Talenti i Bayern Munichut, Erblin Osmani, është një nga emrat më të rinj që i është bashkuar Kombëtares së Kosovës, ndërsa vendimi i tij për të qenë pjesë e “Dardanëve” ka tërhequr vëmendjen edhe të mediave gjermane.

Gazeta prestigjioze gjermane “BILD” ka raportuar për vendimin e 17-vjeçarit, duke theksuar se Osmani, të paktën për momentin, ka zgjedhur Kosovën para Gjermanisë.

Trajneri i Kosovës, Franco Foda, e ka përfshirë Osmanin në listën e futbollistëve të grumbulluar për ndeshjet e ardhshme, duke i dhënë atij mundësinë për të bërë hapin e parë drejt përfaqësimit të Kosovës në nivel senior.

Osmani deri tani ka qenë pjesë e grupmoshave të Gjermanisë. Në janar të këtij viti, ai u paraqit në dy ndeshje miqësore me përfaqësuesen gjermane U17 ndaj Portugalisë.

“BILD” e përshkruan Osmanin si një prej talenteve të Bayern Munichut. Në mars të këtij viti, ai bëri debutimin në Bundesligë në ndeshjen ndaj Union Berlinit, në moshën 16 vjeç e 305 ditë, duke u renditur ndër lojtarët më të rinj që kanë luajtur për gjigantin bavarez.

Sipas mediumit gjerman, Osmani ka nënshkruar gjithashtu një kontratë afatgjatë me Bayern Munichun dhe aktualisht aktivizohet kryesisht me ekipet e të rinjve të klubit.

Megjithatë, “BILD” thekson se vetëm grumbullimi nga Kosova nuk e bën ende përfundimisht të pakthyeshëm vendimin e tij sa i përket së ardhmes ndërkombëtare. Pavarësisht kësaj, ftesa nga Franco Foda përbën hapin e parë konkret të Osmanit drejt përfaqësimit të Kosovës.

17-vjeçari tashmë ka mbërritur në Prishtinë dhe ka shprehur publikisht krenarinë për vendimin e tij për t’iu bashkuar Kombëtares së Kosovës.

Osmani pritet të jetë pjesë e skuadrës së “Dardanëve” në ndeshjet e ardhshme të Ligës së Kombeve.

D.L

Ish-futbollisti i Kombëtares së Shqipërisë, Taulant Xhaka, i ka dalë në mbrojtje vëllait të tij, Granit Xhakës, pas situatës së fundit që ka përfshirë mesfushorin e Zvicrës.

Përmes një postimi në Instagram, Taulant Xhaka ka kërkuar që të mos harrohen kontributet e vëllait të tij për përfaqësuesen zvicerane, duke theksuar se askush nuk është i përsosur dhe se të gjithë njerëzit mund të bëjnë gabime.

“Ju lutem, mos harroni kurrë një gjë: atë që Granit Xhaka, vëllai im, ka bërë për Zvicrën gjatë gjithë këtyre viteve. Sa zemër, pasion dhe krenari ka treguar për këtë vend dhe këtë fanellë”, ka shkruar Taulanti.

Ai iu është drejtuar edhe gazetarëve, duke theksuar se edhe ata kanë bërë gabime gjatë jetës së tyre.

“Edhe ju keni bërë gabime në jetën tuaj. Gjëja thelbësore nuk është që të mos bëni kurrë gabime, por që t’i pranoni ato dhe të mësoni prej tyre”, ka shtuar ish-reprezentuesi shqiptar.

Reagimi i Taulant Xhakës vjen pasi Granit Xhaka pranoi të hënën në mëngjes, përmes një postimi në Instagram, se kishte blerë një certifikatë vaksinimi kundër COVID-19 në vitin 2022.

Pasojat ligjore për mesfushorin pritet të përcaktohen nga gjykata në Luzern. Sipas raportimeve të “Blick”, seanca dëgjimore është planifikuar të mbahet më 6 tetor.

