Lajmet nga UBT

Italian Design Day në UBT: Dizajni si mjet për të luftuar pabarazitë dhe për të ndërtuar një të ardhme më të mirë

Published

on

Në kuadër të Italian Design Day, në UBT u organizua një konferencë e veçantë e dedikuar për studentët të Arkitekturës dhe Dizajnit, si dhe profesionistëve të fushës, ku u trajtua tema “Pabarazitë. Dizajni për një jetë më të mirë”. Kjo ngjarje shënoi një moment të rëndësishëm për të reflektuar mbi rolin e dizajnit si një instrument për të adresuar pabarazitë dhe për të krijuar një mjedis më gjithëpërfshirës dhe të drejtë për të gjithë.

Konferenca u mbajt në Parkun Shkencor, Inovativ dhe Teknologjik të UBT-së në Lipjan, duke bashkuar studentë, akademikë dhe profesionistë të arkitekturës dhe dizajnit me ekspertë të njohur ndërkombëtarë. Ligjëruesi kryesor i ngjarjes ishte arkitekti dhe dizajneri Alessandro Mason, themelues i Studio GISTO, i cili ndau me të pranishmit përvojat dhe qasjet e tyre inovative në dizajn.

Duke u bazuar në hulumtimet dhe praktikat profesionale, ai trajtoi mënyrat se si dizajni mund të shërbejë për të zbutur pabarazitë shoqërore dhe për të ndërtuar hapësira që promovojnë gjithëpërfshirjen, mirëqenien dhe një cilësi më të mirë të jetës për të gjithë. Diskutimet u fokusuan gjithashtu në ndikimin e dizajnit në planifikimin urban, arkitekturën sociale dhe krijimin e qyteteve të qëndrueshme, duke nxitur të pranishmit të mendojnë për një të ardhme ku estetika dhe funksionaliteti ecin krah për krah me barazinë dhe drejtësinë sociale.

Në këtë ngjarje morën pjesë edhe Rektori i UBT-së, Prof. Dr. Edmond Hajrizi, Ambasadori i Italisë në Kosovë, Antonello De Riu, dhe Ark. Gëzim Kastrati nga Komuna e Prishtinës, të cilët theksuan rëndësinë e kësaj teme dhe rolin e arkitekturës e dizajnit në krijimin e një bote më të barabartë.

Rektori i UBT-së, Prof. Dr. Edmond Hajrizi, e cilësoi këtë ngjarje si një mundësi të jashtëzakonshme për studentët që të mësojnë nga ekspertët dhe të frymëzohen për të sjellë ndryshime konkrete në arkitekturë dhe dizajn për një shoqëri më të barabartë.

“Dizajni nuk është thjesht një art apo profesion, por një përgjegjësi ndaj shoqërisë. Ai ka fuqinë të shërojë pabarazitë, të ndërtojë ura bashkëpunimi dhe të krijojë hapësira që pasqyrojnë vlerat e drejtësisë dhe gjithëpërfshirjes. Studentët tanë sot nuk po mësojnë vetëm si të krijojnë forma, por si të formësojnë një të ardhme më të mirë për të gjithë. Pikërisht për këtë arsye, në UBT kemi krijuar dhe zhvilluar departamente të specializuara në fusha si Arkitektura, Dizajni, Inxhinieria dhe Teknologjia, të cilat po tërheqin gjithnjë e më shumë të rinj që dëshirojnë të ndërtojnë të ardhmen me kreativitet dhe inovacion”, tha Rektori Hajrizi.

Ambasadori italian në Kosovë, Antonello De Riu në fjalën e tij inspiruese, citoi arkitektin e njohur Renzo Piano, duke thënë:

“Bukuria është po aq jetike sa buka, dhe si buka, duhet të jetë e qasshme për të gjithë”.

Ai shtoi se dizajni nuk është thjesht një art apo profesion, por një mjet për ndryshim shoqëror, i aftë të ripërcaktojë mënyrën se si njerëzit jetojnë, bashkëveprojnë dhe përjetojnë hapësirat rreth tyre.

