Lajmet

“Jasharaj, armik i nxënësve”

Kreu i SBAShK-ut Jasharaj tha se pa dialogun social me Qeverinë nuk do të mbyllet greva.

Published

3 years ago

on

Kryetari i Këshillit Grevist të SBAShK-ut, Rrahman Jasharaj, i shoqëruar nga Këshilli Qendror Grevist i BSPK-së kanë vizituar shkollën “Ismail Qemaili”, në Prishtinë.

Vizita është përcjellë me tensione pasi në mesin e mësimdhënësve, por edhe të prindërve që kërkuan ndërprerjen e grevës, duke thënë se paraja nuk është asgjë.

Kryetari i SBAShK-ut gjatë kësaj vizite ka thënë se presidentja Vjosa Osmani ka premtuar se do ta bëjë të pamundurën që ta bindë qeverinë të ulet të bisedojë për kërkesat e grevistëve, teksa shtoi se 50 eurot e ofruara nga Qeveria nuk janë kërkesë e sindikatës që ai drejton.

“Bëmë protestë, grevë njëorëshe, por Qeveria nuk deshi dhe tek e fundit doli sa për të treguar që unë bëj çfarë të dua e nuk e dëgjoj askënd. Doli me atë 50-euroshin, që është një shumë që nuk është adresuar si duhet dhe është një shumë që nuk na duhet. Ne për lëmoshë ose mëshirë, e lusim njëri-tjetrin. Ne grevën do ta vazhdojmë dhe greva do të përfundojë vetëm kur të realizohen kërkesat”, tha ai.

Ndërkohë që presidentja Osmani e kryeministri Kurti kanë bërë thirrje për t’i dhënë fund grevës duke paralajmëruar miratimin e ligjit të ri për paga në Kuvend, kreu i SBAShK-ut Jasharaj u shpreh skeptik se një gjë e tillë mund të ndodhë së shpejti për shkak të procedurave që nevojiten.

“Askush nga sindikatat nuk e ka parë kurrë ligjin, veç fjalët e tyre, e kemi kryer ligjin, koeficientet, njerëzit filluan të bëjnë me stilografë paga dhe defekti i këtij ligji është se nuk e kemi parë hiç. Të shkojë në parlament i duhet rreth katër muaj, pastaj e keqja është se atje po thotë se pas gjitha procedurave edhe kur del në gazetën zyrtare, duhet edhe tetë muaj të fillojë ligji, pra edhe nëse është ligji i mirë, hairin do t’ia shohim pas 16 muajve, e deri atëherë çmimet nuk po ndalen hatri ligjit”, tha ai.

Festime Sijarina, mësimdhënëse në shkollën “Ismail Qemaili”, ka thënë se asnjërës qeveri nuk i ka interesuar arsimi, derisa kërkoi nga Jasharaj ta mbyllë grevën dhe të vazhdojë procesi mësimor.

“Marrëveshja që po dëshirojmë është politika jashtë arsimit. Por, të lutem për hir të fëmijëve kryetar, lësho pe kësaj here, ulu dhe bëhu me burrë, se ata që të fyen, tregoju që ne jemi ata dhe deri në fund, vetëm ne jemi ata njerëz me vetëdije të lartë që kurrë në jetë as nuk kemi përfituar prej këtij shteti, vetëm ne jemi të pathyeshmit, le ta dinë secila qeveri”, tha ajo.

Refiqe Hamiti, mësimdhënëse po ashtu në këtë shkollë është kundër grevës. Ajo kërkoi nga Jasharaj që të ndalet greva dhe të vazhdojë mësimi.

“Ju lutem, merr guxim, bëhu më patriot se patriotët që po thirren dhe kthena në bankat shkollore, të dalim para nxënësve, kthena dinjitetin tonë se kemi humb për asgjë, sepse paraja nuk është mbi natyrorja dhe njerëzorja. Unë jam për rrogë, por unë jam që nxënësit të kthehen në shkollë. Si e verifikon që një pjesë e madhe po dëshiron, a ka ndonjë listë që ne duhet të nënshkruhemi, që duhet të përpilohet ajo listë, se a dëshirojmë të kthehemi në shkollë si mësues apo ta respektojmë sindikatën”, tha ajo

Mirëpo kreu i SBAShK-ut Jasharaj tha se pa dialogun social me Qeverinë nuk do të mbyllet greva.

