Lajmet

​“Kjo nuk është drejtësi”, Rubin shpreh kritikat për procesin gjyqësor në Hagë

Published

11 months ago

on

E përditësuar:

12:13 – Ish-ndihmëssekretari amerikan i Shtetit, James Rubin ka shprehur shqetësimin e tij për procesin gjyqësor në Hagë. “Kjo është mënyrë e pazakontë për të trajtuar një burrë-shteti i cili është dorëzuar vullnetarisht”, deklaroi Rubin në gjykatore, gjatë dëshmisë së tij në mbrojtje të ish-presidentit, Hashim Thaçi. Në ditën e dytë të dëshmisë, amerikani James Rubin ka treguar pikëpamjet për këto pesë vjet proces gjyqësor ndaj ish-krerëve të Ushtrisë Çlirimtare të Kosovës (UÇK), ku tha se e shqetëson fakti që katërshja e UÇK-së janë mbajtur kaq gjatë në paraburgim. “Kjo nuk është drejtësi”, theksoi Rubin derisa u shpreh se i ka ditur zhvillimet në UÇK, meqë i ka parë nga afër krerët e saj gjatë luftës.

Pikëpamjet e tij lidhur me këtë proces gjyqësor ai i ka treguar pas pyetjeve të prokurorit të specializuar, James Pace, i cili paraprakisht i tha se “mbrojtja e Thaçit më 25 gusht që ju nuk keni pranuar të merreni në pyetje nga ZPS”.

“Fakti që të akuzuarit janë në paraburgim në Hagë për më shumë se pesë vjet dhe fakti që ata janë dorëzuar vullnetarisht dhe fakti që janë mbajtur të ndaluar për kaq shumë gjatë më shqetëson. Mendoj që lidhet me politikën dhe me shtetin e së drejtës, dhe mua më shqetëson fakti që dikush të jetë i paraburgosur për pesë vjet përpara se të fillojë të ndiqet penalisht një cështje penale, ndërkohë që këta persona janë dorëzuar vullnetarisht dhe kanë qenë shumë bashkëpunues me gjykatën. Kështu që në rastin e të akuzuarit në fjalë, nuk e kuptoj fare se pse është dashur që të qëndrojë në burg për pesë vjet”, deklaroi Rubin në Hagë.

Ai tha se është përgatitur me qindra orë që të jetë dëshmitar i mbrojtjes dhe se “sekretarja e Albright nuk ka pasur këtë lloj drejtësie në mendje kur ka iniciuar Tribunalin Penal Ndërkombëtar për ish-Jugosllavinë”.

“Sekretarja Albright nuk ka pasur këtë lloj drejtësie në mendje kur ka iniciuar krime në ish-Tribunalit të Hagës kundër Jugosllavisë. Kështu që mua kjo më është dukur thjesht si një fajësim kolektiv për shkak të faktit se i akuzuari ka qenë udhëheqës i UÇK-së. Duke qenë se i kam parë nga afër liderët e UÇK-së nëpër male dhe nëpër bjeshkë dhe mendoj që asnjë person tjetër jashtë UÇK-së e ka pasur këtë mundësi duke pasur një ide të mirë të funksionimit të UÇK-së. Unë për tri ditë me radhë kam parë nga afër se si janë sjellur ata, se kush ishte përgjegjës, kush ishte komandanti, kush ishte mbështetës, kam pasur këtë lloj njohurie dhe duke ditur se si kanë qenë zhvillimet, unë vërtetë mendoj që kjo ka qenë e gabuar. Kjo nuk është drejtësi. Unë nuk jam jurist me profesion, megjithatë kam të drejtë të shfaq dhe të them me zë të lartë opinionit tim”, shtoi ai.

“Për orë e orë të tëra”, siç tregoi Rubin ka menduar lidhur me këtë proces, për çka tha se ka folur edhe me juristë e avokatë ndërkombëtarë, të cilët i kishin thënë se “kjo është mënyrë e pazakontë për të trajtuar një burrë shteti i cili është dorëzuar vullnetarisht”. 

“Pesë apo gjashtë vite më përpara kur kam filluar të dëgjojë për herë të parë për këtë gjykim, fillova që të shikoja formacionin, përbërjen e këtij tribunali, sepse është krijuar, kam folur me akademikë, kam folur me juristë, jam përpjekur gjithashtu që të rishikojë, shqyrtojë me aq sa di unë artikujt me shkrim, ose dokumente të cilat janë paraqitur në ekran, të cilat lehtësisht shfaqen këtu, dhe rilexova shumë nga materialet ose artikujt, jam takuar gjithashtu dhe me ekipin e mbrojtjes në Uashington, kam kaluar pesë vite duke folur, duke menduar për të, duke u përgatitur me të, mendoja nga viti në vit që do hapet gjykimi sot, do të hapet nesër, ndërkohë që vitet kalonin asgjë nuk ndodhi për shumë vite. Për shumë vite kam menduar për të, kam lexuar për të, kam vrarë mendjen sepse u deshën pesë vite për të krijuar një çështje të tillë, ndërkohë që aktakuza është ngritur pesë vite më përpara. Nuk e kuptoja gjithë këtë dhe kam pyetur njerëzit e kësaj fushe, kësaj lëmie, ju kam thënë nëse një gjë e tillë ishte normale apo jo. Kam folur me juristë dhe me avokatë me emër ndërkombëtarë që më kanë thënë që kjo është mënyrë e pazakontë për të trajtuar një burrë shteti i cili është dorëzuar vullnetarisht. Dhe në juridiksionin e një gjykate që e ka krijuar vet kur ishte kryeministër dhe për të treguar liderëve evropianë që kishte dëshirë vendi që të bëhej pjesë e BE-së, ndërkohë që ky burrë shteti mbahet i ndaluar për pesë vite përpara se sa çështja të ishte gati”, u shpreh ai nga banka e dëshmitarit.

