Në përvjetorin e parë të ndarjes nga jeta të Liam Payne, motra e tij Ruth ndau një mesazh thellësisht emocional në Instagram, duke e përshkruar humbjen e vëllait si “mizore dhe pa kuptim”.

Këngëtari i njohur i grupit One Direction ndërroi jetë në tetor të vitit 2024, në moshën 31-vjeçare, pasi ra nga ballkoni i një hoteli në Argjentinë. Sipas raportit toksikologjik, në sistemin e tij u gjetën gjurmë alkooli, kokainë dhe një antidepresivi, shkruan DailyMail.

Ruth publikoi disa fotografi familjare, duke shprehur dhimbjen që e shoqëron çdo ditë: “Një vit, 12 muaj, 365 ditë… sido që ta them, mbetet e njëjta e vërtetë e dhimbshme — ti nuk je më këtu.”

Ajo tregoi se ka makthe që lidhen me momentet e fundit të Liamit dhe pranoi se ende nuk mund ta përballojë plotësisht humbjen e tij.

“E nënvlerësova pikëllimin,” shkroi ajo. “Je humbja më e madhe e jetës sime, personi që do të më mungojë çdo ditë të ardhshme.”

Motra e këngëtarit rrëfeu se djali i Liam, Bear, ka ndryshuar shumë gjatë këtij viti dhe ndien thellë mungesën e babait të tij. Ajo shtoi se përpiqet ta ndiej praninë e vëllait në detajet e vogla të përditshmërisë: “I them ‘natën e mirë’ yjeve, në rast se diku atje mund të të gjej.”

Në përfundim të homazhit, Ruth u bëri thirrje njerëzve të kujtojnë se, përtej famës dhe muzikës, Liam ishte një bir, një baba e vëlla i dashur. “Gjithmonë me dashuri, Liam — në çdo jetë,” përfundoi ajo.

Ndërkohë, fansat e këngëtarit mbajtën një ceremoni përkujtimore në Argjentinë, pranë hotelit ku ndodhi tragjedia.

Nga donacionet e mbledhura në kujtim të tij janë siguruar rreth 250 mijë funte (afërsisht 287 mijë euro) për Spitalin e Fëmijëve Great Ormond Street, duke e kthyer kujtimin e Liam Payne në një trashëgimi dashurie dhe bujarie. /A.Z/UBT News/

Këngëtarja e njohur shqiptare, Parashqevi Simaku, ka prekur ndjekësit e saj me një postim të ndjerë për djalin e saj, Luke, ku shpreh dashurinë dhe mallin e pafund për të, edhe pse janë larg.

“Luke… largësia nuk e zbeh kurrë dashurinë e një nëne. Çdo ditë të mendoj me mall dhe krenari. Edhe pse nuk je pranë, zemra ime të ndjen gjithmonë afër. Je gjithçka që një nënë mund të ëndërrojë, drita, forca dhe shpresa ime. Të dua pafund, sot dhe gjithmonë,” shkroi artistja, duke e shoqëruar mesazhin me simbole dashurie dhe zemrash.

Postimi ka marrë shumë komente pozitive nga ndjekësit, që janë prekur nga fjalët e saj e kanë vlerësuar lidhjen e fortë mes nënës dhe birit.

Dashuria e nënës, siç tregon Simaku, mbetet një forcë e pakufishme, që nuk shuhet nga largësia dhe pengesat e jetës. /A.Z/UBT News/

Ndërsa shumë prindër luftojnë për të kufizuar përdorimin e telefonave nga fëmijët, për Julia Roberts kjo ka qenë shumë më e thjeshtë me vajzën e saj, Hazel.

Aktorja 57-vjeçare tregoi për New York Times se disa vite më parë, duke parë së bashku filmin klasik të vitit 1986, “Stand By Me”, Hazel vendosi ta linte celularin mënjanë.

Hazel i tha: “Thjesht mbaje. Nuk e dua. Nëse ata djem do të kishin celularë, nuk do të flisnin me njëri-tjetrin në atë mënyrë.”