“Dizajni nuk është një privilegj, por një e drejtë – e drejta për një jetë të dinjitetshme, për një shoqëri të drejtë dhe për një planet të qëndrueshëm. E ardhmja është në duart tuaja, në skicat dhe projektet që do të krijoni. Ndërtoni qytete që bashkojnë, shtëpi që mbrojnë dhe hapësira që fuqizojnë. Kur dizajni është i rrënjosur në humanizëm, ai nuk është thjesht një mjet për ta zbukuruar jetën, por për ta transformuar atë në thelb”, u shpreh Ambasadori De Riu.

Ark. Gëzim Kastrati, përfaqësues i Komunës së Prishtinës, foli për rëndësinë e urbanizmit të qëndrueshëm dhe nevojën për dizajn që i përgjigjet kërkesave të të gjithë qytetarëve, pa përjashtime. Ai vlerësoi rolin e UBT-së si një qendër e rëndësishme e inovacionit dhe edukimit në fushën e arkitekturës dhe dizajnit.

Ngjarja përfundoi me një sesion diskutimi interaktiv, ku studentët patën mundësinë të ndajnë idetë dhe pikëpamjet e tyre mbi temën e pabarazive në dizajn. Ata u inkurajuan të shohin arkitekturën jo vetëm si një profesion, por si një mjet për të ndërtuar një të ardhme më të drejtë dhe të qëndrueshme.

Italian Design Day në UBT ishte një dëshmi e fuqisë së dizajnit për të ndikuar pozitivisht në shoqëri dhe për të krijuar hapësira që pasqyrojnë vlera të barazisë, gjithëpërfshirjes dhe drejtësisë sociale. Kjo ngjarje forcoi edhe më shumë bashkëpunimin akademik dhe profesional mes Kosovës dhe Italisë, duke hapur rrugën për ide të reja dhe projekte që synojnë të ndërtojnë një botë më të mirë për të gjithë.

 

lajme

UBT pjesë e punëtorisë ndërkombëtare në Rodos në kuadër të projektit CORE ED Academy

Published

on

By

UBT është përfaqësuar në punëtorinë dyditore të mbajtur në Rodos të Greqisë, në kuadër të projektit “CORE ED Academy”, me temë “Adaptimi i profileve profesionale për drejtësinë për të miturit – Punëtori Kombëtare për diskutimin dhe validimin e profileve profesionale të përditësuara sipas qasjes ‘Pedagogy-First’”.

Aktiviteti është zhvilluar në hapësirat e University of the Aegean, ku partnerët e projektit janë mbledhur për të bashkëpunuar dhe diskutuar rreth zhvillimit dhe avancimit të fushës së drejtësisë për të mitur.

Gjatë punëtorisë, fokusi kryesor ishte te rishikimi dhe validimi i profileve profesionale të përditësuara, duke vendosur qasjen pedagogjike në plan të parë për përgatitjen dhe trajnimin e profesionistëve që punojnë me të miturit.

Nga stafi i UBT-së, në këtë punëtori e pranishme ishte Dekania e Fakultetit të Psikologjisë, Prof. Dr. Denis Çelçima dhe Prof. Dr Bleta Brovina.

Continue Reading

Lajmet nga UBT

Rektori i UBT-së, Prof. Dr. Edmond Hajrizi, mori pjesë si folës në Samitin Botëror të Klimës COP31 në Antalya

Published

on

By

UBT, një nga institucionet kryesore të arsimit të lartë në Kosovë, u përfaqësua në nivel ndërkombëtar në Konferencën e Kombeve të Bashkuara për Ndryshimet Klimatike (COP31), të organizuar në Antalya të Turqisë. Rektori i UBT-së, Prof. Dr. Edmond Hajrizi, mori pjesë si folës në një panel ndërkombëtar të nivelit të lartë, ku u diskutua roli i universiteteve në përballjen me sfidat globale të ndryshimeve klimatike.

Më 18 nëntor 2026, në kuadër të COP31, në Zonën Blu (Blue Zone) në Antalya, u organizua paneli ndërkombëtar me temën: “From Universities to a Global Climate Alliance: Shared Vision and Action for Green Transition” (Nga universitetet drejt një aleance globale për klimën: Vizioni dhe veprimi i përbashkët për transformimin e gjelbër).

