Një grua nga Brazili është dënuar me një vit burgim me kusht për dy vjet, pasi përndoqi vazhdimisht yllin e grupit BTS, Jungkook, pavarësisht paralajmërimeve të autoriteteve për të qëndruar larg shtëpisë së tij në Seul.

Sipas vendimit të Gjykatës së Qarkut në Seul, gruaja, identiteti i së cilës nuk është bërë publik, kishte filluar ta përndiqte këngëtarin në dhjetor të vitit të kaluar. Ajo kishte lënë letra dhe fotografi pranë banesës së tij, duke pretenduar se vepronte “nga dashuria” për artistin 28-vjeçar.

Gjykata bëri të ditur se gruaja kishte vizituar shtëpinë e Jungkook gjithsej 22 herë. Në një prej rasteve, ajo kishte rënë ziles së shtëpisë 133 herë, veprim që u cilësua nga gjykatësi si një nivel ekstrem obsesioni.

Ajo u arrestua më 13 dhjetor pasi kishte ndjekur një punonjës të shpërndarjes së ushqimit për të hyrë në pronë përmes një porte anësore. Edhe pse ishte liruar me paralajmërim që të mos i afrohej më banesës, ajo vazhdoi vizitat, duke detyruar policinë të lëshonte një urdhër emergjent që ia ndalonte afrimin brenda 100 metrave nga prona.

Përveç dënimit me kusht, gruaja pritet të dëbohet nga Koreja e Jugut, nëse nuk arrin të apelojë me sukses vendimin.

Ndërkohë, ky nuk është rasti i parë i tillë. Në qershor të vitit të kaluar, një grua kineze në të 30-at u arrestua në Seul teksa tentonte të hynte në shtëpinë e Jungkook vetëm disa orë pasi ai kishte përfunduar shërbimin ushtarak. /BBC/A.K/

Modelja e njohur ruse, Irina Shayk, ka ndarë me ndjekësit e saj në Instagram momente nga vizita në Universitetin e Oxfordit, ku ishte e ftuar si folëse në një aktivitet të organizuar nga Oxford Union.

Shayk e cilësoi ftesën si një nder të veçantë, duke theksuar rëndësinë e Oxford Union si një institucion që ka pritur ndër vite mendimtarë, udhëheqës dhe figura me ndikim në shoqëri.

“Falënderoj Oxford Union dhe Universitetin e Oxfordit për mundësinë që të ndaj rrugëtimin tim. Jam shumë mirënjohëse për pritjen e ngrohtë, bisedat e thelluara dhe momentet e paharrueshme”, ka shkruar ajo.

Modelja publikoi disa fotografi nga vizita e saj në Oxford, ku u shfaq me një kostum elegant të zi. Në njërën prej fotografive ajo pozonte me librin “Mysafirët e shquar të Oxford Union”.

Ligjërata e saj tërhoqi interesimin e studentëve të shumtë, të cilët morën pjesë në aktivitet dhe ndoqën me vëmendje rrëfimin e saj për karrierën dhe përvojat personale.

Postimi i Shayk mori mijëra reagime nga fansat, të cilët e uruan për këtë arritje dhe i shprehën mbështetjen e tyre./A.K/

Producenti i njohur amerikan i muzikës, Clive Davis, ka ndërruar jetë në moshën 94-vjeçare në Nju Jork, sipas raportimeve të mediave amerikane që citojnë familjen e tij.

Sipas raportimeve, Davis kishte qenë i shtruar në spital për shkak të problemeve me frymëmarrjen.

Gjatë karrierës së tij shumëvjeçare, ai luajti një rol të rëndësishëm në zbulimin dhe promovimin e disa prej emrave më të mëdhenj të industrisë muzikore, përfshirë Whitney Houston, Barry Manilow, Janis Joplin, Santana, Bruce Springsteen, Billy Joel, Pink Floyd, Patti Smith, Alicia Keys dhe Aerosmith.

Me rastin e 90-vjetorit të lindjes, Davis organizoi një festë të madhe në Nju Jork me pjesëmarrjen e shumë figurave të njohura të botës së artit dhe muzikës.

I lindur në vitin 1932 në Bruklin të Nju Jorkut, Davis fillimisht punoi si avokat, përpara se të hynte në industrinë muzikore përmes kompanisë “Columbia”, ku nisi rrugëtimin që do ta shndërronte në një nga producentët më me ndikim në historinë e muzikës moderne.

Fitues i shumë çmimeve Grammy dhe anëtar i Rock and Roll Hall of Fame që nga viti 2000, Clive Davis lë pas një trashëgimi të jashtëzakonshme në industrinë muzikore botërore.

Nga jeta private, ai kishte katër fëmijë nga dy martesa që përfunduan me divorc.

/A.K/

Këngëtari britanik Harry Styles ka tërhequr vëmendjen e fansave pasi është parë duke vrapuar drejt stadiumit Wembley pak para nisjes së një prej koncerteve të tij në Londër.

Sipas Daily Mail, artisti 32-vjeçar, i cili po mban një rezidencë rekord prej 12 netësh në Wembley në kuadër të turneut “Together Together”, është filmuar nga një fanse teksa vraponte nga zona e Hampstead drejt stadiumit.

Në videon që u bë virale në rrjetet sociale, Styles shihet i veshur me një bluzë gri me kapuç dhe pantallona të shkurtra ngjyrë vjollcë, ndërsa nxiton drejt arenës ku e prisnin mijëra fansa.

Pamjet kanë ngjallur reagime të shumta në internet, me shumë komentues që kanë bërë shaka duke pyetur nëse këngëtari ishte vonë për koncertin e tij.

Harry Styles njihet për pasionin e tij ndaj vrapimit dhe ka përfunduar më parë maratona në Tokio dhe Berlin. Në një intervistë për “Runner’s World”, ai kishte deklaruar se vrapimi e ndihmon të kalojë kohë me mendimet e tij dhe të largohet nga presioni i famës.

Aktualisht, artisti po promovon albumin e tij të katërt dhe po shënon një sukses të madh me koncertet në Wembley, të cilat konsiderohen rezidenca më e gjatë e mbajtur ndonjëherë nga një artist i vetëm në stadiumin londinez./A.K/