Koncerti kushtuar repertorit të pavdekshëm të ikonës së muzikës shqiptare, Nexhmije Pagarusha, rikthehet edhe këtë vit në kuadër të Rame Lahaj International Opera Festival, duke vazhduar traditën e nderimit të trashëgimisë së saj artistike.

Në skenën e kësaj mbrëmjeje do të ngjiten Alma Bektashi, Liridon Sadriu, Malvina Likaj dhe Samir Shehu, të cilët do të interpretojnë disa prej këngëve më të njohura shqiptare. Këtë edicion, repertori vjen me aranzhime të reja nga Shpëtim Saraçi, i shoqëruar nga Pagarusha Band.

Koncerti do të mbahet në hapësirën e jashtme të Bibliotekës Kombëtare të Kosovës në Prishtinë, me fillim nga ora 20:30, duke premtuar një mbrëmje të mbushur me emocione dhe homazh për “Bilbilin e Kosovës”./A.K/

Bashkimi Evropian dënoi deklaratën e ministres serbe për Administratë Publike dhe Vetëqeverisje Lokale, Snezhana Paunoviq, e cila tha se, po të ishte në vend të ish-presidentit serb, Sllobodan Millosheviq, në vitin 1998, do ta kishte “spastruar etnikisht Kosovën”.

Zëdhënësja e Komisionit Evropian, Anitta Hipper, tha se BE-ja nuk komenton deklarata individuale, por theksoi se në Evropë nuk ka vend për retorikë që arsyeton ose promovon spastrimin etnik.

“Deklarata të tilla bien ndesh me vlerat e dinjitetit njerëzor, pajtimit, llogaridhënies dhe marrëdhënieve të mira fqinjësore, mbi të cilat është ndërtuar Bashkimi Evropian”, tha Hipper duke iu adresuar gazetarëve në Bruksel.

Sipas saj, ato bien ndesh edhe me zotimet që ka marrë Serbia në kuadër të dialogut për normalizimin e marrëdhënieve me Kosovën, të ndërmjetësuar nga BE-ja.

“Ne presim që të gjithë liderët të veprojnë me përgjegjësi, të përmbahen nga retorika nxitëse dhe të kontribuojnë në krijimin e një klime besimi dhe stabiliteti rajonal”, shtoi Hipper.

Paunoviq deklaroi të shtunën për televizionin serb Kurir se, po të ishte në vend të Millosheviqit në vitin 1998, “do ta kishte spastruar etnikisht Kosovën”.

Millosheviq ishte ish-president i Republikës Federale të Jugosllavisë dhe i akuzuar nga Tribunali i Hagës për krime lufte.

“Kjo është deklarata më e ashpër që kam bërë ndonjëherë në jetën time”, tha Paunoviq.

Ajo tha se “nuk do t’i kishte likuiduar shqiptarët ashtu siç ata po përpiqen ta pastrojnë etnikisht Kosovën, por në atë mënyrë që secili që ndihet më pak qytetar i Republikës Federale të Jugosllavisë, të largohej dhe të shkonte në shtetin e vet amë”.

Në një reagim të publikuar më 14 korrik, Paunoviq tha se nuk heq dorë nga politika e Partisë Socialiste të Serbisë – pjesë e së cilës është që nga viti 1992.

“Ne jemi partia që e udhëhoqi Serbinë në rrethana jashtëzakonisht të vështira historike, partia që bëri sakrifica të mëdha – emri i së cilës është përmendur më së shumti në Hagë”, shkroi ajo në rrjetet sociale.

Paunoviq është nënkryetare e Partisë Socialiste të Serbisë që nga viti 2024.

Gjatë luftës në Kosovë, në vitet 1998-1999, u vranë mbi 13.000 civilë, ndërsa mijëra të tjerë u zhdukën.

Mbi 1.500 persona, shumica shqiptarë, vazhdojnë të figurojnë të zhdukur.

Mijëra trupa u gjetën ndër vite në varreza masive në Serbi.

Tribunali Penal Ndërkombëtar për ish-Jugosllavinë në Hagë i cilësoi drejtuesit e atëhershëm të RFJ-së si pjesëmarrës kyç në një “ndërmarrje të përbashkët kriminale”, që synonte dëbimin me forcë të qindra mijëra civilëve shqiptarë nga Kosova, nga marsi deri në qershor të vitit 1999.

Sipas aktgjykimeve, qëllimi ishte “ndryshimi i balancës etnike për të ruajtur kontrollin serb mbi Kosovën”.