Paneli u zhvillua nën moderimin e Rektorit të Universitetit Çanakkale Onsekiz Mart dhe Kryetarit të Këshillit Ndëruniversitar të Turqisë, Prof. Dr. Ramazan Cüneyt Erenoğlu, me pjesëmarrjen e përfaqësuesit të Agjencisë Turke për Bashkëpunim dhe Koordinim (TİKA) dhe rektorëve të universiteteve nga vende të ndryshme.

Vizioni i UBT-së për kampuset inteligjente dhe qytetet rezistente ndaj ndryshimeve klimatike u prezantua në COP31

Në kuadër të panelit, Rektori i UBT-së, Prof. Dr. Edmond Hajrizi, realizoi prezantimin me temën: “From Smart Campuses to Climate-Resilient Cities: The 5S Approach to University Living Labs” (Nga kampuset inteligjente drejt qyteteve rezistente ndaj ndryshimeve klimatike: Qasja 5S për laboratorët e gjallë universitarë).

Prezantimi trajtoi vizionin e UBT-së për zhvillimin e kampuseve inteligjente dhe transformimin e tyre në modele të qëndrueshme, të cilat mund të kontribuojnë në krijimin e qyteteve më rezistente ndaj ndryshimeve klimatike.

Në kuadër të konceptit: “UBT Smart City: Integrating Education, Research, Emerging Technologies and Climate Action” (UBT Smart City: Integrimi i arsimit, kërkimit shkencor, teknologjive të reja dhe veprimit klimatik), u theksua rëndësia e ndërthurjes së arsimit, kërkimit shkencor, inovacionit teknologjik dhe veprimeve konkrete klimatike në një model të integruar të zhvillimit të qëndrueshëm.

Qasja UBT Smart City mbështetet në konceptin se kampuset universitare nuk duhet të shërbejnë vetëm si qendra të arsimit dhe kërkimit shkencor, por edhe si laboratorë të gjallë (Living Labs), ku teknologjitë e qëndrueshme mund të zhvillohen, testohen dhe të shndërrohen në zgjidhje praktike për shoqërinë.

Bashkëpunimi me TİKA-n dhe Universitetin Çanakkale Onsekiz Mart në fushën e transformimit të gjelbër

Përfaqësimi i UBT-së në COP31 ka një rëndësi të veçantë edhe në kontekstin e vazhdimësisë së bashkëpunimeve akademike ndërkombëtare të universitetit.

Në vitin 2024, UBT dhe Universiteti Çanakkale Onsekiz Mart nënshkruan një marrëveshje bashkëpunimi akademik, e cila krijoi bazën për zhvillimin e iniciativave të përbashkëta në fushën e arsimit, shkencës dhe qëndrueshmërisë.

Në vazhdim të këtij bashkëpunimi, me mbështetjen e Agjencisë Turke për Bashkëpunim dhe Koordinim (TİKA), në UBT u realizua Projekti i Transformimit të Gjelbër.

Projekti u zhvillua në bashkëpunim me Koordinimin e Transformimit të Gjelbër të Universitetit Çanakkale Onsekiz Mart, me pjesëmarrjen e rreth 30 studentëve të UBT-së.

Në kuadër të projektit, synimi kryesor ishte zhvillimi i njohurive dhe aftësive të të rinjve në fushën e transformimit të gjelbër, zhvillimit të qëndrueshëm dhe përgjegjësisë mjedisore.

Ky bashkëpunim përfaqëson një shembull konkret të mënyrës se si njohuritë shkencore dhe partneritetet ndërkombëtare mund të shndërrohen në aktivitete edukative dhe programe për ngritjen e kapaciteteve njerëzore.

UBT vazhdon të zhvillojë aktivitete në fushën e qëndrueshmërisë, jo vetëm përmes konceptit të kampuseve inteligjente, por edhe përmes kërkimeve shkencore dhe zhvillimit të teknologjive inovative mjedisore.

Pjesëmarrja e universitetit në renditjen ndërkombëtare UI GreenMetric World University Rankings pasqyron angazhimin institucional për vlerësimin dhe përmirësimin e performancës në fushën e qëndrueshmërisë mjedisore dhe menaxhimit të kampuseve universitare.

