Në Gjykatën Themelore në Prishtinë, në rastin ku ish-kryeshefi ekzekutiv i Korporatës Energjetike të Kosovës (KEK), Nagip Krasniqi, akuzohet për keqpërdorim të detyrës zyrtare, të hënën ka filluar dëshminë Edmond Nulleshi- në cilësinë e këshilltarit të drejtorit ekzekutiv të shërbimeve të KEK-ut.

Fillimisht, me pyetje për këtë dëshmitar po vazhdon prokurori special Dren Paca, për të vijuar më pas me palët tjera,

Krasniqi ishte deklaruar i pafajshëm në seancën fillestare të mbajtur më 8 tetor 2024. I pafajshëm ai u deklarua edhe në seancën e 3 korrikut 2025.

Aktakuza e Prokurorisë Speciale të Republikës së Kosovës e ngritur më 19 gusht 2024, akuzon Nagip Krasniqin për veprën penale “Keqpërdorimi i pozitës apo autoritetit zyrtar”.

Sipas aktakuzës të cilën e ka siguruar “Betimi për Drejtësi”, Krasniqi në cilësinë e kryeshefit të KEK-ut, duke filluar nga 15 tetori 2021 e në vazhdimësi me qëllim që operatorit ekonomik “Holding Slovenske Elektrane” SE nga Sllovenia t’ia mundësojë tregtimin e energjisë elektrike në Republikën e Kosovës në kundërshtim me Ligjin për Energjinë Elektrike dhe Ligjit për Rregullatorin e Energjisë, me dashje aprovon blerjet, nënshkruan kontrata dhe autorizon nënshkrimin e tyre si dhe konfirmon vazhdimin e tregtimit me operatorin në fjalë, ani pse ishte në dijeni se nuk mund të tregtohej energji elektrike me këtë operator derisa ai nuk licencohej apo nuk i njihej licenca nga Zyra e Rregullatorit për Energji (ZRrE).

Në aktakuzë thuhet se operatorit i mundësohet përfitimi pasuror si dhe shmangia nga pagesat tatimore në Republikën e Kosovës dhe për pasojë dëmtimin në shkallë të madhe të buxhetit të Kosovës apo në vlerë prej 531 mijë e 920 euro e 79 centë. Gjithashtu, thuhet se kjo kishte dëmtuar dhe diskriminuar operatorët tjerë ekonomikë konkurrentë që operonin në tregun e Kosovës që ishin të licencuar dhe i nënshtroheshin obligimeve tatimore. Ndërsa, dëmi material ndaj KEK-ut, thuhet se është në shkallë të madhe, përkatësisht 3 milionë e 229 mijë e 905 euro.

Nga provat e Prokurorisë, thuhet se ZRrE, KEK-ut i kishte shqiptuar dënim për shkak të shkeljeve të konstatuara në blerje të energjisë. Raporti i Zyrës së Regullatorit kishte gjetur se bazuar në legjislacionin e vendit, aktivitetet e tregtisë së energjisë mund të ushtrohen vetëm me licencë të lëshuar nga ZRrE, e që janë të regjistruara në Kosovë. Aty thuhet se aktivitetet pa licenca, mund të lejoheshin vetëm nëse operatorët kanë licencë në vendet e tyre të cilat mund të njihen në Kosovë vetëm pasi të jenë plotësuar kushtet sipas rregullores për Licencimin e Aktiviteteve të Energjisë në Kosovë.

Sipas aktakuzës, ZRrE kishte reaguar disa herë përmes shkresave dhe emailit zyrtar që KEK të veprojë në përputhje me ligjin dhe aktivitetet e tregtimit të energjisë me operatorë të palicencuar.

Tutje, thuhet se ZRrE më 19 gusht 2022, kishte monitoruar procesin e tregtimit në kohë reale dhe kishte vërejtur se pavarësisht vërejtjeve dhe kërkesave KEK kishte vazhduar të veprojë në kundërshtim me ligjin.

