Organizatorët e Sunny Hill Festival kanë njoftuar se një nga yjet më të mëdhenj të muzikës pop në botë, Katy Perry, do të jetë krye-artiste në edicionin e këtij viti.

Lajmi është bërë i ditur nga organizatorët përmes një njoftimi entuziast, ku thuhet se Perry do të performojë në Prishtinë këtë verë, duke e cilësuar atë si një nga emrat më të mëdhenj që ka marrë pjesë ndonjëherë në festival.

Sipas njoftimit, artistja Dua Lipa ka qenë e para që ka marrë lajmin për konfirmimin e pjesëmarrjes së Katy Perryt, përpara se ai të bëhej publik për fansat.

Organizatorët shprehen të entuziazmuar për këtë bashkëpunim, duke theksuar se festivali vazhdon të sjellë emra të mëdhenj të skenës botërore në kryeqytetin e Kosovës.

“Shihemi këtë verë në Prishtinë”, thuhet në njoftim.

Në Irlandë ka ekzistuar festivali i veçantë “Irish Redhead Convention”, i cili mblidhte çdo vit persona me flokë të kuq nga vende të ndryshme të botës.

Ngjarja përfshinte muzikë, aktivitete dhe gara argëtuese, me qëllim promovimin e diversitetit dhe krenarisë për këtë tipar të rrallë gjenetik.

Me kalimin e viteve, festivali u bë atraksion ndërkombëtar turistik, duke tërhequr edhe vizitorë të shumtë. Aktualisht, ai është në pauzë dhe nuk po organizohet, por mbetet i njohur si një nga eventet më unike në Irlandë.

Aktori britanik Tom Holland ka folur hapur për sfidat që i ka sjellë disleksia gjatë karrierës së tij, duke zbuluar se ka refuzuar disa herë ftesën për të prezantuar emisionin e njohur amerikan Saturday Night Live për shkak të vështirësive që ka me leximin.

Ylli i filmave të Spider-Man e bëri këtë rrëfim gjatë një interviste në podkastin “Good Hang” të Amy Poehler, ku tregoi se ideja për të lexuar kartelat udhëzuese të përdorura në emision i shkakton ankth.

“Kanë kërkuar disa herë që ta bëj, por e vërteta është se jam shumë i frikësuar. Jam shumë disleksik dhe ideja për të lexuar diçka që ndryshon vazhdimisht më tremb”, tha Holland.

Aktori 30-vjeçar pranoi gjithashtu se përballet me vështirësi edhe gjatë leximeve provë për rolet e tij, duke theksuar se shpesh përgatitet paraprakisht për të shmangur bllokadat gjatë leximit me zë të lartë.

Deklaratat e tij janë mirëpritur nga organizatat që mbështesin personat me disleksi. Kay Carter nga The Dyslexia Association e cilësoi sinqeritetin e aktorit si “të fuqishëm dhe të guximshëm”, duke shtuar se rrëfime të tilla i ndihmojnë njerëzit të ndihen të kuptuar dhe të përfaqësuar.

Edhe James Taylor nga Scope tha se fjalët e Hollandit nxjerrin në pah sfidat reale me të cilat përballen personat me vështirësi në të nxënë, veçanërisht në profesione që kërkojnë ekspozim publik.

Ndërkohë, Ashley Walker, e cila jeton me disleksi, tha se rrëfimi i aktorit është i rëndësishëm për rritjen e ndërgjegjësimit mbi këtë gjendje.

“Është frymëzuese të shohësh dikë aq të suksesshëm si Tom Holland të flasë hapur për disleksinë. Kjo tregon se, edhe pse rruga mund të jetë më e vështirë, me punë dhe përkushtim mund të arrish sukses”, u shpreh ajo.

Holland pritet të rikthehet në ekranet e mëdha më vonë gjatë këtij viti me filmin Spider-Man: Brand New Day, ku do të luajë përkrah partneres së tij, Zendaya.

Reperi amerikan A$AP Rocky ka reaguar për herë të parë publikisht lidhur me incidentin e rëndë që ndodhi në muajin mars, kur një grua dyshohet se hapi zjarr drejt shtëpisë së tij dhe të partneres së tij, Rihannas, në Beverly Hills.

Më 25 mars, autoritetet amerikane ngritën 14 akuza penale ndaj Ivanna Ortizit, përfshirë tentativë vrasjeje, 10 akuza për sulm me armë gjysmëautomatike dhe tri akuza për të shtëna ndaj një objekti banimi. Sipas prokurorisë, ajo dyshohet se më 8 mars qëlloi me një pushkë gjysmëautomatike të tipit AR-15 drejt rezidencës së çiftit.

Në një intervistë për revistën “VIBE”, A$AP Rocky e cilësoi ngjarjen si jashtëzakonisht të rëndë, duke treguar ndikimin që ajo ka pasur te familja e tij.

“Dikush tentoi të më dëmtonte mua dhe familjen time. Kjo na mori shumë nga qetësia dhe lumturia për të jetuar të lirë. Nuk dua të më merret paqja dhe gëzimi”, u shpreh artisti.

A$AP Rocky dhe Rihanna jetojnë me tre fëmijët e tyre, RZA, Riot dhe Rocki. Sipas mediave amerikane, Rihanna dhe fëmijët ndodheshin në shtëpi në momentin e të shtënave, por fatmirësisht askush nuk pësoi lëndime.

Prokurori i Qarkut të Los Anxhelosit, Nathan Hochman, dënoi ashpër incidentin, duke theksuar se përdorimi i armëve të zjarrit në zona të banuara paraqet rrezik serioz për jetën e qytetarëve.

“Hapja e zjarrit në një lagje të populluar është jashtëzakonisht e rrezikshme. Jemi mirënjohës që askush nuk u lëndua, por një dhunë e tillë e papërgjegjshme do të ndiqet penalisht”, deklaroi ai.

Nëse shpallet fajtore për të gjitha akuzat, Ortiz mund të përballet me burgim të përjetshëm.

Burime pranë çiftit kanë bërë të ditur se pas incidentit Rihanna ka forcuar masat e sigurisë dhe ka shtyrë disa angazhime profesionale. Sipas tyre, këngëtarja mbetet e tronditur nga fakti se familja e saj mund të ketë qenë në shënjestër.

“Rihanna dëgjoi të shtënat, por fillimisht nuk e kuptoi se çfarë po ndodhte. Edhe me një ekip të fortë sigurie, është e frikshme të kuptosh se diçka e tillë mund të ndodhë”, tha një burim i afërt me familjen.