 

Gjithashtu, UBT ka zhvilluar projekte kërkimore në fushën e teknologjive mjedisore, përfshirë projektin që synon prodhimin e karbonit aktiv nga mbetjet bujqësore dhe përdorimin e tij për largimin e ndotësve nga ujërat e ndotura.

Kjo iniciativë shkencore përfaqëson një shembull të rëndësishëm të orientimit të universitetit drejt ekonomisë qarkore, shfrytëzimit të qëndrueshëm të burimeve natyrore dhe zhvillimit të teknologjive miqësore me mjedisin.

Një hap i rëndësishëm drejt forcimit të bashkëpunimit akademik ndërkombëtar

Gjatë panelit ndërkombëtar në kuadër të COP31 u diskutuan përgjegjësitë që universitetet mund të marrin në përballjen me ndryshimet klimatike, transferimin e teknologjive të gjelbra, diplomacinë shkencore dhe zhvillimin e projekteve të përbashkëta ndërkombëtare.

Pjesëmarrja e Rektorit të UBT-së, Prof. Dr. Edmond Hajrizi, si folës në këtë panel ndërkombëtar përfaqëson një mundësi të rëndësishme për promovimin e vizionit të universitetit në fushën e qëndrueshmërisë, teknologjive inovative dhe bashkëpunimit shkencor në një platformë globale.

Përmes këtij përfaqësimi, UBT dëshmon përkushtimin e tij për të kontribuar në diskutimet ndërkombëtare mbi sfidat klimatike dhe për të forcuar lidhjet ndërmjet arsimit të lartë, kërkimit shkencor, inovacionit dhe zhvillimit të qëndrueshëm.

UBT mbetet i përkushtuar ndaj integrimit të arsimit, shkencës, teknologjisë dhe bashkëpunimit ndërkombëtar, me synimin për të kontribuar në ndërtimin e një të ardhmeje më të gjelbër, më të qëndrueshme dhe më rezistente ndaj ndryshimeve klimatike.

 

Continue Reading

lajme

UBT bëhet Qendër e Autorizuar e Testimit Pearson VUE, duke ofruar qasje në certifikime ndërkombëtare nga Microsoft, AWS, Google, Cisco, PMI dhe kompani të tjera globale

Published

on

By

UBT ka shënuar një tjetër arritje të rëndësishme në zgjerimin e shërbimeve profesionale dhe ndërkombëtarizimin e arsimit, duke u bërë zyrtarisht Qendër e Autorizuar e Testimit Pearson VUE (Pearson VUE Authorized Test Center).

Përmes këtij autorizimi, UBT bëhet pjesë e rrjetit ndërkombëtar të qendrave të testimit Pearson VUE, një nga ofruesit kryesorë globalë të shërbimeve të testimit dhe certifikimit profesional.

Ky zhvillim u mundëson studentëve, profesionistëve, institucioneve dhe kompanive në Kosovë qasje në provime për certifikime profesionale ndërkombëtare, duke reduktuar nevojën për të udhëtuar jashtë vendit për certifikime të caktuara.

Mbi 90 organizata dhe programe ndërkombëtare të certifikimit

UBT ka marrë autorizimin për administrimin e provimeve për më shumë se 90 organizata dhe programe ndërkombëtare, përfshirë disa nga emrat më të njohur në industrinë globale të teknologjisë, menaxhimit dhe zhvillimit profesional.

Ndër organizatat dhe programet për të cilat UBT është autorizuar të ofrojë shërbime testimi përfshihen:

  • Microsoft – certifikime në teknologjitë dhe platformat Microsoft.
  • Amazon Web Services (AWS) – certifikime në teknologjitë cloud.
  • Google Cloud – certifikime në infrastrukturën dhe shërbimet cloud.
  • Cisco – certifikime në rrjete kompjuterike dhe teknologji informacioni.
  • Project Management Institute (PMI) – certifikime ndërkombëtare në menaxhimin e projekteve.
  • CompTIA – certifikime profesionale në teknologji informative dhe siguri kibernetike.
  • Oracle dhe IBM – certifikime në teknologji dhe sisteme ndërmarrjesh.
  • Fortinet, EC-Council dhe GIAC – certifikime në siguri kibernetike.
  • Salesforce, ServiceNow dhe Snowflake – certifikime në platforma dhe teknologji të avancuara.
  • Autodesk – certifikime në projektim dhe teknologji inxhinierike.
  • Linux Professional Institute (LPI) – certifikime në sistemet Linux.