Këto deklarata James Rubin i ka bërë gjatë ditës së dytë të dëshmisë në Dhomat e Specializuara në Hagë, ku ka treguar se fillimisht Shtetet e Bashkuara të Amerikës e kishin përshkruar UÇK-në si terroriste, por që kjo ka ndryshuar “derisa e kuptuam situatën më mirë”.

“Ndoshta ne shkelëm dëshirën që të ishim në anën e engjëjve gjithmonë, sepse për një periudhë të caktuar kohore derisa e kuptuam më mirë situatën, ne fillimisht e përshkruam UÇK-në si organizatë që zhvillonte aktivitete terroriste dhe ne sigurisht me gjithë dëshirën që kishim të ishim në anën e engjëjve, ne nuk donim që të vidheshim apo të mbështesnim që zhvillojnë apo bëjnë aktivitete terroriste. Ky qëndrim pastaj ndryshoi me kalimin e kohës, veçanërisht pasi UÇK u pajtua me marrëveshjen e Rambujesë, dhe pastaj e konsideruam atë që ishin në anën e engjëjve sepse nënshkruan marrëveshjen e paqes”, u shpreh ai.

Në ditën e dytë të dëshmisë, James Rubin po shoqërohet nga një përfaqësuese e Shteteve të Bashkuara të Amerikës.

Gjatë pyetjeve të prokurorit të specializuar, James Pace, Rubin tha se Shtetet e Bashkuara të Amerikës nuk kanë arritur të vërtetojnë pretendimet për krime lufte të pjesëtarëve të Ushtrisë Çlirimtare të Kosovës.

Në Dhomat e Specializuara në Hagë, Rubin u pyet edhe për një raport të Organizatës së Kombeve të Bashkuara (OKB) të vitit 1998, ku thuhej se “fati i shumë serbëve, shqiptarëve të Kosovës, romëve si dhe oficerëve të policisë serbe që janë rrëmbyer nga shqiptarë të Kosovës, që besohet se i përkasin UÇK-së është i panjohur”.

“Kam lexuar një raport të OKB-së për Kosovën, por kam qenë shumë skeptik për atë raport sepse organet e OKB-së nuk e kanë përshkruar shumë mirë situatën shumë shpesh. Kam qenë në dijeni të raportimit prej OKB-së, por jo domosdoshmërisht ka qenë i besueshëm raporti. Raporti i Kryqit të Kuq ndërkombëtar zakonisht në fakt i konsideroja si më të besueshme”, deklaroi ai.

Amerikani James Rubin tha se ka pasur njohuri për diskutimet në UÇK, por jo edhe para Rambujesë. Gjatë pyetjeve të prokurorit Pace, dëshmitari i mbrojtjes ka treguar nëse ka qenë pjesë e takimeve të mbyllura që mbaheshin mes komandantëve të UÇK-së.

Pace: Gjatë bisedimeve për marrëveshje ka patur takime ndonjëherë të gjata në mes të udhëheqësve të UÇK-së, komandantëve, në mungesë tuajën, pa praninë tuaj?

Rubin: Po.

Pace: Dhe gjatë këtyre bisedimeve ju nuk keni marrë pjesë në këto takime të mbyllura që mbaheshin mes komandantëve të UÇK-së?

Rubin: Nuk jam i sigurt që nuk kam qenë në atë zonë, por nuk flisja shqip, ata mund të kenë biseduar gjëra që nuk i kam kuptuar. Por, nuk është që më kanë ndaluar që unë të isha në këtë dhomë, në këtë sallë ku mbaheshin mbledhje apo takime. Ka qenë një sallë e madhe në këtë ndërtesë dhe gjërat kanë ndodhur në forma të ndryshme. Është e mundur që mund të kem qenë në afërsi të dhomës, ndërkohë që janë diskutuar gjëra”, u përgjigj Rubin.

Në ditën e dytë të dëshmisë, dëshmitari i mbrojtjes tregoi nëse gjatë kohës së luftës kishte takuar Jakup Krasniqin, e Kadri Veselin si pjesë të delegacionit të Rambujesë.

Pace: A e keni takuar apo patur një kontakt me Kadri Veselin përpara shkurtit 1999?

Rubin: Për të qenë i sinqert, nuk më kujtohet ky individ, nuk mund t’i përgjigjem pyetjes.

Pace: Kadri Veseli ka qenë pjesë e delegacionit të UÇK-së në Rambuje, nuk ka qenë pjesë por ka qenë i pranishëm aty, a është saktë?

Rubin: Nuk e di.

Pace: Deklarata juaj nuk përmend në mënyrë specifike Rexhep Selimin, a është kështu?

Rubin: Kështu është, nuk mendoj që e përmend.

Pace: A e keni takuar apo keni pasur një kontakt me Rexhep Selimin?

Rubin: Është shumë e mundur që po, kam takuar shumë shumë komandantë të UÇK-së gjatë viteve, por nuk më kujtohen gjithmonë emrat sepse kjo ka ndodhur para 25 vitesh”, ka shtuar Rubin.

Prokurori i specializuar, James Pace ka thënë se i duhen një orë e gjysmë kohë për të përfunduar pyetjet për James Rubin.

