Partitë opozitare të Sllovakisë kanë shpallur se do të thërrasin një votë mosbesimi kundër qeverisë së kryeministrit Robert Fico. Opozita e akuzon Ficon për zvarritje të politikës së jashtme, sidomos lidhur me marrëdhëniet me Rusinë, ndërkohë që nuk ka arritur të përballojë sfidat e brendshme, përfshirë problemet e theksuara ekonomike dhe sociale.

Koalicioni i majtist-nacionalist i Ficos është përballur me ndarje të brendshme dhe ka humbur shumicën në parlament, duke kaluar nga 150 në vetëm 76 deputetë. Ndërkohë, opozita kërkon një shumicë për të sjellë një qeveri të re, e cila mund të përfshijë zgjedhje të parakohshme, megjithatë, një veprim i tillë kërkon mbështetje edhe nga disa grupe brenda qeverisë.

Qeveria po përballet me një situatë të vështirë ekonomike, përfshirë një deficit të lartë buxhetor dhe probleme të theksuara në sistemin shëndetësor. Po ashtu, ndalimi i dërgesave të gazit rus përmes Ukrainës ka shkaktuar humbje të mëdha financiare, që Fico i konsideron të dëmshme për ekonominë e Sllovakisë.

Fico ka kërcënuar se do të ndërpresë ndihmën humanitare për Ukrainën, duke e lidhur këtë me mosmarrëveshjet mbi tranzitin e gazit, pasi muajin e kaluar ai udhëtoi në Moskë për të diskutuar çështjet me presidentin rus Vladimir Putin, ndërsa nuk ka vizituar Kievin. Në të njëjtën kohë, ai ndërpreu mbështetje ushtarake për Ukrainën.

Kreu i opozitës, Michal Simecka, ka kritikuar ashpër Ficon, duke e akuzuar se po e lë pas dore Sllovakinë dhe po kërkon mbështetje nga liderë autoritarë në vend të përqendrimit te zgjidhja e problemeve të brendshme të vendit. Opozita thekson angazhimin e saj për një Sllovaki të lidhur ngushtë me Bashkimin Evropian dhe NATO-n./UBTNews/

Në një përpjekje për të nxitur turizmin dhe për të forcuar ekonominë e ngadaltë, Tajlanda ka miratuar një projektligj për legalizimin e kazinove. Ky hap i rëndësishëm u bë të hënën dhe është pjesë e një strategjie për të sjellë klube lojërash të fatit në vend.

Në Tajlandë, disa forma të lojërave të fatit, si bastet në boks dhe gara me kuaj, janë të ligjshme, por kazinotë kanë mbetur të paligjshme deri tani. Kryeministri Paetongtarn Shinawatra theksoi se ky projektligj do të ndihmojë në tërheqjen e investimeve dhe do të kontribuonte në zgjidhjen e çështjeve të lojërave të paligjshme të fatit.

Sipas planit të qeverisë, kazinotë do të jenë pjesë e “komplekseve argëtimi”, që mund të përfshijnë hotele, qendra tregtare, parqe dhe sallë konventash. Kazinotë do të kenë një tarifë hyrjeje për qytetarët tajlandezë prej 5,000 baht (rreth 140 €), ndërsa të huajve do t’u mundësohet hyrja falas. Po ashtu, personat nën 20 vjeç do të jenë të ndaluar të hyjnë në kazinotë.

Projektligji tani do të shqyrtohet nga Zyrat e Shtetit të Këshillit dhe më pas do të kalojë në Parlament për votim. Qeveria ka theksuar se ky është një hap për të rritur të ardhurat nga turizmi, një sektor kyç për ekonominë e Tajlandës./UBTNews/

Ministri i Jashtëm i Rusisë sinjalizoi se Moska është e gatshme të dëgjojë nga presidenti i zgjedhur amerikan, Donald Trump dhe këshilltarët propozimet për të zgjidhur luftën në Ukrainë, duke thënë se administrata e re amerikane “ka nisur të pranojë realitetet në terren”.

Këto deklarata Sergei Lavrov i bëri gjatë një konference vjetore për mediat më 14 janar. Edhe më herët, zyrtarë të lartë rusë kanë bërë deklarata lidhur me propozimet potenciale për armëpushim në konfliktin, që muajin e ardhshëm shënon përvjetorin e tretë.