Grupi punues i KEK-ut, ishte pajtuar që të respektonin të gjeturat e raportit të ZRRE-së. “Pavarësisht bindjeve dhe argumenteve të cekura më lartë, KEK do të respektoj përfundimisht qëndrimet e ZRrE-së, si një institucion i thirrur për rregullim të sektorit të energjisë i emëruar nga Kuvendi i Republikës së Kosovës sipas legjislacionit në fuqi, i cili i jep ketë kompetencë. Në këtë rast, KEK do të ndërpresë tregtimin energjisë me tregtarë që nuk prezantojnë licencë apo dëshmi nga ZRrE që e dëshmojnë që nuk kanë licencë meqë janë shtjerrë të gjitha mundësitë me komunikimet që kemi pasur me ZRrE”, thuhet në aktakuzë.

Kjo përgjigje e grupit punues, sipas Prokurorisë nuk ishte dërguar e plotë. Në e-mailin e përcjellë nga Eljas Jashari, thuhet se ishin dërguar vetëm komentet mospajtuese që kundërshtonin të gjeturat e ZRrE-së, duke konsideruar se nuk kishin nevojë për licenca shtesë, meqë të njëjtat ishin të licencuara në shtetet e tyre.

“Sipas përgjigjes së lartcekur rezulton se ZRrE-së nuk i ishin përcjellë qëndrimet e grupit punues të KEK, por qëndrimi personal i Nagip Krasniqit”, thuhet në aktakuzë.

Tutje, thuhet se edhe nga opinioni i zyrës ligjore të KEK-ut, ku në ‘cc’ ishte edhe vetë i pandehuri Krasniqi, i kishte dhënë të drejtë ZRrE-së, duke e vënë në dijeni të akuzuarin Krasniqi që duhet të respektohet rregullatori pasi është autoriteti shtetëror që ka kompetencë për këtë fushë. Madje, sipas këtij opinioni edhe kur KEK-ka dërguar rastet në Gjykatë, ZRrE ka fituar rastet dhe kërkesëpaditë e tyte janë refuzuar, pasi kompetenca e tyre është përfundimtare për çështjet e energjisë elektrike.

Nagip Krasniqit, sipas aktakuzës i ishte dërguar edhe një e-mail nga Departamenti i Menaxhimit të Tregtimit me Energjinë duke kërkuar nga Krasniqi konfirmimin nëse duhej tregtuar me operatorin “HSE”, duke theksuar se nga përgjigja dërguar ZRrE-se, nënkuptohej se duhej të vazhdohej tregtimi.

I akuzuari Krasniqi ishte përgjigjur “konfirmoj vazhdimin e tregtimit sipas përgjigjes që i është dërguar ZRrE-së”. Si pasojë e kësaj, tregtimi me ketë operator të palicencuar kishte vazhduar deri në pezullimin dhe ndërprerjen përfundimtare të kontratës në maj 2023, përkatësisht gusht 2023.

Me konfirmimin që drejtori operativ, Luigj Imeri kishte kërkuar nga kryeshefi Krasniqi, në këtë korrespodencës, sipas Prokurorisë thuhet se pas përgjigjes së Krasniqit, Anjeta Zeqiri dhe Besa Shatri ishin tallur.

“Hahaha ja ke prish tripat”, “Ej qetu Luigji ka pas me dhanë dorëheqje…i paska ra pishman”, ishin replikat në ketë e-mail zyrtar.

Operatori nga Sllovenia thuhet se nuk ishte në listën e kompanive të licencuara e sipas ARBK-së, as e regjistruar si biznes në Kosovë.