Ndërkohë, Granit Xhaka nuk është përfshirë në listën e lojtarëve të grumbulluar nga Zvicra për katër ndeshjet e ardhshme të Ligës së Kombeve.

D.L

Përfaqësuesja e Kosovës ka nisur dje përgatitjet për ndeshjet e radhës në kuadër të Ligës së Kombeve.

Në ditën e parë të grumbullimit, futbollistët që kishin zhvilluar ndeshje me klubet e tyre gjatë fundjavës iu nënshtruan një programi rigjenerues në palestër.

Ndërkohë, pjesa tjetër e futbollistëve zhvilloi seancën stërvitore në stadiumin “Fadil Vokrri”, duke nisur përgatitjet për sfidat e ardhshme.

Dardanët do të vazhdojnë me intensitet përgatitjet gjatë ditëve në vijim, me fokus te ndeshjet e radhës në Ligën e Kombeve.

D.L

Federata e Futbollit të Izraelit ka reaguar ashpër ndaj deklaratave të përzgjedhësit të Irlandës, Heimir Hallgrimsson, duke i cilësuar ato si “marrëzi, injorancë dhe hipokrizi”.

Përplasja verbale ka ndodhur në prag të dy ndeshjeve të Ligës së Kombeve mes Irlandës dhe Izraelit, të cilat janë shoqëruar me debate të shumta për shkak të situatës në Gaza.

Gjatë konferencës për media, Hallgrimsson u pyet se si synon ta mbajë ekipin të përqendruar te futbolli, në një kohë kur në Irlandë janë shtuar thirrjet për bojkotimin e ndeshjeve për shkak të zhvillimeve në Gaza.

Përzgjedhësi irlandez u përgjigj:

“E kam thënë tashmë, ne nuk po luajmë me gjenocidin, por kundër gjenocidit. Po luajmë kundër Izraelit, nuk po luajmë me Izraelin”.

Federata e Futbollit të Izraelit reagoi menjëherë përmes profilit të saj zyrtar në rrjetin social X, duke iu kundërpërgjigjur në mënyrë të drejtpërdrejtë trajnerit irlandez.

“Ne kemi kontribuar në botë dhe njerëzimin në shumë fusha, duke fituar një numër mbresëlënës të çmimeve Nobel”.

Në reagimin e federatës izraelite më tej thuhej:

“Fatkeqësisht, ende nuk kemi gjetur një kurë për marrëzinë, injorancën dhe hipokrizinë që tregon trajneri i kombëtares irlandeze”.

Federata vazhdoi me një tjetër deklaratë të drejtpërdrejtë ndaj Hallgrimssonit:

“Ne nuk po luajmë me injorancën, hipokrizinë dhe marrëzinë. Po luajmë kundër një trajneri që i mishëron ato”.

Dy përballjet mes Irlandës dhe Izraelit do të zhvillohen në terrene neutrale. Izraeli do të jetë nikoqir në Debrecen të Hungarisë më 27 shtator, ndërsa ndeshja e kthimit, ku Irlanda do të jetë skuadra pritëse, do të luhet në Baçka Topolë të Serbisë më 4 tetor.

Në Irlandë, prej muajsh është zhvilluar një fushatë për bojkotimin e këtyre ndeshjeve. Më shumë se 160 sportistë irlandezë kanë nënshkruar një letër të hapur, përmes së cilës u kanë bërë thirrje futbollistëve të kombëtares që të veprojnë sipas ndërgjegjes së tyre dhe të refuzojnë të luajnë.

Megjithatë, Federata Irlandeze e Futbollit (FAI) votoi në një asamble të jashtëzakonshme në korrik që ndeshjet të zhvillohen.

Hallgrimsson ka konfirmuar se disa prej futbollistëve ndihen në siklet për shkak të situatës, por ka theksuar se fakti që ata janë paraqitur në grumbullim tregon, sipas tij, një frymë të veçantë ekipore në rrethana të vështira.

D.L