kuptojnë se mund t’ia dalin me më pak. Prandaj synojnë një jetë minimaliste.

Të bësh një stil jetese minimaliste përfshin reduktimin e asaj që ke në minimum dhe në njëfarë mënyre, të bësh pa gjëra materiale.

Po flasim për një filozofi të jetuar dhe mbrojtur gjatë historisë, nga filozofët e lashtë grekë apo nga mjeshtrat budistë Zen.

Në ditët e sotme stili minimalist i jetesës është tërheqës sepse përfaqëson një lloj kriptoniti për qarkun “punë-para-konsum”. Nga ana tjetër, sipas Art Markman, profesor i psikologjisë dhe marketingut në Universitetin e Teksasit: çdo brez rinovon atë të mëparshëm dhe minimalizmi duket një bast imanent për shumicën e gjeneratave të reja.

Gjeneratat e reja duket se po reagojnë ndaj epokës së konsumit të tepruar të dekadave të fundit.

“Shumë gjëra janë të disponueshme dhe ka shumë mediume që nxisin konsumin, prandaj njerëzit po reagojnë kundër kësaj”, shpjegon Markman.

Për shumicën e brezit të ri, të bëjnë të njëjtat zgjedhje si prindërit e tyre, thjesht nuk është një opsion.

Minimalizmi është interesant për shkak të dimensionit të tij shpirtëror. Njeriu ka shpresën se është mirë për anën tonë shpirtërore (ajo që ka mbetur disi jetime prej ndikimit më të vogël të fesë në shoqëri). Gjithashtu, jeta minimaliste është e lidhur me ndërgjegjen sociale.

Përzgjedhja e asaj që blejmë nënkupton ndëshkimin e atyre kompanive që nuk respektojnë kushtet e punës që janë dinjitoze për punëtorët e tyre; më pak konsum i burimeve natyrore; më pak ndotje; konsum më i ulët i energjisë, etj. Të gjitha këto janë ideale në përputhje me ankthet e brezave të rinj.

Pse jeta është kaq e çrregullt?

Është e vërtetë se bota në të cilën ne lëvizim është, sipas përkufizimit, sa kaotike aq edhe e paparashikueshme. Është një mungesë rregulli për të cilën ne shpesh kontribuojmë me mënyrën tonë të jetesës.

Shumë njerëz nuk janë të kënaqur me punën e tyre, e ndjejnë të nevojshme gjithçka që reklama e bën popullore, dënojnë me fjali që nuk i besojnë realisht, hanë ushqime jo të shëndetshme, kalojnë kohën me njerëz me të cilët nuk duan të jenë. Dhe, nëse kjo ndodh, nuk është për shkak se dikush na e imponon, por sepse ne vendosim ta bëjmë këtë. Ne vendosim që nuk kemi mundësi të tjera, apo se kjo është më e mira për ne.

Megjithatë, ne nuk jemi plotësisht fajtorë për këtë. Që në moshë të re shoqëria dhe konteksti në të cilin jetojmë na “shtyjnë” të jetojmë në këtë mënyrë. Publiciteti që shtrihet kudo, indoktrinimi i marrë në shkollë, në familje dhe në kontekste të tjera ndikimi, rrethi ynë i miqve….

Nisur nga kjo panoramë, nuk është aq e habitshme që jeta duket si një rrëmujë. Por ne mund të ndërhyjmë në mënyrë të dobishme në situatën për të cilën po flasim. Mund të lëmë hapësira boshe ku kthjelltësia mund të depërtojë. Ne mund të krijojmë një jetë më pak të komplikuar dhe më kuptimplote duke ndjekur një stil jetese minimaliste.

Jetesa minimaliste: më pak komplikime dhe më shumë kuptim

Ideja kryesore e minimalizmit është të heqim qafe atë që nuk i shton vlerë jetës sonë, t’i lëmë vend asaj që i shton. Për shembull, eliminimi i rrëmujës, shpërqendrimeve dhe marrëdhënieve të pashëndetshme, dhe krijimi i më shumë hapësire për gjërat që janë thelbësore për mirëqenien tonë, si kreativiteti, dashuria dhe loja.

Minimalizmi ose jeta minimaliste ka të bëjë me fokusimin e qëllimshëm në atë që është me të vërtetë e rëndësishme dhe lënien mënjanë të pjesës tjetër. Me fjalë të tjera, ka të bëjë me shijimin e jetës, duke patur më pak. Më poshtë, një shpjegim se si mund ta bëjmë:

Lini mënjanë gjithçka që nuk ju bën të ndiheni mirë: hiqni qafe gjithçka që ju pengon, gjithçka që ju shpërqendron, që ju bën të humbni përqendrimin. Hiqni qafe gjithçka që ju heq qetësinë dhe kthjelltësinë. Në vend të kësaj, përmbajuni asaj që vërtet kontribuon në mirëqenien tuaj.