Ky moment i tregoi Roberts fuqinë e kinemasë për të nxitur lidhjen dhe bisedën mes fëmijëve.

Megjithatë, në shtëpinë e tyre ata gjithmonë kishin rregulla të thjeshta për pajisjet dixhitale: stacione karikimi ku fëmijët linin telefonat kur vinin në shtëpi dhe asnjë telefon në tavolinë gjatë vakteve, sipas Roberts. /A.Z/UBT News/

Ekipi i Britney Spears ka reaguar ndaj komenteve të ish-bashkëshortit të saj, Kevin Federline, i cili në librin e tij të ri me kujtime, You Thought You Knew, shpreh shqetësime për sjellje pas përfundimit të kujdestarisë së saj nga ekipi i udhëhequr nga babai i Spears më 2021.

“Me publikimin e librave të Kevinit, ai dhe të tjerët po përfitojnë përsëri nga kjo situatë, dhe fatkeqësisht kjo po ndodh pasi pagesat e alimentacionit kanë përfunduar. Britney fokusohet vetëm tek mirëqenia e fëmijëve të saj, Sean Preston dhe Jayden James, gjatë gjithë kësaj zhurme mediatike. Ajo ka rrëfyer historinë e saj personale në librin e vet me kujtime”, deklaroi një përfaqësues i Spears për NBC News, sipas raportimit të Today.

Ky reagim pasoi një intervistë të Federline për The New York Times. Në disa pjesë të librit të publikuara nga gazeta, ish-valltari shprehet se shumicën e informacionit për sjelljen e Spears e ka marrë nga dy djemtë e tyre, të cilët gjatë adoleshencës i kishin thënë se nuk donin të ktheheshin në shtëpin për disa arsye, duke përfshirë një rast kur ajo kishte shfaqur një thikë në dorë gjatë natës.

Federline, i cili ishte valltari i saj në skenë, thotë se nuk ka pasur komunikim me Spearsin prej vitesh.

“Nga pikëpamja ime, situata me Britney po shkon drejt diçkaje të pakthyeshme. Nuk mund të bëjmë sikur gjithçka është në rregull. Ora po troket dhe po afrohemi në minutat e fundit. Diçka e keqe mund të ndodhë nëse gjërat nuk ndryshojnë, dhe frika ime më e madhe është se djemtë tanë do të mbeten me pasojat”, shkruan ai në libër.

Federline mohoi se libri është përfitim financiar. “Si baba, jam i tmerruar se një ditë mund të zgjohem dhe djemtë e mi do të duhet të përballen me diçka të paimagjinueshme”, tha ai.

Spears dhe Federline u martuan në vitin 2004 dhe u divorcuan tre vjet më vonë. Dokumentet gjyqësore tregojnë se këngëtarja ka paguar midis 20,000 dhe 40,000 dollarë në muaj për mbështetjen financiare të dy djemve, Sean Preston (20 vjeç) dhe Jayden James (19 vjeç).

Në vitin 2021, Spears u lirua nga kujdestaria 13-vjeçare e vendosur nga babai i saj, pas një beteje ligjore. Ajo ka shkruar për eksperiencën në librin me kujtime, The Woman In Me (2023): “Gjatë kujdestarisë u ndjeva si një robot… jo thjesht robot, por një lloj fëmije-robot. Ishin aq shumë vite sa u trajtova si fëmijë dhe po humbja pjesë të vetes. Kujdestaria ma rrëmbeu femrën dhe më bëri një qenie, jo një person”.

Kujtimet e Spears po përpunohen në një film biografik nga Universal Pictures, me regjisor Jon M. Chu dhe producent Marc Platt.

Në vitin 2024, Spears e përmendi projektin në një postim në rrjetin social X: “Jam e emocionuar që po punoj për një projekt sekret me #MarcPlatt. Ai gjithmonë ka bërë filmat e mi të preferuar… qëndroni të vëmendshëm”. /A.Z/UBT News/