Në dëshminë e tij, James Rubin të hënën kujtoi takimet me ish-presidentin e Kosovës, derisa hodhi poshtë pretendimet se Hashim Thaçi, Jakup Krasniqi e drejtues të tjerë të UÇK-së kanë ekzekutuar apo vrarë njerëz.

Paraprakisht, në pyetjet e avokates së Jakup Krasniqit, Venketasëari Alagenda, Rubin tha se serbët janë përpjekur të fajësojnë gjithmonë UÇK-në.

James Rubin është dëshmitari i parë i mbrojtjes së Thaçit e cila ka paraparë që në gjykatore t’i sjell rreth 11 dëshmitarë. Më pas, procesi gjyqësor do të vazhdojë me dëshmitarët e thirrur nga mbrojtja e ish-kryetarit të Kuvendit të Kosovës, Jakup Krasniqi./D.B/KP

11:04 – Në Dhomat e Specializuara në Hagë po vazhdon dëshmia e James Rubin, i cili gjatë luftës në Kosovë ishte ndihmëssekretar amerikan i Shtetit. Dëshmia e tij është në mbrojtje të ish-presidentit të Kosovës, Hashim Thaçi.

Dëshmia e tij po vazhdon me pyetjet e Zyrës së Prokurorit të Specializuar.

Në ditën e dytë të dëshmisë, James Rubin po shoqërohet nga një përfaqësuese e Shteteve të Bashkuara të Amerikës.

Dëshmitari i mbrojtjes, James Rubin tha se “derisa e kuptuan situatën më mirë”, Shtetet e Bashkaura të Amerikës e përshklruanin UÇK-në si “organizatë që zhvillonte aktivitete terroriste”.

“Ndoshta ne shkelëm dëshirën që të ishim në anën e engjëjve gjithmonë, sepse për një periudhë të caktuar kohore derisa e kuptuam më mirë situatën, ne fillimisht e përshkruam UÇK-në si organizatë që zhvillonte aktivitete terroriste dhe ne sigurisht me gjithë dëshirën që kishim të ishim në anën e engjëjve, ne nuk donim që të vidheshim apo të mbështesnim që zhvillojnë apo bëjnë aktivitete terroriste. Ky qëndrim pastaj ndryshoj me kalimin e kohës, veçanërisht pasi UÇK u pajtua me marrëveshjen e Rambujesë, dhe pastaj e konsideruam atë që ishin në anën e engjëjve sepse nënshkruan marrëveshjen e paqes”, u shpreh ai.

Dëshmia e tij po vazhdon me pyetjet e prokurorit të specializuar, James Pace.

Në dëshminë e tij, James Rubin të hënën kujtoi takimet me ish-presidentin e Kosovës, derisa hodhi poshtë pretendimet se Hashim Thaçi, Jakup Krasniqi e drejtues të tjerë të UÇK-së kanë ekzekutuar apo vrarë njerëz.

Paraprakisht, në pyetjet e avokates së Jakup Krasniqit, Venketasëari Alagenda, Rubin tha se serbët janë përpjekur të fajësojnë gjithmonë UÇK-në.

James Rubin është dëshmitari i parë i mbrojtjes së Thaçit e cila ka paraparë që në gjykatore t’i sjell rreth 11 dëshmitarë. Më pas, procesi gjyqësor do të vazhdojë me dëshmitarët e thirrur nga mbrojtja e ish-kryetarit të Kuvendit të Kosovës, Jakup Krasniqi.D.B/KP

10:45

Ish-ndihmësi i sekretarit amerikan të Shtetit, James Rubin, po vazhdon dëshminë e tij në Dhomat e Specializuara të Kosovës në Hagë, si dëshmitar i ftuar nga ekipi i mbrojtjes së Hashim Thaçit, ish-udhëheqës politik i UÇK-së.

Rubin u pyet nga ekipi i Prokurorisë rreth pretendimeve se Ushtria Çlirimtare e Kosovës ishte përfshirë në veprimtari kriminale dhe vrasje.

Në përgjigjen e tij, ai theksoi se Shtetet e Bashkuara kishin shqyrtuar këto akuza, por nuk kishin arritur t’i vërtetonin

“Ka patur pretendime dhe akuza për një vit, ne shikuam ato nuk arritëm t’i vërtetonim. Mendoj që po ata ishin një forcë qe duhej të merreshin parasysh dhe në konsideratë në terren dhe ne donim të krijonim një Kosovë më afatgjate, të kishim shkëmbime dhe të punonim me z. Thaçi”, deklaroi Rubin.

Në vijim, prokurori i çështjes e pyeti nëse është e saktë që në vitet 1998 dhe 1999 mediat ndërkombëtare dhe organizatat tjera kishin publikuar raporte me pretendime të besueshme për krimet e kryera nga pjesëtarë të UÇK-së.

Rubin iu përgjigj shkurt: “Po.”

Më tej, prokurori iu referua një dokumentari të transmetuar nga BBC, duke e pyetur Rubin nëse aty ai kishte pranuar që anëtarë të UÇK-së kishin vrarë civilë serbë me gjakftohtësi.

Në përgjigje, Rubin deklaroi:

“Më kujtohet se i dënuam veprimtaritë e UÇK-së në fazën fillestare, pasi po vriteshin civilë dhe jo ushtarë, prandaj dhe ne i dënuam këto veprimtari terroriste të UÇK-së, por me kalimin e viteve njohëm më mirë organizatën”, u shpreh Rubin./S/K/EO/

10:20

Në ditën e dytë të dëshmisë së tij në Gjykatën Speciale, James Rubin iu përgjigj pyetjeve të Prokurorisë në lidhje me një dokument ku thuhej se Adem Demaçi përshkruante Hashim Thaçin si zëdhënës të UÇK-së.