Tensionet gjatë vizitës së sotme të kreut të SBAShK-ut në shkollën “Ismail Qemali”, nisën kur një prind i një nxënësi Musli Rexhepi është përplasur me Jasharajn, duke thënë se ai është fajtori kryesor për grevën në arsim.

Megjithatë, Rexhepi gjithë këtë u mundua ta arsyetojë se ardhja e tij në sallë ku po zhvillohej vizita e kreut të SBAShK-ut, ishte bërë me qëllim që të informohet nëse do të ketë mësim ose jo dhe jo për të tensionuar situatën.

“Mbesën time e kam regjistruar në klasë të parë këtë vit, erdha të pyes a po fillon mësimi apo jo. Hyra në sallë te mbledhja e sindikatës të arsimit, me mirëkuptim dhe jo me qëllime tjera. Armikun e këtyre nxënësve, se askënd tjetër nuk e ofendoj, vetëm atë personalisht, sepse ai ka marrë një kokëfortësi në veti dhe e ka ndarë arsimin në dy pjesë. Ky është armik. Nëse ka problem le të merret me qeverinë dhe jo me fëmijët tanë”, tha ai.

Related Topics:
Continue Reading

Lajmet

​Deputetët mblidhen sërish sot për seancën konstituive

Published

26 minutes ago

on

June 4, 2025

By

Deputetët e Kuvendit të Kosovës do të mblidhen sërish sot në përpjekjen e radhës për konstituimin e legjislaturës së nëntë. Ky është tentimi i njëzet e gjashtë me radhë që prej 15 prillit kur ka nisur seanca konstituive.

Vendi është zhytur në një ngërç politik pasi që Kuvendi nuk po bëhet, rrjedhimisht as qeveri të re nuk mund të ketë.

Tashmë për disa seanca me radhë deputetët po refuzojnë të formojnë një komision për mbikëqyrjen e votimit të fshehtë për kryetarin e Kuvendit. Votimi i fshehtë është propozuar nga kryesuesi I seancës, deputeti i Lëvizjes Vetëvendosje, Avni Dehari, por është refuzuar nga partitë e tjera parlamentare.

Ideja për votim të fshehtë ka ardhur pasi kandidatja e partisë së parë të dalë nga zgjedhjet e 9 shkurtit, Lëvizjes Vetëvendosje – në koalicion me Guxo dhe Alternativa, Albulena Haxhiu nuk po arrin t’i marrë 61 votat e nevojshme për kryeparlamentare.

Çështja e votimit të fshehtë tashmë është edhe në Gjykatën Kushtetuese pasi është dërguar nga Aleanca për Ardhmërinë e Kosovës, e mbështetur edhe nga partitë e tjera që deri më tash ishin në opozitë.

Lëvizja Vetëvendosje po insiston në kandidaturën e Haxhiut, ndërkaq, partitë e tjera kanë deklaruar se nuk e mbështesin atë për kryetare të Kuvendit.

Thirrje për zhbllokim të ngërçit politik janë bërë brenda dhe jashtë Kosovës.

Presidentja e vendit, Vjosa Osmani ka mbajtur një takim më 15 maj me përfaqësues të partive politike, por as aty nuk ka pasur pajtim rreth konstituimit të Kuvendit.

Vazhdimi i seancës konstituive sot, më 4 qershor, pritet të bëhet nga ora 11:00.

Kuvendi do të mund të konstituohet vetëm pasi të zgjedhet kryetari dhe pesë nënkryetarët.

Më pas, i hapet rruga formimit të qeverisë së re.

Sipas rezultateve të zgjedhjeve parlamentare të 9 shkurtit, asnjë parti nuk e ka fituar shumicën për të qeverisur e vetme./KP

Continue Reading

Lajmet

Ambasada e Kosovës në Austri ka një njoftim për bashkatdhetarët

Published

35 minutes ago

on

June 4, 2025

By

Ambasada e Republikës së Kosovës në Austri ka njoftuar bashkatdhetarët se nga tani e tutje të gjitha shërbimet konsullore do të ofrohen vetëm me termin të caktuar paraprakisht përmes platformës elektronike zyrtare E-Kosova.