Trump ka thënë se dëshiron të takohet direkt me presidentin rus, Vladimir Putin, për të tentuar që ta zgjidhë luftën, e cila ka lënë të vrarë më shumë se 1 milion trupa në dy anët.

Rusia, trupat e së cilës aktualisht kanë nën kontroll rreth 20 për qind të territorit ukrainas, e ka justifikuar pushtimin e saj të plotë të Ukrainës, që nisi në shkurt të vitit 2022, duke përdorur një sërë arsyetimesh të ndryshme, përfshirë parandalimin që Kievi të anëtarësohet në aleancën ushtarake perëndimore të NATO-s.

“Ne do të presim për iniciativa specifike. Presidenti Putin ka thënë në shumë raste se është i gatshëm të takohet, por ende nuk janë bërë propozime”, tha Lavrov gjatë konferencës për media që zgjati tri orë.

“Presidenti Trump po ashtu tha se Putini dëshiron të takohet dhe ai beson se duhet të takohen, por fillimisht Trump duhet të marrë detyrën”.

Në ditët e fundit si president i SHBA-së, Joe Biden, ka nxituar të dërgojë miliarda dollarë armatime dhe pajisje të tjera në Ukrainë, duke synuar që të forcojë arsenalet e Kievit në rast se administrata e re e Trumpit do të zvogëlojë dërgesat e armëve.

Në Kiev, zyrtarët ukrainas kanë sinjalizuar po ashtu se janë të hapur që të dëgjojnë propozimet për paqe të Trumpit.

Gjatë jë interviste për Newsmax më 13 janar, Trump tha se Putin është gati të takohet sapo ai të inaugurohet si president më 20 janar.

“E di se ai dëshiron të takohet dhe unë do të takohem me të shumë shpejt”, tha Trump.

Zëdhënësi i Kremlinit, Dmitry Peskov, u ka thënë gazetarëve pas deklaratave të Lavrovit se ende nuk ka pajtim për detajet lidhur me një takim mes Trumpit dhe Putinit.

Këshilltari i ri i Trumpit për siguri kombëtare, Mike Walz, po ashtu ka përmendur një shtytje të re diplomatike për të zgjidhur çështjen e konfliktit. Por, ai po ashtu ka sinjalizuar se kërkesat ukrainase që Rusia të tërhiqet nga të gjitha territoret e pushtuara ka pak gjasa të përmbushet.

“Thjesht, nuk mendoj se është realiste të thuhet se ne dëbojmë çdo rusë nga çdo milimetër i territorit ukrainas, madje edhe nga Krimeja”, tha ai për ABC News më 12 janar.

“Presidenti Trump e ka pranuar këtë realitet dhe mendoj se ka qenë një hap i madh përpara që e gjithë bota po e pranon këtë realitet. Tani, le të ecim përpara”./REL/

Komisioneri i Lartë i Kombeve të Bashkuara për të Drejtat e Njeriut, Volker Turk, mbërriti në kryeqytetin e Sirisë, Damask, të martën për vizitën e parë ndonjëherë të shefit të OKB-së për të drejtat e njeriut në vend.

Turk, një avokat austriak, do të vizitojë Sirinë dhe Libanin nga 14-16 janar dhe do të takohet me zyrtarë, grupe të shoqërisë civile, diplomatë dhe organe të OKB-së, thuhet në deklaratën e OKB-së, pa dhënë detaje të mëtejshme.

Presidenti sirian Bashar al-Assad u largua nga pushteti muajin e kaluar pas një ofensivë të lehtë të armatosur nga opozita, duke i dhënë fund 50 viteve të sundimit të familjes së tij dhe duke rritur shpresat për përgjegjësi për krimet e kryera gjatë luftës civile, më shumë se 13-vjeçare të Sirisë. Nën Al-Asad, shumë zyrtarëve të OKB-së dhe grupeve të të drejtave iu mohua qasja në vend për të hetuar shkeljet e supozuara.

Një zëdhënës i zyrës së Turk nuk dha menjëherë detaje të mëtejshme, se sa herë ai ose paraardhësit e tij ishin përpjekur të hynin në vend. Roli i Komisionerit të Lartë për të Drejtat e Njeriut u krijua në vitin 1993. /Al Arabiya/