Ish-gjenerali i Ushtrisë jugosllave, Nebojsha Pavkoviq, si komandant i Armatës së Tretë, u dënua nga Tribunali i Hagës me 22 vjet burg për dëbime, zhvendosje me forcë, vrasje dhe përndjekje të civilëve shqiptarë në Kosovë, gjatë gjysmës së parë të vitit 1999.

Së bashku me të u dënuan edhe ish-shefi i Shtabit të Përgjithshëm të Ushtrisë jugosllave, Dragolub Ojdaniq, ish-komandanti i Korpusit të Prishtinës, Vlladimir Llazareviq, gjenerali i policisë Sreten Llukiq dhe ish-zëvendëskryeministri i RFJ-së, Nikolla Shainoviq.

I akuzuari kryesor, Sllobodan Millosheviq, vdiq në paraburgim para përfundimit të gjykimit, ndërsa ish-presidenti i Serbisë, Millan Milutinoviq, u shpall i pafajshëm. /REL/

Kryesuesi i Këshillit Prokurorial të Kosovës (KPK), Arian Gashi, ka marrë pjesë në punëtorinë e organizuar nga Akademia e Drejtësisë, e cila kishte për qëllim identifikimin e nevojave trajnuese dhe avancimin e kapaciteteve profesionale të prokurorëve dhe gjyqtarëve.

Gjatë fjalës së tij, Kryesuesi Gashi theksoi se zhvillimi profesional i vazhdueshëm është një proces thelbësor për t’u përballur me sfidat e reja në sistemin e drejtësisë, veçanërisht në luftimin e kriminalitetit, përdorimin e provave digjitale dhe përshtatjen me zhvillimet e fundit teknologjike.

Në mbyllje të adresimit të tij, ai ritheksoi se ngritja e kapaciteteve profesionale, forcimi i integritetit dhe respektimi i etikës mbeten ndër prioritetet kryesore strategjike të Këshillit Prokurorial të Kosovës për të ardhmen. /E.A/

Fakulteti i Medias dhe Komunikimit në UBT ka prezantuar zyrtarisht platformën e re “BE THE ONE”, një iniciativë e krijuar për të mbështetur dhe shfaqur rrugëtimin profesional të studentëve që nga dita e parë e studimeve, përmes praktikës e deri te depërtimi i tyre i suksesshëm në tregun e punës.

Kjo platformë shërben si urë lidhëse mes përgatitjes akademike dhe industrisë mediale, duke u fokusuar në katër shtylla kryesore që dominojnë sot tregun e informacionit dhe të komunikimit: investigimin, marketingun, sportin dhe showbiz-in.

Në pjesën e investigimit, platforma u jep hapësirë studentëve që të zhvillojnë hulumtime të thella, të verifikojnë fakte dhe të merren me gazetari investigative, duke sjellë raporte të bazuara në prova për tema me interes publik. Në fushën e marketingut, ata aftësohen në ndërtimin e fushatave, strategjive të komunikimit digjital dhe menaxhimit të imazhit për brende dhe organizata të ndryshme.

Gazetaria sportive u mundëson studentëve të mbulojnë ngjarje live, të bëjnë analiza të ndeshjeve dhe të realizojnë intervista me protagonistë të fushës, ndërsa shtylla e showbiz-it mbulon industrinë e argëtimit, artit dhe kulturës, duke i lejuar ata të prekin nga afër dinamikën e jetës publike dhe prodhimin e materialeve kreative.

“BE THE ONE” synon t’u ofrojë studentëve përvojë praktike të drejtpërdrejtë në këto katër drejtime, duke i bërë ata plotësisht të punësueshëm dhe të gatshëm për të udhëhequr në tregun e medias.

Ky projekt mbështetet fuqishëm në programin e studimeve “Media dhe Komunikim” në UBT, i cili është i dizajnuar për të ndërthurur teoritë moderne të komunikimit me punën praktike në laboratorët e universitetit. Programi i aftëson studentët të zhvillohen si profesionistë të pavarur dhe të punojnë në projekte të përbashkëta ekipore.

Me përfundimin e studimeve në këtë fakultet dhe përmes angazhimit në platformën “BE THE ONE”, studentët fitojnë shkathtësi të avancuara për të punuar në mjedise multikulturore, të zotërojnë gjuhë të huaja në nivel profesional, të krijojnë strategji marketingu e komunikimi digjital, si dhe të zhvillojnë aftësi në dizajnimin dhe redaktimin e përmbajtjeve mediale. Nis rrugëtimin tënd drejt suksesit në industrinë e medias dhe apliko tani në UBT për t’u bërë pjesë e platformës që të bën të dallohesh.