Rubin tha se nuk kishte informacione për këto dallime të vogla brenda UÇK-së.

I pyetur nëse kishte takuar Jakup Krasniqin në kohën e luftës, Rubin tha se nuk mendoj që po, teksa shtoi se nuk i kujtohet nëse Jakup Krasniqi dhe Kadri Veseli ishin pjesë e delegacionit shqiptar në Rambuje.

“Nuk më kujtohen të gjithë emrat, sepse kjo ka ndodhur para 25 vjetësh”, tha Rubin.

09:15

James Rubin, ish-ndihmësi i sekretarit amerikan të Shtetit, vazhdon sot dëshminë e tij në Gjykatën Speciale në Hagë. Dje mbrojtja nisi paraqitjen e provave në gjykimin Thaçi dhe të tjerët duke thirrur dëshmitarin e parë, në këtë rast James Rubin.

Sipas përmbledhjes së Mbrojtjes të lexuar në gjykatë, dëshmitari James Rubin ka shërbyer si Ndihmës Sekretar i Shtetit i SHBA-së për Çështjet Publike dhe Zëdhënës kryesor nga viti 1997 deri në vitin 2000.

Përfaqësues të Qeverisë së Shteteve të Bashkuara dje ishin të pranishëm në sallën e gjyqit për të shoqëruar dëshmitarin.

Gjatë dëshmisë së tij në Hagë, James Rubin tha se forcat serbe janë munduar që të mbulojnë krimet e tyre dhe janë përpjekur që ta fajësojnë UÇK-në.

“Qeveria serbe gjithmonë është përpjekur të fajësojë UÇK-në dhe kjo është në përputhje me mënyrën e veprimit të regjimit serb, mënyrë se si ka vepruar në atë kohë, kjo është mënyra se si ata janë përpjekur të justifikonin fajin tek të tjerët”, tha ai.

“Hashim Thaçi nuk ka pasur autoritet dhe as mundësi për të diktuar ndonjë gjë”, ka deklaruar në dëshminë e tij James Rubin, i cili gjatë kohës së luftës në Kosovë ka qenë ndihmëssekretar amerikan i Shtetit.

Rubin, dëshmitari i parë i mbrojtjes së Hashim Thaçit, dëshmoi për disa orë në Hagë mbi njohjen, takimet dhe komunikimet me Thaçin dhe pjesëtarë të tjerë të UÇK-së.

Sipas Rubinit, Thaçi nuk kishte as dijen, as aftësinë dhe as pushtetin për të marrë vendime, duke hedhur dyshime mbi pretendimet e prokurorisë për një strukturë të centralizuar të UÇK-së. Ai e përshkroi Thaçin si figurë politike dhe jo ushtarake.

Ish-ndihmëssekretari amerikan i shtetit, James Rubin, gjatë dëshmisë së tij në Dhomat e Specializuara në Hagë, ka mohuar se arsyeja pse Hashim Thaçi nuk e nënshkroi marrëveshjen e parë të Rambujesë lidhej me hezitimin për çarmatosjen e UÇK-së.

Rubin theksoi se pala shqiptare kërkonte garanci nga NATO për përdorimin e forcës në rast se Serbia do të vazhdonte represionin. Ai tha se Thaçi kërkonte edhe aprovimin e Adem Demaçit, i cili sipas tij kishte kundërshtuar nënshkrimin.

Në dëshminë e tij, Rubin akuzoi diplomatin amerikan Christopher Hill përanshmëri kundër UÇK-së dhe tentativë për ta dëmtuar figurën e tij dhe të sekretares Madeleine Albright.

Po ashtu, dëshmitari theksoi se nuk ka gjetur asnjë provë që Thaçi apo Jakup Krasniqi të jenë përfshirë në vrasje apo ekzekutime dhe se akuzat e tilla shpesh ishin të fabrikuara për të cenuar marrëdhënien mes Kosovës dhe ShBA-së.

Dëshmia e tij është cilësuar nga analistët në Kosovë si një sfidë ndaj akuzave të prokurorisë, duke e paraqitur UÇK-në si një strukturë të decentralizuar dhe jo si organizatë të aftë për të planifikuar krime sistematike./S.K/EO/

Related Topics:
Continue Reading

Vendi

REL: Gjenden mbetje eshtërore të tre personave në Kalludër të Zubin Potokut

Published

10 hours ago

on

August 15, 2026

By

Policia e Kosovës ka njoftuar se janë gjetur mbetje eshtërore të tre personave në fshatin Kalludër të Zubin Potokut, në një lokacion ku po zhvillohen hetime lidhur me dyshimet për krime lufte dhe varre të mundshme masive.

Sipas raportit të Policisë, mbetjet janë gjetur më 14 gusht dhe, pas ekzaminimit nga eksperti mjeko-ligjor, është konfirmuar se ato janë me prejardhje njerëzore dhe kanë interes forenzik.

“Dyshohet që janë të viktimave të luftës së fundit në Kosovë”, thuhet në raportin policor.

Gërmimet në këtë zonë janë duke u zhvilluar prej javësh në tri lokacione në Zubin Potok, përfshirë Kalludrën e Vogël dhe, pas një hetimi rreth dyvjeçar lidhur me dyshimet për krime lufte.

Më 7 gusht, Policia e Kosovës dhe Prokuroria Speciale njoftuan se mbetje mortore ishin gjetur edhe në lokacionin e tretë të dyshuar për varr masiv në këtë komunë.