Mos blini gjëra që nuk ju nevojiten: mos u mashtroni nga reklamat, moda dhe mendimet e njerëzve të tjerë. Të kesh më shumë gjëra nuk do të të bëjë më të lumtur. E vërteta është se kur kemi mjaftueshëm për të plotësuar nevojat tona bazë, pasuritë materiale nuk mund të përmirësojnë mirëqenien tonë në asnjë mënyrë. Ato mund të na japin vetëm një kënaqësi momentale, e cila zhduket shumë shpejt, duke na çuar në një gjendje më të keqe psikologjike.

Vlerësoni atë që keni: Përqendrohuni në atë që keni në vend të asaj që ju mungon. Përndryshe do të ndiheni gjithmonë të paplotësuar, të pakënaqur dhe të burgosur të dëshirës suaj.

Minimizoni shpërqendrimet dixhitale: e-maile, mesazhe të çastit, rrjete sociale, shfletim argëtues… Të gjitha këto ju shpërqendrojnë dhe ju bëjnë të humbni përqendrimin, vëmendjen në momentin aktual. Përdorni me vetëdije mediat digjitale dhe mbani nën kontroll ndërveprimet me njerëzit e tjerë.

Përmirësimi i marrëdhënieve ndërpersonale: në epokën e internetit, që lehtëson ndërlidhjen, ne jemi gjithnjë e më të shkëputur. Na mungojnë marrëdhëniet e vërteta njerëzore, ato reale.

Bëni gjërat me radhë: një jetë minimaliste është, në thelb, të jetosh me fokus. Me fjalë të tjera, shijoni çdo moment në maksimum. Nëse jemi gjithmonë të hutuar dhe/ose të lidhur me shumë detyra, kjo nuk do të jetë e mundur.

Përqendrohuni në qëllime të rëndësishme: Shumica e njerëzve në përgjithësi kanë një numër të madh qëllimesh që duan t’i arrijnë. Një jetë minimaliste ka një qëllim të qartë. Për ta bërë këtë, duhet të zbuloni ato pak gjëra që ju interesojnë më shumë dhe t’u përkushtoheni atyre.

Kujdesuni për trupin dhe mendjen: shëndeti është pika fillestare për t’u ndjerë mirë. Prandaj, është thelbësore të kujdeseni për veten në dy nivele: fizik dhe mendor. Aktiviteti fizik, ushqimi dhe gjumi janë tre elementët kryesorë në këtë drejtim.

Kultivoni vëmendje të plotë: Jeta minimaliste kërkon një mendje të qetë dhe kjo do të thotë pa mendime kontradiktore dhe në harmoni me momentin aktual. Praktikimi i vëmendjes ose meditimit të plotë ndihmon në rivendosjen e një gjendjeje paqësore të vetëdijes. Ju mund t’i vëzhgoni mendimet dhe ndjenjat tuaja pa i gjykuar, rezistuar ose nxitur ato, dhe t’i përgjigjeni me vetëdije situatave në vend që të reagoni me tepri, ose të lodheni prej tyre.

Konkluzione

Fumio Sasaki thotë se “minimalizmi është një mënyrë jetese në të cilën ju reduktoni pasuritë tuaja në minimumin e mundshëm”. Për Sasakin, “të jetuarit vetëm me gjërat elementare jo vetëm që më ka ofruar përfitime sipërfaqësore, si kënaqësia e një shtëpie të rregullt apo lehtësia gjatë pastrimit, por më ka çuar edhe drejt një ndryshimi më thelbësor”.

Duke zgjedhur një mënyrë jetese minimaliste, Sasaki ka lëvizur drejt përkufizimit të tij të lumturisë.

Kjo rrugë na tregon se sa më shumë gjëra të kemi, aq më shumë fuqi kanë ato mbi ne. Sa më shumë të varemi nga diçka, aq më shumë kjo “diçka” ndikon në aftësinë tonë për të qenë të lumtur, për të shijuar vërtetë jetën. Ne mendojmë se lumturia jonë varet nga ajo dhe përpiqemi të kemi gjithnjë e më shumë, duke u frikësuar se herët a vonë do të na mungojë. Dhe përfundojmë skllevër./Health – Bota.al