Tutje, në aktakuzë bëhet e ditur se pas shkresës se KEK-ut të 7 gushtit 2023, vërtetohet se pas arrestimit të Nagip Krasniqit (për çështje që nuk ndërlidhen me këtë rast), KEK më 19 maj 2023 fillimisht kishte njoftuar “HSE” se po e pezullonte bashkëpunimin për ta njoftuar me vonë se po e shkëpusin kontratën në mungesë të licencës se lëshuar nga ZRRE, duke e njoftuar se në momentin që “HSE” dëshmon posedimin e licencës të lëshuar ose të njohur nga ZRRE, atëherë KEK mund të iniciojë procesin e nënshkrimit të një kontrate të re./BetimipërDrejtësi

Në një letër drejtuar Presidentes së Komisionit Evropian, Ursula von der Leyen, kreu i Partisë Demokratike të Kosovës (PDK), Bedri Hamza, ka kërkuar heqjen urgjente dhe pa kushte të masave të Bashkimit Evropian ndaj Kosovës. Ai argumenton se vendi ka përmbushur çdo standard demokratik dhe ka bërë sakrifica të mëdha në përpjekjet e tij për integrim evropian.

Hamza rikujton se Kosova ka zhvilluar tri palë zgjedhje brenda një viti, të cilat, sipas tij, kanë qenë “plotësisht demokratike, transparente dhe të qeta”, pavarësisht ngërçit të mëvonshëm politik për formimin e qeverisë. Ai thotë se këto procese dëshmojnë “pjekurinë politike” të vendit dhe se vazhdimi i masave të BE-së është bërë “i paarsyeshëm dhe i padrejtë”.

Në letrën e tij, kryetari i PDK-së i kujton institucioneve evropiane edhe përgjegjësitë e mëdha që ka marrë përsipër Kosova në arenën ndërkombëtare, përfshirë krijimin e Dhomave të Specializuara. Sipas Hamzës, ky ishte një detyrim që u vendos në mënyrë të njëanshme mbi Kosovën dhe që, siç thekson ai, “është shndërruar në një mekanizëm me karakter monoetnik”, duke theksuar se deri tani kanë qenë të gjykuar vetëm drejtues të brezit themelues të shtetit.

Hamza thekson se Kosova ka paguar “një çmim tejet të lartë” për lirinë, shtetndërtimin dhe konsolidimin e një republike demokratike që respekton angazhimet ndërkombëtare. Prandaj, ai kërkon nga BE-ja që ta trajtojë Kosovën me të njëjtat standarde si vendet e tjera të rajonit dhe të mos e privojë më nga “mjetet dhe mbështetja e domosdoshme” për rrugëtimin drejt BE-së dhe NATO-s.

Në përmbyllje, Hamza lëshon një thirrje të hapur politike: “Kërkoj heqjen e menjëhershme dhe të pakushtëzuar të të gjitha masave të BE-së ndaj Kosovës”, duke theksuar se një vendim i tillë do të përbënte një mesazh të qartë për qytetarët se përpjekjet e tyre demokratike po vlerësohen dhe mbështeten.

Luciano Spalletti pranoi se Juventusi reagoi më mirë në lojë vetëm pasi Jonathan David u fut në pjesën e parë dhe Yildiz u rikthye në pozicionin e tij natyral në krahun e majtë ku theksoi se pasimet e gabuara dhe balanca e dobët në fazën mbrojtëse e lanë ekipin të ekspozuar në disa momente.

Në mesin e analizës, Spalletti u ndal posaçërisht te Edon Zhegrova, një nga lojtarët që zakonisht sjell shpërthim në të tretën e fundit të fushës.

Ai e quajti kosovarin “shkatërrues” në zonat kreative, por zbuloi se gjendja fizike nuk e kishte lejuar të ishte në maksimum këtë javë.

“Edon Zhegrova është shkatërrues në të tretën e fundit, por ai pati dhimbje në stërvitje dhe do t’i duhet kohë që të kthehet në formë”, tha Spalletti, duke lënë të kuptohet se mungesa e tij në 100% ndikoi në mënyrën si u përball Juventusi me presionin e Napolit.