Autoritetet kosovare kanë arrestuar tre persona në kuadër të hetimeve për këtë rast, ndërsa kanë thënë se njëri prej të arrestuarve dyshohet se ka qenë pjesë aktive e Armatës Jugosllave gjatë luftës në Kosovë.

Kryeministri në detyrë, Albin Kurti, ka deklaruar më herët se gërmimet mund të zgjasin me muaj, për shkak të terrenit të vështirë dhe shpërndarjes së mbetjeve njerëzore.

Kurti ka thënë gjithashtu se mbetjet e gjetura në zonën e Kalludrës së Vogël mund t’u përkasin një grupi prej 23 shqiptarëve që janë zhdukur në atë pjesë të Kosovës gjatë vitit 1999.

Autoritetet, megjithatë, kanë paralajmëruar se është ende herët për të folur për identifikimin e viktimave.

Sipas Institutit të Krimeve të Kryera Gjatë Luftës në Kosovë, 1.577 persona vazhdojnë të jenë të zhdukur nga lufta e viteve 1998-1999, ndërsa janë dokumentuar gjithsej 12.230 viktima të luftës.

Kosova ka kërkuar vazhdimisht nga Serbia bashkëpunim për zbardhjen e fatit të personave të zhdukur dhe qasje në arkivat ushtarake që mund të ndihmojnë në identifikimin e lokacioneve të varreve të mundshme./REL/

 

Continue Reading

Vendi

Sistemet e Informacionit në UBT: Nga analist i sistemeve te specialist i të dhënave

Published

11 hours ago

on

August 15, 2026

By

Rreth 170 milionë vende të reja pune pritet të krijohen në mbarë botën deri në vitin 2030, ndërsa teknologjia, inteligjenca artificiale, të dhënat dhe transformimi digjital po ndryshojnë me shpejtësi kërkesat e tregut të punës. Kështu vlerëson World Economic Forum në raportin “Future of Jobs Report 2025”, ku profesionet e lidhura me teknologjinë, të dhënat dhe inteligjencën artificiale renditen ndër ato me rritjen më të shpejtë të kërkesës.

Pikërisht në këtë realitet të ri profesional pozicionohet edhe programi Bachelor në Sistemet e Informacionit në UBT, i cili synon të përgatisë profesionistë që dinë ta lidhin teknologjinë me të dhënat, biznesin dhe nevojat e organizatave.

Programi – Sistemet e Informacionit është ndërtuar mbi një qasje që e sheh teknologjinë jo vetëm si mjet teknik, por si pjesë të rëndësishme të funksionimit dhe zhvillimit të një organizate. Sot, sistemet e informacionit janë pjesë e produkteve, shërbimeve, operacioneve dhe proceseve të menaxhimit. Ato ndihmojnë kompanitë dhe institucionet të organizojnë informacionin, të analizojnë të dhënat, të përmirësojnë proceset dhe të marrin vendime më të informuara.

Për këtë arsye, kurrikula e Sistemeve të Informacionit në UBT ndërthur disa fusha të rëndësishme. Krahas njohurive në informatikë, studentët marrin bazë në matematikë, statistika, komunikim dhe funksionet e biznesit. Kështu duke i mundësuar studentit të kuptojë jo vetëm mënyrën se si ndërtohet një sistem, por edhe problemin që ai sistem duhet të zgjidhë.

Gjatë studimeve, studentët zhvillojnë aftësi për të analizuar probleme, për të identifikuar kërkesat e nevojshme teknologjike dhe për të hartuar, zbatuar dhe vlerësuar sisteme, procese dhe programe kompjuterike. Një pjesë e rëndësishme e formimit lidhet edhe me aftësinë për të punuar në grup, për të komunikuar në mënyrë efektive dhe për të përdorur teknikat dhe mjetet që kërkohen në praktikën profesionale.

Kjo qasje lidhet drejtpërdrejt me objektivat e programit, të cilat synojnë që të diplomuarit të jenë në gjendje të aplikojnë njohuritë e informatikës dhe matematikës, të analizojnë probleme dhe të ndërtojnë zgjidhje që përmbushin objektivat e përcaktuara. Po ashtu, programi synon të zhvillojë te studentët aftësinë për të kuptuar ndikimin e teknologjisë në individë, organizata dhe shoqëri, në nivel lokal dhe global.

Një element i rëndësishëm është edhe orientimi drejt nevojave të industrisë. Kurrikula është konceptuar për të përgatitur të diplomuar që mund të hyjnë në pozitat fillestare në fushën e Sistemeve të Informacionit, por që njëkohësisht të kenë bazën e nevojshme për të ndërtuar një karrierë afatgjatë.

I diplomuari në Sisteme të Informacionit nuk kufizohet vetëm në një rol teknik. Formimi i tij e vendos në pikën ku takohen teknologjia, biznesi, të dhënat dhe menaxhimi.

Në tregun e punës, kjo mund të përkthehet në mundësi për të punuar si analist i sistemeve të informacionit, analist biznesi, specialist i teknologjisë së informacionit, administrator i sistemeve, specialist i të dhënave, koordinator i projekteve teknologjike dhe në role të tjera që kërkojnë aftësi për të analizuar dhe përmirësuar mënyrën se si organizatat përdorin teknologjinë dhe informacionin.

Kërkesa për këto aftësi po rritet edhe në tregjet ndërkombëtare. Profesionet e lidhura me sistemet, të dhënat, sigurinë e informacionit dhe zhvillimin teknologjik janë ndër ato që pritet të kenë rritje të ndjeshme gjatë viteve të ardhshme. Kjo e bën një formim të gjerë dhe të përshtatshëm me zhvillimet teknologjike veçanërisht të rëndësishëm për të rinjtë që synojnë një karrierë në këtë sektor.