Në njoftimin e ambasadës theksohet se shërbime si lëshimi i pasaportave, letërnjoftimeve, certifikatave dhe dokumenteve të tjera do të realizohen vetëm për qytetarët që kanë rezervuar paraprakisht një takim online.

Caktimi i terminit bëhet përmes këtij linku:

Udhëzimet për caktimin e terminit janë si më poshtë:

Hyni në platformën eKosova

Zgjidhni opsionin Shërbimet Konsullore

Klikoni: Terminet për misionet diplomatike dhe konsullore të Republikës së Kosovës

Zgjidhni: Ambasada – Austria, Vjenë

Zgjidhni shërbimin e nevojshëm dhe përfundoni aplikimin

Qytetarët që kanë caktuar termin, duhet të paraqiten në adresën e Ambasadës së Republikës së Kosovës në Austri.

 

 

 

Continue Reading

Aktualitet

Sot mblidhen sërish deputetët, në tentativën e 26-të për konstituimin e Kuvendit

Published

2 hours ago

on

June 4, 2025

By

Sot do të mblidhen sërish deputetët, në tentativën e 26-të për konstituim të Kuvendit të Kosovës.

Tash e katër muaj në vend janë mbajtur zgjedhjet parlamentare, ndërsa vendi vazhdon të jetë në ngërç politik.

Lëvizja Vetëvendosje nuk heq dorë nga kandidatja për kryetare të Kuvendit, Albulena Haxhiu, e cila nuk ka përkrahjen e Partisë Demokratike të Kosovës, Lidhjes Demokratike të Kosovës dhe Aleancës për Ardhmërinë e Kosovës.

Kryesuesi i Kuvendit, që është njëherësh edhe deputeti më i vjetër, Avni Dehari ka vënë në procedurë votimin për Komision zgjedhor që do të mundësonte votim të fshehtë në Kuvend për kryetarin, por edhe ky proces është bllokuar në mungesë të kuorumit.

Çështjen e votimit të fshehtë, AAK e ka dërguar në Kushtetuese.

 

Continue Reading

Aktualitet

KEK thirrje bizneseve që kanë dalë në treg të hapur

Published

19 hours ago

on

June 3, 2025

By

Korporata Energjetike e Kosovës ka lëshuar një njoftim duke thënë se inkurajojnë të gjithë konsumatorët që ende nuk kanë siguruar furnizues të energjisë elektrike të lidhin kontrata komerciale me KEK.

“Korporata Energjetike e Kosovës (KEK sh.a.) inkurajon të gjithë konsumatorët që ende nuk kanë siguruar furnizues të energjisë elektrike, që të lidhin kontrata komerciale të drejtpërdrejta me KEK, për të siguruar furnizim të qëndrueshëm.”

KEK thotë se deri tani ka lidhur 15 marrëveshje komerciale.

“Sipas vendimit të Zyrës së Rregullatorit për Energji (ZRRE), KEK është e licencuar për furnizim në treg të hapur dhe deri më tani ka lidhur me sukses 15 marrëveshje komerciale, duke përfshirë edhe ndërmarrje publike strategjike.”

KEK ka listuar disa arsye se pse duhet të zgjidhet KEK’u si furnizues.

“Pse të zgjidhni furnizimin komercial direkt nga KEK?

·         Furnizimi nga Furnizuesi i Mundësisë së Fundit është një zgjidhje e përkohshme, me periudhë 60-ditore dhe çmime më të larta nga tregu.

·         Sipas udhëzimeve të ZRRE-së, konsumatorët që nuk zgjedhin furnizues kalojnë automatikisht te FMF për 60 ditë, ku çmimet janë më të larta se në tregun e lirë. Pas afatit, kontratat me furnizues të rregullt është e detyrueshme.

·         Marrëveshjet komerciale me KEK ofrojnë çmime konkurruese, furnizim të qëndrueshëm dhe transparencë.

·         KEK siguron furnizim referuar në çmimet e tregut të publikuara në bursën zyrtare të energjisë ALPEX.”

“Veproni tani! Lidhja e kontratës komerciale është hapi më i sigurt për të shmangur pasigurinë dhe kostot e larta të furnizimit përmes FMF-së.”

Continue Reading

Të kërkuara