Trajneri theksoi se ekipi po vuan për të shënuar gola, por sipas tij problemet nuk ndodhen vetëm tek sulmuesit. Ai nënvizoi se lëvizjet në të gjithë fushën duhen përmirësuar, jo vetëm në pasimin e fundit apo në rastet para portës, duke kërkuar më shumë kohezion dhe qartësi lojtarësh në fazën organizative./S.K/KP/

Fushata zgjedhore për zgjedhjet parlamentare të 28 dhjetorit po hyn në një fazë të re, pasi të gjitha partitë kryesore politike në vend kanë publikuar listat e tyre të plota me nga 110 kandidatë për deputetë. Prezantimi i këtyre listave shënon edhe zyrtarisht nisjen e garës së brendshme për votën qytetare dhe përfaqësimin në legjislaturën e re të Kuvendit të Kosovës.

Kryetari i PDK-së, Bedri Hamza, prezantoi listën me 110 kandidatë, ku dhjetëshja e parë kryesohet pikërisht nga ai.

Në mesin e dhjetë kandidatëve të parë renditen figura me peshë politike dhe profesionale, si Uran Ismaili, Vlora Çitaku, Enver Hoxhaj, Arben Mustafa, Besa Kabashi Ramaj, Rrahman Rama, Eman Rrahmani, Sala Jashari dhe Kujtim Gashi.

Parti Demokratike e Kosovës në këto zgjedhje garon në fletëvotim me numrin 130.

Edhe Lidhja Demokratike e Kosovës (LDK) ka publikuar listën e saj të kandidatëve, e cila udhëhiqet nga kryetari i kësaj partie, Lumir Abdixhiku. Në top-10 gjenden emra të njohur të politikës dhe akademisë, si Kujtim Shala, Hykmete Bajrami, Doarsa Kica-Xhelili, Lutfi Haziri, Avdullah Hoti, Anton Quni, Jehona Lushaku Sadriu, Ferid Agani dhe Ukë Rugova.

Abdixhiku e cilësoi listën si një “kombinim përvoje, profesionalizmi dhe energjie të re”, duke e quajtur atë “listën e shpresës” për Kosovën.

AAK garon me listë të kryesuar nga Ramush Haradinaj, ndërsa në dhjetëshen e parë përfshihen emra si Besnik Tahiri, Time Kadrijaj, Bekë Berisha, Arber Tolaj, Albania Bytyqi, Pal Lekaj, Gani Dreshaj dhe Agim Çeku.

Haradinaj u shpreh se Kosovës i duhen “përfaqësues të guximshëm”, duke siguruar se secili kandidat në listë ka peshë të barabartë për votuesit.

Kryeministri në detyrë, Albin Kurti, prezantoi listën e Lëvizjes Vetëvendosje, të përbërë edhe nga kandidatët e Guxo, Alternativa dhe PSHDK. Dhjetëshja e parë përfshin figura qeveritare dhe partiake të profilit të lartë, si Glauk Konjufca, Donika Gërvalla, Avni Dehari, Albulena Haxhiu, Hekuran Murati, Xhelal Sveçla, Mimoza Kusari Lila, Hajrulla Çeku dhe Shqipe Mehmeti Selimi.

LVV garon në fletëvotim me numrin 116.

Kryetari Fatmir Limaj publikoi listën zgjedhore ku ai kryeson, të ndjekur nga Xhevahire Izmaku, Arbëreshë Krasniqi, Mevludin Krasniqi, Endrit Shala, Albulena Balaj Halimaj, Artan Nimani, Çerkin Dukolli, Jehona Rrafshi Lumi dhe Nehat Mustafa.

NISMA  në këto zgjedhje garon me numrin 122, ndërsa Limaj e quajti listën “bashkë drejt fitores”.

Me publikimin e listave, partitë politike i kanë hapur rrugë fazës më të nxehtë të fushatës. Ato tashmë synojnë të bindin qytetarët se përfaqësuesit e tyre ofrojnë stabilitet, reformë dhe vizion të qartë për zhvillimin e vendit.

Në ditët në vijim, fokusi do të kalojë te prezantimi i programeve, takimet me qytetarë dhe debati publik, ndërsa qytetarët do të mbeten në qendër të çdo premtimi politik që synon marrjen e votës./UBTNews