Programi Bachelor në Sistemet e Informacionit në UBT është ndërtuar pikërisht për këtë realitet. Në vend të një përgatitjeje të kufizuar në një teknologji të caktuar, studentët marrin një bazë të gjerë që u mundëson të përshtaten me ndryshimet e tregut dhe të vazhdojnë zhvillimin profesional edhe pas përfundimit të studimeve.

Kurrikula përfshin edhe komponentë që forcojnë aftësitë analitike dhe sasiore, përmes matematikës dhe statistikave, ndërsa kurset e komunikimit synojnë të zhvillojnë aftësinë për të komunikuar qartë dhe profesionalisht. Njohuritë nga fusha e biznesit u japin studentëve mundësinë të kuptojnë proceset, ekonominë dhe funksionet që qëndrojnë pas organizatave ku teknologjia zbatohet.

Kështu, studenti nuk përgatitet vetëm për të punuar me një sistem, por për të kuptuar të gjithë mjedisin në të cilin ai sistem funksionon.

Në një treg pune ku ndryshimi teknologjik është bërë pjesë e përditshmërisë, një nga aftësitë më të rëndësishme është edhe gatishmëria për të mësuar vazhdimisht. Programi synon pikërisht këtë: të krijojë profesionistë me bazë të fortë akademike dhe praktike, por edhe me aftësi për t’u zhvilluar më tej gjatë karrierës.

Sistemet e Informacionit, në këtë kuptim, ofrojnë një profil që shkon përtej idesë tradicionale të një profesioni vetëm në teknologji. Është një fushë ku njohuritë teknike kombinohen me analizën, komunikimin dhe kuptimin e biznesit.

Për studentët që duan të hyjnë në botën e teknologjisë, por dëshirojnë një profil më të gjerë dhe më fleksibil, Bachelor-i në Sistemet e Informacionit në UBT ofron një rrugë që mund t’i çojë nga auditorët drejt roleve ku teknologjia përdoret për të zgjidhur probleme reale dhe për të krijuar vlerë në organizata.

Continue Reading

Lajmet

Ditari: Lajmet kryesore që shënuan datën 15 gusht 1993-1998?

Published

11 hours ago

on

August 15, 2026

By

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Në komunën e Istogut u vendosën deri tash 227 refugjatë serbë

 15 gusht 1994

Represioni në Kosovë

Prishtinë: – Pardje (13 gusht) policia bastisi shtëpinë e Nijazi Gashit në Kodër të Diellit me pretekst se ai ka një telefon mobil. Pasi i urdhëroi çmontimin e antenës për telefon, policia bastisi shtëpinë dhe gjeti një sasi librash për shkollat fillore të Republikës së Kosovës. Gjoja për t’i kontrolluar këto, policia thirri në ndihmë agjentë serbë, të cilët shkuan në shtëpinë e Nijaziut dhe kontrolluan deri në detaje shtëpinë. Ata e kërcënuan në fund kryezotin se nuk bën të mungojë asnjë libër.

Më 14 gusht një patrullë e policisë serbe, e prirë nga polici i njohur për të keq, me ofiqin Rambo trokiti në disa shtëpi në lagjen “Velania” në Prishtinë. Policët u kërkonin njerëzve letërnjoftimet, me pretekst se gjoja po kërkonin të rinj për t’i dërguar në ushtri, apo personat e dënuar për vjedhje.

Kjo patrullë hyri edhe në shtëpinë e Ismajl Sopit, kryetar i Komisionit për Informim i Degës III të LDK-së në Prishtinë.

Pejë: – Në bazë të thirrjes së policisë, në qendrën e policisë serbe në Pejë më 11 gusht u paraqit Qazim Metë Kastrati nga fshati Dobërdol. Në stacion i thanë atij se duhet të dorëzojë një armë.

Në shtëpinë e tij në fshatin Jabllanicë e Vogël, më 11 gusht, u mor nga policia Zymer Rexhaj, i punësuar i përkohshëm në botën e jashtme. Në stacionin e policisë në Pejë atë e mbajtën tri orë dhe e liruan me kusht që të paraqitet sërish të nesërmen në polici, prandaj ia morën peng pasaportën. Policia i tha atij se duhet të dorëzonte një armë. Të nesërmen kur shkoi në polici, përgjegjësit serbë i dhanë urdhër që të largohet nga Kosova me gruan dhe fëmijët e tij deri të nesërmen në orën 6 të mëngjesit. Nga frika se do ta pësojë keq, Zymer Rexhaj u largua me të shpejtë nga Kosova.

Avni Berisha (21) nga fshati Kliçinë u rrah nga polici i stacionit të policisë në këtë fshat, i quajtur Dejan. Avniu u rrah pa kurrfarë shkasi derisa po bartte zhavor nga Bistrica në fshatin e tij.

Më 12 gusht policia serbe rrahu Avdyl Nimon Gashin (1933) nga fshati Broliq, i cili kur u sulmua nga policia, po ruante lopët e tij. Nga goditjet ai ka marrë plagë të rënda dhe ka kërkuar ndihmën mjekësore në spital në Pejë.