Autorizimi përfshin gjithashtu organizata dhe programe të tjera nga fushat e financave, menaxhimit të rrezikut, shëndetësisë, privatësisë së të dhënave dhe administrimit profesional.

Mundësi të reja për studentët dhe profesionistët në Kosovë

Hapja e kësaj qendre përfaqëson një hap të rëndësishëm në krijimin e mundësive për zhvillim profesional dhe avancim në karrierë.

Certifikimet profesionale ndërkombëtare janë gjithnjë e më të rëndësishme në tregun global të punës, veçanërisht në sektorët e teknologjisë informative, sigurisë kibernetike, menaxhimit të projekteve, inxhinierisë dhe biznesit.

Përmes Qendrës së Autorizuar të Testimit Pearson VUE, UBT synon të mbështesë zhvillimin e kompetencave profesionale dhe të kontribuojë në rritjen e konkurrueshmërisë së fuqisë punëtore në Kosovë dhe më gjerë.

UBT vazhdon zgjerimin e shërbimeve profesionale dhe certifikuese

Ky autorizim është pjesë e strategjisë së UBT-së për të ndërlidhur arsimin akademik me kërkesat e industrisë dhe standardet ndërkombëtare të kompetencave profesionale.

Duke integruar programet akademike, trajnimet profesionale dhe certifikimet ndërkombëtare, UBT vazhdon të fuqizojë rolin e tij si institucion i arsimit të lartë dhe qendër për zhvillim profesional, inovacion dhe teknologji.

Përmes bashkëpunimit me Pearson VUE, UBT zgjeron mundësitë që studentët dhe profesionistët në Kosovë të dëshmojnë njohuritë dhe kompetencat e tyre përmes certifikimeve të njohura ndërkombëtarisht.

Informata dhe regjistrimi

Kandidatët e interesuar për provime certifikuese mund të informohen për programet, kushtet dhe procedurat e regjistrimit përmes platformës zyrtare të Pearson VUE:

https://home.pearsonvue.com/Test-takers.aspx

Disponueshmëria e provimeve varet nga programi përkatës i certifikimit dhe terminet e ofruara nga qendra.

Continue Reading

Lajmet

Studimi i profesorëve të UBT-së publikohet në revistën ndërkombëtare “Pharmacoepidemiology”

Published

on

By

Punimi shkencor i profesorëve të Shkencave Mjekësore në UBT, Prof. Dr. Fitim Alidema dhe Prof. Dr. Zejdush Tahiri, në bashkëautorësi me Mr. Ph. Flakron Alidema, është publikuar në revistën prestigjioze ndërkombëtare Pharmacoepidemiology.

Ky studim vëzhgues retrospektiv ka analizuar të dhënat e 4.668 pacientëve të trajtuar me aspirinë 100 mg në kujdesin parësor shëndetësor. Gjetjet kryesore të hulumtimit tregojnë se përdorimi potencialisht i papërshtatshëm i aspirinës është dukshëm më i lartë në parandalimin parësor kardiovaskular (52,3%) krahasuar me atë dytësor (1,8%).

Kontributi i veçantë i këtij punimi të profesorëve të UBT-së qëndron në vlerësimin e përbashkët të indikacionit mjekësor, profilit të rrezikut për gjakderdhje dhe barnave shoqëruese, në raport me ndërprerjen e dokumentuar të terapisë. Sipas analizës, historia e gjakderdhjes gastrointestinale rezultoi të jetë faktori kryesor i lidhur me ndërprerjen e trajtimit me aspirinë, duke nxjerrë në pah nevojën për rivlerësim individual të raportit përfitim–rrezik te secili pacient.

Revista Pharmacoepidemiology, e botuar nga MDPI, renditet në kuartilin Q2 sipas SCImago 2025 në kategorinë e farmakologjisë dhe toksikologjisë, indeksohet në platformat e njohura Scopus dhe Web of Science (ESCI), dhe ka faktor ndikimi 1,6 sipas Clarivate.

Continue Reading

Të kërkuara