Mitrovicë: – Më 12 gusht, në orën 11,30, tre policë serbë rrahën në fshatin Shipol të Mitrovicës pa kurrfarë shkasi Hasan Alidemajn (27), Bedri Osmanin dhe Vesel Habibin. Policia kërkoi nga këta që ta tregojnë shtëpinë e Skënder Çitakut. Në përgjigjen se këta nuk dinin ku është shtëpia e z.Çitakut, policia i goditi me grushta e me shqelma. Pasi doli në derë të shtëpisë së vet, policia rrahu edhe Bedri Osmanin. Në këtë rrëmujë nga shtëpia e tij doli një fëmijë tetëvjeçar dhe prej frikës ai iku në oborrin e Vesel Habibit. Policia e ndoqi atë fëmijë pas. Policia pasi hyri në oborrin e Veselit e rrahu edhe atë.

Malishevë: – Musë Toplana me të birin Dalipin, kusheririn Halilin dhe Ramiz Gashin nga Kieva, me pretekst të kërkimit të armëve, u ftuan dhe u keqtrajtuan në stacionin e policisë serbe në Kievë nga e mërkura e kaluar deri më sot.

Më 11 gusht me pretekst të kërkimit të armëve u bastis edhe familja e Fejzë Lacajt në fshatin Lladroviq. Prej tij kërkohej një revole, me të cilën, thoshin policët, Fejza ka shtënë në ajër një ditë më parë. Policia rrahu djalin e Fejzës, Shaban Lacajn (23). Policia e mori atë në shtëpi dhe e dërgoi në pyll larg fshatit ku e rrahu dhe e maltretoi gjatë. Pas një kohe atë e kthyen në shtëpi dhe e kërkuan vëllanë e tij Bajramin. Për shkak se kryezoti i familjes nuk gjendej në shtëpi, policët bashkë me Shabanin shkuan në Malishevë dhe pasi e takuan Fejzën në afërsi të Bellanicës, e morën atë dhe e rrahën rëndë në stacionin e policisë në Suharekë.

Njoftohet se kësaj familjeje policia ua mori në oborr traktorin dhe ca gjësende të tjera dhe ua mbylli furrën e gëlçeres së djegur, pasi Fejza e ushtron këtë zeje.

Të shtunën, policia serbe e Kievës kërkoi Halit Hotin në shtëpinë e tij në Carrallukë. Njoftohet se policia e kërkoi atë për shkak të një telefoni mobil që e ka Halili qe disa vite me leje përkatëse. Antena dhe aparati telefonik u morën dhe u dërguan nga policët në stacionin e policisë.

Vushtrri: – Më 7 gusht një patrullë e policisë serbe, me pretekst të kërkimit të armëve, shkoi në familjen e Rexhep Bajramit dhe Aziz Imerit në fshatin Liçej. Policia rrahu Rexhepin (74), djalin e tij Eminin dhe Azizin e djalin e tij Sabriun.

Më 11 gusht policia serbe arrestoi Sylë Sylën në fshatin Beçuk, me pretekst se gjoja ai ka bërë falsifikimin e regjistrimit të makinës.

Njoftohet se Sylë Syla punon në Zvicër qe 20 vjet.

 

15 gusht 1995

Në komunën e Istogut u vendosën deri tash 227 refugjatë serbë

Sot, në qendrën për rehabilitim në Banjë të Pejës të komunës së Istogut u vendosën edhe 50 refugjatë serbë të ardhur nga Knini, njofton Komisioni për Informim i Degës së LDK-së në Istog.

Vlen të theksohet se 55 refugjatët serbë nuk janë vendosur dje në lokalet e hotelit “Gërmeç”, por në SHNK në Gjurakoc.

Njoftohet se deri tash në komunën e Istogut janë vendosur gjithsej 227 refugjatë serbë të ardhur nga Kroacia.

 

 15 gusht 1997

Ushtria serbe maltretoi rëndë 12 shqiptarë

 “Bujku” i sotëm, duke iu referuar Komisionit për Informim të Degës së LDK-së në Shtërpcë, njofton se më 11 gusht, rreth orës 15, derisa ktheheshin pas mbledhjes së boronicave në bjeshkët e Sharrit, në afërsi të fshatit Blutinë e Epërme e Prizrenit, nga ushtarët serbë u ndaluan dhe u maltretuan rëndë Ahmet Bajrami, Myftar Syla, Sefer Muharremi, Rasim Selmani, Florim Selmani, Basri Muharremi, Njazi Muharremi, Besim Tahiri, Avni Muharremi, Bujar Muharremi të gjithë këta nga fshati Viçaj dhe Nexhat Arifi e Razim Arifi nga fshati Firajë.

Këta të rinj u ndaluan në afërsi të Blutinës, që është shumë larg nga karakolla e ushtrisë dhe sapo u nxorrën nga fshati ku u maltretuan rreth dy orë.

Më pas, këta të rinj u dërguan në Karakoll ku kundër tyre vazhduan maltretimet e rënda fizike e psikike.

Ushtarët kishin lënë në tavolina revole, automatikë e litarë dhe duke iu kërcënuar me cinizëm u thoshin: “zgjidhni armët me të cilat do ta vrani veten”.

Megjithatë, momentet më të rënda e më shqetësuese për ta ishin kur u shkaktohej maltretimi me rrymë, malterim ky që zgjaste edhe mbi një gjysëm ore.

E gjithë jo zgjati deri në orën 22, kur 12 shqiptarët filloi t’i marrë në pyetje një rreshter i klasës së parë, i cili, sipas dëshmitarëve, ishte i përkatësisë myslimane. Edhe sjelljet e hetimet e tij ishin të njëjta e të rënda. Rreth orës 22,45 minuta në karakoll paraqitet Sami Selmani, babai i Rasimit e Florimit, i cili më parë duke i kërkuar bijtë e të rinjtë e tjerë, rastin e kishte paraqitur në stacionin e milicisë në Sreckë të Shtërpcës dhe pastaj në mungesë të informatave ishte nisur për në karakoll. Pas bisedës së tij me rreshterin, 12 të rinjtë u liruan, por atyre ushtria serbe ua ndali letërnjoftimet dhe i urdhëroi që sërish të nesërmen të paraqiten në të njëjtin vend.

Por, as të nesërmen atyre nuk iu kthyen letërnjoftimet. Më vonë

Sami Selmani rastin e paraqiti në kazermën e ushtrisë serbe në Prizren, ku nga komandanti i kazermës së ushtrisë serbe mori përgjigje se ky rast nuk është lajmëruar. Ky komandant pastaj me disa ushtarakë të tjerë shkoi në karakoll dhe këtyre personave ua ktheu letërnjoftimet, thuhet në njoftim.

 

15 gusht 1998

Sulm masiv serb mbi fshatrat bri rrugës Pejë – Deçan

Janë sulmuar fshatrat e Deçanit: Isniq, Lëbushë, Strellc, Prapaçan, Dubovik e Krushec si edhe fshatrat Loxhë e Raushiq afër Pejës. – Deri më tash pesë civilë të vrarë. – Mbi 50. 000 shqiptarë, shumica prej tyre refugjatë, po mbahen në rrethim në fshatrat e sulmuara

Në orët e hershme të mëngjesit forcat serbe kanë filluar sot një sulm masiv kundër fshatrave bri rrugës Deçan – Pejë. Në këtë sulm po marrin pjesë 46 tankse, katër aeroplanë, tetë helikopterë, 20 kamionë e forca të tjera.

Bashkëpunëtori i QIK-ut nga rrethinat e Deçanit, burime të KMDLNJ-së në Pejë dhe dëshmitarë të ndryshëm të fshatrave të Deçanit i thanë sot QIK-ut se pas sistemimit të forcave mëdha serbe gjatë natës, sot në orën 6:00 ka filluar sulm masiv kundër fshatrave Loxhë e Raushiq, të komunës së Pejës, dhe mbi fshatrat e Deçanit: Isniq, Lëbushë, Strellc, Prapaçan, Dubovik, Krushec e tjerë.

KMDLNJ nga Peja njoftoi se sulmi mbi fshatin Loxhë filloi në orën 6:00 me hedhjen e nga një bombe nga katër aroplanë të tipit “Orao”. Pastaj ka vazhduar granatimi nga bazat ushtarake në Zagërmë dhe nga baza e instaluar në fshatin Gorazhdec. Prej orës 6:00 deri në 8:15 kanë rënë së paku 200 granata në fshat. Nga fshati po del tym e flakë, ndërsa deri tash nuk dihet për viktima, pasi fshati është i bllokuar. Nga baza ushtarake në Zagërmë po granatohet edhe fshati Strellc, në një largësi rreth katër kilometra.

Osman Cacaj, kryetar i Komisionit për Informin në Degën e LDK-së në Deçan, i tha QIK-ut se sot në orën 6:00 nga helikopterët e autoblindat ka filluar një sul masiv mbi fshatrat e Deçanit. Deri në orën 9:00, kur po vazhdonte sulmi, dihej për pesë civilë të vrarë.

  1. Cacaj tha se se në këto fshatra gjenden rreth 60. 000 banorë të komunave të Deçanit, Pejës, Malishevës, Gjakovës.

Në emër të fëmijëve, grave e pleqve ai i bëri thirrje bashkësisë ndërkombëtare që të ndërhyjë urgjentisiht për të shpëtuar popullin e sulmuar të Deçanit e Pejës.

  1. Cacaj tha se helikopteri po fluturon vazhdimisht mbi këtë zonë, ndërsa popullsia nuk ka t’ia mbajë. Prej uikendit të javës së kaluar, kur filloi një ofensivë e fuqishme serbe në komunën e Deçanit, kjo popullsi është mbajtur në rrethim të plotë të forcave serbe.

Një dëshmitar tjetër i tha QIK-ut se po granatohen edhe fshatrat Lugut të Baranit.

 

Continue Reading

Vendi

PDK kritikon Kurtin për pjesëmarrjen në ceremoninë e kadetëve të Shërbimit Korrektues

Published

1 day ago

on

August 14, 2026

By

Deputetja e PDK-së, Besa Kabashi-Ramaj, ka kritikuar kryeministrin në detyrë, Albin Kurti, për pjesëmarrjen në ceremoninë e diplomimit të kadetëve të rinj të Shërbimit Korrektues të Kosovës.

Ajo akuzoi Kurtin se po përdor institucionet e sigurisë për të krijuar, sipas saj, një imazh të normalitetit në kohën kur vendi po përballet me krizë politike dhe institucionale.

Kabashi-Ramaj tha se uniformat dhe institucionet e sigurisë nuk duhet të përdoren për qëllime politike, duke theksuar se ato janë institucione të Republikës së Kosovës dhe jo të një partie apo individi.

Ajo i bëri thirrje Kurtit dhe Lëvizjes Vetëvendosje që të kthehen në Kuvend dhe të mundësojnë konstituimin e tij.

Deputetja e PDK-së kritikoi gjithashtu mungesën e sigurimit shëndetësor dhe jetësor për pjesëtarët e sektorit të sigurisë, duke kërkuar më shumë mbështetje për policët dhe pjesëtarët e Shërbimit Korrektues.

Kabashi-Ramaj tha se respekti ndaj pjesëtarëve të uniformuar nuk duhet të matet me ceremoni e fotografi, por me kushtet dhe trajtimin që shteti ua ofron atyre./A.K/

Continue Reading

Të kërkuara